1, 2. 1) ¿Tukuya tamaskiwin maxkilh Jehová Adán? 2) ¿Tuku xlakata Jehová maxkilh Adán chatum puskat? (Kaʼakxilhti xapulana dibujo.)

JEHOVÁ wi tuku xpalakata malakatsukilh Katiyatni: xlakata anta nalatamakan (Is. 45:18). Akxni malakatsukilh xapulana chixku, Adán, ni xkgalhi talakgalhin chu maxkilh lilakgatit pulataman, jardín xaʼEdén. ¡Adán lu xlakgati xakxilha laklanka kiwi, xkgaxmata la tlawama chuchut kkgalhtuchokgo chu xakxilha la xkgamanankgo animales! Pero xtsankgani tuku lu xlakaskinka. Jehová xkatsi, wa xlakata wa: «Nitlan xakstu nalatama chixku. Naktlawani xmakgtayana xlakata nalitakgatsi». Wa xlakata tlawalh pi Adán liwana klhtatalh, tiyalh kgantum xtapalukut chu «litlawalh chatum puskat». ¡Lu paxuwalh Adán akxni stakwanalh! Xla wa: «Uma lu xlikana kilukut chu kiliwa. Nawanikan Puskat, xlakata lakmaxtuka chixku» (Gén. 2:18-23).

² Dios maxkilh Adán lu tlan tamaskiwin, xlakata puskat lu tlan makgtayana xʼama wan. Nachuna, puskat tlan xkgalhilh kamanan. Wa xlakata, «Adán limapakuwilh Eva xpuskat, xlakata wa tiku xtse xʼama wan putum tiku xlatamalh» (Gén. 3:20; nota). ¡Lu lilakgatit tuku kamaskiwilh Jehová Adán chu Eva! Tlan xʼamakgo kgalhikgo kamanan tiku ni xkgalhikgolh talakgalhin. Chuna, xlikalanka Katiyatni akgtum paraíso xwa chu xlitatsamalh latamanin tiku ni xkgalhikgo talakgalhin chu xkuentajtlawakgolh tuku staknankgo (Gén. 1:27, 28).

3. 1) ¿Tuku xlitlawatkan xwanit Adán chu Eva xlakata Jehová xkasikulunatlawalh, pero tuku lalh? 2) ¿Tuku takgalhskinin nakgalhtiyaw?

 ³ Xlakata xmakglhtinankgolh xtasikulunalin Jehová, xtalakaskin pi Adán chu Eva xkgalhakgaxmatkgolh chu xtapakgsinikgolh (Gén. 2:15-17). Kajwatiya chuna tlan xmakgantaxtikgolh tuku Jehová xlakapastaknit xpalakatakan. Lu nitlan, pero Adán chu Eva kgalhakgaxmatkgolh «xapulana luwa», chu lakgalhinankgolh kxlakatin Dios (Apocalipsis [Revelación] 12:9, TNM; Gén. 3:1-6). ¿Tuku nitlan kakitaxtuninit lakpuskatin xlakata ni kgalhakgaxmatnankgolh Adán chu Eva? ¿Tuku lu xlakaskinka tlawakgolh makgapitsi lakpuskatin xalamakgasa tiku kskujnanikgo Dios? ¿Tuku xlakata natalan lakpuskatin xala uku kalimapakuwikan «la lhuwa soldado»? (Sal. 68:11, TNM.)

4. Kxlakatin Jehová, ¿tiku lilh kuenta xlakata lakgalhinankgolh xapulana kinatlatnikan?

⁴ Akxni Dios kgalhskilh Adán tuku xlakata ni kgalhakgaxmatninalh, uma tuku wa: «Puskat tiku kimaxki xlakata xkintatawi, wa tiku kimaxkilh xtawakat kiwi, wa xlakata kwalh» (Gén. 3:12). Ni kajwatiya ni litayalh pi xlin kuenta, wata limawakalh xpuskat tuku nitlan xtlawanit, asta Dios xlimawakama kuenta, xlakata wa tiku xmaxkinit xpuskat. Maski xchatiykan lakgalhinankgolh, kxlakatin Jehová wa Adán tiku lilh kuenta. Wa xlakata Pablo tsokgli pi «ntsukulh ntalakgalhin nkatuxawat nkaj xpalakata nchatum chixku [Adán], pus wa linin nkitaxtunilh ntalakgalhin» (Rom. 5:12).

5. ¿Tuku litasiyanit xlakata Dios mastanit talakaskin pi latamanin nalamapakgsikgo?

⁵ Satanás kamakanajlilh xapulana kinatlatnikan pi ni xtalakaskin pi Jehová xkamapakgsilh. Uma tlawalh pi xtawilalh uma lu xlakaskinka takgalhskinin: ¿tiku lakgchan namapakgsinan? Xlakata tlan xtakgalhtilh uma, Dios mastalh talakaskin pi ni lhuwa kilhtamaku latamanin xakstukan kalamapakgsilh, chuna xʼama litasiya pi putum tamapakgsin nema ni wa tapakgsini nitlan katikitaxtunilh. Chuna la titaxtunit siglos, xtamapakgsin chixku lu nitlan tuku katlawaninit latamanin. Siglo nema aku titaxtulh max 100 millón latamanin nikgolh kaj xlakata guerra, nikgolh lakchixkuwin, lakpuskatin chu laktsu kamanan nema ni linkgo kuenta. Liwana litasiyanit pi «ni lakgchan chatum chixku xakstu napulalin xtatukit» (Jer. 10:23). Wa xlakata laksaknitaw pi Jehová nakinkamapakgsiyan (kalikgalhtawakga Proverbios 3:5, 6).

6. ¿La kalikatsinikan lakpuskatin klakalhuwa países?

⁶ Lakchixkuwin chu lakpuskatin lhuwa patinankgonit kʼuma xkakilhtamaku Satanás (Ecl. 8:9; 1 Juan 5:19). Pero, lakpuskatin wa tiku tlakg nitlan kalikatsinikan. Akgtum liʼakxilhtit, xlikalanka katiyatni, xlikgalhtutu lakpuskatin chatum nitlan kalikatsininit xchixku o xlitatawilat. Kmakgapitsi kachikinin tlakg kapaxkikan lakgskgatan tiku lakgkgawasan, xlakata lakpuwankan pi akxni nastakkgo chuntiya nalin xʼapellido xfamilia chu nakakuentajtlawa xnatlatni, xtata chu xnana, o xtsiyuna. Kmakgapitsi países, ni kakgalhiputunkan laktsuman, chu tlakg kamakgankan lakgskgatan laktsuman nixawa lakgkgawasan.

7. Akxni Jehová kamalakatsukilh puskat chu chixku, ¿tuku kamaxkilh?

⁷ Dios lu nitlan akxilha pi ni tlan nakalikatsinikan lakpuskatin. Xla ni kalaksakpaxki chu kamaxki kakni. Kaʼakxilhwi pulaktum tuku limasiya. Akxni Dios tlawalh Eva ni xkgalhi talakgalhin, maxkilh lakwan tayat xlakata lu xatlan xmakgtayana Adán xwa, ni kskujni Adán xwanit. Wa xlakata, xliʼakgchaxan kilhtamaku akxni xmalakatsukinanita, «Dios akxilhli putum tuku xtlawanit chu ¡kaʼakxilhti!, lu tlan xwanit» (Gén. 1:31). Chuna, putum tuku Jehová tlawalh «lu tlan» xwanit. Lu tlan la kamalakatsukika chixku chu puskat.

8. 1) ¿La likatsikgonit putum latamanin? 2) ¿Tiku kamakgtayanit Jehová chuna la titaxtutilhanit kilhtamaku?

⁸ Lata akxni Adán chu Eva ni kgalhakgaxmatkgolh Dios, putum latamanin, lakchixkuwin chu lakpuskatin nitlan xtayatkan, chu siglo nema aku titaxtulh tlakg nitlan tsukukgolh likatsikgo. Biblia lichuwinalh pi uma nitlan tayat xʼama litasiya «xaʼawatiya kilhtamaku», tuku nitlan talakgatuminit chu xlikana «lu tuwa» kilhtamaku lamaw (2 Tim. 3:1-5, TNM). Maski chuna, putum kilhtamaku latamakgonit lakchixkuwin chu lakpuskatin tiku lipawankgonit Dios, kgalhakgaxmatkgonit xlimapakgsin chu xmapakgsinakan tlawakgonit. Jehová tiku lakgchan namapakgsinan kamakgtayanit (kalikgalhtawakga Salmo 71:5).

9. ¿La kgalhlit latamanin lakgtaxtukgolh kMunkaklat, chu tuku xlakata?

⁹ Akxni Dios limasputulh munkaklat lixkajni kakilhtamaku akxni xlama Noé, ni lhuwa latamanin lakgtaxtukgolh. Komo xnatalan Noé, laktsuman o lakgkgawasan xlamakgo ama kilhtamaku na nikgolh (Gén. 5:30). ¿Tiku lakgtaxtukgolh? Chuna la xlilhuwa lakchixkuwin nachuna xlilhuwa lakpuskatin lakgtaxtukgolh: Noé, xpuskat, kgalhtutu xlakgkgawasan chu xlakpuskatin. Dios kalakgmaxtulh xlakata kgalhakgaxmatkgolh chu makgantaxtikgolh xtalakaskin. Lhuwa millón tiku lamaw la uku, litaxtuyaw xkamanan uma kgalhtsayan latamanin tiku Jehová kamakgtayalh (Gén. 7:7; 1 Ped. 3:20).

10. ¿Tuku xlakata kgalhikgolh xtamakgtay Dios xlakpuskatin patriarcas?

¹⁰ Lhuwa kata alistalh, xlakpuskatin patriarcas, makglhtinankgolh xtamakgtay Jehová. Uma ni chuna xtikitaxtulh komo ni xpaxuwakgolh la xlinkgo xlatamatkan (Jud. 16). Chatum tiku chuna titaxtulh wa Sara. Akxni kawanika xmakgxtakgkgolh tuku tlan xkgalhikgo kʼUr chu xʼankgolh latamakgo klaktsu chiki xaxuwa, ni wa pi ni xʼama. «Sara, xlakgachixkuwi Abraham, [...] xlimapakuwiy» xmalana (1 Ped. 3:6). Na kalakapastakwi Rebeca, tiku litaxtulh akgtum xtamaskiwin Jehová chu lu tlan xpuskat Isaac. Ni kaks lilakawanaw akxni likgalhtawakgayaw pi «Isaac paxkilh Rebeca, chu nialh lipuwa xlakata xninitta xtse» (Gén. 24:67). ¡La uku paxuwayaw pi kinkatawilan lakpuskatin tiku ni makgxtakgkgo Dios la Sara chu Rebeca!

11. ¿La limasiyakgolh chatiy parteras hebreas pi ni xpekuankgo?

¹¹ Akxni skujnin xlitaxtukgo kʼEgipto, israelitas talhuwikgolh, chu faraón limapakgsinalh pi xkamakgnika putum lakgskgatan lakgkgawasan tiku xlakachinkgolh. Pero parteras hebreas Sifrá chu Puá, tiku max xkamapakgsikgo amakgapitsi parteras ni pekuankgolh chu ni kgalhakgaxmatkgolh faraón. Xlakata xpekuanikgo Jehová, ni kamakgnikgolh lakgskgatan, chu Jehová kasikulunatlawalh chu kamaxkilh kamanan (Éx. 1:15-21).

12. ¿Tuku tlan nalichuwinanaw xlakata Débora chu Jael?

¹² Kxkilhtamaku jueces xalak Israel, chatum puskat tiku Dios makgtayalh, wa palakachuwina Débora. Xla matliwakglhli juez Barac chu kamakgtayalh israelitas nalakgtaxtunikgo xtalamakgasitsinkan. Pero lichuwinalh pi ni wa Barac xʼamaka malankikan xlakata xkamakgatlajaka cananeos. Dios xʼama tlawa pi Sísara xpuxkukan soldados cananeos xnilh kxmakan chatum puskat. Chu chuna lalh, Jael chatum puskat tiku ni israelita xwanit, wa tiku makgnilh (Juec. 4:4-9, 17-22).

13. ¿Tuku kinkawaniyan Biblia xlakata Abigail?

¹³ Abigail, wa tiku na lu tlan puskat nema xlama akgkawitu siglos akxni nina xmin Jesús. Xla liwana xlakapastaknan, pero xchixku Nabal, nitu xlilaka xwanit, lixkajnit xlikatsi chu ni xlakapastaknan (1 Sam. 25:2, 3, 25). David chu xsoldados, kuentajtlawakgolh kskujnin chu xborregos Nabal ni lhuwa kilhtamaku, pero akxni skinikgolh liwat, Nabal lixkajnit kawanilh chu nitu kamaxkilh. David lu sitsilh, wa xlakata lakpuwa namakgni Nabal chu kskujnin. Akxni Abigail katsilh, kalinilh  liwat chu tuku nalikgotnankgo David chu xsoldados, chuna makgtayanalh pi niti namakgnikan (1 Sam. 25:8-18). Alistalh David wanilh: «¡Katasikulunatlawalh Jehová xDios Israel, tiku malakgachan natana kimpaxtokga!» (1 Sam. 25:32). Akxni nilh Nabal, David tatamakgaxtokgli Abigail (1 Sam. 25:37-42).

14. 1) ¿Tukuya taskujut makgtlawakgolh xlaktsuman Salum? 2) ¿La nachuna tlawakgo la xlaktsuman Salum, natalan lakpuskatin xala uku?

¹⁴ Lhuwa lakchixkuwin, lakpuskatin chu kamanan nikgolh akxni babilonios masputukgolh Jerusalén kata 607 akxni nina xmin Jesús. Xpatsaps kachikin tsukuka lakkaxtlawakan kata 455, Nehemías xpulalima taskujut. Tiku na xmakgtayanamakgo nalakkaxtlawakan patsaps wa xlaktsuman Salum, tiku «príncipe xʼitat distrito Jerusalén» xlitaxtu (Neh. 3:12). Tasiya pi uma laktsuman xatapaxuwan tlawakgolh uma xataktuju taskujut. ¡Lu xlakaskinka akxilhaw pi la uku lhuwa kinatalankan lakpuskatin, pulaklhuwa la makgtayanankgo chu xatapaxuwan skujkgo akxni katlawakan chiki kxkachikin Dios!

15. ¿Tukuya talakgalhaman maxkilh Dios chatum puskat xwanikan María?

¹⁵ Kxapulana siglo akxni xminita Jesús chu akxni nina xchan, Jehová kasikulunatlawalh makgapitsi lakpuskatin chu kalakgayawalh xlakaskinka taskujut. Tiku kgalhilh uma talakgalhaman wa chatum tsumat xwanikan María. Akxni nina xtatamakgaxtokga José, wanika pi xlakata xʼespíritu santo Jehová xʼama kgalhi skgata. ¿Tuku xlakata Dios laksakli xlakata xtse Jesús xwa? Xlakata xkgalhi lakwan tayat nema xtalakaskin xlakata xmakgastakli xkgawasa tiku ni xʼama kgalhi talakgalhin. ¡Akgtum lanka talakgalhaman pi María xtse xwa tlakg xlakaskinka chixku tiku latamanit kKatiyatni! (Mat. 1:18-25.)

16. ¿La xkalikatsini Jesús lakpuskatin? Kawili akgtum liʼakxilhtit.

¹⁶ Jesús lu tlan xkalikatsini lakpuskatin. ¿Lakapastaka la likatsinilh puskat tiku akgkutiy kata xlakgstajtamakgama? Akxni uma puskat lakgtalakatsuwilh kxchakgen Jesús, xlakgstipan lhuwa latamanin chu xamalh klhakgat, ¿tuku tlawalh Jesús? Ni kilhnilh, wata lakgalhamalh chu wanilh: «Tsumat, wa mintakanajla malakgtaxtinitan. Chapaxuwana nkapit, na nialh katikgalhi mintajatat» (Mar. 5:25-34).

17. ¿Tuku lalh kPentecostés kata 33 nema nila takanajla?

¹⁷ Makgapitsi lakpuskatin na kstalaninanin Jesús xwankgonit chu xkamaxkikgo tuku xmaklakaskinkgo Jesús chu xʼapóstoles (Luc. 8:1-3). Chu kata 33, makgamakglhtinankgolh xʼespíritu Dios 120 lakchixkuwin chu lakpuskatin (kalikgalhtawakga Hechos 2:1-4). Jehová xlichuwinanita uma, akxni wa: «Nakxajmakanikgoy nkispíritu kxokgspun xlipaks nchixkuwin, na napalakachuwinankgoy Dios minkamankan, chu milaktsumajankan, [...]. Chu na kiskujnin chixkuwin, xawa lakchajan, akxni yama nkilhtamaku, nakkamaxki nkispíritu» (Hech. 2:17, 18). Xlakata uma milagro, Jehová limasiyalh pi xlakgmakganit kachikin Israel tiku xmakgxtakgnit xaxlikana takanajla chu tlan xakxilha «xIsrael Dios», nema xlitakgatsi lakpuskatin chu lakchixkuwin (Gál. 3:28; 6:15, 16). Makgapitsi lakpuskatin kstalaninanin Cristo tiku lichuwinankgolh xalakwan xalaksasti kxapulana siglo, wa kgalhtati xlaktsuman Felipe tiku xlichuwinan Dios (Hech. 21:8, 9).

18, 19. 1) ¿Tukuya talakgalhaman kamaxkinit Jehová lakchixkuwin chu lakpuskatin? 2) ¿Tukuya tachuwin limaklakaskilh salmista xlakata nakalichuwinan lakpuskatin tiku lichuwinankgo xalakwan xalaksasti?

¹⁸ Kata 1870 asta 1880, ni lhuwa lakchixkuwin chu lakpuskatin limasiyakgolh pi xtekgsputunkgo xaxlikana takaknin. Umakgo kamalakinikgolh tiji tiku la uku makgantaxtimakgo tuku Jesús wa: «Umakgolh  xalakwan xalaksasti tamakatsin xla xtamapakgsin Dios natalichuwinan kputum katiyatni xlakata natamakatsininan kputum laklanka kachikinin; chu alistalh namin lisputni» (Mat. 24:14, TNM).

¹⁹ Uma ni lhuwa xLikgalhtawakgananin Biblia staknit chu anan max 8,000,000 xtatayananin Jehová. Chu putum katalakgo liwaka 11,000,000 latamanin tiku kilakgolh akxni lakapastakka akxni tinilh Cristo kata 2013. Atsinu ni putum kpaíses, tlakg lhuwa lakpuskatin tiku kilakgolh. Xlikalanka katiyatni liwaka akgtum millón tiku lichuwinankgo xTamapakgsin Dios putum kilhtamaku, chu tlakg lhuwa lakpuskatin tiku chuna tlawakgo. Chuna la akxilhaw, Dios na kamaxkinit lakpuskatin lanka talakgalhaman pi nalinkgo xtukuwani. Xlikana kgantaxtuma tuku tsokgli salmista: «Wa uma tuku Jehová wan; lakpuskatin tiku lichuwinankgo xalakwan xalaksasti tamakatsin litaxtukgo la lhuwa soldado» (Sal. 68:11, TNM).

20. ¿Tuku tlan nalakkaxwiliyaw xlakata nalikgalhtawakgayaw?

²⁰ Kilhtamaku ni kintikakchanin xlakata nakalichuwinanaw lakpuskatin tiku ni makgxtakgkgolh Dios nema talichuwinan kBiblia. Pero tlan naputsayaw la linkgolh xlatamatkan kxTachuwin Dios chu kʼartículos nema taxtunit kkilikgalhtawakgakan. Kalilakpuwaw xliʼakxilhtit Rut. Lu nakinkamakgtayayan nalilakpuwanaw pi ni xmakgxtakgnan (Rut 1:16, 17). ¿Chu tuku tlan xwaw xlakata mapakgsina Ester? Komo nalikgalhtawakgayaw libro nema lin xtukuwani chu artículos niku litachuwinan, namatliwakglha kintakanajlakan. Akxni kakninaniyaw Jehová kfamilia, tlan nalakkaxwiliyaw nalikgalhtawakgayaw umakgolh artículos. Chu komo kaj kiʼakstukan, tlan nalakputsananiyaw akxni kgalhtawakgayaw.

21. ¿La limasiyakgonit lhuwa natalan lakpuskatin pi ni makgxtakgkgo Dios akxni titaxtukgo tuku tuwa?

²¹ Xlikana pi Jehová sikulunatlawa taskujut tuku tlawakgo natalan lakpuskatin xlakata nalichuwinankgo xTamapakgsin chu kamakgtaya akxni titaxtukgo tuku tuwa. Akgtum liʼakxilhtit, kamakgtayalh natalan lakpuskatin xlakata ni xmakgatsankgananikgolh akxni xmapakgsinamakgo Nazis chu comunistas. Lhuwa patinankgolh chu asta wi tiku nikgolh xlakata kgalhakgaxmatkgolh Dios (Hech. 5:29). Chuna la makgasa, la uku putum natalan, lakchixkuwin chu lakpuskatin laksakkgonit pi Jehová xmapakgsinakan nawan. Chu chuna la tlawalh xpalakata israelitas xalamakgasa, kamakgachipa chu kawani: «Ni kapekuanti. Akit xlikana nakmakgtayayan» (Is. 41:10-13).

22. ¿Tukuya talakgalhaman kgalhkgalhimakgo kskujnin Jehová tiku ni makgxtakgkgo?

²² Nialh makgas, lakchixkuwin chu lakpuskatin tiku ni makgxtakgkgo Dios namakgtayanankgo pi Katiyatni akgtum paraíso nawan chu nakamasiyanikgo xtalakaskin Jehová lhuwa millón tiku nalakastakwanankgo. Xlakata nina chan uma kilhtamaku lu xlakaskinka kaʼakxilhwi “akxtum naskujnaniyaw” kiDioskan (Sof. 3:9).