1, 2. ¿Tuku xlakata xtalakaskin xkuentajtlawaka xkam puskat?

XAPULANA tuku Biblia wan pi xʼama kgantaxtu, lu xlakaskinka xlakata natatlawa tuku Jehová lakapastaknit. Anta kʼEdén uma tuku Dios wa pi xʼama tlawa: «Naktlawa pi wix [Satanás] chu puskat ni nalaʼakxilhputunatit, chu minkamanan chu xkam puskat ni nalaʼakxilhputunkgo». ¿Tuku lu nitlan xʼama latlawani xlakata ni xlaʼakxilhputun? Jehová wa pi xkam puskat xʼama “aktayami” Satanás chu wa pi Satanás xʼama “tsankxkiti” xkam puskat (Gén. 3:15). Xlakata lu ni xʼama laʼakxilhputunkgo xkamanan Satanás chu xkam puskat, Satanás asta xʼama malakgsputuputun xkam puskat.

² Ni kaks kinkamalakawaniyan pi salmista tasaskinilh Dios kxʼoración: “Kaʼakxilhti la [litaʼakglhuwimakgon] ti sitsinikgoyan, xlakan ni akxilhputunkgoyan, lakatakimakgon. Xlakan tsekg lichiwinankgonit tu nitlan natlawanikgo ti kalaksaknita. Akxtum laklhkakgonit la nalakatakikgo ti wix kapaxkiya. Wankgo: «Katantit, kakamasputuwi ti xala nak Israel xlakata yan pulataman nawankgo, y [nikxni] kalakapastakka para ama pulataman Israel»” (Sal. 83:2-4). Satanás xmaxkajwaniputun chu xmalakgsputuputun familia niku xʼama minacha xkam puskat. Xlakata xkuentajtlawalh uma kam chu tlan xmakgantaxtilh xtalakaskin, Jehová tlawalh amakgapitsi talakkaxlan.

3, 4. 1) ¿Tukuya kilhtamaku tsukulh kgantaxtu talakkaxlan xla Limapakgsin? 2) ¿Tuku wa kachikin Israel pi xʼama tlawa? 3) ¿La xʼama makgtayanan talakkaxlan xla Limapakgsin?

³ Akxni xkamanan Abrahán, Isaac chu Jacob lhuwa millón litaxtukgolh, Jehová akgtum kachikin tlawalh: xamakgan xkachikin Israel. Jehová limaklakaskilh Moisés xlakata xkatatlawalh israelitas talakkaxlan xla Limapakgsin. Kamaxkilh Limapakgsin chu wankgolh pi xʼama kgalhakgaxmatkgo. Biblia wan: «Moisés [...] tiyalh libro xla talakkaxlan chu kalikgalhtawakganilh putum kachikin. Alistalh xlakan wankgolh: “Putum tuku Jehová lichuwinanit nakmakgantaxtiyaw, chu nakkgalhakgaxmataw”. Wa xlakata Moisés tiyalh kgalhni chu kstajmakgalh kxokgspun kachikin chu wa: “Unu wi kgalhni xla talakkaxlan nema Jehová katatlawanitan xpalakata putum umakgolh tachuwin”» (Éx. 24:3-8).

⁴ Talakkaxlan xla Limapakgsin tsukulh kgantaxtu ksipi Sinaí kkata 1513 a.n.J. Dios limaklakaskilh uma xlakata Israel xkachikin xlitaxtulh. Ama kilhtamaku litaxtulh xJuezkan, tiku masta limapakgsin chu xMapakgsinakan (Is. 33:22). Tuku titaxtulh Israel masiya tuku kitaxtu akxni kgalhakgaxmatkan xaʼakgstitum xlimapakgsin Dios chu akxni ni kgalhakgaxmatkan. Xlakata ni xtaxkajwanilh familia niku xʼama minacha xkgawasa Abrahán, Limapakgsin xwan pi ni xlitatamakgaxtokgatkan xwanit tiku ni xkakninanikgo Jehová chu ni xlikakninanitkan xwanit nixaxlikana dioses (Éx. 20:4-6; 34:12-16).

5. 1) Xlakata talakkaxlan xla Limapakgsin, ¿tuku tlan xlitaxtukgolh israelitas? 2) ¿Tuku xlakata Dios lakgmakgalh Israel?

⁵ Talakkaxlan xla Limapakgsin tlawalh pi xʼanalh sacerdotes, chu uma limasiyalh pi xʼama anan alistalh atanu sacerdotes nema tlakg xlakaskinka tuku xʼama tlawakgo (Heb. 7:11; 10:1). Uma xtlawa pi israelitas tlan «tamapakgsin xla sacerdotes» xlitaxtukgolh komo xkgalhakgaxmatkgolh xlimapakgsin Jehová (kalikgalhtawakga Éxodo 19:5, 6). Pero Israel ni makgantaxtilh uma tuku xtalakaskin. Lakgmakgalh Mesías, wa tiku tlakg xlakaskinka xkam Abrahán. Wa xlakata Dios lakgmakgalh uma kachikin.

6. ¿Tuku makgantaxtilh Limapakgsin?

⁶ Xlakata Israel makgatsankgananilh Jehová, nila makgatsilh putum tiku xʼama litaxtukgo tamapakgsin xla sacerdotes. ¿Xwamputun uma pi Limapakgsin nitu xlitaxtunit? Ni chuna. Limapakgsin xwilikanit xlakata xkuentajtlawalh xkam puskat chu xlakata tlan xlakgapaska Mesías. Uma kgantaxtulh akxni Cristo chilh chu katsika tiku xwanit. Wa xlakata Biblia wan pi xlikgatsputni «limapakgsin, wa nCristo» (Rom. 10:4). Pero ¿tiku xʼama kgalhikgo talakgalhaman nalitaxtukgo tamapakgsin xla sacerdotes? Jehová tlawalh atanu talakkaxlan xlakata xʼanalh akgtum xasasti kachikin.

7. ¿Tuku wa Jehová akxni limaklakaskilh palakachuwina Jeremías?

⁷ Akxni lhuwa kilhtamaku xtsankga xlakata xlakxtlawaka talakkaxlan xla Limapakgsin, Jehová tlawalh pi palakachuwina Jeremías xmakatsininalh pi xʼama tatlawa Israel xasasti talakkaxlan (kalikgalhtawakga Jeremías 31:31-33). Ama xasasti talakkaxlan ni xtachuna xʼama wan la talakkaxlan xla Limapakgsin, xlakata uma xʼama tlawa pi tlan xtapatinanka talakgalhin maski ni xmakamastaka animales. ¿La tlan xlalh uma?

8, 9. 1) Xkgalhni Jesús nema stajtamakgalh ¿tuku tlawa pi tlan nakgantaxtu? 2) ¿Tukuya talakgalhaman namakglhtinankgo tiku makgtanukgo kxasasti talakkaxlan? (Kaʼakxilhti xapulana dibujo.)

⁸ Titaxtulh akglhuwa siglos, Jesús lakkaxwililh Taway xla kiMalanakan, 14 xla nisán kata 33 xla kinkilhtamakujkan. Akxni xlichuwinama copa xla vino, kawanilh 11 xlimakgalhtawakget tiku ni xmakgatsankgananikgo: «Yuma [...] mpukgotnu, wa yuma xasasti talakkaxlan wa ntu lilakkaxlay nkinkgalhni, wa ntu wixin mimpalakatakan nalistajtamakgan» (Luc. 22:20). Chu Mateo tsokgli tuku Jesús wa xlakata vino: «Wa yuma nkinkgalhni xla xasasti talakkaxlan, wa ntu xpalakatakan lhuwa nalistajtamakgan, lakimpi nalitamatsankgananiy xtalakgalhinkan» (Mat. 26:27, 28).

⁹ Xkgalhni Jesús nema stajtamakgalh wa tuku tlawa pi tlan nakgantaxtu xasasti talakkaxlan. Xkgalhni na tlawa pi natapatinankan talakgalhin putum kilhtamaku. Jesús ni makgtanu kxasasti talakkaxlan. Xlakata ni lakgalhinalh, ni xtalakaskin pi xtapatika. Pero Dios tlan xtlawa pi xkamanan Adán xlitamakgtayakgolh xkgalhni Jesús nema stajtamakgalh. Na tlan xkalilaksaka espíritu santo makgapitsi tiku ni xmakgatsankgananikgolh, xlakata «lantla xlakgskgatan» xlitaxtukgolh (kalikgalhtawakga Romanos 8:14-17). Xlakata kxlakatin Dios ni xʼamakgo kgalhikgo talakgalhin, uma xkilhchani pi xʼamakgo litaxtukgo la Jesús, xKgawasa Dios. Xlakan “makxtum nakatalakgchan nCristo wa ntu nkgalhi Dios” chu nakgalhikgo talakgalhaman tuku Israel makgatsankgalh, wa pi «tamapakgsin xla sacerdotes» nalitaxtukgo. Xlakata umakgolh tiku “makxtum nakatalakgchan nCristo wa ntu nkgalhi Dios”, apóstol Pedro wa: «Wixin “tiku kalaksakkanitantit, lu xlakaskinka sacerdotes, akgtum xasanto kachikin, akgtum kachikin xatalaksakni, xlakata nalichuwinanatit kxlakatin amakgapitsin wantu xatlan tlawanit” tiku kamaxtun kkapukswa chu kalin kxastlan xkgakganat» (1 Ped. 2:9, TNM). ¡Lu xlakaskinka uma xasasti talakkaxlan! Tlawa pi makgapitsi kstalaninanin Jesús namakgtapakgsikgo kxlipulaktiy tiku litaxtukgo xkam Abrahán.

10. 1) ¿Tukuya kilhtamaku tsukulh kgantaxtu xasasti talakkaxlan? 2) ¿Tuku xlakata asta kPentecostés kata 33 tsukulh kgantaxtu?

¹⁰ Xasasti talakkaxlan ni tsukulh kgantaxtu akxni Jesús lakkaxwililh Taway xla kiMalanakan. ¿Tuku xlakata? Xlakata pulana xtalakaskin pi kstajtamakgalh xkgalhni Jesús chu xtalakaskin pi Jehová xmakgamakglhtinalh xtamakamastan. Nachuna, xtalakaskin pi xkalilaksakka espíritu santo tiku “makxtum nakatalakgchan nCristo wa ntu nkgalhi Dios”. Wa xlakata, xasasti talakkaxlan tsukulh kgantaxtu kPentecostés kata 33 xla kinkilhtamakujkan, akxni makgapitsi kstalaninanin Jesús kalilaksakka espíritu santo.

11. 1) ¿La tlawalh xasasti talakkaxlan pi judíos chu tiku ni judíos xmakgtapakgsikgolh kʼIsrael xaʼespiritual? 2) ¿La xlilhuwa latamanin xʼamakgo makgtanukgo kxasasti talakkaxlan?

¹¹ Maski xlikana pi talakkaxlan xla Limapakgsin xtachuna la «nialh xlakgasiy», o nialhtu litaxtulh akxni Jehová limaklakaskilh Jeremías xlakata namakatsininan pi xʼama tatlawa xasasti talakkaxlan Israel, uma talakkaxlan sputli asta  akxni xasasti tsukulh kgantaxtu (Heb. 8:13). Akxni chuna lalh, Jehová tlan kamakgamakglhtinalh judíos chu tiku ni judíos nema ni xtacircuncidarlikgonit, xlakata «wa nti [...] circuncidarlanit [...] kxnaku kilhtsukuy, kspíritu nakilhti, ni wa nakilhti» ktatsokgni (Rom. 2:29). Jehová xʼama limaklakaskin xasasti talakkaxlan xlakata xtsokgwililh xlimapakgsin “kxtapuwankan [chu] kxnakukan” (Heb. 8:10). Kxasasti talakkaxlan xʼamakgo makgtanukgo 144,000 latamanin. Umakgolh xʼamakgo litaxtukgo xasasti kachikin: «xʼIsrael Dios», uma kilhchanima, Israel xaʼespiritual (Gál. 6:16; Apocalipsis [Revelación] 14:1, 4).

12. ¿La talakxtumikgo talakkaxlan xla Limapakgsin chu xasasti talakkaxlan?

¹² ¿La talakxtumikgo talakkaxlan xla Limapakgsin chu xasasti talakkaxlan? Ktalakkaxlan xla Limapakgsin makgtanulh Jehová chu kachikin Israel, chu kxasasti talakkaxlan makgtanu Jehová chu Israel xaʼespiritual. Kʼakgatunu talakkaxlan wi tiku limaklakaskinka xlakata xlakkaxwilika: kxapulana limaklakaskinka Moisés, chu kxasasti wa Jesús. Kpulaktiy talakkaxlan talakaskilh kgalhni: ktalakkaxlan xla Limapakgsin, limaklakaskinka xkgalhni animal; chu kxasasti talakkaxlan, xkgalhni Jesús nema stajtamakgalh. Moisés wa tiku xpulalima kachikin Israel akxni xwi talakkaxlan xla Limapakgsin, chu kxasasti talakkaxlan, Jesús, xAkgxakga congregación wa tiku pulalima xasasti kachikin (Efes. 1:22).

13, 14. 1) ¿Tuku xlakata wanaw pi Tamapakgsin takilhti kxasasti talakkaxlan? 2) ¿Tuku talakaskin xlakata Israel xaʼespiritual tlan natamapakgsinan Cristo kʼakgapun?

¹³ Tamapakgsin takilhtinit kxasasti talakkaxlan , xlakata tlawa pi kaʼanalh akgtum xasanto kachikin, tiku kgalhikgo talakgalhaman mapakgsinanin chu sacerdotes nalitaxtukgo kʼuma Tamapakgsin xalak akgapun. Uma kachikin litaxtu xlipulaktiy tiku litaxtu xkam Abrahán (Gál. 3:29). Uma xasasti talakkaxlan matliwakglha talakkaxlan nema tatlawaka Abrahán.

¹⁴ Chuna la akxilhnitaw, xasasti talakkaxlan tlawalh pi xʼanalh Israel xaʼespiritual chu anta takilhti pi tiku anta makgtapakgsikgo “makxtum nakatalakgchan nCristo wa ntu nkgalhi Dios”. Pero talakaskin atanu talakkaxlan nema natlawa pi kstalaninanin Cristo tiku xatalaksakni natatawilakgo Cristo kxTamapakgsin xalak akgapun chu tlan mapakgsinanin chu sacerdotes nalitaxtukgo.

15. ¿Tukuya talakkaxlan katatlawalh Jesús xʼapóstoles?

¹⁵ Akxni xlakkaxwilinita Taway xla kiMalanakan, Jesús katatlawalh 11 xʼapóstoles akgtum talakkaxlan. Tlakg makglhuwa limapakuwikan talakkaxlan xla Tamapakgsin (kalikgalhtawakga Lucas 22:28-30, Hua Xasasti Talaccaxlan, 1999). Kʼamakgapitsi talakkaxlan Jehová na makgtanu, pero uma talakkaxlan kajwatiya Jesús katatlawalh xatalaksakni kstalaninanin. Akxni Jesús wa «xtachuna lantla Kintlat» kintatlawanit akgtum talakkaxlan, max xlichuwinama talakkaxlan nema Jehová xtatlawanit xlakata sacerdote xlitaxtulh «nkaxani liwayaj xtiwaj, xtachuna lantla xliwi Melquisedec» (Heb. 5:5, 6).

16. ¿Tuku tlawa pi namakglhtinankgo kstalaninanin Cristo xatalaksakni, talakkaxlan xla Tamapakgsin?

¹⁶ Umakgolh 11 apóstoles ni makgxtakgkgolh Jesús kputum taʼakglhuwit nema titaxtulh. Talakkaxlan xla Tamapakgsin liwana lakkaxwililh pi xʼamakgo tamapakgsinankgo Jesús kʼakgapun chu sacerdotes xʼamakgo litaxtukgo. Pero ni kajwatiya umakgolh 11 apóstoles xʼamakgo makglhtinankgo uma talakgalhaman. Jesucristo tasiyanilh apóstol Juan kʼakgtum visión chu wanilh: «Wanti xtlajanalh, kit nakmaxkiy ntalakaskin mpi anta nakintatawilay klaktawilh kkimpumapakgsin; xtachuna lantla nkit ktlajananit, na wa nkinTlat, ktatawilalh klaktawilh kxpumapakgsin» (Apoc.  3:21). Wa xlakata, ktalakkaxlan xla Tamapakgsin na makgtanukgo 144,000 xatalaksakni kstalaninanin Cristo (Apoc. 5:9, 10; 7:4). Uma talakkaxlan tlawa pi natamapakgsinankgo kʼakgapun. Xtachuna la akxni chatum tsumat litatawilat laksakkan xlakata natatamakgaxtokga chatum mapakgsina chu natamapakgsinan. Biblia kalimapakuwi kstalaninanin Cristo tiku xatalaksakni, «ntsumat [x]litatawilat» Cristo chu wan pi litaxtukgo la tiku «nkajku xaʼakgstitum tsumat» tiku natamakgaxtokga (Apoc. 19:7, 8; 21:9; 2 Cor. 11:2).

17, 18. 1) Tsinu kalichuwinanti la xTamapakgsin Mesías takilhtinit kʼakgchaxan talakkaxlan nema kalichuwinanitawa. 2) ¿Tuku xlakata tlan nakanajlaniyaw Tamapakgsin?

¹⁷ Akgatunu talakkaxlan nema lichuwinanitaw kʼuma akgtiy artículos, kilhchanima pulaktum o pulaktiy tuku lu xlakaskinka xpalakata Tamapakgsin (kaʼakxilhti recuadro «La namakgantaxti Dios xtalakaskin», nema wi kxapulana artículo). Uma liwana masiya pi Tamapakgsin takilhtinit kmakgapitsi talakkaxlan. Wa xlakata, lhuwa tuku tlawa pi tlan nakanajlaniyaw xTamapakgsin Mesías. Xlikana pi wa uma tuku Dios namaklakaskin xlakata namakgantaxti tuku lakapastaknit natlawa xpalakata Katiyatni chu latamanin (Apoc. 11:15).

¹⁸ Nila tiku nawan pi Tamapakgsin ni katikasikulunatlawalh latamanin putum kilhtamaku. Liwana katsiyaw pi kajwatiya xTamapakgsin Dios namasputu putum kintaʼakglhuwitkan. Wa xlakata, ¡xatapaxuwan kakaliniw latamanin uma tamakatsin! (Mat. 24:14.)