1. 1) ¿La akxilha Jehová taskujut? 2) ¿Tuku talakgalhaman kamaxkinit kskujnin?

JEHOVÁ putum kilhtamaku lipaxuwa xtaskujut (Sal. 135:6; Juan 5:17). Chu lakaskin pi latamanin chu ángeles nachuna kamakgkatsikgolh, wa xlakata kamaxki taskujut nema lu kamakgapaxuwa. Akgtum liʼakxilhtit, tlawalh pi xapuxku xKgawasa xmakgtayalh akxni tlawalh putum tuku anan (kalikgalhtawakga Colosenses 1:15, 16). Wa xlakata Biblia kinkawaniyan pi akxni Jesús nina xmin kKatiyatni, xtawilacha Dios kʼakgapun chu xlitaxtu «skujni xapuxku» (Prov. 8:30).

2. ¿Tuku xlakata katsiyaw pi Jehová putum kilhtamaku kamaxkinit xʼángeles xlakaskinka taskujut nema kamakgapaxuwa?

² Niku tsuku Biblia asta niku sputa, masiya pi Jehová putum kilhtamaku kamaxkinit taskujut xʼángeles. Akxni Adán chu Eva lakgalhinankgolh chu kamaxtuka kjardín xaʼEdén, Dios «kayawalh querubines chu akgtum espada nema xkgalhi lhkuyat nema xtakgalhwitiwaka xlakata nila xtitaxtuka ktiji nema xʼan niku xya kiwi xla latamat» (Gén. 3:24). Chu Apocalipsis o Revelación 22:6 wan pi Jehová «malakgacha[lh] xʼángel lakimpi namasiyunikgoy kskujnin wa xlipaks nkatuwa wa ntu lakapala nalay».

3. ¿Tuku xlakata wanaw pi Jesús tlawalh chuna la xTlat akxni xlama kKatiyatni?

³ Akxni xlama kKatiyatni, Jesús xatapaxuwan tlawalh taskujut nema xmaxkinit xTlat. Jesús nachuna tlawalh la Jehová chu kalakgayawalh xlakaskinka taskujut kstalaninanin. Tlawalh pi xpaxuwakgolh xlakata tuku tlan xʼama makgantaxtikgo akxni kawanilh: «Wa nti nkinkanajlaniy wa ntatlaw ntu nkit ktlaway, na natlaway; na tlakg laktlanka natlaway, ni xawa yuma; sampi klakga[ma] nkit xaTlat» (Juan 14:12). Nachuna, wa pi uma taskujut lu lakapala xlitatlawat xwanit akxni kawanilh: «Xlakaskinka natlawayaw xtatlaw nti nkimalakgachalh, [xlakata] xkgakgayku; wa ntsisni, namin, akxni nialhti la ntu liskuja» (Juan 9:4).

4-6. 1) ¿Tuku xlakata paxtikatsininanaw pi Noé kgalhakgaxmatnilh Jehová? 2) ¿La litamakgtayayaw xlakata Moisés tlawalh taskujut nema Jehová lakgayawalh? 3) Maski Jehová lakgpalitilha taskujut tuku kalakgayawa kskujnin, ¿la makgtayanan uma?

⁴ Akxni Jesús nina xmin kKatiyatni, Jehová kalakgayawalh latamanin taskujut nema xʼamakgo lipaxuwakgo. Maski Adán chu Eva ni tlawakgolh taskujut nema xkamaxkinit Dios, amakgapitsi makgantaxtikgolh tuku xkalakgayawakanit (Gén. 1:28). Akgtum liʼakxilhtit, xlakata Noé chu xfamilia tlan xlakgtaxtukgolh akxni xmilh Munkaklat, Dios liwana wanilh la xtlawalh arca. Chu akinin lamaw la uku xlakata Noé chuna tlawalh la limapakgsika (Gén. 6:14-16, 22; 2 Ped. 2:5).

⁵ Moisés nachuna matlawinalh tabernáculo chu kalakkaxwililh sacerdotes la xwaninit Jehová (Éx. 39:32; 40:12-16). ¿La litamakgtayayaw xlakata chuna tlawalh la wanika? Chuna la wa apóstol Pablo, tabernáculo chu sacerdotes wa xkilhchanima tuku laktlan xʼama min alistalh (Heb. 9:1-5, 9; 10:1).

⁶ Chuna la kgantaxtutilha xtalakaskin, Jehová lakgpali taskujut nema kamaxki kskujnanin; pero putum kilhtamaku malanki Jehová chu na litamakgtayakgo latamanin tiku ni makgxtakgkgo. Putum tuku Jesús tlawalh akxni nina xmin kKatiyatni chu akxni xlama unu kKatiyatni, malankilh Jehová (Juan 4:34; 17:4). Nachuna tlawa taskujut nema uku kinkalakgayawakanitan (Mat. 5:16; kalikgalhtawakga 1 Corintios 15:58). ¿La malanki Jehová uma taskujut?

7, 8. 1) Kalichuwinanti taskujut nema kinkalakgayawakanitan. 2) ¿Tuku kilitlawatkan akxni Jehová wi tuku kinkawaniyan natlawayaw?

⁷ Lu lipaxuwayaw pi Jehová kinkalakgayawanitan taskujut akinin tiku makglakgalhinanin (1 Cor. 3:9). Tiku tlawakgo Salones de Asambleas, Pukgalhtawakga xla xTatayananin Jehová chu sucursales tlawamakgo taskujut xtachuna la tlawakgolh Noé chu Moisés. Max anta makgtayanamaw niku tlawamaka uma taskujut, o kaxtlawamaw akgtum Pukgalhtawakga o makgtlawamaw niku pulalinkan taskujut xliputum katiyatni xla xtatayananin Jehová anta kWarwick (Nueva York) (kaʼakxilhti xapulana dibujo). Komo makgtlawamaw uma taskujut, lu kapaxkiw: uma xasanto taskujut. Na wi akgtum taskujut nema putum akinin kinkawanikanitan namakgtlawayaw. Wa namakglichuwinanaw xTamapakgsin Dios, uma malanki Jehová chu kamakgtaya tiku kgalhakgaxmatnikgo (Hech. 13:47-49). Xkachikin Dios kinkapulalinan xlakata lu tlan natlawayaw uma taskujut. Wa xlakata, min kilhtamaku kinkalakgayawakanan tuku nikxni xtlawanitaw.

⁸ Kstalaninanin Cristo tiku ni makgatsankgananikgo Dios, xatapaxuwan kgalhakgaxmatnikgonit xkachikin Jehová (kalikgalhtawakga Hebreos 13:7, 17). Max pulana ni naʼakgatekgsaw tuku xlakata akgtum taskujut chuna kilitlawatkan.  Pero, liwana katsiyaw pi lu tlan kinkakitaxtuniyan akxni lakgpaliyaw tuku Jehová akxilha pi chuna xlilat.

9. ¿Tukuya tlan liʼakxilhtit wilikgo lakgkgolotsin xalak congregación?

⁹ Liʼakxilhtit nema wilikgo lakgkgolotsin xalak congregación, masiya pi lu tlawaputunkgo xtalakaskin Dios (2 Cor. 1:24; 1 Tes. 5:12, 13). Masiyakgo pi xatapaxuwan skujkgo chu chuna tlawakgo maski tanu tanu tuku natitaxtukgo. Xatapaxuwan lichuwinankgo xTamapakgsin Dios chu lakgpalitilhakgo chuna la tlawakgo. Maski pulana makgapitsi xpekuankgo nalakkaxwilikgo nalichuwinankgo Dios kteléfono, anta niku chankgo barcos o niku lamakgolh lhuwa latamanin, tunkun akxilhkgonit pi lu tlan kitaxtunit. Akgtum liʼakxilhtit, kgalhtati precursores xalak Alemania, chatum kgolotsin xalak congregación litaxtu xtukuwani Michael, liwana lakpuwankgolh naʼankgo lichuwinankgo Dios anta niku kstanankan chu makgasata niti xʼanit lichuwinan Dios anta. Michael lakapastaka: «Xtitaxtunit makgapitsi kata ni xaklichuwinanitaw Dios niku stanankan, wa xlakata lu xakpekuamaw. Chu Jehová tiku putum akxilha, tlawalh pi lu tlan xkinkakitaxtunin ama tsisa. ¡Lu klipaxuwaw xlakata klipawaw Jehová chu ktlawaw la wan kilikgalhtawakgakan La Natlawayaw xTaskujut Dios!». ¿Na tlan chuna wanaw akinin? ¿Lichuwinamputunaw Dios chuna la nikxni tlawanitaw?

10. Nina lhuwa kata titaxtunit, ¿tuku lakgpalinit xkachikin Dios?

¹⁰ Min kilhtamaku, talakaskin wi tuku natalakgpali ksucursales. Nina makgas, makgapitsi sucursales makxtum katatlawaka atanu nema tlakg laklanka. Tiku anta kskujkgo wi tuku limakgxtakgkgonit, pero putum akxilhkgonit pi lu tlan kitaxtunit xlakata chuna tlawaka (Ecl. 7:8). ¡Lu lanka talakgalhaman kgalhikgo umakgolh natalan tiku xatapaxuwan skujnanikgo Dios, xlakata na makgtanumakgolh tuku titaxtuma xkachikin Jehová la uku!

11-13. ¿Tuku lakgpalikgonit kxlatamatkan makgapitsi natalan xlakata tuku talakgpalinit kxkachikin Dios?

¹¹ Lhuwa tuku lu xlakaskinka kinkamasiyanikgoyan natalan tiku wi tuku lakgpalikgonit kxlatamatkan xlakata makgapitsi sucursales makxtum katlawaka. Makgapitsi, lhuwa kata kskujnanikgonit Dios xaputum kilhtamaku kBetel niku xtapakgsikgo. Akgtum tamakgaxtokgat tiku xmakgtapakgsikgo kʼakgtum Betel xalak Centroamérica niku ni lhuwa tiku kskujkgo, skinika pi xʼankgolh kBetel xalak México niku tlakg lhuwa betelitas wilakgolh. Rogelio wan: «Lu tuwa kmakgkatsiw nakkamakgxtakgaw kifamiliajkan chu kiʼamigoskan». Chu Juan, atanu tala tiku alh kMéxico, makgkatsilh la komo xtsukupa xlatamat, xla wan: «Talakaskin xasasti naputsaparaya tiku nakatalalipina chu nalismaniya tuku anta lismanikgo chu nachuna la lakpuwankgo».

¹² Na tuwa kakitaxtunilh betelitas xalak makgapitsi países xalak Europa, akxni ankgolh ksucursal xalak Alemania. Tiku lu lakgati kalaksipijni tlan kaʼakgatekgsni natalan tiku kskujnanikgo Dios kSuiza, xlakata la xlituwa makgkatsikgolh namakgxtakgkgo laklanka kalaksipijni Alpes. Natalan tiku xminkgoyacha kʼAustria lu xlakapastakkgo la xwilakgolh kxkachikinkan.

¹³ Tiku ankgonit skujnanikgo Dios kʼatanu país, talakaskinit nalismanikgo xasasti niku natawilakgo, nakataskujkgo natalan tiku ni xlakgapaskgo chu lhuwa tiku na talakaskinit nakatsinikgo atanu taskujut. Nachuna, talakaskin nasmanikgo kxasasti congregación chu nalichuwinankgo Dios niku ni xlismanikgo, niku max atanu tachuwin chuwinankan. Maski tuwa kakitaxtuninit uma, lhuwa betelitas chuna tlawakgonit. ¿Tuku xlakata?

14, 15. 1) ¿La limasiyakgonit lhuwa natalan pi lu xlakaskinka akxilhkgo naskujnanikgo Jehová kaniwa niku xla kawili? 2) ¿La tlan nachuna natlawayaw la umakgolh natalan?

¹⁴ Grethel wan: «Kmakgamakglhtinalh  taskujut nema kilakgayawaka xlakata chuna klimasiyanilh Jehová pi kpaxki pero ni kaj xlakata kwi kʼakgtum país, kʼakgtum edificio o klakgaya akgtum taskujut». Dayska wan: «Tiku xkintlawanima invitación wa Jehová, wa xlakata tunkun kmakgamakglhtinalh». André chu Gabriela nachuna lakpuwankgo. Xlakan wankgo: «Kakxilhwi pi tlan tlakg xakskujnaniw Jehová chu ni wa xlakaskinka xakakxilhwi tuku akinin xaklakaskinaw». Xlakan lakpuwankgo pi akxni xkachikin Jehová wi tuku lakgpali, tlakg tlan nawan xatapaxuwan namakgamakglhtinanaw nixawa nalisitsiyaw.

¹⁵ Akxni makgapitsi sucursales makxtum katatlawakan atanu, makgapitsi betelitas precursores regulares kaliyawakan. Wa uma tuku titaxtukgolh makgapitsi natalan akxni sucursales xalak Dinamarca, Noruega chu Suecia makxtum katlawaka xlakata kaj xtawilalh sucursal xalak Escandinavia. Florian chu Anja na kalakgayawaka precursores nalitaxtukgo, xlakan wankgolh: «Tuwa kakxilhaw tuku kinkalakgayawakanitan, pero na lu makgapaxuwanan. Lu kinkamakgapaxuwayan pi Jehová kinkamaklakaskinan kaniwa niku lakaskin. Tlan kwanaw xliputum kinakujkan pi lhuwa tasikulunalin kmakgamakglhtinanitaw». Maski max ni putum akinin chuna natitaxtuyaw, ¿tlan xtlawaw la umakgolh natalan chu chuna la xlakan, tlan pulana nawiliyaw xTamapakgsin Dios kkilatamatkan? (Is. 6:8.) Jehová putum kilhtamaku kasikulunatlawa tiku xlakaskinka akxilhkgo nataskujkgo kaniwa niku xla nakawili.

16. 1) ¿Tuku tastakyaw kinkamaxkiyan Gálatas 6:4? 2) ¿Tuku tlakg xatlan talakgalhaman nema anan?

¹⁶ Xlakata makglakgalhinanin, min kilhtamaku tuku tlawayaw tamalakxtumiyaw tuku tlawakgo amakgapitsin. Pero xTachuwin Dios kinkastakyawayan pi kajwatiya kaʼakxilhwi tuku kinchatunukan tlan tlawayaw (kalikgalhtawakga Gálatas 6:4). Lhuwa akinin ni lakgkgolotsin xalak congregación litaxtuyaw. Chu nila kimputumkan litaxtuyaw precursores, misioneros  chu betelitas. Pero putum kilhtamaku kalakapastakwi pi kimputumkan makglhtinanitaw tlakg xatlan talakgalhaman nema anan: wa pi nataskujaw Jehová akxni nalichuwinanaw xTamapakgsin. ¡Uma lu lanka talakgalhaman!

17. 1) ¿Tuku max nila katitlawaw kxkakilhtamaku Satanás? 2) ¿Tuku xlakata uma ni xlitlawat pi nataxlajwani kintakanajlakan?

¹⁷ Kʼuma xkakilhtamaku Satanás, max nila naskujnaniyaw Jehová chuna la lakaskinaw. Pero uma ni xlitlawat pi nataxlajwani kintakanajlakan. Maski tuku lakgayaw kfamilia, tajatat o atanu tuku natlawa ni lu lhuwa naskujnaniyaw Dios, tlan taskujaw komo lichuwinanaw xtukuwani chu xTamapakgsin akxni tlan chuna tlawayaw. ¡Ni kalakpuwaw pi ni lu xlakaskinka! Tuku tlakg xlakaskinka wa pi lu naliskujaw. Na kaskiniw Jehová pi kakasikulunatlawalh tiku tlakg skujnanikgo nixawa akinin. Kalakapastakwi pi putum tiku malanki xtukuwani Jehová, xla lu xlakaskinka akxilha.

18. ¿Tuku liwana kililakpuwatkan natlawayaw chu tuku xlakata?

¹⁸ Maski makglakgalhinanin akinin, Jehová lipaxuwa xlakata taskujaw. ¡Lu lanka talakgalhaman akxilhaw nataskujaw Dios kʼuma xaʼawatiya kilhtamaku! Wa xlakata, liwana lakpuwanitaw nakgalhkgalhiyaw asta akxni nachin xasasti katiyatni xlakata nakgalhiyaw tuku lakaskinaw, katsiyaw pi ama kilhtamaku nakgalhiyaw xaxlikana latamat, latamat nema nikxni nasputa chu xatapaxuwan (1 Tim. 6:18, 19).

19. ¿Tuku nakinkamaxkiyan Jehová kkilhtamaku nema aku mima?

¹⁹ La uku akxni nialh makgas tsankga xlakata natanuyaw kxasasti katiyatni, kalilakpuwaw tuku Moisés kawanilh israelitas akxni nina xtanukgo kTiyat nema xKawanikanit pi Nakamaxkikan: «Jehová miDios xlikana natlawa pi tlakg nakgalhiya xlakata tuku naliskuja» (Deut. 30:9). Akinin tiku taskujwi Jehová, akxni titaxtunita nawan Armagedón, nakinkamaxkiyan Katiyatni, chuna la wanit pi natlawa. Ama kilhtamaku wi tuku xasasti nakinkalakgayawakanan: wa pi katlawaw uma katiyatni akgtum xastlan paraíso.