1, 2. 1) ¿Tuku xkatsiputunkgo makgapitsi xpulalinanin takanajla? 2) ¿Tuku kakgalhtilh Pedro? (Kaʼakxilhti xapulana dibujo.) 3) ¿Tuku xlakata Pedro nipara tsinu pekualh akxni kgalhtinalh?

AKXNI nina lhuwa kilhtamaku xtitaxtunit la xninit Jesús, makgapitsi xpulalinanin takanajla tiku nitlan xlikatsikgo xtlawanimakgo takgalhskinin apóstol Pedro. Watiya xpulalinanin judíos tiku lakkaxwilikgolh pi xmakgnika Jesús. Pedro aku xmapaksanit chatum chixku tiku nila xtlawan lata akxni lakachilh, chu xkatsiputunkgo tiku xmaxkinit litliwakga xlakata chuna xtlawalh. Pedro ni pekualh chu kakgalhtilh: «Jesucristo xalak Nazaret wa nti wixin ntipakgaxtokgowakatit, wampi Dios, malakastakwanilh klinin, wa nchu xapaksni liwanit yuma nchixku nti wi kmilakatinkan» (Hech. 4:5-10).

² Nina makgas, xlakata Pedro xpekuan makgtutu wa pi ni xlakgapasa Jesús (Mar. 14:66-72). Pero, ¿tuku xlakata nialh pekualh akxni kgalhtinalh? Pulaktum, xlakata makgtayalh espíritu santo, pero nachuna xlakata lu xkanajla pi Jesús xlakastakwananit. Pero ¿tuku xlakata lu xkanajla? Chu ¿tuku xlakata na lu kanajlayaw?

3, 4. 1) ¿Tiku kamalakastakwanika akxni nina xlamakgolh apóstoles? 2) ¿Tiku kamalakastakwanilh Jesús?

³ Akxni nina xlamakgolh xʼapóstoles Jesús, xkamalakastakwanikanit makgapitsi latamanin, wa xlakata xlakan ni xlimakgtumku xkatsimakgo pi wi tiku tlan lakastakwanan. Xlakan xkatsikgo pi Jehová xkamaxkinit litliwakga palakachuwina Elías chu  Eliseo xlakata xkamalakastakwanilh tiku xnikgonitta (1 Rey. 17:17-24; 2 Rey. 4:32-37). Chatum chixku tiku xninit, lakastakwanalh akxni makanka kxputaknun Eliseo chu xmakni laktamacha xlukut uma palakachuwina (2 Rey. 13:20, 21). Xapulana kstalaninanin Cristo xkanajlakgo pi uma tuku lichuwinaw xlikana chuna xlanit, chuna la akinin kanajlayaw pi xlikana tuku wan xTachuwin Dios.

⁴ Lu lakgchan kinakujkan akxni likgalhtawakgayaw pi Jesús kamalakastakwanilh latamanin. Puskat tiku xninit xchixku max lu kaks lilakawa akxni Jesús malakastakwanilh xkgawasa (Luc. 7:11-15). Atanu kilhtamaku, Jesús malakastakwanilh chatum aktsu tsumat tiku xkgalhi akgkutiy kata. ¡Kalakpuwanti la lu paxuwakgolh xnatlatni akxni akxilhkgolh pi xlakastakwananit! (Luc. 8:49-56.) ¡Chu kalakpuwanti la paxuwakgolh tiku akxilhkgolh Lázaro akxni taxtulh klhuku! (Juan 11:38-44.)

5. ¿Tuku xlakata wanaw pi Jesús ni malakastakwanika la amakgapitsin?

⁵ Apóstoles xkatsikgo pi xtalakastakwanat Jesús ni xtachuna xwanit la amakgapitsin. Tiku xkamalakastakwanikanit kgalhiparakgolh xmaknikan chuna la xapulana, chu alistalh niparakgolh. Pero Jesús maxkika akgtum makni xaʼespíritu nema ni lakxla chu nila niy (kalikgalhtawakga Hechos 13:34). Pedro tsokgli pi Jesús «nilh kxtiyatliwa, wampi tikgalhipa xlatamat wa kʼespíritu». Na wa pi «kxpakgstakat Dios wi» kʼakgapun, na «mapakgsikgoy ángeles, chu [mapakgsinanin, TNM], chu xlipaks nti nkgalhiy xlitliwakga» (1 Ped. 3:18-22). Xlikana pi lu tlan chu akgtum milagro xwankgonit talakastakwanat nema xʼananit pulana, pero la Jesús malakastakwanika nikxni chuna xtlawakanit.

6. Xlakata Jesús lakastakwanalh, ¿la kamakgtayalh uma kstalaninanin?

⁶ Xlakata Jesús lakastakwanalh, uma lu kamakgtayalh kstalaninanin. Xla ni xanin xwi chuna la xlakpuwankgo xtalamakgasitsin. La uku Jesús xlitaxtu chatum tliwakga espíritu nema nialhla xtlawanikan tuku nitlan. Nachuna, xtalakastakwanat xlimasiyanit pi xKgawasa Dios xwanit. Xlakata putum uma, kstalaninanin nialh lilipuwankgolh chu nialh pekuankgolh, wata lu paxuwakgolh. Chu xʼamakgo limasiyakgo uma akxni xlichuwinankgolh xalakwan xalaksasti. ¡Jesús xlamapa chu tuku Jehová xlakapastaknit natlawa, xlikana xʼama kgantaxtu!

7. 1) ¿Tuku tlawama Jesús la uku? 2) ¿Tukuya takgalhskinin nakamaxkiyaw takgalhtin?

⁷ Kskujnanin Jehová katsiyaw pi Jesús ni kajwatiya litaxtulh chatum chixku tiku tlawalh tuku kaks malakawaninan. La uku, pulalima la talichuwinama Dios kxlikalanka katiyatni. Chu xlakata Dios laksakli Mapakgsina nawan kxTamapakgsin, nialh makgas namasputu tuku nitlan unu kKatiyatni chu natlawa pi akgtum xastlan paraíso nawan niku latamanin xatapaxuwan nalatamakgo putum kilhtamaku (Luc. 23:43). Komo ni xtimalakastakwanika Jesús, uma nila xkgantaxtulh. Pero, ¿tuku xlakata tlan kanajlayaw pi lakastakwanalh chu lama la uku? Chu ¿tuku xlakata lu xlakaskinka kimpalakatakan xtalakastakwanat?

8, 9. 1) ¿Tuku xlakata xpulalinanin takanajla xlakaskinkgo pi xkuentajtlawaka niku xmaknukanit Jesús? 2) ¿Tuku lalh akxni chankgolh lakpuskatin?

⁸ Akxni aku xmakgnikanit Jesús, xapuxku sacerdotes chu fariseos lakgankgolh Pilato chu wanikgolh: «Tlati, klakapastakmaw mpi wa yama xaʼakgsanina chixku, tiwa akxni xlamajku: “Akxni xliʼakgtutu kilhtamaku, naklakastakwanan”. Kuintay kamatlawinanti klhuku [o tampixtu] asta akxni xliʼakgtutu kilhtamaku, mpi tini natanuy; lakimpi ni naʼankgoy nkatsisni xlimakgalhtawakgat, na naliyankgoy, cha nchu nawanikgoy ntachixkuwitat mpi lakastakwananit klinin.  Na wa nchu yuma ntu xaʼawatiya takgsanin, tlakg tlanka nawan ni xawa wa ntu xapulanaj». Pilato kamaxkilh talakaskin nakayawakgo tiku xkuentajtlawakgolh putaknun (Mat. 27:62-66).

⁹ Xmakni Jesús xwilikanit kʼakgtum lhuku nema xlakawaxkanit klanka chiwix chu xlilakgatalakanit akgtum lanka chiwix. Xpulalinanin takanajla xlakaskinkgo pi xanin anta xtamakgxtakgli. Pero Jehová atanu tuku xlakpuwanit. Kxliʼakgtutu kilhtamaku, akxni María Magdalena chu María ankgolh niku xmaknukanit Jesús, akxilhkgolh pi xmapanukanit chiwix nema xlitalakgatalanit lhuku chu chatum ángel xwi xʼakgspun uma chiwix. Ángel kawanilh pi xlakankgolh xpulakni lhuku xlakata xʼakxilhkgolh pi niti xtanuma. Kawanilh: “Ni unu wi, sampi malakastakwanikanit” (Mat. 28:1-6). ¡Jesús kstaknama!

10. ¿Tuku lichuwinalh Pablo nema xlimasiyakgo pi xmalakastakwanikanit Jesús?

¹⁰ Tuku lalh tipuxam kilhtamaku nema titaxtulh, liwana limasiyalh pi Jesús xlikana xlakastakwananit. Kxapulana tatsokgni nema kamalakgachanilh Corintios, apóstol Pablo lichuwinalh makgapitsi tuku chuna xmasiya. Katsokgnanilh: «Xapulanaj kkamasiyuninitan wa ntu na chuna nkit kmakgamakglhtinalh: mpi wa nCristo, wa linilh xpalakata kintalakgalhinkan, lu[...] xtachuna lantla wan ntatsokgnun. Na timaknukaj, chu na tilakastakwanalh xliʼakgtutu kilhtamaku, lu[...] xtachuna lantla wan ntatsokgnun. Chu [...] titasiyunilh Cefas, alistalh nchu ntitasiyunikgolh wa xkgalhakutuykan. Alistalh nchu ntitasiyunikgolh mpala liwaka akgkitsis ciento natalanin, makxtum xwilakgo, wa cha nti lamakgojku makgapitsin, chi nchu wa makgapitsin, nikgonitta. Alistalh titasiyunilh nchu wa Jacobo, alistalh nchu ntitasiyunikgolh wa xlipaks ntalakgachanin. Wa nti nchu xaʼawatiya lantla xlipaks amakgapitsin, kit nkintitasiyunilh, xtachuna nchatum skgata nti [nina chan, TMN] nkilhtamaku lakachin» (1 Cor. 15:3-8).

11. ¿Tuku xlakata wanaw pi Jesús lakastakwanalh «lantla wan ntatsokgnun»?

¹¹ Jesús lakastakwanalh «lantla wan ntatsokgnun». Anta kxTachuwin Dios, xwankanita pi Jesús xʼama lakastakwanan. Akgtum liʼakxilhtit, David lichuwinalh chatum tiku limapakuwilh tiku ni makgatsankgananinan, chu wa pi ni xʼama makgxtakgkan «kkalinin», o kputaknun (kalikgalhtawakga Salmo 16:10). ¿Tiku xlichuwinama? Kkilhtamaku Pentecostés kata 33, apóstol Pedro liwana masiyalh pi wa Jesús xlichuwinama, wa: «David [...] ntilikatsilh asta xalipulanaj, tilichuwinalh xtalakastakwan nCristo, mpi wa [xlatamat], ni anta nkatitamakgaxtakgli nkalinin, chu na ni mpala wa xtiyatliwa xmasli» (Hech. 2:23-27, 31).

12. ¿Tiku akxilhkgolh Jesús akxni xlakastakwananita?

¹² Lhuwa latamanin akxilhkgolh Jesús akxni xlakastakwananita. Tipuxam kilhtamaku nema titaxtulh akxni xlakastakwananita, Jesús katasiyanilh kstalaninanin kjardín niku xwi xputaknun, ktiji nema chan kʼEmaús chu alakatanu (Luc. 24:13-15). Milh kilhtamaku kaj chatum tiku tachuwinalh, la akxni tachuwinalh Pedro, chu alimakgtum katachuwinalh chalhuwa latamanin. Makgtum asta katasiyanilh liwaka 500 latamanin. Nila wi tiku nawan pi ni xlikana tuku akxilhkgolh lhuwa latamanin.

13. ¿La limasiyakgolh kstalaninanin pi lu xkanajlakgo pi Jesús xmalakastakwanikanit?

¹³ Kstalaninanin Jesús makatsininankgolh pi xlakastakwananit. Makgapitsi kaputsastalanika, patinankgolh chu asta kamakgnika xlakata xlichuwinamakgo pi Jesús xlakastakwananit. Komo kaj taʼakgsanin xwanit chu Jesús ni xmalakastakwanikanit, ¿tuku xlakata Pedro kalipekua wililh xlatamat akxni lichuwinalh xtalakastakwanat Jesús kxlakatinkan xpulalinanin takanajla tiku ni xʼakxilhputunkgo Cristo chu  lakkaxwilikgolh pi xmakgnika? Pedro chu amakgapitsin kstalaninanin liwana xkatsikgo pi Jesús xlama chu xpulalima la xtalichuwinama Dios. Nachuna, xtalakastakwanat liwana kamakanajlilh pi xlakan na xʼamaka kamalakastakwanikan. Chuna akgspulalh Esteban, akxni nilh liwana xkanajla pi xʼama latamapara (Hech. 7:55-60).

14. ¿Tuku tlawa nakanajlayaw pi Jesús lama la uku?

¹⁴ Anan tuku likatsiyaw pi Jesús mapakgsinamaja chu xʼAkgxakga congregación litaxtu. Xaxlikana kstalaninanin Cristo talhuwimakgolh. ¿Chuna xkitaxtulh komo Jesús ni xlatamalh? Komo ni xtimalakastakwanika, max nikxni xtikgaxmatwi pi xlichuwinanka. Pero anan lhuwa tuku kinkamakanajliyan pi lama la uku chu pulalima la talichuwinama Dios kxlikalanka Katiyatni.

15. Xlakata Jesús lakastakwanalh, ¿la kinkamakgtayayan uma ni napekuanaw akxni nalichuwinanaw Dios?

¹⁵ Xlakata katsiyaw pi Jesús lakastakwanalh uma tlawa pi ni napekuanaw akxni nalichuwinanaw Dios. Akgtiy mil kata nema titaxtunit lhuwa tuku tlawakgonit xtalamakgasitsin Dios xlakata nialh natalichuwinan xalakwan tamakatsin. Lhuwa tuku maklakaskinkgonit: apostasía, kinkalikgalhkgamanankanan, nitlan kinkalikatsinikanan, ni mastakanit talakaskin nalichuwinanaw Dios, chu asta kamakgnikanit makgapitsi natalan. Pero Biblia lichuwinanit: «Katuwa tuku nalitalachipaputunkana, nitu katilitlawanikgon» (Is. 54:17). Wa xlakata, tiku tatayakgo Satanás ni kinkamakgapekuanan. Jesús kinkatawilan chu kinkamakgtayayan chuna la wa pi xʼama tlawa (Mat. 28:20). ¡Ni kilipekuatkan! Maski lhuwa tuku natlawakgo xlakata nialh nalichuwinanaw Dios, ni katitlajanankgolh.

16, 17. 1) Xlakata Jesús lakastakwanalh, ¿la limasiya pi putum tuku masiyalh xaxlikana? 2) Chuna la wan Juan 11:25, ¿tukuya litliwakga maxkikanit Jesús?

¹⁶ Xtalakastakwanat Jesús limasiyalh pi putum tuku xmasiyanit xaxlikana. Apóstol Pablo wa pi komo kaj taʼakgsanin pi Cristo lakastakwananit, xtakanajla kstalanina Cristo chu la lichuwinan Dios, nitu litaxtu. Chatum xlakputsana Biblia, tsokgnalh: «Komo Jesús ni malakastakwanika, [...] kstalaninanin Cristo xatontos litaxtukgo tiku kaj kaʼakgskgawimika». Komo Jesús ni lakastakwanalh, xlitaxtulh pi tuku lichuwinankgo Evangelios kaj xalilakgaputsa tatsokgni xpalakata chatum xaskgalala chixku tiku tlan xlikatsi chu makgnikgolh xtalamakgasitsin. Pero Jesús xlikana lakastakwanalh. Chu uma limasiya pi xlikana putum tuku masiyalh chu tuku wa pi xʼama kgantaxtu kilhtamaku nema aku mima (kalikgalhtawakga 1 Corintios 15:14, 15, 20).

¹⁷ Jesús wa: «Kit wa ntalakastakwan, chu latamat; wa nti nkit nkinkanajlaniy, maski xnilh, nalatamay» (Juan 11:25). Uma tuku wa nema makgapaxuwanan, xlikana nakgantaxtu. Jehová maxkilh litliwakga Jesús xlakata nakamalakastakwani tiku natamapakgsinankgo kʼakgapun chu lhuwa millón latamanin tiku nalatamakgo putum kilhtamaku kKatiyatni. Xlakata Jesús makamastalh xlatamat chu lakastakwanalh liwana kinkamasiyaniyan pi namasputukan linin. Xlikana pi uma kinkamakgtayayan natayaniyaw tuku tuwa, chu asta ni pekuanaw komo nakinkamakgniputunkanan.

18. Xlakata Jesús lakastakwanalh, ¿tuku liwana katsiyaw?

¹⁸ Xtalakastakwanat Jesús masiya pi Jehová nakinkatatlawayan kuenta chuna la wi xaʼakgstitum xlimapakgsin. Kaʼakxilhwi tuku Pablo kawanilh makgapitsi latamanin xalak Atenas: «[Dios] lilhkanit akgtum nkilhtamaku, akxni ntalulokgtat naliputsananiy ntachixkuwitat, sampi wa natlawa yama nchixku  nti liwililh. Na wa yuma xaliʼakxilhtit lantla mpaks nalikanajlanikgoy mpi malakastakwanilh klinin» (Hech. 17:31). Chuna, Jesús wa tiku Jehová liwayalh Juéz nawan, chu tlan lipawanaw pi xaʼakgstitum nakinkatatlawayan kuenta chu nakinkalimasiyaniyan pi kinkapaxkiyan (kalikgalhtawakga Isaías 11:2-4).

19. ¿La kinkamakgtayayan nakanajlayaw pi Jesús lakastakwanalh?

¹⁹ Akxni kanajlayaw pi Jesús lakastakwanalh kinkamakgpuwantiniyan natlawayaw xtalakaskin Dios. Komo ni xtimakamastalh xlatamat chu ni xtilakastakwanalh, nila xlakgtaxtuniw talakgalhin chu linin (Rom. 5:12; 6:23). Max na xlichuwinaw tuku wankgo lhuwa latamanin: «Kawayaw, chu [kakgotnaw], xampi ni katsiyaw pala chali, usu tuxama naniyaw» (1 Cor. 15:32, Hua Xasasti Talaccaxlan, 1999). Pero, akinin ni kajwatiya lilakpuwanaw nalipaxuwayaw tuku anan klatamat. Xlakata katsiyaw pi naʼanan akgtum talakastakwanat, liwana lakpuwanitaw nakgalhakgaxmataw putum tuku Jehová kinkawaniyan.

20. Xlakata Jesús lakastakwanalh, ¿la limasiya uma xlilanka Jehová?

²⁰ Xtalakastakwanat Jesús masiya xlilanka Jehová, wa tiku sikulunatlawa putum tiku putsakgo (Heb. 11:6). ¿Lilakpuwanitaw la xlilhuwa litliwakga chu liskgalala limaklakaskilh Jehová xlakata xmalakastakwanilh xKgawasa la chatum espíritu nema nikxni katinilh? Xtalakastakwanat Jesús limasiyalh pi Dios tlan makgantaxti putum tuku wan pi natlawa. Jehová xwanit pi «xkam puskat» lu xlakaskinka taskujut xʼama tlawa xlakata xlimasiyalh pi xlikana lakgchan namapakgsinan kputum kakilhtamaku. Xlakata xkgantaxtulh uma tuku xwanit pi xʼama la, xtalakaskin pi xnilh chu xlakastakwanalh Jesús, wa tiku litaxtu «xkam puskat» (Gén. 3:15).

21. ¿Tuku xlakata lu xlakaskinka akxilha takgalhkgalhin xla talakastakwanat?

²¹ ¡Lu paxtikatsiniyaw Jehová xlakata kinkamaxkiyan takgalhkgalhin pi nalakastakwananaw! Apóstol Juan kgaxmatli uma tuku wanka pi nakgantaxtu nema lu tlan: «Uwi xputawilh Dios, anta wi kxlakgstipankan nchixkuwin; na wa natatawilakgo, chi nchu xlakan x[kachikin] nawankgoy, na watiya Dios xPuchinakan nawan. Na paks naxakanikgo Dios xlakgpixtajatkan na nialh katiʼanalh linin chu na nialh katiʼanalh talipuwan, ni mpala wa ntatasa chu na ni mpala wa ntakatsanajwat; sampi wa xlipaks katuwaj wantu xʼanan xakgasiyaj, paks lakgsputli. Chin chu wa nti xwi klaktawilh kpumapakgsin, waj: [...] “Katsokgti yuma; sampi wa yuma ntachuwin, kgalhiy xkakni, na xlikana”». ¿Tiku xwanima uma? ¡Wa Jesús akxni xlakastakwananita! (Apocalipsis [Revelación] 1:1; 21:3-5.)