1, 2. 1) ¿Tuku tuwa xtitaxtuma congregación xalak Colosas? 2) ¿Tuku tastakyaw kamaxkilh Pablo natalan xalak Colosas?

TUWA tuku xtitaxtuma congregación xalak Colosas kxapulana siglo. Makgapitsi tiku anta xmakgtapakgsikgo xtlawakgo pi ni akxtum xlakpuwanka, xlakata xwankgo pi xlimakgantaxtitkan xwanit Limapakgsin nema maxkika Moisés. Amakgapitsi xwankgo pi nipara tsinu xlilat nalipaxuwakan tuku anan klatamat. Xlakata ni xkapasalh uma nixaxlikana tamasiyat, apóstol Pablo tsokgnilh maktum carta uma congregación. Anta kawanilh: «Kuintaj kakatlawakantit mpi ti ni nakaliʼakgskgawiyan [lhuwa takatsin chu, TNM] wa ntu ni kgalhiy xlakgasi ntachuwin [...], xampi wa yuma nkaj xtapalaksaknikan nchixkuwin mintilhanitancha, kaj wa xtachuna wa lantla nkaj xachunata ntalakapastakna xala katuxawat, wampi ni wa lantla xtamasiyun nCristo» (Col. 2:8).

² Komo amakgolh kstalaninanin Cristo xatalaksakni kaj wa xlilakpuwankgolh «ntalakapastakna xala katuxawat», xkitaxtulh pi xlakgmakgamakgo tuku Dios xkalilakgmaxtuma (Col. 2:20-23). Xlakata xkuentajtlawakgolh chuna la lu tlan xtalalinkgo Dios, Pablo kastakyawalh: «Wa nkalakapastaktit wa ntu xala talhman, ni wa ntu xala katiyatna» (Col. 3:2). Chuna, xnatalan Cristo kaj wa xlilakpuwatkan xwanit takgalhkgalhin tuku “kamakinikanit kʼakgapun” (Col. 1:4, 5).

3. 1) ¿Tuku takgalhkgalhin lilakpuwankgo kstalaninanin Cristo xatalaksakni? 2) ¿Tuku takgalhskinin nakakgalhtiyaw kʼuma artículo?

 ³ Kstalaninanin Cristo xatalaksakni tiku lamakgolh uku, na kaj wa lilakpuwankgo xTamapakgsin Dios xalak akgapun chu xtakgalhkgalhinkan pi “makxtum nakatalakgchan nCristo wa ntu nkgalhi Dios” (Rom. 8:14-17). Pero ¿tuku tlan wanaw xlakata “amakgapitsi borrego”, wa tiku kgalhikgo takgalhkgalhin nalatamakgo kKatiyatni? Xlakata tuku wa Pablo ¿tuku xlitlawatkan? ¿La tlan kajwatiya nalilakpuwankgo «wa ntu xala talhman»? (Juan 10:16, Hua Xasasti Talaccaxlan, TXS, 1999.) Chatiy kskujnanin Dios, Abrahán chu Moisés, kajwatiya lilakpuwankgolh «wa ntu xala talhman» maski xtitaxtumakgo tuku tuwa. ¿Tuku kinkamasiyaniyan tuku tlawakgolh?

4. ¿Tuku tlan tlawakgo amakgapitsi borrego xlakata kajwatiya nalilakpuwankgo tuku xala talhman?

⁴ Maski amakgapitsi borrego ni katiʼankgolh kʼakgapun, na tlan kajwatiya nalilakpuwankgo tuku xala talhman. ¿La tlan chuna natlawakgo? Pulana nawilikgo Jehová chu xTamapakgsin kxlatamatkan (Luc. 10:25-27). Chuna tlawalh Cristo, chu nachuna kilitlawatkan (1 Ped. 2:21). Xtachuna la titaxtukgolh kinatalankan kxapulana siglo, na wilaw kxkakilhtamaku Satanás niku anan nixaxlikana tamasiyat, xliskgalalakan lakchixkuwin chu lhuwa tuku kgalhiputunkan (kalikgalhtawakga 2 Corintios 10:5). Katlawaw chuna la tlawalh Jesús: skgalalh katawilaw chu kakuentajtlawaw pi nitu nalaktlawa kintakanajlakan.

5. ¿La tlan nakatsiyaw komo tsukumaw lakpuwanaw la lakpuwankgo kakilhtamaku xlakata tumin chu tuku nakgalhikan?

⁵ ¿Nachuna tsukumaw lakpuwanaw la lakpuwankgo kakilhtamaku xlakata tumin chu tuku nakgalhikan? ¿La nakatsiyaw tuku tlakg paxkiyaw kkilatamatkan? Kaʼakxilhwi tuku lakpuwanaw chu tuku tlawayaw. Jesús wa: «Anta [niku] xtawi mintamakunkan [o tuku xtapalh], na anta natawilay minakukan» (Mat. 6:21). Xlakata nakatsiyaw niku kinkaliman kinakujkan, talakaskin pi ni lhuwa kilhtamaku natitaxtu akstu nakinkaputsananikanan. Kakinkakgalhskinkan: «¿Lhuwa kilhtamaku klilakpuwan tumin o xlakata nakkgalhi tlakg xatlan taskujut, o lu klakpuwan pi nialhtu nakintsankgani? ¿O tlakg kliskuja xlakata ni lhuwa tuku nakkgalhiputun, chu wa tlakg xlakaskinka nakakxilha la ktalalin Jehová?» (Mat. 6:22). Jesús wa pi komo lu lilakpuwanaw namastokgaw «wantu xtapalh [...] unu katiyatna», max nalakxla kintakanajlakan (Mat. 6:19, 20, 24, TXS, 1999).

6. ¿Tuku tlan tlawayaw xlakata ni nakinkamakgatlajayan tuku nitlan tlawaputunaw?

⁶ Xlakata makglakgalhinanin akinin, ni tuwa natlawayaw tuku nitlan (kalikgalhtawakga Romanos 7:21-25). Komo ni xkgalhiw xʼespíritu santo Jehová, ni tuwa natlawayaw «wa ntu ntatlaway nkapakglhtutaj» o kkapukswa. Uma kilhchanima “akgkgottamakan, [...] ankgalhin napaxuwapulakan kpupaskua [...] chalhuwa nakgalhikan puskat usu nakgalhiputunkan atanuj lakchajan maski [tamakgaxtokgkanit]” (Rom. 13:12, 13, TXS, 1999). Kajwatiya kililakpuwatkan tuku xala talhman, xlakata nakamakgatlajayaw umakgolh tuku «xala katiyatna», nema lakgatiyaw xlakata makglakgalhinanin akinin. Pero xlakata uma tuwa, apóstol Pablo wa: «Kakgastakyaway nkimakni, na wa nakilakgachixkuwiy [o nakinkgalhakgaxmata]» (1 Cor. 9:27). Komo lakaskinaw pi Dios tlan kakinkaʼakxilhni, talakaskin nakinkamafuerzalikanan natlawayaw tuku tlan. Kaʼakxilhwi tuku tlawakgolh Abrahán chu Moisés xlakata ni xmakgxtakgkgolh Dios (Heb. 11:6).

7, 8. 1) ¿Tuku titaxtukgolh Abrahán chu Sara? 2) ¿Tuku tlakg xlakaskinka xʼakxilha Abrahán?

⁷ Akxni Jehová wanilh Abrahán pi xkataʼalh xfamilia kxtiyat Canaán, xatapaxuwan kgalhakgaxmatli. Akxni Jehová akxilhli pi Abrahán xkanajlani chu xkgalhakgaxmata, tatlawalh akgtum talakkaxlan. Wanilh: «Naktlawa pi akgtum lanka kachikin nalitaxtuya chu naksikulunatlawayan» (Gén. 12:2). Pero titaxtulh lhuwa kata chu Abrahán chu Sara nina xkgalhikgo kamanan. ¿Pi nialh xlakapastaka Jehová tuku xwaninit? Nachuna, max tuwa makgkatsikgolh namakgxtakgkgo xfamiliajkan chu xchikkan kʼUr, akgtum kachikin xalak Mesopotamia niku xʼanan lhuwa tuku tlan. Tlawankgolh liwaka 1,600 kilómetros xlakata xchankgolh kCanaán, chu anta xtawilakgo kchiki xaxuwa, xmin kilhtamaku xtitaxtukgo tatsinksni chu xkatlawanikan tuku nitlan (Gén. 12:5, 10; 13:18; 14:10-16). Pero nipara tsinu xlakpuwankgo nataspitparakgo kʼUr (kalikgalhtawakga Hebreos 11:8-12, 15).

⁸ Abrahán ni wa lilakpuwa «ntu xala katiyatna» wata «kanajlanilh Dios» (Sant. 2:23). Xlilakpuwan tuku xala talhman: xlakaskinka xʼakxilha tuku Dios xwaninit pi xʼama tlawa. Chu xlakata xkanajlani, Jehová sikulunatlawalh. Tasiyanilh kʼakgtum visión chu wanilh: «“Katlawa litlan, kalakapi kʼakgapun chu kakaputlakge staku komo tlan kaputlakgeya”. Chu wanilh: “Chuna xlilhuwa nawan minkamanan”» (Gén. 15:5). ¡Uma lu matliwakglhli! Jehová chuntiya xlakapastaka tuku xwaninit. Makgatunu akxni Abrahán xkaʼakxilhli staku, xʼama lakapastaka tuku Dios xwanit pi xʼama maxki. Chu akxni xlilat xwanit, lakachilh xkgawasa nema lu xkgalhkgalhinit (Gén. 21:1, 2).

9. ¿La kinkamakgtayayan xliʼakxilhtit Abrahán xlakata chuntiya lu naskujnaniyaw Jehová?

⁹ Chuna la Abrahán, kgalhkgalhimaw pi kakgantaxtulh tuku Dios wanit natlawa (2 Ped. 3:13). Komo ni wa lilakpuwanaw tuku xala talhman, namakgkatsiyaw pi lu kgalhkgalhinitawa chu max nialh lu naskujnaniyaw Jehová. Xlakata precursor xlitaxtu o xlakata tlakg kskujnani Jehová, ¿wi tuku limakgxtakgti makgasa? Komo chuna, lu tlan pi chuna tlawa. ¿Chu la uku? Kalakapastakti pi Abrahán chuntiya skujnanilh Jehová chu kajwatiya xlilakpuwan «kachikin wantu nikxni katilaklalh», uma wamputun, tasikulunalin nema xʼama makglhtinan alistalh (Heb. 11:10, TXS, 1999). «Tikanajlanilh Abraham Dios, cha nchu wa yuma xtakanajla, xtachuna litanuy ntu [xaʼakgstitum, TNM].» (Rom. 4:3.)

10. ¿La xwanit xlatamat Moisés akxni kgawasaku xwanit?

¹⁰ Tiku na kajwatiya xlilakpuwan tuku xala talhman, wa Moisés. Akxni kgawasaku xwanit “paks wa ntu [xliskgalalakan] nti xala kʼEgipto ntilimakgalhtawakgakaj”. Uma takgalhtawakga lu xatlan xwanit. Ni kaj xlakata Egipto lu lanka tamapakgsin xwanit ama kilhtamaku, nachuna xlakata Moisés xmakgtapakgsi kxfamilia faraón. Xlakata uma takgalhtawakga nema makglhtinalh, ni kaks kinkamalakawaniyan pi «lu[...] xkgalhiy xkakni kxtawan, chu kxtatlaw» (Hech. 7:22). ¡Kalakpuwanti putum tuku tlan xtitlawalh! Pero Moisés xlilakpuwan tuku tlakg xatlan nema ni kgalhi xtachuna: wa pi natlawa xtalakaskin Dios.

11, 12. 1) ¿Tukuya takgalhtawakga tlakg xlakaskinka xʼakxilha Moisés? 2) ¿La limasiyalh pi tlakg xlakaskinka xʼakxilha uma takgalhtawakga?

¹¹ Akxni aktsujku xwanit, xaxlikana xtse, wa Jokébed, masiyanilh xlakata xDioskan hebreos. Moisés tlakg xlakaskinka xʼakxilha tuku xkatsini xlakata Jehová, nixawa atanu. Wa xlakata lakgmakgalh xlakaskinka xlitaxtulh chu tuku xtapalh  nema max xkgalhilh xlakata xmakgtapakgsi kxfamilia faraón (kalikgalhtawakga Hebreos 11:24-27). Wantuku masiyanika Moisés xlakata Dios akxni aktsujku xwanit chu xlakata xkanajlani Jehová, tlawalh pi kajwatiya xlilakpuwa tuku xala talhman.

¹² Maski Moisés kgalhilh tlakg xatlan takgalhtawakga nema xʼanan kxkilhtamaku, ni limaklakaskilh xlakata xkgalhilh lhuwa tumin o xlakaskinka xlitaxtulh kʼEgipto. Chuna la wan Biblia, «ni tilakaskilh xkam nawan xtsumat Faraón, [...] wata wa ntilaksakli xalikgaman natatatlawakgoy xlakgskatan Dios, ni xawa wa nalimakgapaxuwakan ntalakgalhin [...] wantu nkaj makgtum [...]titaxtuj». Alistalh, tuku xkatsini xlakata Jehová makgtayalh xlakata xpulalilh kachikin Israel.

13, 14. 1) ¿Tukuya tayat xtalakaskin xkgalhilh Moisés xlakata xkalakgmaxtulh israelitas? 2) Chuna la Moisés, ¿tukuya tayat kilikgalhitkan?

¹³ Moisés xpaxki Jehová chu xkachikin, nema kskujnin xlitaxtukgo kʼEgipto. Akxni 40 kata xkgalhi, lakpuwa pi tlan xkalakgmaxtulh israelitas (Hech. 7:23-25). Pero Jehová xkatsi pi nina la chuna xtlawa. Xtalakaskinku pi ni lakapala xsitsilh, tlan xlikatsilh, xtaktujulh, xmachokgolh tuku nitlan xtlawaputun chu atanu (Prov. 15:33). Xtalakaskin pi xkgalhilh umakgolh tayat xlakata xtayanilh tuku tuwa xʼama titaxtu. Tipuxum kata xkuentajtlawana borrego litaxtulh, chu uma makgtayalh xkgalhilh umakgolh tayat.

¹⁴ ¿Makgtayalh Moisés tuku katsinilh akxni xkuentajtlawana borrego litaxtulh? Chuna. Biblia wan pi «wa tlakg ni tlankajwa xwanit xliputum lakchixkuwin tiku xlamakgolh kkatiyatni» (Núm. 12:3). Katsinilh nataktuju chu uma makgtayalh xlakata ni lakapala xkasitsinilh israelitas tiku tanu tanu xlikatsikgo chu tanu tanu xtaʼakglhuwitkan xkgalhikgo (Éx. 18:26). Na talakaskin nakgalhiyaw tayat nema nakinkamakgtayayan natayaniyaw lanka takatsanajwat chu tlan natanuyaw kxasasti katiyatni (Apocalipsis [Revelación] 7:14). ¿Tlan katalalinaw putum latamanin, asta wantiku tunkun nitlan limakgkatsikgo tuku kawanikan o tunkun sitsikgo? Apóstol Pedro wa: «Kamaxkikgotit nkakni xlipaks nchixkuwin. Kapaxkikgotit xlipaks natalanin» (1 Ped. 2:17).

15, 16. 1) ¿Tuku xlakata lu xlakaskinka wa nalilakpuwanaw tuku xala talhman? 2) ¿Tuku xlakata xlakaskinka pi xaʼakgstitum nalatamayaw?

¹⁵ La uku «lu tuwa» kilhtamaku lamaw (2 Tim. 3:1, TNM). Wa xlakata, lu xlakaskinka wa nalilakpuwanaw tuku xala talhman, komo tliwakga kgalhiputunaw kintakanajlakan (1 Tes. 5:6-9). Kaʼakxilhwi pulaktutu la tlan chuna natlawayaw kkilatamatkan.

¹⁶ Xaʼakgstitum nalatamayaw: Pedro wa pi lu xlakaskinka xaʼakgstitum nalatamayaw. Xla wa: «Lakatitum nalatapayatit kxlakgstipankan xakgmakgat chixkuwin; lakimpi [...] wa lantla naʼukxilhkgo milatamatkan ntu ntlan ntlawayatit, nalimaxkikgoy nkakni Dios» (1 Ped. 2:12). Komo wilaw kkinchikkan, ktaskujut, kʼescuela, wi tuku lilakgastanamaw o lichuwinamaw Dios, kuentajtlawayaw pi akgstitum nalinaw kilatamatkan xlakata namalankikan Jehová. Xlikana, xlakata makglakgalhinanin akinin, tlawayaw tuku nitlan (Rom. 3:23). Pero komo chuntiya “lu[...] fuerza natlawaniyaw pi natayaniyaw tama kkintakanajlakan”, tlan namakgatlajayaw tuku nitlan tlawaputunaw (1 Tim. 6:12, TXS, 1999).

17. ¿La tlan chuna natlawayaw la tlawalh Cristo? (Kaʼakxilhti xapulana dibujo.)

¹⁷ Kintalakapastaknikan: Talakaskin nakgalhiyaw xatlan talakapastakni xlakata xaʼakgstitum nalatamayaw. Apóstol Pablo wa: «Pus chi kakgalhitit watiya yuma ntalakapastakni wa ntu na xkgalhi nCristo  Jesús» (Filip. 2:5). ¿Tukuya talakapastakni xkgalhi Cristo? Xtaktuju, chu uma tayat xtlawa pi tlakg kskujnanilh Jehová. Putum kilhtamaku lu xlakaskinka xʼakxilha nakatalichuwinan amakgapitsi xlakata xTamapakgsin Dios (Mar. 1:38; 13:10). Nachuna, xlakpuwan pi xTachuwin Dios wa tuku tlakg xlakaskinka (Juan 7:16; 8:28). Liwana likgalhtawakgalh, wa xlakata tlan lichuwinalh, tatayalh chu wa tuku xwamputun. Komo nachuna wamputunaw la Jesús, talakaskin nalikgalhtawakgayaw Biblia chu nataktujuyaw chu xatapaxuwan nalichuwinanaw Dios.

18. ¿La tlan namakgtayananaw kxtaskujut Jehová?

¹⁸ Namakgtayananaw: Jehová lakaskin pi «[k]xtukuwini Jesús, kalilakgatatsokgostakgolh lantla xlipakskan nti wilakgo nkʼakgapun, chu nti xala katiyatna» (Filip. 2:9-11). Maski lu xlakaskinka tuku lakgaya kʼakgapun, Jesús taktuju chu kgalhakgaxmata xTlat. Chu nachuna kilitlawatkan akinin (1 Cor. 15:28). Wa xlakata, kamakgtayanaw xliputum kinakujkan kxtaskujut Jehová, “kakamasiyaniw xlipaks akgmakgat chixkuwin” xlakata Biblia (Mat. 28:19). Nachuna, «wa ntu ntlan nkatlawanikgow» latamanin chu kinatalankan (Gál. 6:10).

19. Xlakata tuku akxilhwi, ¿tuku kilitlawatkan?

¹⁹ ¡Lu paxtikatsiniyaw pi Jehová kinkamalakapastakayan pi wa nalilakpuwanaw tuku xala talhman! Kaʼakxilhlakachaw uma chu «kapaxuwanaliyaw nkalilakapalaw xatlan tiji» (Heb. 12:1). Kaskujwi “xlipaks kintapaxuwankan [...] mpi wa nkimPuchinakan [Jehová] skujnanimaw”. Komo chuna natlawayaw, kinTlatkan xalak akgapun nakinkamaxkiyan lhuwa tasikulunalin (Col. 3:23, 24).