Tuku katsiputunkgo tiku likgalhtawakgakgo
Xlakata tuku wa David kSalmo 37:25 chu tuku wa Jesús kMateo 6:33, ¿wamputun uma pi Jehová nikxni katimastalh talakaskin pi natsankgani tuku nawa chatum kstalanina Cristo?
David tsokgli pi «nikxni [x]akxilhnit akgxtakgwilinit Dios chatum ti tanks lamaj, nipara ixkamanan [x]akxilhnit para [n]askiwayan». Uma tuku lichuwinalh kaj xlichuwinama tuku xla xʼakxilhnit kxlatamat. Xla liwana xkatsi pi Jehová lu tlan kuentajtlawanan (Sal. 37:25). Pero tuku wa David ni wamputun pi nipara chatum kskujni Jehová wi tuku kitsankganinit o nikxni wi tuku nakitsankgani.
Milh kilhtamaku akxni asta David titaxtulh tuku lu tuwa. Makgtum akxni chuna titaxtulh, wa akxni xtsalanima Saúl. David xmakgasputma xliwat, chu skilh tuku xwalh chu tuku xwakgolh ksoldados (1 Sam. 21:1-6). Ama kilhtamaku akxni xitaxtuma tuku tuwa, tlan wanaw pi David skilh tuku tlan xwalh, pero nipara lakatum kBiblia wan pi kskiwayama. David akxilhli pi Jehová ni xmakgxtakgnit.
Anta kMateo 6:33, TNM, Jesús liwana wa pi Jehová nakamaxki tuku maklakaskinkgo xlakskujnin tiku pulana wilikgo kxlatamatkan xTamapakgsin Dios. Jesús wa: «Pulana kaputsatit xTamapakgsin Dios, chu xtalakaskin, chu putum tuku maklakaskinatit [la taway, tuku likgotnankan chu lhakgat] nakamaxkikanatit». Pero, Jesús na wa pi xlakata xʼama kaputsastalanikan, «[x]natalan» max xʼama kakitsankgani tuku nawakgo (Mat. 25:35, 37, 40). Wa uma tuku titaxtulh apóstol Pablo. Milh kilhtamaku akxni ni xkgalhi tuku nawa chu tuku nalikgotnan (2 Cor. 11:27).
Jehová kinkawaniyan pi pulaklhuwa la nakinkaputsastalanikanan. Xla max namasta talakaskin pi katitaxtuw tuku tuwa xlakata namakgtayananaw namaxkikan takgalhtin tuku limawakanalh Akgskgawini (Job 2:3-5). Akgtum liʼakxilhtit, makgapitsi kinatalankan la tiku xkamanukanit kcampos de concentración nazis, kalipekua xwilakgolh xlatamatkan xlakata xkaputsastalanimaka. Pulaktum tuku Satanás maklakaskilh xlakata xmakgatsankgananikgolh Jehová, wa pi xkatsankganilh tuku nawakgo. Natalan tiku ni makgxtakgkgolh Jehová chuntiya kgalhakgaxmatkgolh chu xla ni kamakgxtakgli. Xla mastalh talakaskin pi xtitaxtukgolh uma tuku tuwa, chuna la uku masta talakaskin pi putum kskujnanin katitaxtukgolh pulaklhuwa tuku tuwa. Pero liwana katsiyaw pi Jehová kamakgtaya natayanikgo putum tiku patinankgo xpalakata xtukuwani (1 Cor. 10:13). Kalakapastakwi tuku wan Filipenses 1:29: «Wa litamaxkinitantit xpalakata nCristo, ni xman wa nakanajlaniyatit, wampi na nalipatinanatit xpalakata».
Jehová wan pi putum kilhtamaku nakamakgtaya xlakskujnin. Akgtum liʼakxilhtit, Isaías 54:17, kinkawaniyan: «Katuwa tuku nalitalachipaputunkana, nitu katilitlawanikgon». Uma chu atanu tachuwin liwana kinkawaniyan pi Jehová nakuentajtlawa putum xkachikin, pero chatunu chatunu kstalaninanin Cristo max natitaxtu tuku tuwa, chu max asta namakgnikan.