1, 2. 1) ¿Tuku talakgpalilh kPentecostés xla kata 33? 2) ¿Tiku tapakgsikgolh kʼuma xasasti kachikin? (Kaʼakxilhti xapulana dibujo.)

KATA 33 xla Pentecostés wi tuku lu xlakaskinka talakgpalilh. Uma kilhtamaku Jehová lakkaxwililh xasasti kachikin: Israel xaʼespiritual, «xIsrael Dios» (Gál. 6:16). Xlakata xkalaksakli tiku natapakgsikgo kʼuma kachikin, limaklakaskilh xʼespíritu santo. Pablo lichuwinalh pi tiku tapakgsikgo kʼuma xasasti kachikin ni talakaskin natacircuncidarlakgo. Xla tsokgli: «Wa nti lu[...] circuncidarlanit, lu[...] kxnaku nkilhtsukuy», espíritu chuna tlawanit (Rom. 2:29).

² Tiku xapulana tapakgsikgolh kʼuma xasasti kachikin, wa apóstoles chu nachuna liwaka akgtum ciento kstalaninanin Cristo nema xtamakxtumikgonit xlikilhmaktiy chiki kJerusalén (Hech. 1:12-15). Dios kalilaksakli espíritu santo chu chuna xkamanan litaxtunikgolh (Rom. 8:15, 16; 2 Cor. 1:21). Tuku lalh limasiyalh pi Jehová xmakgamakglhtinanit xtamakamastan Jesús chu xasasti talakkaxlan xtawilama xlakgxokgo talakkaxlan xla Limapakgsin (Luc. 22:20; kalikgalhtawakga Hebreos 9:15). Chuna, umakgolh kstalaninanin Cristo makgtapakgsikgolh kxasasti kachikin, xkachikin Dios. Espíritu santo tlawalh pi xchuwinankgolh tanu tanu tachuwin. Uma tlawalh pi tlan xkalitachuwinankgolh «ntlanka likakni ntu ntlaway Dios», judíos chu tiku ni judíos nema xminkgonit kJerusalén xlakata natlawakgo pascua xla Pentecostés (Hech. 2:1-11).

3-5. 1) ¿Tuku kawanilh Pedro judíos kilhtamaku xla Pentecostes? 2) ¿La staktilhalh xasasti kachikin akxni aku xtsukuma?

³ Jehová limaklakaskilh apóstol Pedro xlakata namalakki tiji xlakata judíos chu tiku ni judíos xtapakgsikgolh kxasasti kachikin, congregación xla kstalaninanin Cristo. Kilhtamaku xla Pentecostés, Pedro ni pekualh chu kawanilh judíos pi xlimakgamakglhtinatkan xwanit Jesús, tiku xlitaxtu “xPuchinakan [...] chu xCristojkan”, tiku xlakan xmakgnikgonit. Akxni kgalhskinkgolh tuku xlitlawatkan xwanit, Pedro kgalhtinalh: «Katalakgaspittayatit [o kamakgxtakgtit tuku nitlan], na katamunutit wixin nchatunu kxtukuwini Jesucristo, lakimpi nalikgalhiyatit xmatsankgananika mintalakgalhinkan; chu na namakgamakglhtinanatit spiritu santo» (Hech. 2:22, 23, 36-38). Watiya uma kilhtamaku, max akgtutu mil latamanin akxtum talakgolh Israel xaʼespiritual (Hech. 2:41). Apóstoles chuntiya katapaxuwan lichuwinankgolh Dios chu tlakg lhuwa latamanin xmakgamakglhtinamakgo tuku xaxlikana (Hech. 6:7). Xasasti kachikin kstakma.

⁴ Alistalh, na kalinika tamakatsinin samaritanos, chu lu tlan kitaxtulh. Felipe lhuwa tiku kamunulh. Pero umakgolh ni tunkun makgamakglhtinankgolh espíritu santo. Lakgkgolotsin tiku xpulalinkgo kstalaninanin Cristo kxapulana siglo, nema xwi kJerusalén, kamalakgachalh Pedro chu Juan xlakata xʼankgolh kaʼakxilhkgo natalan tiku aku xtamunukgonit. Akxni apóstoles chankgolh, “wilinikgolh xmakankan [chu umakgolh natalan] makglhtinankgolh spiritu santo” (Hech. 8:5, 6, 14-17). Chuna, umakgolh samaritanos makgtapakgsikgolh kʼIsrael xaʼespiritual.

⁵ Kkata 36, Jehová limaklakaskimpa Pedro xlakata nakawani atanu latamanin pi na xmakgtapakgsikgolh kxkachikin. Uma chuna lalh akxni apóstol litachuwinalh Dios chatum soldado xalak Roma, tiku xwanikan Cornelio chu na kalitachuwinalh xfamilia chu xʼamigos (Hech. 10:22, 24, 34, 35). Biblia wan: «Kajku xchuwinama mPedro [...], timilh spiritu santo kxokgspun [tiku ni judíos] nti xkgaxmatmakgo xtachuwin. [Kaks likawankgolh, TNM] nkanajlanin, wa cha nti judíos nti xtaminkgonit mPedro, mpi na xtaxajtamakgan ntatakin xla spiritu santo kxokgspunkan xakgmakat chixkuwin» (Hech. 10:44, 45). Lata ama kilhtamaku, tiku ni judíos xwankgonit chu nitu xtacircuncidarlimakgo, na tlan xmakgtapakgsikgolh kxkachikin Dios.

6, 7. ¿La xlimasiyatkan xwanit xaxlikana kstalaninanin Cristo pi xlitaxtukgo akgtum kachikin nema xlin xtukuwani Jehová, chu la makgantaxtikgolh?

⁶ Kata 49 kʼakgtum tamakxtumit nema tlawakgolh lakgkgolotsin tiku xpulalinkgo kstalaninanin Cristo, Santiago wa: «Lichuwinanit Simón [Pedro] lantla Dios nkgasiya ukxilhlakachanikgolh xakgmakgat chixkuwin lakimpi wa yama ntachixkuwitat, na wa naliyankgoy xtukuwini» (Hech. 15:14). Uma xasasti kachikin nema xlilh xtukuwani Jehová xʼamakgo makgtatapakgsikgo tiku judíos chu tiku ni judíos (Rom. 11:25, 26a). Alistalh, Pedro katsokgnanilh: “Xapulana, ni xtapakgsiyatit [kxkachikin], wampi la uku xtapakgsin Dios wixin”. Chu lichuwinalh tuku xlitlawatkan  xwanit: «Wampi wa wixin, xatalaksaknin kilhtsukut, wa [sacerdotes] wixin nti xkilhtsukut reyes, chixkuwin xasantujlanin, wa nti lu[...] xtapakgsin Dios wixin, lakimpi wixin naliakgchuwinanatit wa ntu xatlan ntlawanit wa nti yama nkatasaninitan [kxakapukswa], anta nkalimin lilakgatit kxkgakganat» (1 Ped. 2:9, 10). Xtalakaskin pi xmalankikgolh Jehová kxlakatin amakgapitsin chu xlichuwinankgolh xtukuwani. Xtalakaskin pi ni xpekuankgolh chu xpalakachuwinankgolh xDioskan, tiku lakgchan namapakgsinan.

⁷ Chuna la tlawalh xpalakata kachikin Israel, Jehová wa pi Israel xaʼespiritual xlitaxtu “kachikin nema xlakkaxwilinit, xlakata nalichuwinankgo xlilanka” (Is. 43:21). Kstalaninanin Cristo ni pekuankgolh chu lichuwinankgolh pi kajwatiya Jehová xaxlikana Dios xwanit chu pi amakgapitsi dioses nema latamanin xkakninanikgo ni xaxlikana (1 Tes. 1:9). Chuna, palakachuwinankgolh Jehová chu Jesús «kJerusalén [...] chu xlikatlanka kJudea, chu kSamaria, chu asta awatiya kxtankgana tiyat» (Hech. 1:8; Col. 1:23).

8. ¿Tuku kawanilh apóstol Pablo kstalaninanin Cristo kxapulana siglo?

⁸ Pablo na xlitaxtu chatum tiku ni xpekuan chu xmakgtapakgsi kxkachikin Dios. Ni pekualh chu lichuwinalh kxlakatin filósofos pi Jehová wa Tiku lakgchan namapakgsinan, «Dios nti ntlawalh nkatuxawat, chu xlipaks ntu ananiy, wa xmalana akgapun, chu nkatiyatna» (Hech. 17:18, 23-25). Akxni xlimakgtutu makgat kilichuwinantapulilh Dios, Pablo kawanilh kstalaninanin Cristo: “Kkatsiy mpi akxni nkanitta nawan, nakalakgtanukgoyan [lobos] wa nti [nitlan katikalikatsinikgolh xborrego] Dios. Na naʼanankgoy kmilakgstipankan makgapitsin nchixkuwin, na tanuj tamasiyun ntu ni talulokgtat nalichuwinankgoy, lakimpi namalakgaspityawakgoy limakgalhtawakgat nastalanikgoy” (Hech. 20:29, 30). Chu chuna lalh. Akxni ksputmaja xapulana siglo, lhuwa xʼanankgo tiku xmakgxtakgkgonit xaxlikana takanajla chu xlakatayakgo (1 Juan 2:18, 19).

9. ¿Tuku lalh kxkachikin Dios akxni apóstoles nikgolh?

⁹ Akxni apóstoles nikgolh, tiku xmakgxtakgkgonit xaxlikana takanajla chu xlakatayakgo, talhuwikgolh chu malakatsukikgolh nixaxlikana takanajla. Umakgolh tiku kaj wankgo pi kstalaninanin Cristo ni limasiyakgo pi “liyankgoy xtukuwini” Jehová, wata mapanukgonit xtukuwani klhuwa traducciones xalak Biblia. Na tlawakgo takaknin nema tlawakgo tiku ni kakninanikgo Dios chu ni limalankikgonit Jehová xtamasiyatkan. Tlawakgo guerras nema xasanto limapakuwikgo, nitlan likatsikgo chu tlawakgo talakgxtumit xalimaxana. Wa xlakata, akglhuwa siglo titaxtulh, Jehová ni xkgalhi akgtum kachikin nema “xliyankgoy xtukuwini”, wata kaj ni lhuwa kskujnin xkgalhi kKatiyatni.

10, 11. 1) ¿Tuku wa Jesús pi xʼama la akxni lichuwinalh parábola xla trigo chu nixatlan palhma? 2) ¿La kgantaxtulh parábola nema lichuwinalh Jesús akxni xtitaxtunita kata 1914?

¹⁰ Akxni Jesús lichuwinalh parábola xla trigo chu nixatlan palhma o tuwan, wa pi tuku xmasiyakgo tiku xmakgxtakgkgonit xaxlikana takanajla xʼama tlawa pi tuwa xtekgska xaxlikana takanajla. Lichuwinalh pi akxni «klhtatamakgo nchixkuwin», Akgskgawini xʼama chan nixatlan palhma kkapukuxtun niku xKgawasa chixku xchanit trigo. Nixatlan palhma chu trigo akxtum xʼamakgo stakkgo asta “xlikgatsputni [kakilhtamaku]”. Lichuwinalh pi «xatlan lichanat», wa kilhchanima «nti ntapakgsinikgoy xtapakgsin Dios» chu nixatlan «mpalhma» kilhchanima «nti ntapakgsinikgoy nti ni tlan». Xlisputni kakilhtamaku, xKgawasa chixku xʼama kamalakgacha “nti namakikgoy [tachanan]”, uma kilhchanima ángeles, xlakata tanu xwilikgolh trigo chu nixatlan palhma. Alistalh xʼamakgo mamakxtumikgo tiku tapakgsikgo kxtamapakgsin  Dios (Mat. 13:24-30, 36-43). ¿La kgantaxtulh uma? ¿La tlawalh Jehová xlakata tlan xkgalhipa akgtum kachikin kKatiyatni?

¹¹ “Xlikgatsputni [kakilhtamaku]” tsukulh kata 1914. Ama kilhtamaku, ni lhuwa mil xʼanankgo kKatiyatni tiku kalaksakkanit xlakata naʼankgo kʼakgapun. Kʼguerra nema analh ama kata, wantiku «ntapakgsinikgoy xtapakgsin Dios», anta xkaʼakgchipakanit kxaLanka Babilonia, putum takanajla nema ni xaxlikana. Pero kkata 1919, Jehová kalakgmaxtulh, chu chuna limasiyalh pi umakgolh ni xtachuna xwankgonit la nixatlan «mpalhma», wamputun tiku ni xaxlikana kstalaninanin Cristo. Chuna la xlichuwinanit palakachuwina Isaías, Jehová kalimaxtulh akgtum kachikin nema liwana talakkaxtawilanit. Isaías 66:8 kinkawaniyan: «¿Tlan kawa akgtum kachikin kaj akgtum kilhtamaku nalimalakachinikan? O ¿kaj xamakgtum nalakachin akgtum lanka kachikin? Xlakata Sión kgalhima takatsanajwat xlakata nakgalhi kskgata chu na lakachinkgonit xkamanan». Sión wa kilhchanima ángeles nema kalakkaxwilikanit kʼakgapun chu tlan nawanaw pi malakachinikgolh tiku kalaksakkanit naʼankgo kʼakgapun chu akgtum kachikin katlawalh.

12. ¿La limasiyakgonit tiku kalaksakkanit naʼankgo kʼakgapun pi xlikana litaxtukgo akgtum kachikin nema lin xtukuwani Jehová?

¹² Xtachuna la xapulana kstalaninanin Cristo, wantiku «ntapakgsinikgoy xtapakgsin Dios», tatayakgonit Jehová (kalikgalhtawakga Isaías 43:1, 10, 11). Umakgolh, kalilakgapaskan xlakata tlan linkgo xlatamatkan chu lichuwinankgo «xalakwan xalaksasti tamakatsin xla xtamapakgsin Dios [...] xlakata natamakatsininan kputum laklanka kachikinin» (Mat. 24:14; Filip. 2:15). Chuna kamakgtayakgonit lhuwa millón latamanin xlakata tlan nakamakgamakglhtinan Jehová (kalikgalhtawakga Daniel 12:3).

13, 14. 1) ¿Tuku xlitlawatkan tiku ni makgtapakgsikgo kʼIsrael xaʼespiritual xlakata Jehová namakgamakglhtinan xtakakninkan? 2) ¿La xlichuwinanita Biblia uma?

¹³ Chuna la akxilhwi artículo nema aku titaxtulh, kxamakgan Israel Jehová xmakgamakglhtinan  xtakakninkan tiku xala alakatanu, pero komo akxtum xtalakgolh kachikin nema Dios xlaksaknit (1 Rey. 8:41-43). Nachuna la uku, tiku ni tapakgsikgo kʼIsrael xaʼespiritual, komo lakaskinkgo pi Jehová kamakgamakglhtinalh xtakakninkan, talakaskin akxtum natalakgo xkachikin Jehová, xtatayananin tiku naʼankgo kʼakgapun.

¹⁴ Chatiy palakachuwinanin lichuwinankgolh pi kkinkilhtamakujkan, lhuwa latamanin akxtum xʼamakgo talakgo xkachikin Jehová. Palakachuwina Isaías lichuwinalh: «Lhuwa kachikinin naʼankgo chu nawankgo: “Katantit chu katakxtuw kxsipi Jehová, anta kxchik xDios Jacob; chu xla nakinkamasiyaniyan xtiji, chu liwana natlawanaw klaktsu xtiji”. Xlakata kʼSión nataxtuyacha limapakgsin, chu kʼJerusalén nataxtuyacha xtachuwin Jehová» (Is. 2:2, 3). Palakachuwina Zacarías, na lichuwinalh pi «lhuwa kachikin chu lakgtliwakga laklanka kachikinin xlikana [xʼamakgo minkgo] putsakgo kJerusalén, Jehová tiku kapulalin lhuwa soldados, chu naputsakgo pi kakamakgamakglhtinalh Jehová». Lichuwinalh pi litaxtukgo la «kgalhakaw lakchixkuwin xalak tipalhuwa kachikinin chu tipalhuwa xtachuwinkan», chu xtachuna la komo xʼamakgo chipanikgo klhakgat Israel xaʼespiritual chu xʼamakgo wankgo: «Nakkataʼanan, xlakata kkgaxmatnitaw pi Dios katalaman» (Zac. 8:20-23).

15. ¿Tuku xlakata wanaw pi “amakgapitsi borrego” akxtum taʼankgo tiku tapakgsikgo kʼIsrael xaʼespiritual?

¹⁵ “Amakgapitsi borrego” akxtum taʼankgo tiku tapakgsikgo kʼIsrael xaʼespiritual, xlakata akxtum kalitachuwinankgo xalakwan xalaksasti tamakatsinin xla xTamapakgsin Dios (Mar. 13:10). Na makgtapakgsikgonit kxkachikin Dios chu “nkgamputum wankgonit”, chu kapulalima «xatlan mapuchwanina», Jesucristo (kalikgalhtawakga Juan 10:14-16).

16. ¿Tuku natlawa Jehová xlakata natsuku tuku nalisputa «lanka takatsanajwat»?

¹⁶ Akxni masputukanita nawan xaLanka Babilonia, xkachikin Dios na lu namasputuputunkan. Xlakata tlan nalakgtaxtuyaw, nalakaskinaw xtamakgtay Jehová. Wa Jehová tiku nalakkaxwili tuku nala chu wa nalaksaka kilhtamaku akxni chuna nala. Ama kilhtamaku, natsuku tuku nalisputa «lanka takatsanajwat» (Mat. 24:21; Ezeq. 38:2-4). Gog mamasputuputun «kachikin nema kakitiyakanit klhuwa laklanka kachikinin» (Ezeq. 38:10-12). Pero akxni Gog chuna natlawa, Jehová nalakgmaxtu xkachikin chu nakatalachipa Gog chu lhuwa ksoldados. Chuna nalimasiya pi wa lakgchan namapakgsinan chu namasantujli xtukuwani. Jehová wan: «Naktlawa pi lanka naklitaxtu chu naktasantujli chu naktlawa pi kakilakgapaska kxlakatin lhuwa laklanka kachikinin; chu nakatsikgo pi akit Jehová» (Ezeq. 38:18-23).

17, 18. 1) ¿Tuku nakinkawanikanan pi natlawayaw kskujnin Jehová, akxni Gog namasputuputun xkachikin Dios? 2) ¿Tuku kilitlawatkan komo lakaskinaw pi Jehová kakinkalakgmaxtun?

¹⁷ Akxni Gog namasputuputun xkachikin Jehová, xla nakawani kskujnin: «Kapit, kinkachikin, katanu niku tlakg xatsekg kminchik chu kamalakchuwa mimalakcha. Kaj tsinu katatsekgti asta akxni nasputa tasitsi» (Is. 26:20). Ama kilhtamaku, Jehová nakinkawaniyan tuku kilitlawatkan xlakata nalakgtaxtuyaw. Chu tachuwin «niku tlakg xatsekg [kinchikkan]» max wa kilhchanima congregaciones.

¹⁸ Wa xlakata, komo lakaskinaw pi Jehová kakinkalakgmaxtun klanka takatsanajwat, kiliʼakgatekgsatkan pi xla kgalhi akgtum kachikin unu kKatiyatni chu lakkaxwilinit kcongregaciones. Wa xlakata ¡ni katamakgatliniw kincongregacioneskan! Chuna la salmista, lakatanks kawaw: «Dios, wata wix lanka lakgmaxtuna, ¡wix kasikulanatlawaya minkamanan!» (Sal. 3:8).