1, 2. ¿Tukuya taskujut lakgayawalh Jehová Moisés, chu tuku wanilh Jehová Moisés pi xʼama tlawa?

¿LA XMAKGKATSI komo xpit kxlakatin tiku tlakg xalanka mapakgsina xliputuminika Katiyatni chu xpalakachuwinanti xkachikin Jehová? Max xmakgkatsi pi nila xmakgantaxti. Max ni xkatsi tuku natlawaya o max xpekuanti chu ni xkatsi tuku nawana. ¿La xlakkaxwili tuku nawana? ¿Tuku xtlawa xlakata xtakgaxmatli pi palakachuwinampat Dios tiku kgalhi putum litliwakga?

² Chuna titaxtulh Moisés. Jehová xwaninit uma chixku tiku «tlakg ni tlankajwa xwanit xliputum lakchixkuwin tiku xlamakgolh kkatiyatni», pi xʼama malakgacha kxlakatin faraón xlakata nakalakgmaxtu xkachikin chu nialh skujnin xlitaxtukgolh anta kʼEgipto chu nialh xkamapatinika (Núm. 12:3). Faraón lu lixkajnit xlikatsi chu tlankajwa xwanit. Maski chuna, Jehová xlakaskin pi Moisés wi tuku xlimapakgsilh: ¡pi xmastalh talakaskin, lhuwa millones xlakskujnin xtaxtukgolh kʼEgipto! (Éx. 5:1, 2.) Wa xlakata Moisés kgalhskilh Jehová: «¿Tiku klitaxtu akit xlakata naklakgan Faraón chu nakkamaxtu xkamanan Israel kʼEgipto?». Moisés max xmakgkatsi pi nila xmakgantaxtilh uma taskujut. Pero Dios wanilh pi ni xakstu xʼama an, wanilh: «Akit naktatawilayan» (Éx. 3:9-12).

3, 4. 1) ¿Tuku xlakata xpekuama Moisés? 2) ¿Tuku xlakata max nachuna namakgkatsiyaw la Moisés?

³ ¿Tuku xlipekuama Moisés? Xlipekuan pi faraón ni xmakgamakglhtinalh  chu ni xkgaxmatnilh chatum xpalakachuwina Jehová. Na xpekuan pi xnatalan israelitas ni xkanajlanikgolh pi Jehová xlaksaknit xlakata wa xkamaxtulh kʼEgipto. Wa xlakata wanilh Jehová: «Kalakpuwaw pi ni nakinkanajlanikgo chu ni nakgaxmatkgo tuku nakkawani, xlakata nawankgo: “Nitu tasiyaninitan Jehová”» (Éx. 3:15-18; 4:1).

⁴ Xlikana pi max nikxni natalakaskin napina chuwinana kxlakatin chatum mapakgsina. Pero, ¿max tuwa makgkatsinita napina lichuwinana Dios chu xTamapakgsin kxlakatin latamanin? Tuku Jehová wanilh Moisés chu tuku lalh alistalh wi tuku lu xlakaskinka kinkamasiyaniyan.

5. 1) ¿Tuku maxkilh Jehová Moisés? (Kaʼakxilhti xapulana dibujo.) 2) ¿La makgtayalh uma Moisés xlakata nialh xpekualh?

⁵ Akxni Moisés wanilh Jehová pi xlakpuwan pi niti xkanajlanilh, Dios wanilh tuku xtlawalh. Tuku tatsokgnit kʼÉxodo wan: «Wa xlakata Jehová wanilh: “¿Tuku chipanita?”, Moisés kgalhtinalh: “Kgantum lixtokgo”. Jehová wanilh: “Kamapi kkatiyatni”. Wa xlakata Moisés makalh kkatiyatni, chu xlixtokgo tantum luwa wa chu Moisés tsukulh tsalani. Alistalh Jehová wanilh Moisés: “Kalichipa kstajan”. Wa xlakata xla chipalh, chu lixtokgo wampa kxmakan. Dios wanilh: “Xlakata nakanajlanikgoyan pi tasiyaninitan Jehová”» (Éx. 4:2-5). Kaj xlakata xlitliwakga Dios, ¡kgantum kiwi xastakna luwa wa! Xlakata uma milagro Moisés tlan xlimasiya pi Jehová xmalakgachanit chu xmakgtayama. Jehová wanilh: «Uma lixtokgo nalipina xlakata wa nalitlawaya tuku kaks malakawaninan» (Éx. 4:17). Xlakata xkgalhi kxmakan tuku xlitasiyalh pi wa Dios xmakgtayama, Moisés tlan makgantaxtilh tuku lakgayawaka chu tlan palakachuwinalh xaxlikana Dios kxlakatin xkachikin chu kxlakatin faraón (Éx. 4:29-31; 7:8-13).

6. 1) ¿Tuku kililinatkan kkimakankan akxni lichuwinanaw Dios, chu tuku xlakata? 2) ¿Tuku xlakata Pablo wa pi «xtachuwin Dios [...] xastakna na kgalhiy xlitliwakga»?

⁶ Akxni lichuwinanaw Dios na max nakinkakgalhskinkanan: «¿Tuku chipanita?». Min kilhtamaku tuku chipanitaw wa Biblia chu skgalalh wilaw xlakata namaklakaskinaw. Maski wi tiku akxilha Biblia la kaj maktum libro, ni chuna: wa xTachuwin Dios nema kinkalitachuwinanan (2 Ped. 1:21). Anta tekgsaw tuku Dios wanit pi natlawa xTamapakgsin. Wa xlakata apóstol Pablo tsokgli: «Xtachuwin Dios [...] xastakna na kgalhiy xlitliwakga» (kalikgalhtawakga Hebreos 4:12). ¿Tuku xlakata wa pi «xtachuwin Dios [...] xastakna»? Xlakata tuku Dios wanit natlawa ni kaj chunata natamakgxtakga, xlakata wa tlawama pi nakgantaxtu (Is. 46:10; 55:11). Akxni chatum lataman akgatekgsa uma, tuku likgalhtawakga kBiblia lakgpali xlatamat.

7. ¿La tlan nalimaklakaskinaw «ntachuwin xla [xaxlikana]»?

⁷ Jehová kinkamaxkinitan xastakna xTachuwin, wa Biblia. Wa tlan nalimasiyayaw pi tamakatsin nema linaw xaxlikana chu wa xtachuwin. Ni kaks kinkamalakawaniyan pi akxni Pablo xkatsokgnaninitta Hebreos, maxkilh Timoteo uma tastakyaw: «Aktanks [na]malakatanksaya ntachuwin xla [xaxlikana]» (2 Tim. 2:15). ¿La tlan na nakuentajtlawaniyaw uma tastakyaw? Liwana nalaksakaw textos nema nalikgalhtawakganiyaw tiku nakinkakgaxmatnikgoyan, xlakata tlan nachanaw kxnakujkan. Tratados nema kamastaka kkata 2013 liwana kalakkaxwilikanit xlakata chuna natatlawa.

8. ¿Tuku wa chatum superintendente de servicio xpalakata xalaksasti tratados?

⁸ Putum xalaksasti tratados lakxtum la katlawakanit, wa xlakata komo nakatsiniyaw la namaklakaskinaw akgtum, nakatsiyaw la nakamaklakaskinaw amakgapitsin. Chatum  superintendente de servicio xalak Hawái (Estados Unidos) tsokgli: «Ni xaklakpuwanaw pi lu xʼama kinkamakgtayayan uma tratados akxni xaklichuwinaw Dios kʼakgatunu chiki chu niku xakkatatanokglhwi latamanin». ¿Tuku xlakata lu makgtayanankgo chu ni tuwa kamaklakaskinkan? Xla akxilhnit pi chuna la katsokgkanit, kamakgpuwantini latamanin nawankgo tuku lakpuwankgo chu uma tlawa pi tlan nakatakgalhchuwinankan. Lakpuwan pi makgpuwantininan takgalhskinin chu takgalhtin nema min kxapulana página, xlakata chuna tiku kinkakgaxmatniman ni napekuan komo namasta takgalhtin nema ni xlilat.

9, 10. 1) ¿La kinkamakgtayayan tratados namaklakaskinaw Biblia? 2) ¿Tukuya tratados tlakg makgtayanitan akxni kamaklakaskinita, chu tuku xlakata?

⁹ Makatunu tratado kinkamakgpuwantiniyan nalikgalhtawakgayaw akgtum texto xalak Biblia nema liwana laksakkanit. Kalichuwinaw tratado, ¿Namin kilhtamaku akxni nialh napatinanaw? Maski tiku tachuwinamaw nakgalhtinan pi «namin», «ni katimilh», o «max» akxni natlawaniyaw uma xtakgalhskinin tratado, kawaniw: «Wa uma tuku wan Biblia». Alistalh kalikgalhtawakganiw Apocalipsis [o Revelación] 21:3, 4.

¹⁰ Nachuna, akxni namaklakaskina tratado ¿La akxilha Biblia?, ni lu kuenta tukuya takgalhtin nalaksaka tiku tachuwinampat. Kajwatiya kawani: «Kaʼakxilhti tuku wan Biblia». Kamalakgapitsi tratado chu kalikgalhtawakga texto nema tatsokgnit anta: «Xlipaks yuma ntatsokgnun, paks ntimapuwanikgolh Dios lantla natsokgkgoy». Alistalh tlan xwanti: «Uma texto atanu tuku na wan». Alistalh kalikgalhtawakgani 2 Timoteo 3:16, 17.

11, 12. 1) Komo liwana kamaklakaskina tratados, ¿tuku nalipaxuwaya? 2) ¿La namakgtayayan tratados nalakkaxwiliya tuku nakalitachuwinana tiku nakalakgpimparaya?

¹¹ Chuna la nakgalhtinan tiku tachuwinamaw, nalikatsiyaw komo tlan tlakg nalikgalhtawakganiyaw chu nalitakgalhchuwinanaw tuku wan tratado. Komo kinkamaxkiyan talakaskin chuna natlawayaw o ni, nalipaxuwayaw pi ni kajwatiya makgaxtakgniw tratado wata na likgalhtawakganiw tuku wan Biblia, maski kaj akgtum o akgtiy versículo akxni xapulana lakgaw. Alimakgtum tlan nataspitaw chu natakgalhchuwinamparayaw.

¹² Kxaʼawatiya página xla makatunu tratado tatsokgnit «Kalilakpuwanti uma». Tutsu min akgtum takgalhskinin chu textos xalak Biblia nema tlan natalikgalhtawakgaya tiku tachuwinanti akxni nalakgpimparaya. Ktratado ¿La akxilha kilhtamaku nema aku mima?, wa uma takgalhskinin min, «¿La natlawa Dios xlakata  tlakg tlan nawan uma kakilhtamaku?», chu textos wa umakgolh, Mateo 6:9, 10 chu Daniel 2:44. Chu ktratado ¿Tlan nalatamaparakgo tiku nikgonita?, wa uma takgalhskinin min, «¿Tuku xlakata kgolonaw chu niyaw?», chu textos wa umakgolh, Génesis 3:17-19 chu Romanos 5:12.

13. ¿La tlan kamaklakaskinaw tratados xlakata wi tiku natsukuyaw limakgalhtawakgeyaw Biblia?

¹³ Kakamaklakaskinti xalaksasti tratados xlakata wi tiku nalimakgalhtawakgeya Biblia. Kxaʼawatiya página wi akgtum Código QR *. Akxni liʼescaneartlawakan akgtum celular o atanu, tasiya página xla kisitiojkan kʼInternet chu tasiya akgtum video nema kamakgpuwantini latamanin nalikgalhtawakgakgo Biblia. Tratados na lichuwinan folleto Lakwan tamakatsin masta Dios chu makgpuwantininan nalikgalhtawakgakan akgtum xtakgalhtawakga. Akgtum liʼakxilhtit, tratado ¿Tiku xlikana mapakgsi kakilhtamaku? wan pi kalikgalhtawakgaka takgalhtawakga 5, chu tratado ¿Tuku talakaskin xlakata xatapaxuwan natawila familia? kinkawaniyan kalikgalhtawakgaw takgalhtawakga 9. Komo nakamaklakaskinaw tratados chuna la xlilat, tlan namaklakaskinaw Biblia akxni pulana nakatachuwinanaw latamanin chu akxni nakalakgamparayaw. Chu uma max natlawa pi tlakg nakatekgsaw tiku nakalimakgalhtawakgeyaw Biblia. ¿Tuku na tlan natlawaya xlakata tlakg liwana namaklakaskina xTachuwin Dios akxni nalichuwinana xalakwan xalaksasti?

14, 15. ¿La tlan nachuna natlawaya la Pablo akxni nalichuwinana Dios?

¹⁴ Pablo xlakputsa la «ntlakg lhuwa nti» xkgaxmatnikgolh akxni xlichuwinan Dios (kalikgalhtawakga 1 Corintios 9:19-23). ¿Tuku xlakata? Pablo wa pi chuna xtlawa xlakata «na[...]litlajakgoy judíos; [...] nti ntapakgsinikgoy limapakgsin, [...] nti ni kgalhikgoy limapakgsin [...] nti xaxlajwani kxtakanajlakan». Xkalakgchamputun lhuwa latamanin xlakata maski kaj makgapitsi xkalakgmaxtulh (Hech. 20:21). ¿La tlan natlawayaw la Pablo akxni lakkaxwiliyaw tuku nakalitachuwinanaw «kaxati kawaj» latamanin? (1 Tim. 2:3, 4.)

¹⁵ Anta klikgalhtawakga La Natlawayaw xTaskujut Dios akgatunu papaʼ kinkawanikanan la tlan natsukuyaw katakgalhchuwinanaw latamanin. Kakamaklakaskinti. ¿Chu komo atanu tuku katsiputunkgo tiku lamakgo anta niku lichuwinana Dios? Kalakpuwanti tuku tlan xwanti xlakata nakgaxmatputunkgo tamakatsin nema min kBiblia. Akgtum liʼakxilhtit, miʼakstu kakgalhskinkanti: «¿Tuku titaxtumakgo tiku nakkatachuwinan? ¿Tuku tlakg lilipuwankgo?». Alistalh kalakpuwanti akgtum texto nema max nakamakgtaya. Chatum superintendente xla circuito wan tuku tlawa xla chu xpuskat xlakata namaklakaskinkgo Biblia: «Lhuwa latamanin kinkamaxkiyan talakaskin nakkalikgalhtawakganiyaw akgtum versículo komo ni lhuwa tuku kkawaniyaw chu tunkun kkawaniyaw tuku kkalitachuwinamputunaw. Akxni kkawaninitawa kgalhen, tunkun kkalikgalhtawakganiyaw akgtum texto». Naʼakxilhaw makgapitsi temas, takgalhskinin chu textos xalak Biblia nema tlan kitaxtunit akxni kamaklakaskinkanit. ¿Tlan xkamaklakaskinti?

16. ¿La tlan namaklakaskina Isaías 14:7 akxni nalichuwinana Dios?

¹⁶ Komo lapat anta niku lu lakatsalakan limapakgsin chu lu tlawakan tuku nitlan, tlan xkgalhskininanti: «¿Lakpuwana pi nachan kilhtamaku akxni putum periódicos nawankgo pi putum kKatiyatni ni anan taʼakglhuwit chu putum latamanin paxuwamakgo? Wa uma tuku wan Biblia kʼIsaías 14:7. Biblia lichuwinan pulaklhuwa tuku Dios wanit pi natlawa xlakata naʼanan takaksni nialh makgas kilhtamaku». Alistalh tlan nawaniya pi likgalhtawakganiputuna akgtum texto nema lichuwinan uma.

17. ¿La tlan namaklakaskina Mateo 5:3?

¹⁷ ¿Tuwa tlajakan tumin anta niku lapat?  Komo chuna, tlan xkgalhskininanti: «¿La xlilhuwa tumin xlitlajat chatum tlat xlakata xfamilia tlan natawila?». Akxni kgalhtinitana, kawani: «Lhuwa latamanin tlakg lhuwa tumin tlajakgo nixawa la wanti, pero xfamiliajkan ni paxuwakgo. Wa xlakata, ¿tuku xlikana talakaskin?». Alistalh kalikgalhtawakgani Mateo 5:3 chu kakgalhskinti komo lakaskin nalitakgalhtawakgaya Biblia.

18. ¿La tlan namaklakaskina Jeremías 29:11 xlakata latamanin tlan namakgkatsikgo?

¹⁸ ¿Lipuwamakgolh tiku lamakgolh anta niku lapat xlakata tuku nitlan lalh nina makgas? Tlan xwanti: «Kminit kminchik xlakata naklitachuwinanan tuku tlan namamakgkatsiniyan». Alistalh kalikgalhtawakga Jeremías 29:11 (kalikgalhtawakga). Alistalh tlan xwani: «¿Kgaxpatti uma pulaktiy tuku Dios lakaskin kakgalhiw? “Takaksni” chu “takgalhkgalhin”. ¡Lu tlan kinkamamakgkatsiniyan pi xla lakaskin kapaxuwaw! Pero, ¿tlan nakgantaxtu uma?». Alistalh kamalaki folleto Lakwan tamakatsin masta Dios kʼakgtum takgalhtawakga nema na lichuwinan uma.

19. ¿La tlan namaklakaskina Apocalipsis 14:6, 7 xlakata nakatachuwinana tiku kgalhikgo xtakanajlakan?

¹⁹ ¿Kgalhikgo xtakanajlakan tiku lamakgo anta niku lichuwinana Dios? Komo chuna, tlan xwanti: «Komo chatum ángel xmilh chu xtachuwinan, ¿xkgaxpatni?». Alistalh kalikgalhtawakga Apocalipsis 14:6, 7 (kalikgalhtawakga). Alistalh tlan xwani: «Uma ángel wan “kapikuanitit Dios, [...] na nkalakgatakilhputanitit yama nti ntlawanit akgapun, chu ntiyat”. ¿Katsiya tuku xtukuwani tiku tlawalh akgapun chu katiyatni?». Alistalh kalikgalhtawakga Salmo 124:8, TNM, niku wan: «Kintamakgtaykan anta wi kxtukuwani Jehová, wa tiku tlawalh akgapun chu katiyatni». Alistalh kawani pi tlan tlakg nalitachuwinana Jehová.

20. 1) ¿La tlan namaklakaskina Proverbios 30:4 xlakata wi tiku namasiyaniya xtukuwani Dios? 2) ¿Anan akgtum versículo nema lu tlan kitaxtuninitan akxni lichuwinana Dios?

²⁰ Akxni nakatakgalhchuwinana tiku kamananku, tlan xwanti: «Klikgalhtawakganiputunan akgtum texto xalak Biblia nema lichuwinan tuku lu xlakaskinka». Alistalh kalikgalhtawakga Proverbios 30:4 (kalikgalhtawakga). Alistalh tlan xwani: «¿Tiku talichuwinama unu? Ni anan chatum lataman tiku tlan tlawa tuku wan unu, ¿ni chuna? Wa xlakata liwana tasiya pi lichuwinama Malakatsukina. * Pero takgalhskinin wa uma: ¿la nakatsiyaw xtukuwani? Kmasiyaniputunan unu kBiblia».

21, 22. 1) Akxni liwana laksakaw akgtum texto, ¿la tlan lakgpalini xlatamat tiku tachuwinamaw? 2) ¿Tuku lakpuwanita natlawaya akxni nalichuwinana Dios?

²¹ Ni katsiyaw la namakgtaya tiku nalikgalhtawakganiyaw akgtum texto nema liwana laksakwi. Akgtum liʼakxilhtit, kʼAustralia chatiy xTatayananin Jehová lakgatlakgkgolh xmalakcha chatum tsumat. Chatum tala kgalhskilh: «¿Katsiya tuku xtukuwani Dios?». Alistalh likgalhtawakganilh Salmo 83:18. Ama tsumat wan tuku lakpuwa akxni likgalhtawakganika uma texto: «¡Nila xakkanajla! Akxni ankgolh, ktawakalh kkimputlaw chu kalh 56 kilómetros xlimakgat asta niku kstakan libros xlakata xakputsalh komo atanu biblias nachuna xwankgo. Na kputsalh uma tukuwani kʼakgtum diccionario. Akxni liwana kkatsilh pi xtukuwani Dios, wa Jehová, klakpuwa: “¿Tuku atanu na ni kkatsi?”». Alistalh, uma tsumat chu tiku xʼama tatamakgaxtokga tsukukgolh likgalhtawakgakgo Biblia, chu ni lhuwa kilhtamaku titaxtulh, tamunukgolh.

²² Tiku likgalhtawakga xTachuwin Dios xlikana lakgpali xlatamat chu lipawan pi Jehová namakgantaxti tuku wanit natlawa (kalikgalhtawakga 1 Tesalonicenses 2:13). Tamakatsin nema min kBiblia tlakg tliwakga nixawa tuku akinin tlan nawanaw xlakata nachanaw kxnakujkan latamanin. Chuna, xTachuwin Dios xastakna chu kgalhi lhuwa litliwakga. ¡Kamaklakaskiw putum kilhtamaku!