LAMAW kkilhtamaku nema tlakg xakatuwa (2 Tim. 3:1-5). Chali chali kinkaliʼakxilhkanan komo xlikana paxkiyaw Jehová chu komo nalilatamayaw xlimapakgsin. Jesús lichuwinalh uma xatuwa kilhtamaku chu kawanilh kstalaninanin pi xʼama kamatliwakglha xlakata xtayanikgolh asta akxni xmilh xlisputni kakilhtamaku (Mat. 24:3, 13; 28:20). Wa xlakata laksakli chatum skujni xalipaw tiku xʼama masta taway xlakata takanajla kilhtamaku akxni xlilat (Mat. 24:45, 46).

Lata akxni laksakka skujni xalipaw kata 1919, lhuwa millón «amakgapitsi kskujnin» tiku tanu tanu chuwinankgo akxtum talakgonit xkachikin Dios chu makglhtinamakgo taway xlakata xtakanajlakan (Mat. 24:14; Apocalipsis [Revelación] 22:17). Pero lhuwa tuku masta skujni xalipaw ni anan kputum tachuwin, nachuna ni putum latamanin tlan likgalhtawakgakgo tuku kajwatiya taxtu kʼInternet. Lhuwa tiku nila akxilhkgo videos chu artículos nema kajwatiya taxtu kjw.org. ¿Wamputun uma pi ni kgalhikgo taway nema maklakaskinkgo xlakata tliwakga natawila xtakanajlakan? Xlakata liwana naʼakgatekgsaw uma, talakaskin nakgalhtiyaw akgtati xlakaskinka takgalhskinin.

Akxni Satanás wanilh Jesús pi kaxtalanchu xtlawalh chiwix, Jesús kgalhtilh: «Ni xman wa nkaxtalanchu nkatililatamalh nchixku, wampi wa nalilatamay xlipaks ntachuwin wa ntu wan [Jehová]» (Mat. 4:3, 4). ¿Niku natekgsaw tuku wan Jehová? Anta kBiblia (2 Ped. 1:20, 21). Wa xlakata Biblia wa tuku tlakg xlakaskinka nema kinkalimaxkikanan taway (2 Tim. 3:16, 17).

Xkachikin Jehová makgtayananit xlakata Traducción del Nuevo Mundo de las Santas Escrituras tlan nalikgalhtawakgakan xamaktuminika o ni xamaktuminika liwaka 120 tachuwin, chu taliwakatilhama kata kata. Nachuna anan lhuwa millón tanu tanu Biblia klhuwa mil tachuwin. Uma tuku lama, makgantaxtima xtalakaskin Jehová, xla lakaskin pi «paks naʼakgaputaxtukgoy, chu nalakgapaskgoy wa [xaxlikana]» (1 Tim. 2:3, 4). Chu xlakata «wantu Dios malakatsukinit nilay tatsekgniy» liwana katsiyaw pi Jehová nakamalakatsuwi «tiku katsikgo pi lakaskinkgo tuku xla Dios» chu nakamaxki taway nema maklakaskinkgo (Heb. 4:13, Xasasti Talaccaxlan, [Coyutla]; Mat. 5:3, 6; Juan 6:44; 10:14).

Komo lakaskinaw pi kintakanajlakan tliwakga nawan, ni kajwatiya talakaskin nalikgalhtawakgayaw Biblia. Lu xlakaskinka naʼakgatekgsaw chu nalilatamayaw (Sant. 1:22-25). Chuna akgatekgsli chatum xlakskujni mapakgsina xalak Etiopía kxapulana siglo. Uma chixku xlikgalhtawakgama xTachuwin Dios akxni Felipe kgalhskilh: «¿Akgatekgsa ntu likgalhtawakgapat?». Etíope kgalhtilh: «¿Lantla nakakgatekgsa wa mpalapi tini xkimasiyunilh?» (Hech. 8:26-31). Wa xlakata Felipe makgtayalh liwana naʼakgatekgsa xTachuwin Dios, chu tuku katsilh uma chixku tlawalh pi xtamunulh (Hech. 8:32-38). Nachuna kinkakitaxtuniyan. Kilikgalhtawakgakan kinkamakgtayanitan naʼakgatekgsaw tuku xlikana masiya Biblia. Lakgchan kinakujkan chu wa xlakata lilatamaputunaw tuku katsiniyaw (Col. 1:9, 10).

Kskujnanin Jehová lhuwa chuchut chu taway xla takanajla makglhtinanaw kkilikgalhtawakgakan (Is. 65:13). Akgtum liʼakxilhtit, Makatsinina nema maʼakgpitsikan liwaka 210 tachuwin, wan tuku Biblia xwanit pi nala chu kinkamakgtayayan naʼakgatekgsaw tuku xaxlikana nema laktuwa chu nalatamayaw chuna la limapakgsinan Biblia. Chu revista ¡Despertad!, nema maʼakgpitsikan max 100 tachuwin, kinkamasiyaniyan tuku kaks malakawaninan nema malakatsukikanit chu katsiniyaw nalilatamayaw tastakyaw xalak Biblia (Prov. 3:21-23; Rom. 1:20). Skujni xalipaw kinkamaxkiyan likgalhtawakga nema takilhti kBiblia ¡kliwaka 680 tachuwin! ¿Limaxtuya kilhtamaku chali chali nalikgalhtawakgaya Biblia? ¿Likgalhtawakgaya makatunu revista chu xasasti likgalhtawakga nema taxtu kmintachuwin?

Pero ni kajwatiya likgalhtawakga kgalhiyaw. Xkachikin Jehová na lakkaxwili bosquejos nema takilhtinit kBiblia xlakata namastakan taʼakgchuwin kkintamakxtumitkan chu klaklanka tamakxtumit. ¿Lakgatiya taʼakgchuwin, dramas, entrevistas chu liʼakxilhtit nema matitaxtikan anta? ¡Lu lhuwa taway xla takanajla kinkamaxkiyan Jehová! (Is. 25:6.)

¡Ni chuna! Ni xlilat kaks nalilakawanaw pi makgapitsi kskujnin Jehová tlakg kgalhikgo taway xla takanajla nixawa amakgapitsin. Kakalilakpuwaw apóstoles. Xlakan tlakg lhuwa tuku kamakatsinika nixawa amakgapitsi kstalaninanin Jesús kxapulana siglo (Mar. 4:10; 9:35-37). Pero uma ni wamputun pi amakgapitsi kstalaninanin Jesús ni xkgalhikgo taway xla takanajla: xkgalhikgo tuku xmaklakaskinkgo (Efes. 4:20-24; 1 Ped. 1:8).

Na kilikatsitkan pi lhuwa tuku Jesús wa chu tlawalh, ni tatsokgnit kʼEvangelios. Chuna wa apóstol Juan: «Na anan lhuwa amakgapitsin nkatuwa ntu ntitlawalh Jesús, wa mpalapi paks xtsokgka ntipatu, kpuwan mpi asta max ni anan [niku] xtilitawilakgolh nkatuxawat xlilhuwa libro ntu xtatsokgli» (Juan 21:25). Maski kstalaninanin Jesús kxapulana siglo tlakg lhuwa tuku xkatsikgo xlakata Jesús nixawa akinin, uma ni wamputun pi nitu katsiyaw: Jehová lakkaxwilinit xlakata nakatsiyaw tuku kilikatsinitkan xlakata Jesús chu chuna tlan natlawayaw tuku tlawalh (1 Ped. 2:21).

Na kalakpuwaw cartas nema apóstoles kamalakgachakgolh kcongregaciones. Anan maktum nema tsokgli apóstol Pablo nema nitu wi kBiblia (Col. 4:16). Xlakata uma ¿nawanaw pi taway xla kintakanajlakan ni xatakgatsin? Ni chuna. Jehová katsi tuku maklakaskinaw xlakata natatliwakglhaw kkintakanajlakan chu kinkamaxkinitan (Mat. 6:8).

Kkinkilhtamakujkan, makgapitsi natalan max tlakg kgalhikgo taway xla takanajla nixawa amakgapitsi. ¿Ni anan lhuwa likgalhtawakga kmintachuwin? Ni kalilipuwanti, Jehová na kuentajtlawaman. Kalikgalhtawakga likgalhtawakga nema kgalhiya chu komo tlan, kapit ktamakxtumit tachuwin nema akgatekgsa. Liwana kakatsi pi Jehová namakgtayayan tliwakga natawila mintakanajla (Sal. 1:2; Heb. 10:24, 25).

Kkisitiojkan kʼInternet tlan likgalhtawakgakan revistas chu atanu tuku makgtayanan nalikgalhtawakgayaw Biblia. Nachuna lichuwinan xlakata tamakgaxtokgat, lakgkgawasan chu laktsuman chu natlatni tiku kgalhikgo laktsu xkamanan, uma tamakatsin lu nakamakgtaya xlakata akxtum nalikgalhtawakgakgo kFamilia. Nachuna, minkgo tamakatsin xlakata xlakaskinka tamakxtumit, la akxni sputa xtakgalhtawakgakan tiku ankgo kʼEscuela de Galaad o tamakxtumit nema tatlawa kata kata. Chu makatsininankan xlakata tuku masputunan chu taʼakglhuwit nema katakgalhikan mapakgsinanin, nema kalaktlawa o litamakgtayakgo natalan xalak putum katiyatni (1 Ped. 5:8, 9). Kisitiojkan xla Internet na lu tlan limaklakaskinkan xlakata nalichuwinankan Dios, xlakata makgtayanan nalichuwinankan niku mapakgsinanin ni lakaskinkgo o ni mastakgo talakaskin chuna natlawakan.

Pero maski kgalhiya o nitu kgalhiya Internet wix tlan namatliwakglha mintakanajla. Skujni xalipaw lhuwa skujnit xlakata nakamaxki amakgapitsi skujnin taway xla takanajla nema tatsokgnit xlakata liwana nawayankgo. Wa xlakata, ni kalakpuwanti pi militamawat akgtum teléfono o atanu nema tlan nalitanuya kjw.org. Max wi tiku naimprimirli artículos nema taxtu kʼuma página xlakata nalitamakgtayakgo tiku ni kgalhikgo Internet, pero ni kawanikan congregaciones pi xafuerza chuna natlawakgo.

Jesús kinkamaxkiman tuku maklakaskinaw kkintakanajlakan chuna la litayalh. ¡Chu lu paxtikatsiniyaw! Chuna la talakatsuwima xlisputni uma kakilhtamaku, tlan nalipawanaw pi Jehová putum kilhtamaku nakinkamaxkiyan “taway kilhtamaku” akxni xlilat.