PEDRO lu chalipuwana xtasama akxni xwanita pi ni xlakgapasa Jesús, xtalakaskin xliskujli xlakata xtatliwakglhpa xtakanajla. Maski chuna, Jesús xlimaklakaskimputun xlakata xkamakgtayalh amakgapitsi kstalaninanin. Wa xlakata xwaninit: «Akxni nchu wix [nataspitparaya], tliwakglh kawilikgo minatalan» (Luc. 22:32, 54-62). Pedro litaxtulh la kgantum talayaw kcongregación kxapulana siglo (Gál. 2:9). Nachuna, tiku kgolotsin xalak congregación xlitaxtukgonit max tlan nalakgatayaparakgo uma taskujut chu nalipaxuwakgo xlakata nakamatliwakglhkgo xnatalan.

Makgapitsi natalan tiku nialh makgatsikgolh tuku xtalakaskin xlakata lakgkgolotsin nalitaxtukgo chu la uku nialh lakgkgolotsin kcongregación, max makgkatsikgo pi nila makgantaxtikgolh xtaskujutkan. Julio, * tiku liwaka akgpuxam kata kgolotsin xalak congregación xwanit kSudamérica, wa: «Lu lhuwa kilhtamaku xaklimaxtu xlakata xaklaklakkaxwili taʼakgchuwin chu xakkalakgapaxialhnan natalan chu xakkamatliwakglhni xtakanajlakan. Kaj xamakgtum putum uma nialh xakkgalhi chu kmakgkatsilh pi wi tuku xkintsankgani. Lu tuwa tuku ktitaxtulh uma kilhtamaku». La uku, Julio kgolotsin xalak congregación litaxtupara.

Santiago tsokgli: «Kinatalanin kaj nalipaxuwayatit akxni mpala tu lhuwa tuwaj talakgaputsit nakgalhiyatit» (Sant. 1:2). Xla xlichuwinama tuku tuwa titaxtuyaw xlakata lakgalhinanin akinin chu xlakata kinkaputsastalanikanan. Lichuwinalh tuku akstu kinkalimakgapaxuwakanan chu talaksakpaxkin, chu na lichuwinalh atanu (Sant. 1:14; 2:1; 4:1, 2, 11). Xlikana pi akxni Jehová kinkastakyawayan, max nakinkakatsaniyan, pero ni xlilat nialh napaxuwayaw (Heb. 12:11).

Komo nialh kgalhiyaw taskujut nema xlakgayaw kcongregación, tlan naputsananiyaw la wi kintakanajlakan  chu nalimasiyaniyaw Jehová pi paxkiyaw. Na tlan akstu nakinkakgalhskinkanan tuku xlakata xlakgatayaputunaw uma taskujut. ¿Xlakata xlakaskinka xkinkaʼakxilhkan? ¿O xlakata xpaxkiyaw Jehová chu liwana xkatsiyaw pi congregación tapakgsini chu lakgchan nakuentajtlawakan? (Hech. 20:28-30.) Natalan tiku lakgkgolotsin xlitaxtukgo chu chuntiya skujnanimakgo Dios, putum kalimasiyanikgo, asta Satanás, pi xlikana paxkikgo Jehová.

Akxni mapakgsina David stakyawaka xlakata laklanka talakgalhin xtlawanit, makgamakglhtinalh tastakyaw chu matsankgenanika. Alistalh kilhtlilh: «Snun lipaxaw makglhkatsi ama ti matsankgenikanit ixtalakgalhin, ama ti wakg xapanikanit tu nitlan tlawanit. Snun paxawa lama nama chixku ti Dios ni liyawa ixtalakgalhin ti nak ixtapuwan ni lakgaskgawinan, sino kgalhtastini Dios tu nitlan tlawanit» (Sal. 32:1, 2). Uma tastakyaw makgtayalh xlakata tlakg tlan xkuentajtlawalh xkachikin Dios.

Makglhuwa, natalan tiku kgolotsin litaxtuparakgo tlakg tlan lakgkgolotsin litaxtukgo nixawa xapulana. Uma tuku wa chatum kgolotsin: «La uku tlakg tlan kkamakgtaya tiku lakgalhinankgonit». Chu achatum wa: «La uku tlakg xlakaskinka kakxilha nakkaskujnani kinatalan».

Salmista tsokgli: «[Jehová] ni putum kilhtamaku kintikamalakapastakan tuku nitlan tlawanitaw» (Sal. 103:9, TNM). Wa xlakata ni xlilat nalakpuwanaw pi Dios ni katilipawampa tiku tlawanit talakgalhin. Ricardo, tiku nialh kgolotsin litaxtulh maski lhuwa kata kgolotsin xlitaxtunit, wan: «Lu nitlan xaklimakgkatsi xlakata xaktlawanit tuku nitlan. Lhuwa kilhtamaku titaxtulh, xakmakgkatsi pi nitu xaklitaxtu chu uma tlawalh pi nila kgolotsin xaklitaxtupa. Xaklakpuwan pi natalan nialh xkilipawankgolh. Pero xlakata klakgati kkamakgtaya amakgapitsi, xaklimakgalhtawakgenan Biblia, xakkamatliwakglha natalan ktamakxtumit chu akxni akxtum xakanaw lichuwinanaw Dios. Uma kimakgtayalh xlakata nialh xakpekualh, chu la uku kgolotsin klitaxtupara».

Komo chatum tala kasitsini lakgkgolotsin, tlakg tuwa nakitaxtuni kgolotsin nalitaxtupara. Tlakg tlan natlawakan la David. Xla tsalanilh xalakgkatsanina  mapakgsina Saúl, pero maski David tlan xtimalakgaxokgelh xlakata tuku nitlan xtlawaniputun, ni chuna tlawalh (1 Sam. 24:4-7; 26:8-12). Akxni Saúl nilh kʼguerra, David lakgtasalh chu wa pi Saúl chu xkgawasa Jonatán lu xkapaxkikan (2 Sam. 1:21-23). David ni sitsinilh Saúl.

Komo lakpuwana pi ni chuna akgatekgskanit tuku lalh o ni xlilat tuku tlawanika, ni kamasta talakaskin namakgatlajayan tasitsi. William, tiku kgolotsin xlitaxtu liwaka puxamakaw kata kʼGran Bretaña, kasitsinilh makgapitsi lakgkgolotsin akxni nialh kgolotsin litaxtulh. ¿Tuku makgtayalh nialh xkasitsinilh? Xla wa: «Lu kimatliwakglhli klikgalhtawakgalh libro xla Job. Komo Jehová makgtayalh Job xlakata tlan xkatalalimpa kgalhtutu xcompañeros, ¿ni xʼama kimakgtaya xlakata xakkatalalimpa lakgkgolotsin xalak congregación?» (Job 42:7-9).

Komo wix laksakti nialh kgolotsin nawana, tlan xwa nakgalhskinkana tuku xlakata chuna tlawa. ¿Xmakgkatsiya pi lhuwa taʼakglhuwit xkgalhiya? ¿Analh atanu tuku tlakg xlakaskinka akxilhti? ¿Lilipuwanti tuku nitlan xtlawakgo amakgapitsin natalan? Maski ni liwana katsiya tuku xlakata chuna tlawa, kalakapastakti pi akxni kgolotsin xwanita pulaklhuwa la tlan xkamakgtayaya natalan. Mintaʼakgchuwin xkamatliwekglha, miliʼakxilhtit xkamakgtaya chu akxni xkalakgapaxialhnana xlakata nakamatliwakglhniya xtakanajlakan, xkamakgtayaya natayanikgo tuku tuwa. Nachuna taskujut tuku xtlawaya xlakata kgolotsin xlitaxtuya lu xmakgapaxuwa Jehová chu na xlipaxuwaya (Prov. 27:11).

Jehová kamakgtayanit lhuwa natalan napaxuwaparakgo chu napulalimputumparakgo congregación. Komo laksakti nialh kgolotsin nawana o nialh makgatsi tuku xtalakaskin, ¿tuku xlakata ni liskuja xlakata “napuxkunaniparaya xtaskujut Dios”? (1 Tim. 3:1.) Pablo putum kilhtamaku xkapalakaskin kxʼoración kstalaninanin Cristo xalak Colosas xlakata liwana xkatsikgolh tuku xtalakaskin Dios. ¿Tuku xlakata? Xlakata “xlilatamakgolh wa lantlata mininiy nkimPuchinakan, xlipaks xlimakgapaxuwakgolh” (Col. 1:9, 10). Komo nakgalhiparaya talakgalhaman kgolotsin nalitaxtuparaya kcongregación, kaskini Jehová pi kamakgtayan nakgalhiya litliwakga, nakgalhkgalhinana chu napaxuwaya. Uma xaʼawatiya kilhtamaku, talakaskin lakgkgolotsin tiku xapaxkinanin xlakata namatliwakglha xtakanajla xkachikin Dios. ¿Tlan kamatliwakglha minatalan? ¿Chuna tlawaputuna?