1, 2. 1) ¿Tuku xlakata liwana katsiyaw pi Tamapakgsin xlikana namakgantaxti putum xtalakaskin Dios xlakata latamanin? 2) Chuna la wan Efesios 2:12, ¿tuku xlakata umakgolh talakkaxlan tlawakgo pi tlakg nalipawanaw Tamapakgsin? (Kaʼakxilhti xapulana dibujo.)

XTATAYANANIN Jehová putum kilhtamaku wanaw pi kajwatiya xTamapakgsin Dios nalakkaxtlawa kintaʼakglhuwitkan, chu chuna kawaniyaw latamanin. Uma takgalhkgalhin kinkamakgapaxuwayan chu kinkamakgtayayan. Pero ¿liwana kanajlayaw pi xTamapakgsin Dios xlikana wi chu namakgantaxti tuku lakpuwanit natlawa? ¿Tuku xlakata lu xlikana tlan nakanajlaniyaw xTamapakgsin Dios? (Heb. 11:1.)

² Jehová tiku kgalhi xliputum litliwakga lakkaxwilinit Tamapakgsin xla Mesías, xlakata namakgantaxti tuku lakapastaknit xpalakata xtamalakatsukin. Niku takilhti uma Tamapakgsin wa pi Jehová lakgchan namapakgsinan. Putum tuku lu xlakaskinka xlakata Tamapakgsin, tiku xMapakgsina, tiku natamapakgsinankgo chu tiku nakamapakgsikan, anta takilhti kpulaklhuwa talakkaxlan nema tlawanit Jehová o xKgawasa, Jesucristo. Wa xlakata akxni nalilakpuwanaw umakgolh talakkaxlan tlakg nakanajlayaw pi xtalakaskin Dios nakgantaxtu chu pi xTamapakgsin liwana lakkaxwilikanit (kalikgalhtawakga Efesios 2:12).

3. ¿Tuku naʼakxilhaw kʼuma artículo chu nema aku namin?

 ³ Biblia lichuwinan akgchaxan lu xlakaskinka talakkaxlan nema kilhchanima Tamapakgsin xla Mesías. Wa umakgolh 1) talakkaxlan nema tatlawaka Abrahán, 2) talakkaxlan xla Limapakgsin, 3) talakkaxlan nema tatlawaka David, 4) talakkaxlan xlakata chatum sacerdote chuna la Melquisedec, 5) xasasti talakkaxlan chu 6) talakkaxlan xla Tamapakgsin. Kaʼakxilhwi la pulakatunu talakkaxlan lichuwinan Tamapakgsin, chu makgtayanan xlakata nakgantaxtu xtalakaskin Dios xpalakata Katiyatni chu latamanin (kaʼakxilhti recuadro « La namakgantaxti Dios xtalakaskin»).

4. Chuna la lichuwinan libro xla Génesis, ¿tuku pulaktutu wa Jehová pi xʼama la xlakata latamanin?

⁴ Akxni xtlawakgonita uma lilakgatit katiyatni xlakata chixku anta xlatamalh, Jehová pulaktutu tuku lichuwinalh xlakata latamanin. Pulana, wa pi xʼama katlawa chuna la xla. Xlipulaktiy, wa pi xliputuminika Katiyatni akgtum Paraíso xʼamakgo tlawakgo chu xlimatsamakgolh xkamanankan. Chu xlipulaktutu, wa pi ni xliwatkan xtawakat kiwi nema lilakgapaskan tuku xatlan chu tuku nixatlan (Gén. 1:26, 28; 2:16, 17). Nialhtu xtsankga xlakata xkgantaxtulh xtalakaskin Dios. Akxni xtlawakanita chixku, kajwatiya xtsankga xkgantaxtulh atanu pulaktiy tuku Dios xwanit. ¿Tuku xlakata talakaskilh natlawakan makgapitsi talakkaxlan?

5, 6. 1) ¿Tuku tlawalh Satanás xlakata ni xkgantaxtulh xtalakaskin Dios? 2) ¿La lakkaxtlawalh Jehová tuku Satanás xlimawakama kʼEdén?

⁵ Satanás wi tuku tlawalh xlakata ni xkgantaxtulh xtalakaskin Dios. Xlakata chixku ni xkgalhakgaxmatli Dios akgskgawilh Eva xlakata xwalh xtawakat kiwi nema litalakgapasa tuku xatlan chu tuku nixatlan (Gén. 3:1-5; Apocalipsis [Revelación] 12:9). Chuna tlawalh pi xlakpuwanka pi Dios ni lakgchan nakamapakgsi tuku malakatsukinit. Alistalh Akgskgawini na kalimawakalh latamanin pi skujnanikgo Jehová kaj xlakata tuku makglhtinankgo (Job 1:9-11; 2:4, 5).

⁶ ¿La lakkaxtlawalh Jehová tuku Satanás xlimawakama kʼEdén? Tlan xkamasputulh tiku ni kgalhakgaxmatkgolh, pero ni xkgantaxtulh tuku xwanit, pi xkamanan Adán chu Eva xmalakgatsamakgolh Katiyatni. Wa xlakata, ni tunkun kamasputulh, wata xaskgalala Malakatsukina lichuwinalh tuku xʼama la nema lu xlakaskinka: tuku wa kʼEdén pi xʼama tlawa. Uma tuku wa pi xʼama tlawa limasiyalh pi xʼama kgantaxtu putum tuku xwanit (kalikgalhtawakga Génesis 3:15).

7. ¿Tuku limasiya tuku Jehová wa kʼEdén pi xʼama tlawa xlakata luwa chu xkamanan?

⁷ Tuku lakkaxwililh Jehová kʼEdén masiyalh tuku xʼama kaʼakgspula luwa chu xkamanan, uma kilhchanima Satanás chu tiku tatayakgo xlakata lakpuwankgo pi Dios ni lakgchan namapakgsinan. Nachuna liyawalh xkam puskat pi namasputu Satanás. Tuku Dios wa pi xʼama tlawa, limasiyalh pi namasputu tiku tlawalh pi ni xkgalhakgaxmatka chu tuku nitlan kitaxtulh. Pero ni kajwatiya uma. Na lichuwinalh tuku xʼama limaklakaskin xlakata chuna xtlawalh.

8. ¿Tuku tlan nawanaw xlakata tiku litaxtu puskat chu xkam?

⁸ ¿Tiku xʼama litaxtu xkam puskat? Xtalakaskin pi espíritu xwa. ¿Tuku xlakata? Xlakata xkam puskat xʼama masputu Satanás, chatum espíritu (Heb. 2:14). Wa xlakata, puskat tiku malakachini uma kam na espíritu xliwanat. Tiku litaxtukgo xkamanan luwa lakapala talhuwikgolh, pero max akgtati mil kata nema titaxtulh ni xtakatsi tiku xwanit xkam puskat. Ama kilhtamaku, Jehová tlawalh makgapitsi talakkaxlan nema liwana makatsininan tiku xlitaxtu  uma kam. Umakgolh talakkaxlan na liwana masiyakgo pi uma kam, wa tiku Dios xʼama maklakaskin xlakata nalakxtlawa putum tuku Satanás katlawaninit latamanin.

9. 1) ¿Tuku uma talakkaxlan nema tatlawaka Abrahán? 2) ¿Tukuya kata tsukulh kgantaxtu?

⁹ Xtitaxtunita max akgtiy mil kata lata akxni Jehová wa tuku xʼama akgspula Satanás, akxni wanilh patriarca Abrahán pi xmakgxtakgli xchik nema xwi kʼUr chu xʼalh kxatiyat Canaán (Hech. 7:2, 3). Wanilh: «Kataxtu kminkachikin chu xlakgstipankan mimparientes chu kxchik mintlat chu kapit kkachikin nema nakmasiyaniyan; chu naktlawa pi akgtum lanka kachikin nalitaxtuya chu naksikulunatlawayan chu xlikana naktlawa pi lanka nawan mintukuwani; chu akgtum tasikulunalin kalitaxtu. Chu xlikana nakkasikulunatlawa tiku nasikulunatlawakgoyan, chu tiku nawaniyan pi kaʼakgspulan tuku nitlan na naktlawa pi kaʼakgspulalh tuku nitlan, chu xlikana mimpalakata nalitasikulunatlawakgo putum familias xalak katiyatni» (Gén. 12:1-3). Uma xapulana akxni Biblia lichuwinan talakkaxlan nema tatlawaka Abrahán, uma wamputun tuku Jehová wa pi xʼama tlawa. Ni katsiyaw tukuya kilhtamaku talakkaxwililh. Pero katsiyaw pi tsukulh kgantaxtu akxni Abrahán tiku xkgalhi 75 kata, makgxtakgli Harán chu patakutli kgalhtuchokgo Éufrates, kkata 1943 akxni nina xmin Jesús.

10. 1) ¿La limasiyalh Abrahán pi xlikana xkanajla putum tuku Dios xwaninit pi xʼama tlawa? 2) ¿Tuku makatsinitilhalh Jehová Abrahán xpalakata xkam puskat?

¹⁰ Jehová makglhuwa wanilh Abrahán pi xʼama makgantaxti tuku xwaninit, chu tlakg lhuwa tuku makatsinitilhalh xlakata uma (Gén. 13:15-17; 17:1-8, 16). Chu akxni patriarca xʼama makamasta xkgawasa chu limasiyalh pi xlikana xkanajla putum tuku Dios xwaninit pi xʼama tlawa,  Jehová amakgtum wanilh pi xlikana xʼama makgantaxti talakkaxlan nema xtatlawanit (kalikgalhtawakga Génesis 22:15-18 chu Hebreos 11:17, 18). Akxni talakkaxlan nema tatlawaka Abrahán xtsukunita kgantaxtu, Jehová makatsinitilhalh tuku lu xlakaskinka xlakata xkam puskat. Uma kam xʼama minacha kxfamilia Abrahán chu lhuwa latamanin xʼamakgo litakgatsikgo. Nachuna, mapakgsinanin xʼamakgo litaxtukgo, xʼamakgo kamalakgsputukgo xtalamakgasitsinkan chu xʼamakgo litaxtukgo akgtum tasikulunalin xpalakata lhuwa latamanin.

11, 12. 1) ¿La limasiya Biblia pi talakkaxlan nema tatlawaka Abrahán xʼama limin tlakg laklanka tasikulunalin? 2) ¿Tuku kilhchanima uma kimpalakatakan?

¹¹ Xlikana pi talakkaxlan nema tatlawaka Abrahán kgantaxtulh akxni xkamanan makgamakglhtinankgolh Tiyat nema xKawanikanit pi Nakamaxkikan, pero Biblia masiya pi uma talakkaxlan xʼama limin tlakg laklanka tasikulunalin (Gál. 4:22-25). Xlakata Dios malakpuwanilh, apóstol Pablo lichuwinalh pi tiku xapulana litaxtu xkam Abrahán wa Cristo chu xlipulaktiy wa 144,000 kstalaninanin Cristo tiku kalilaksakkanit espíritu santo (Gál. 3:16, 29; Apoc. 5:9, 10; 14:1, 4). Puskat tiku lichuwinanka kʼEdén kilhchanima xkachikin Dios xalak akgapun. Uma puskat limapakuwikan «Jerusalén xala talhman», chu anta tapakgsikgo ángeles tiku ni makgxtakgkgo Dios (Gál. 4:26, 31). Chuna la xwan talakkaxlan nema tatlawaka Abrahán, xkam puskat xʼama kalimini tasikulunalin putum latamanin.

¹² Talakkaxlan nema tatlawaka Abrahán, lakkaxwili pi naʼanan akgtum Tamapakgsin kʼakgapun chu tlawa pi tlan namakglhtinankgo uma Tamapakgsin, Mapakgsina chu tiku natamapakgsinankgo (Heb. 6:13-18). ¿La xlilhuwa kilhtamaku namakgapala uma talakkaxlan? Chuntiya natawila asta akxni xTamapakgsin Mesías namalakgsputukgo xtalamakgasitsin Dios chu natasikulunatlawakgo putum familias xalak Katiyatni (1 Cor. 15:23-26). Pero Génesis 17:7 wan pi uma akgtum «talakkaxlan nema ni nakgalhi xlisputat». ¿Tuku xlakata chuna wan? Xlakata putum tiku nalatamakgo kKatiyatni nalitamakgtayakgo putum kilhtamaku. Chuna la akxilhaw, talakkaxlan nema tatlawaka Abrahán masiya pi Jehová liwana lakpuwanit namakgantaxti tuku lakapastaknit, wa pi xaʼakgstitum latamanin “kamalakgatsamakgolh katiyatni” (Gén. 1:28).

13, 14. ¿Tuku masiya xpalakata xTamapakgsin Mesías, talakkaxlan nema tatlawaka David?

¹³ Tuku Jehová wa kʼEdén pi xʼama tlawa chu talakkaxlan nema tatlawaka Abrahán, kinkamasiyaniyan pi xtamapakgsin Jehová putum kilhtamaku takilhti kxlimapakgsin xaʼakgstitum. Wa xlakata Tamapakgsin xla Mesías na takilhtinit kxlimapakgsin xaʼakgstitum (Sal. 89:14). ¿Namin kilhtamaku akxni nalakxla chu natalakaskin namasputukan? Atanu talakkaxlan masiya pi nikxni chuna naʼakgspula.

¹⁴ Lichuwinamaw talakkaxlan nema tatlawaka David (kalikgalhtawakga 2 Samuel 7:12, 16). Talakkaxlan nema Jehová tatlawalh ama xmapakgsina xamakgan Israel, liwana makatsinilh pi Mesías xʼama minacha kxfamilia (Luc. 1:30-33). Chuna tlakg liwana makatsininalh tiku xkam xʼama wan. Liwana lakkaxwililh pi chatum xkgawasa David xʼama «lakgchan namapakgsinan» kxTamapakgsin Mesías (Ezeq. 21:25-27). Xtamapakgsin David «namakgapala kanikxniwa» xlakata wa Jesús tiku namapakgsinan. “Nikxni katisputkgolh ixkamanan ti alistalh nalakachinkgo, [...] ixlimapakgsin [...] kanikxniwa namakgapala la wi chichini.” (Sal. 89:34-37.) Xtamapakgsin  Mesías nikxni katitaxkajwanilh, chu tuku natlawa putum kilhtamaku namakgapala.

15-17. 1) Chuna la wan talakkaxlan xlakata chatum sacerdote chuna la Melquisedec, ¿tuku atanu taskujut ama tlawa xkam puskat? 2) ¿Tuku xlakata talakaskin pi na natlawa uma taskujut?

¹⁵ Talakkaxlan nema tatlawaka Abrahán chu nema tatlawaka David, liwana lakkaxwili pi xkam puskat namapakgsinan. Pero xlakata xlikana xkasikulunatlawaka putum latamanin, ni kajwatiya xtalakaskin akgtum tlan tamapakgsin. Xlakata xtalakaskin pi xkalakgmaxtuka ktalakgalhin chu xmakgtapakgsikgolh kxfamilia Jehová, xtalakaskin pi uma tiku litaxtu xakam na xtlawalh taskujut xla sacerdote. Xlakata kiMalakatsukinakan lu xaskgalala, tlawalh atanu talakkaxlan xlakata uma tlan xkgantaxtulh, talakkaxlan xlakata chatum sacerdote chuna la Melquisedec.

¹⁶ Xlakata tuku wanilh mapakgsina David, Jehová masiyalh pi xʼama tatlawa Jesús akgtum talakkaxlan xlakata pulaktiy tuku tlan xmakgantaxtilh: 1) pi xtawilalh kxpakgastakat, o kxpakgkana asta xkamalakgsputulh xtalamakgasitsin, chu 2) pi xlitaxtulh «sacerdote kanikxniwaj, na chuna la [...] Melquisedec» (kalikgalhtawakga Salmo 110:1, 2, 4). ¿Tuku xlakata «chuna la [...] Melquisedec»? Xlakata akxni xkamanan Abrahán nina xmakglhtinankgo Tiyat nema xKawanikanit pi Nakamaxkikan, Melquisedec, xmapakgsina Salem, xlitaxtu xsacerdote «Dios nti ntlanka xlakatsukut» (Heb. 7:1-3). Jehová liyawalh Melquisedec mapakgsina chu sacerdote. Tatsokgni xaHebreo lichuwinan pi kajwatiya uma chixku tiku tlawalh uma akgtiy taskujut. Nachuna, xlakata ni tatsokgnit pi wi tiku mapakgsina chu na sacerdote xwanit akxni nina xlama Melquisedec chu akxni nialh xlama, tlan wanaw pi litaxtu sacerdote «kaxani liwayaj xtiwaj».

¹⁷ Jesús liyawaka sacerdote xlakata uma talakkaxlan nema Jehová tatlawalh. Wa xlakata Jesús sacerdote nalitaxtu «nkaxani liwayaj xtiwaj, xtachuna lantla xliwi Melquisedec» (Heb. 5:4-6). Uma talakkaxlan masiya pi Jehová litayanit pi namaklakaskin xTamapakgsin Mesías, xlakata namakgantaxti tuku pulana xlakapastaknit natlawa xpalakata Katiyatni chu latamanin.

18, 19. 1) ¿La kilhchanima Tamapakgsin xla Mesías talakkaxlan nema kalichuwinanitawa? 2) ¿Tuku naʼakxilhaw kʼartículo nema aku mima?

¹⁸ Akxni lilakpuwanaw umakgolh talakkaxlan nema kalichuwinanitawa, akxilhaw pi kilhchanima Tamapakgsin xla Mesías. Na akxilhaw pi tliwakglh takilhtiyanit kmakgapitsi talakkaxlan. Tuku Jehová wa kʼEdén pi xʼama tlawa, masiya pi ama maklakaskin xkam puskat xlakata namakgantaxti tuku lakapastaknit natlawa xpalakata Katiyatni chu latamanin. Talakkaxlan nema tatlawaka Abrahán masiyalh tiku xʼama litaxtu uma kam chu tuku taskujut xʼama tlawa.

¹⁹ Talakkaxlan nema tatlawaka David tlakg liwana masiyalh niku xʼama minacha tiku pulana litaxtu xakam, wa Jesús, chu lakkaxwililh pi wa nalakgchan namapakgsinan kKatiyatni putum kilhtamaku. Talakkaxlan xlakata chatum sacerdote chuna la Melquisedec lakkaxwililh pi xakam natlawa taskujut xla sacerdote. Pero ni kajwatiya Jesús natlawa pi latamanin nialh nakgalhikgo talakgalhin. Na xʼama kalaksakan amakgapitsin xlakata xlitaxtukgolh mapakgsinanin chu sacerdotes. ¿Niku xʼama minkgoyacha? Naʼakxilhaw kʼartículo nema aku mima.