XTITAXTUMA 6 xla septiembre kata 1926, akxni chatum peregrino (superintendente viajante) xalak Japón pero kʼEstados Unidos xlama, taspitli kJapón chu misionero xwanit. Anta xkgalhkgalhima kajwatiya tiku xmakglhtinan revistas La Torre del Vigía chu xlakkaxwilinit akgtum grupo nema xtamakxtumikgo kKobe xlakata nalikgalhtawakgakgo Biblia. Kkata 1927, 2 xla enero, xLikgalhtawakgananin Biblia tlawakgolh xapulana xalanka xtamakxtumitkan kʼuma kachikin, 36 tiku kilakgolh chu 8 tamunukgolh. Lu tlan la litsukulh, pero ¿la xʼamakgo tlawakgo xlakata xkalinikgolh tuku xaxlikana xalak Biblia, 60 millón tiku xlamakgo kʼuma país?

Mayo kata 1927, xLikgalhtawakgananin Biblia lakkaxwilikgolh akgtum lanka campaña xlakata xmakatsininankgolh pi xʼamaka mastakan makgapitsi taʼakgchuwin xalak Biblia. Xapulana xʼamaka mastakan kʼOsaka, chu natalan limakatsininankgolh kputum kachikin laklanka kapsnat chu letreros. Nachuna, kamalakgachanikgolh 3,000 invitaciones tiku tlakg xlakaskinka xlitaxtukgo, chu maʼakgpitsikgolh 150,000. Na limaklakaskinkgolh tlakg xlakaskinka periódicos, chu asta 400,000 boletos xla tren xlakata xmakatsininankgolh xlakata taʼakgchuwin. Chu kilhtamaku akxni xʼama tamatitaxti taʼakgchuwin, akgtiy avionetas makaminkgocha 100,000 invitaciones kxakgspun kachikin. ¿La kitaxtulh? Sala Asahi, tatsamalh. Max 2,300 tiku kgaxmatkgolh taʼakgchuwin nema xwanikan «Talakatsuwinit xTamapakgsin Dios». Kkilhtin tamakgxtakgkgolh 1,000 xlakata nialhla xtanukgo. Akxni kgatsputli, max 600 tiku tamakgaxtakgkgolh xlakata xtlawakgolh takgalhskinin chu xkamaxkika xtakgalhtin. Papaʼ nema titaxtukgolh, na kamatitaxtika taʼakgchuwin anta kKioto chu kʼamakgapitsi kachikinin nema wilakgo kxʼoeste Japón.

Octubre kata 1927 lakkaxwilikgolh namastakan akgtutu taʼakgchuwin kTokio. Amakgtum kamalakgachaniparakgolh invitaciones tiku lu xlakaskinka litaxtukgo, la tiku xapuxku xmakgtayana mapakgsina, tiku xtapakgsikgo kParlamento, xpulalinanin takanajla chu soldados. Nachuna mawakakgolh kapsnat, wilikgolh tamakatsinin kperiódicos chu maʼakgpitsikgolh 710,000 invitaciones. Xliputuminika 4,800 tiku kilakgolh.

Colportores (precursores) makgtlawakgolh lu xlakaskinka taskujut xlakata xtalichuwinalh Dios kʼakgatunu chiki. Matsue Ishii, tiku xapulana colportora litaxtulh kJapón chu xchixku, Jizo, linkgolh tamakatsinin xla Tamapakgsin atsinu ni putum kpaís: lata kSapporo, nema wi knorte, asta kSendai, Tokio, Yokohama, Nagoya, Osaka, Kioto, Okayama chu Tokushima. Matsue chu atanu tala puskat nema xkgalhiya kata, xwanikan, Sakiko Tanaka, xlakgapaxialhnankgo laklanka napuxkun, wa xlakata xwilikgo kimonos nema tlakg lakstlan xwanit. Akgtum kilhtamaku, chatum puxku skilh 300 libros nema xwanikan El Arpa de Dios chu Liberación, xlakata xkawililh kbibliotecas xalak pulachin.

 Katsuo chu Hagino Miura, tunkun katsikgolh pi xtekgskgonit xaxlikana takanajla, akxni likgalhtawakgakgolh libros nema Matsue kamaxkilh. Tamunukgolh kkata 1931 chu colportores litaxtukgolh. Haruichi chu Tane Yamada, chu amakgapitsi xfamilia makgamakglhtinankgolh tuku xaxlikana akxni nina xchan kata 1930. Na colportores litaxtukgolh, chu xtsumatkan, tiku wanikan Yukiko, alh skuja kBetel xalak Tokio.

Xlakata carro lu laktapalaxla xwankgonit chu tiji na nitlan xwanit, Kazumi Minoura chu amakgapitsi colportores xmaklakaskinkgo laktsu chiki nema xkgalhi llantas pero ni xkgalhi xmotor. Umakgolh laktsu chiki xkalimapakuwikan Jehús, chuna xkalimapakuwikan xpalakata Jehú tiku talichuwinan kBiblia chu chuna la xmatlawani xcarro (2 Rey. 10:15, 16). Anta kBetel xalak Japón katlawaka akgtutu Jehús xalaklanka, xkgalhikgo 2,2 metros xlilhman, chu 1,9 metros xlitilanka chu xlitalhman, anta tlan klhtatakgo kgalhchaxan colportores. Na katlawaka akgkawitu Jehús xalaktsu, nema xkalilakalhtanktiyakan bicicletas, chu anta tlan xtanukgo chatiy latamanin. Kiichi Iwasaki, tiku katlawalh, wan: «Akgatunu Jehú xkgalhi lanka lhakgat nema xlimakgtlapakan chu akgtum batería xla carro nema xtlawa pi xʼanalh luz». Colportores malakgatumikgolh tuku xaxlikana xlikalanka Japón, akxni xlinkgo kkasipijni chu niku kxakaxtum lata Hokkaido, nema wi knorte, asta Kyushu, nema wi ksur.

Ikumatsu Ota, wan: «Akxni xakchanaw kʼakgtum kachikin xakwiliyaw Jehú kxkilhtun kgalhtuchokgo o anta niku kalakgwan. Pulana xakkalakgapaxialhnanaw tiku xlakaskinka xlitaxtukgo anta, la mapakgsina xalak kachikin, chu alistalh xakmaʼakgpitsiyaw likgalhtawakga akgatunu chiki. Akxni xakkalitachuwinanitawa Dios latamanin kʼuma kachikin, xakanaw alakatanu».

Akxni ama 36 xLikgalhtawakgananin Biblia xalak Kobe tlawakgolh xapulana xalanka xtamakxtumitkan, uma kilhtamaku kajku xlimatsukimaka, litaxtulh «kilhtamaku akxni xtlawamaka tuku xalakstu» (Zac. 4:10). Akgkitsis kata titaxtulh, kkata 1932, malakgachakgolh xinformejkan 103 colportores chu tiku xlichuwinankgo Dios. ¡Liwaka 14,000 libros xmastakgonit! La uku anan max 220,000 tiku lichuwinankgo Dios chu makgxkgakganamakgo kPaís Niku taxtu Chichini. (Tuku xala makgasa xalak Japón.)