CHOONG KEON chu Julie, akgtum tamakgaxtokgat tiku max kgalhikgo 35 kata, precursores regulares litaxtukgonit kSydney (Australia), uma akgkitsis kata nema titaxtunit. Choong Keon wan: «Xakskujaw itat kilhtamaku chu nitu xkinkatsankganiyan. Lu lilakgatit la xtawila kilhtamaku chu lu tlan xwi kilatamatkan. Nachuna, lakatsu xwilakgolh kifamiliajkan chu kiʼamigoskan, chu uma xaklakgatiyaw». Pero ni lu xpaxuwakgo. ¿Tuku xlakata? Xlakata xkatsikgo pi tlan tlakg kskujnanikgolh Jehová, pero nitu xtlawakgo xlakata chuna xtlawakgolh.

Kʼakgtum lanka tamakxtumit nema tatlawalh kkata 2009, kgaxmatkgolh akgtum taʼakgchuwin nema lakgchalh kxnakujkan. Tiku xʼakgchuwinama wa uma tuku kawanilh tiku tlan tlakg kskujnanikgolh Dios: «Chatum tiku matlawani xcarro talakaskin pi matlawanimaja nawan xlakata tlan namalakgspita kpakgxwiki o kpakgastakat. Nachuna, Jesús tlan kinkapulalinan chu tlan kinkamakgtayayan xlakata tlakg naskujnaniyaw Dios komo xlikana liskujmaw tuku lakgatayaputunaw». * Choong Keon chu Julie makgkatsikgolh la komo xlakan xkawanimaka. Klanka tamakxtumit na katlawanika takgalhskinin kplataforma akgtum tamakgaxtokgat tiku misioneros xlitaxtukgo kTaiwán. Uma tamakgaxtokgat wankgolh pi lu xlakgatikgo lichuwinankgo Dios chu wankgolh pi niku xlamakgolh lu xʼananku taskujut. Choong Keon chu Julie makgkatsiparakgolh pi umakgolh tachuwin xlakan xkawanimaparaka.

Julie wan: «Akxni titaxtulh lanka tamakxtumit, kskiniw Jehová pi xkinkamakgtayan nakanaw kskujnaniyaw kTaiwán». Chu wampara: «Pero chuntiya xakpekuamaw. Xakmakgkatsiyaw la komo xlimakgtumku champokglh xaktajumaw kxakapulhman alberca». Akgtum texto xalak Biblia nema kamakgtayalh «champokglh natajukgo», wa Eclesiastés 11:4 nema wan: «Tiku kuentajtlawama palha un, ni katichananalh; chu tiku akxilhma puklhni ni katimakgalanalh». Choong Keon wan: «Ktsukuw “kchanananaw  chu kmakgalananaw” nixawa “nakkuentajtlawayaw palha un chu nakakxilhaw puklhni”». ¿Tuku tlawakgolh? Makglhuwa litachuwinankgolh Dios xlakata uma, likgalhtawakgakgolh xbiografías misioneros, kamalakgachanikgolh lhuwa correos electrónicos natalan tiku xʼankgonit kskujnanikgo Dios kTaiwán, stakgolh xcarroskan chu xmuebleskan. Titaxtulh akgtutu papaʼ, chankgolh kTaiwán.

La uku, liwaka akgtum ciento natalan xalak atanu países ankgonit lichuwinankgo Dios niku tlakg talakaskin anta kTaiwán. Umakgolh natalan minkgonitancha kʼAustralia, kCanadá, kCorea, kʼEspaña, kʼEstados Unidos, kFrancia, kʼGran Bretaña chu kʼJapón chu makgapitsi kgalhikgo 21 asta 73 kata. Na anta ankgonit liwaka tipuxamakaw natalan laktsuman tiku nina tamakgaxtokgkgonit. ¿Tuku kamakgtayanit putum umakgolh xapaxuwananin natalan naskujnanikgo Dios kʼatanu país? Kaʼakxilhwi tuku kamakgtayanit.

Laura, chatum precursora tiku nina tamakgaxtokga xalak kCanadá, skujnanima Dios kxʼoeste Taiwán. Titaxtunita akgkaw kata lata ni xlipaxuwa akxni xlichuwinan Dios. Xla wan: «Xlakata ni lu xaklichuwinan Dios, ni lu xaklakgati». Pero makgapitsi xʼamigos xalak Canadá wanikgolh pi xkataʼankgolh kMéxico xlakata akgtum papaʼ xlichuwinankgolh Dios. Laura wan: «Ama kilhtamaku akxni xlimakgtumku xlikana klimaxtulh lhuwa kilhtamaku xlakata naklichuwinan Dios, chu ¡lu klakgatilh!».

Xlakata uma tuku titaxtulh, lakpuwa naʼan kʼakgtum congregación niku atanu tachuwin chuwinankan, kCanadá. Tanulh kʼakgtum curso ktachuwin chino, kaj ni lhuwa kilhtamaku makgtayanalh kʼakgtum grupo kʼuma tachuwin chu lakpuwa pi naʼan skujnani Dios kTaiwán. Septiembre kata 2008 tlan makgantaxtilh tuku xlakpuwanit. Laura wan: «Titaxtulh max akgtum kata xlakata lu tlan xakmakgkatsilh anta niku xakwi. Pero la uku nipara tsinu klakpuwan pi naktaspita kCanadá». ¿Tuku makgkatsi xlakata la lichuwinan  Dios? Xla wan: «Lu klakgati. Akxni kakxilha pi wi tiku lakgpalitilha xlatamat chuna la lakgapastilha Jehová... ¡ni anan atanu tuku tlakg makgapaxuwanan! Chu makglhuwa kkgalhinit uma tapaxuwan unu kTaiwán».

Brian chu Michelle, akgtum tamakgaxtokgat xalak Estados Unidos tiku kgalhikgo liwaka puxamakaw kata, la uku max titaxtulha akgtsayan kata lata ankgolh kTaiwán. Pulana xmakgkatsikgo pi ni lu tlan xkakitaxtuni akxni xlichuwinankgo Dios. Pero chatum tala tiku lhuwa kilhtamaku misionero litaxtunit, kawanilh: «Maski kaj maktum tratado wi tiku namaxkiyatit, kalakapastaktit pi max xlimakgtumku kgaxmatma xlakata Jehová. ¡Wa xlakata tuku tlawapatit lu xlakaskinka!». Uma tuku kawanika kamakgtayalh xlakata chuntiya xlichuwinankgolh Dios. Atanu tala kawanilh: «Xlakata ni nalilipuwanatit, ni wa kaʼakxilhtit komo tlakg katsinipatit tachuwin akgatunu kilhtamaku, wata wa kaʼakxilhtit la xlilhuwa katsinitit lata xlimakgas asta xaʼatanu lanka tamakxtumit». Chuna tlawakgolh, chu la uku litaxtukgo precursores tiku lu makgtayanankgo.

¿Tuku namakgtayayan nakatsiniputuna atanu tachuwin? Kalakgapaxialhnanti país niku pimputuna skujnaniya Dios. Kapit ktamakxtumit, kakatatawila natalan xala anta chu kapit katalichuwinana Dios. Brian wan: «Akxni naʼakxilha pi lhuwa latamanin kgaxmatkgo akxni katalichuwinana xTamapakgsin Dios chu akxni natsukuya kapaxkiya natalan, uma natlawa pi lu napimputuna kʼuma país xlakata naskujnaniya Dios».

Makgapitsi tiku ankgonit skujnanikgo Dios kTaiwán, mastakgo clases xaʼinglés xlakata natlajakgo tsinu tumin. Kristin chu Michelle, stakgo skiti. Kristin wan: «Nikxni xaktlawanit uma taskujut, pero uma kinkamakgtayayan chuntiya naktawilayaw kʼuma país». Chuna la titaxtunit kilhtamaku, makgapitsi lismanikgonit kaj xlakan nakamakgtamawanankgo. Kʼuma taskujut ni talakaskin lhuwa hora naskujkgo xlakata tlan nakgalhikgo tuku maklakaskinkgo, chu xchatiykan tlan tlawakgo tuku tlakg xlakaskinka: wa pi precursores nalitaxtukgo chu naputsakgo latamanin.

Titaxtunit akgtujun kata lata akxni William chu Jennifer, xalak Estados Unidos, chankgolh kTaiwán. William wan: «Akxni precursor litaxtuya, naskuja, nakatsiniya atanu tachuwin, nakuentajtlawaya congregación... min kilhtamaku putum uma, lu tuwa tamakgkatsi». ¿La makgantaxtikgo putum uma chu chuntiya lipaxuwakgo? Ni lakpuwankgolh pi kaj ni lhuwa kilhtamaku xtitaxtulh chu lu xkatsinikgolh tachuwin chino. Xlakata chuna tlawakgolh, akxni xtasiya pi ni lu xkatsinikgonit, ni xlilipuwankgo.

William lakapastaka pi chatum superintendente viajante wanilh pi akxni wi tuku xmakgantaxtiputulh, xlipaxuwalh pulakatunu tuku xtlawalh asta xmakgantaxtilh. William wan pi uma tuku kawanika kamakgtayalh xlakata wi tuku nialh chuna xtlawakgolh komo chuna xtalakaskilh, kamakgtayalh nakgalhakgaxmatkgo natalan tiku xkapulalinkgo chu xlakgpalikgolh makgapitsi tuku xtlawakgo xlakata tlakg tlan xkakitaxtunilh la kskujnanikgo Dios kʼuma país. Wampara: «Chu ama tastakyaw na kinkamakgtayan naklimaxtuyaw kilhtamaku xlakata naklipaxuwayaw tuku lu stlan anan kʼuma isla».

Megan chatum precursora xalak Estados Unidos tiku nina tamakgaxtokgnit chu lu liskujma xlakata tlakg tlan nachuwinan chino. Chuna la William chu Jennifer, xla na lipaxuwa pulakatunu tuku tlawa la skujnanima Jehová. Akgatunu sábado chu domingo kataʼan lichuwinan Dios lhuwa natalan anta niku lu lilakgatit: niku chankgo barcos xalak Kaohsiung, nema tlakg xalanka anan kTaiwán. Kʼakgatunu barco, Megan katalichuwinanit Dios, tiku chipakgo skiti xalak Bangladés, Filipinas,  India, Indonesia, Tailandia chu Vanuatu. Megan wan: «Skitinanin ni lhuwa kilhtamaku titaxtukgo niku chankgo barcos. Wa xlakata tunkun kkawaniyaw komo lakaskinkgo nakkatalikgalhtawakgayaw Biblia anta. Xlakata xputumkan nakkamasiyani, min kilhtamaku kkamakgalhtawakga kgalhtati o kgalhkitsis skitinanin». ¿Chu la kitaxtunima xlakata katsinima chino? Xla wan: «Tlakg lakapala kkatsiniputun, pero klakapastaka tuku kiwanilh chatum tala: “Komo lu liskujaw xlakata wi tuku natlawayaw, Jehová nakinkamakgtayayan xlakata namakgantaxtiyaw”».

Akxni nina xʼan kʼatanu país, Cathy, chatum tsumat tiku nina tamakgaxtokgnit, xalak Gran Bretaña, lakputsalh ktukuya países tlan naʼan latama. Akxni lu xtlawaninita oración Jehová, katsokgnanilh makgapitsi sucursales komo ni kalipekua xtawilalh xlatamat kʼumakgolh países. Liwana lilakpuwa tuku wanika chu laksakli naʼan kTaiwán.

Alh latama kTaiwán kkata 2004, akxni xkgalhi 31 kata, chu lata ama kilhtamaku skuja pero ni lakpuwan pi lhuwa tuku nakgalhi. Xla wan: «Kkakgalhskilh natalan niku tlan xaktamawalh tuku wakan nema ni laktapalaxla. Uma kimakgtayalh xkiʼakchanilh kintumin». ¿Tuku tlawa xlakata ni lhuwa tuku nakgalhiputun? Cathy wan: «Ktlawani oración Jehová chu kskini kakimakgtayalh naklipaxuwa taway chu lhakgat nema kkgalhi maski ni xalaktapalaxla. Chu Jehová kgalhti kioraciones. Kimakgtaya nakkatsi tuku xlikana kmaklakaskin chu kimakgtaya nakpaxuwa maski ni kkgalhi putum tuku xaklakaskilh». Chu wampara: «Klakgati la klin kilatamat xlakata kimakgtaya tlakg xlakaskinka nakakxilha nakskujnani Jehová».

Xlakata ni lhuwa tuku kgalhi, ni wamputun pi ni lipaxuwa, wata kinkawaniyan: «Unu wilakgolh lhuwa latamanin tiku kgaxmatkgo xalakwan xalaksasti tamakatsin. ¡Uma lu makgapaxuwanan!». Akxni chalh kTaiwán, kkachikin niku tsukulh liskuja precursora, kajwatiya xʼanan akgtiy congregación kxatachuwin chino, pero la uku anan akgtujun. Cathy wan: «Chali chali lu klipaxuwa xlakata kmakgtayanama chu kakxilhma la talhuwima xkachikin Dios».

¿La kakitaxtuninit Choong Keon chu Julie, tiku pulana kalichuwinaw? Akxni aku xchanit, Choong Keon xlakpuwan pi nila lu xmakgtayanalh kcongregación xlakata ni lu xkatsini chino. Pero natalan xala anta ni chuna xlakpuwankgo. Xla wan: «Akxni congregación niku xakwilaw pulaktiy lalh, pulaklhuwa tuku kilakgayawaka xlakata siervo ministerial xaklitaxtu. Ama kilhtamaku kmakgkatsilh pi xlikana xakmakgtayanama niku lu talakaskin». Nachuna lakalitsin chu wan: «¡Lu kimakgapaxuwalh akxni kakxilhli pi asta akit tlan xakmakgtayanan chu xkimaklakaskinkgo!». La uku Choong Keon kgolotsin xalak congregación litaxtu. ¿Chu tuku lakpuwan xpuskat, Julie? «Nikxni xakpaxuwanitaw chuna la uku chu nikxni xakmakgkatsinitaw pi xakmakgtlawamaw tuku lu tlan. Kmiw xlakata nakmakgtayananaw, pero la uku klakpuwanaw pi uma tuku ktlawamaw wata akinin kinkamakgtayanitan. ¡Lu kpaxtikatsiniyaw Jehová xlakata tlan kskujnaniyaw unu!»

¿Nialh makgas namasputuya mintakgalhtawakga chu lakpuwampat tuku natlawaya kmilatamat? ¿Nina tamakgaxtokgnita chu tlakg skujnaniputuna Jehová? ¿Lakaskina pi katatliwakglhli xtakanajlakan mifamilia? ¿Tajubilarlinitata chu tlan kamakgtayaya amakgapitsin xlakata tuku katsininita la titaxtunit kata? Anan lhuwa niku tlakg talakaskinku natalan tiku nalichuwinankgo Dios. Liwana kakatsi uma: komo pina anta niku tlakg talakaskin tamakgtay xlakata naskujnaniya Dios, nakgalhiya lhuwa tasikulunalin.