1, 2. ¿Tuku xlakata lhuwa tiku ni akgatekgskgolh tuku Jesús xmasiyama?

MAX nakgaxmataw pi wi tiku kinkatachuwinaman chu asta max kgaxmataw la takgaxmata xtachuwin, pero ¿nalitamakgtayayaw komo ni akgatekgsniyaw tuku kinkawaniman? (1 Cor. 14:9.) Chuna lalh akxni Jesús katachuwinalh lhuwa mil latamanin chu limaklakaskilh tachuwin nema xchuwinankgo, pero lhuwa tiku ni akgatekgskgolh tuku xlichuwinama. Wa xlakata, wa: «Kakinkgaxpatnitit [...], na kakgatakgstit ntu kkawaniyan» (Mar. 7:14).

² ¿Tuku xlakata lhuwa tiku ni akgatekgskgolh tuku Jesús xmasiyama? Wi tiku lakapala lakpuwankgolh pi tlakg xkatsikgo chu nitlan tapuwan xkgalhikgo. Wa xlakata uma tuku wa Jesús xlakata umakgolh latamanin: «Lakglakgalhi[kgo] xlimapakgsin Dios, lakimpi wata tlan nalimakgaxtakg[kgo] [x]tawilatkan», o xtamasiyatkan (Mar. 7:9). Umakgolh latamanin ni xʼakgatekgsputunkgo tuku Jesús xlichuwinama, nipara xlakgpaliputunkgo xtapuwankan chu la xtlawakgo tuku xtlawaputunkgo. Xkgaxmatkgo, pero ni xlakgchuwa xnakujkan (kalikgalhtawakga Mateo 13:13-15). ¿Tuku kilitlawatkan xlakata chuntiya nakatsiputunaw tuku masiyalh Jesús?

3. ¿Tuku xlakata xlimakgalhtawakget Jesús xʼakgatekgskgo tuku xmasiya?

³ Kilistalanitkan xliʼakxilhtit xlimakgalhtawakget Jesús tiku taʼaktujukgolh. Jesús kawanilh: «Taskulunatlawanit wixin milakgastapukan, sampi lilakawananatit; chu wa miliakgawankan sampi likgaxpatatit» (Mat. 13:16). ¿Tuku xlakata xlakan akgatekgsnikgolh Jesús? Pulana, akstu xkatlawanikan takgalhskinin chu xputsakgo tuku xlikana xwamputun xtachuwin Jesús (Mat. 13:36; Mar. 7:17). Xlipulaktiy, xmakgamakglhtinankgo xalaksasti tamasiy chu putum xtatlawakgo tuku xkatsikgoya (kalikgalhtawakga Mateo 13:11, 12). Xlipulaktutu, xlimaklakaskimputunkgo tuku xkgaxmatkgonit chu xʼakgatekgskgonit, ni kajwatiya xlakata xakstukan xlitamakgtayakgolh, wata na xkalimakgtayaputunkgo amakgapitsin (Mat. 13:51, 52).

4. Kalichuwinanti pulaktutu tuku kilitlawatkan xlakata tlan naʼakgatekgsaw xparábolas Jesús.

⁴ Chuna la xlimakgalhtawakget Jesús, pulaktutu tuku kilitlawatkan komo akgatekgsputunaw xparábolas Jesús. Pulana, kilimaxtutkan kilhtamaku xlakata nalikgalhtawakgayaw tuku Jesús wa, naputsayaw xtakgalhtin kintakgalhskininkan chu nalilakpuwanaw tuku katsiniyaw. Chuna nakgalhiyaw takatsin (Prov. 2:4, 5). Xlipulaktiy, talakaskin naʼakxilhaw la uma takatsin tatalakxtumi tuku katsiyawa chu nalilakpuwanaw la kinkamakgtayayan kkilatamatkan. Uma wamputun taʼakgatekgsni (Prov. 2:2, 3). Chu xlipulaktutu, namaklakaskinaw tuku katsininitaw chu nalilatamayaw. Chuna limasiyayaw liskgalala (Prov. 2:6, 7).

5. Kalimaklakaskinti akgtum liʼakxilhtit xlakata nalichuwinana pi ni watiya tuku kilhchanima takatsin, taʼakgatekgsni chu liskgalala.

⁵ ¿Tuku xlakata ni watiya tuku kilhchanima, takatsin, taʼakgatekgsni chu liskgalala? Akgtum liʼakxilhtit: kalakpuwaw pi yaw xlakʼitat tiji chu mima akgtum autobús. Pulana, akxilhaw pi tuku mima akgtum autobús, uma wamputun takatsin. Alistalh, akxilhaw pi komo ni natapanuyaw, autobús nakinkatitiyayan, uma wamputun taʼakgatekgsni. Wa xlakata lakapala tapanuyaw, uma wamputun liskgalala. Wa xlakata Biblia kinkawaniyan pi lu xlakaskinka nakgalhiyaw «liskgalala nema makgtayanan», xlakata uma nakinkalakgmaxtuniyan kilatamatkan (Prov. 3:21, 22; 1 Tim. 4:16).

6. ¿Tukuya akgtati takgalhskinin nakakgalhtiyaw akxni nalikgalhtawakgayaw pulaktujun xparábolas Jesús? (Kaʼakxilhti  recuadro.)

⁶ Kʼuma artículo chu tuku aku mima naʼakxilhaw pulaktujun parábolas nema Jesús limaklakaskilh. Akxni nalikgalhtawakgayaw pulakatunu uma parábolas nakakgalhtiyaw umakgolh takgalhskinin: ¿Tuku wamputun? (Uma kinkamakgtayayan nakgalhiyaw takatsin.) ¿Tuku xlakata Jesús limaklakaskilh? (Uma takgalhskinin kinkamakgtayayan nakgalhiyaw taʼakgatekgsni.) ¿La nalimaklakaskinaw uma xlakata nalitamakgtayayaw chu nakalimakgtayayaw amakgapitsin? (Uma wamputun liskgalala.) Chu xaʼawatiya, ¿tuku kinkamasiyaniyan uma xlakata Jehová chu Jesús?

7. Kawanti tuku wamputun parábola xlakata xtalhtsi mostaza.

⁷ (Kalikgalhtawakga Mateo 13:31, 32.) ¿Tuku wamputun parábola xlakata xtalhtsi mostaza? Xtalhtsi mostaza kilhchanima congregación xla kstalaninanin Cristo chu tamakatsin xla Tamapakgsin nema lichuwinanaw. Chuna la xtalhtsi mostaza «wa ntlakg xaʼaktsu lantla xlipaks amakgapitsin ntalhtsi», congregación xla kstalaninanin Cristo ni lhuwa xwankgonit kata 33, pero ni lhuwa kilhtamaku titaxtulh lu kaks malakawaninan la xlilhuwa stakli xlakata xlitachuwinama tamakatsin xla Tamapakgsin (Col. 1:23). Jesús lichuwinalh pi anta «[x]tlawakgo xmasakgakan laktsu spun [o tsiktsi] kxpakganin», uma  limasiya pi makgtayanalh chuna la stakli. Uma laktsu spun xkakilhchanima latamanin tiku tlan tapuwan kgalhikgo, tekgskgo tamakgtay chu taway xla xtakanajlakan kcongregación (katamalakxtupi tuku wan Ezequiel 17:23).

8. ¿Tuku xlakata Jesús lichuwinalh parábola xlakata xtalhtsi mostaza?

⁸ ¿Tuku xlakata Jesús lichuwinalh uma parábola? Jesús limaklakaskilh la xlilakapala staka xtalhtsi mostaza xlakata nalichuwinan la xTamapakgsin Dios talakgatumima, makgtayanama chu nituku malakgachokgo. Lata kata 1914, lu kaks malakawaninan la staknit xkachikin Dios xalak katiyatni (Is. 60:22). Tiku makgtapakgsikgo kʼuma kachikin kamakgtayakan tliwakga nakgalhikgo xtakanajlakan (Prov. 2:7; Is. 32:1, 2). Congregación na chuntiya staktilhama, chu nituku malakgachokgo (Is. 54:17).

9. 1) ¿Tuku kinkamasiyaniyan parábola xlakata xtalhtsi mostaza? 2) ¿Tuku kinkamasiyaniyan uma xlakata Jehová chu Jesús?

⁹ ¿Tuku kinkamasiyaniyan parábola xlakata xtalhtsi mostaza? Akinin max lamaw anta niku ni lhuwa xtatayananin Jehová anankgo chu ni tunkun akxilhaw tuku tlan kitaxtu xlakata lichuwinanaw Dios. Maski chuna, xlakata katsiyaw pi xTamapakgsin Dios nituku malakgachokgo, kinkamakgtayayan natayaniyaw. Akgtum liʼakxilhtit, akxni Edwin Skinner chalh kʼIndia kata 1926, ni lhuwa xtatayananin Jehová xʼanankgo kʼuma país chu tuwa xtamakgkatsi nalichuwinankan Dios xlakata ni lakapala kstakma. Pero xla chuntiya lichuwinalh Dios chu akxilhli la tamakatsin xla Tamapakgsin, nituku xmalakgachokgo. La uku anan liwaka 37,000 xtatayananin Jehová kʼIndia, chu liwaka 108,000 tiku kilakgolh akxni lakapastakka akxni tinilh Cristo kata nema titaxtulh. Na wi liʼakxilhtit xlakata la xTamapakgsin Dios talakgatumima chu kaks malakawaninan. Watiya kata akxni tala Skinner chalh kʼIndia, tsukuka lichuwinankan Dios kZambia. La uku anan liwaka 170,000 tiku lichuwinankgo Dios kʼuma país, chu 763,915 tiku kilakgolh akxni lakapastakka akxni tinilh Cristo kata 2013, uma wamputun pi xlikgalhkutsayan latamanin chatum tiku kilalh. ¡Lu kaks malakawaninan la talhuwinit!

10. ¿Tuku wamputun parábola xlakata levadura?

¹⁰ (Kalikgalhtawakga Mateo 13:33.)  ¿Tuku wamputun parábola xlakata levadura? Uma parábola na kilhchanima tamakatsin xla Tamapakgsin chu la kalakgpalini xlatamatkan latamanin. «Skitit» kilhchanima latamanin xalak putum kachikinin, chu tuku tlawa levadura kilhchanima la talakgatumi tamakatsin xla Tamapakgsin xlakata lichuwinamaka. Xtalhtsi mostaza tunkun tasiya la staka, pero chuna la mastakanan levadura nila tunkun akxilhkan. Xlimakgas kitasiya la mastakanan.

11. ¿Tuku xlakata Jesús lichuwinalh parábola xlakata levadura?

¹¹ ¿Tuku xlakata Jesús lichuwinalh uma parábola? Chuna limasiyalh pi tamakatsin xla Tamapakgsin kgalhi litliwakga xlakata tlan talakgatumi «asta awatiya kxtankgana tiyat» chu lakgpali xlatamatkan latamanin (Hech. 1:8). Xlikana pi ni tunkun tasiya la talakgatumi. Pero katsiyaw pi chuna la, ni kajwatiya xlakata tlakg latamanin makgamakglhtinankgo tamakatsin, wata na likatsiyaw xlakata la kalakgpalini xlatamatkan (Rom. 12:2; Efes. 4:22, 23).

12, 13. Kalichuwinanti makgapitsi liʼakxilhtit xlakata la talakgatuminit tamakatsin xla Tamapakgsin chuna la levadura nema talichuwinan kparábola.

¹² Min kilhtamaku, tuku tlan kitaxtu xlakata talichuwinama xTamapakgsin Dios kitasiya akxni akglhuwata kata titaxtunit la tsukuka lichuwinankan. Akgtum liʼakxilhtit, kata 1982, Franz chu Margit, akgtum tamakgaxtokgat nema kskujmakgo ksucursal xalak Brasil, lichuwinankgolh Dios kʼakgtum aktsu kachikin. Tsukukgolh kamakgalhtawakgekgo lhuwa latamanin, na xmakgalhtawakgekgo chatum tse chu kgalhtati xkamanan. Xapuxku tiku xkgalhi 12 kata, lu xamaxana xwanit chu makglhuwa xtatsekga akxni nina xmatsukikgo takgalhtawakga. Xlakata Franz chu Margit kamalakgachaka alakatanu xlakata namakgtayanankgo, nialhla kamakgalhtawakgekgolh, pero titaxtulh puxamakitsis kata, akxni lakgapaxialhnamparakgolh uma kachikin kaks lilakawankgolh tuku akxilhkgolh. Xʼanan akgtum congregación nema xkgalhikgo xasasti Pukgalhtawakga xla xTatayananin Jehová, chu xʼanan 69 tiku xlichuwinankgo Dios, chu 13 precursores regulares xlitaxtukgo. Chu aktsu kgawasa tiku lu xamaxana xwanit xlitaxtu tiku kamakgtaya nalakkaxwilikgo xtaskujutkan amakgapitsi lakgkgolotsin. Xtachuna la levadura nema lichuwinalh Jesús, tamakatsin xla Tamapakgsin xtalakgatuminit chu lhuwa tiku xkalakgpalininit xlatamatkan.

¹³ Asta kpaíses niku ni mastakan talakaskin pi natalan nalichuwinankgo Dios, xlitliwakga tamakatsinin xla xTamapakgsin Dios lakgpali xlatamatkan latamanin. Makglhuwa kaks lilakawanaw akxni akxilhaw la talakgatuminit tamakatsinin kʼumakgolh kachikinin. Akgtum liʼakxilhtit, kalichuwinaw Cuba. Tsukuka lichuwinankan tamakatsin xla Tamapakgsin kata 1910, chu tala Russell kilakgapaxialhnalh uma isla kata 1913. Maski xapulana ni lakapala talhuwilh, ¿tuku akxilhaw kCuba la uku? Anan liwaka 96,000 tiku lichuwinankgo xalakwan xalaksasti tamakatsin, chu 229,726 tiku kilakgolh akxni lakapastakka akxni tinilh Cristo kata 2013, uma wamputun pi xlitipuxamatsayan latamanin chatum tiku kilalh. Chu kpaíses niku mastakan talakaskin nalichuwinankan Dios, tamakatsin xla Tamapakgsin chanit asta niku xlakpuwankan pi nila lhuwa tuku xtlawaka (Ecl. 8:7; 11:5). *

14, 15. 1) ¿La kinkamakgtayayan parábola xlakata levadura? 2) ¿Tuku kinkamasiyaniyan xlakata Jehová chu Jesús?

¹⁴ ¿La kinkamakgtayayan parábola xlakata levadura? Akxni lilakpuwanaw tuku  wamputun uma parábola, kinkamasiyaniyan pi ni talakaskin lu nalilakgaputsayaw xlakata la nakalakgchan tamakatsinin xla Tamapakgsin, lhuwa millón latamanin tiku nina kgaxmatkgo. Jehová wa tiku pulalima uma. Pero ¿tuku kilitlawatkan akinin? Biblia kinkawaniyan: «Tsisa kachanti mintalhtsi, chu asta kakgotanun ni kamajaxa mimakan; xlakata ni katsiya niku tlan nastaka, unu o anta, o akxtum tlan nastakkgo» (Ecl. 11:6). Nachuna, kaskiniw Jehová pi kasikulunatlawalh chuna la talichuwinama Dios, liwaka kpaíses niku ni mastakan talakaskin nalichuwinankan (Efes. 6:18-20).

¹⁵ Na ni kilitaxlajwanitkan komo ni tunkun akxilhaw tuku tlan kitaxtuma xlakata lichuwinamaw Dios. Ni kalakgmakgaw “kilhtamaku akxni [tsukuma] tuku xalaktsu” (Zac. 4:10). Chuna la natitaxtu kilhtamaku, max tlakg tlan nakitaxtu chu ni chuna la xlakpuwanitaw (Sal. 40:5; Zac. 4:7).

16. 1) ¿Tuku wamputun parábola xlakata chixku tiku stanan? 2) ¿Tuku wamputun parábola xlakata tuku xtapalh nema matsekgkanit?

¹⁶ (Kalikgalhtawakga Mateo 13:44-46.) ¿Tuku wamputun parábola xlakata chixku tiku stanan chu tuku xtapalh nema matsekgkanit? Kxapulana siglo makgapitsi stananin xʼankgo asta kʼóceano Índico xlakata naputsakgo tlakg xatlan perlas. Chixku tiku stanan nema lichuwinalh Jesús kilhchanima latamanin tiku tlan xtapuwankan kgalhikgo chu lhuwa tuku tlawakgo xlakata nakatsinikgo xpalakata Dios. «Lu[...] xastlan perla», kilhchanima tuku lu lilakgatit xaxlikana xlakata Tamapakgsin. Akxni chixku tiku stanan akxilhli pi lu kxtapalh uma perla, stalh putum tuku xkgalhi xlakata tlan natamawa. Jesús na lichuwinalh chatum chixku tiku tekgsli tuku lu xtapalh maski ni xputsama, pero na stalh putum tuku xkgalhi xlakata tlan xkgalhilh tuku lu kxtapalh.

17. ¿Tuku xlakata Jesús lichuwinalh parábola xlakata chixku tiku stanan chu tuku xtapalh nema xmatsekgkanit?

¹⁷ ¿Tuku xlakata Jesús lichuwinalh uma akgtiy parábolas? Xlakata nalimasiya pi pulaklhuwa la tlan natekgsaw tuku xaxlikana. Akxni makgapitsi latamanin putsakgo tuku xaxlikana, limaklakaskinkgo putum tuku wi kxmakankan xlakata natekgskgo. Amakgapitsi tekgskgo maski ni putsamakgo; max wi tiku kalitachuwinan xlakata uma. Maski tanu tanu la tekgskgo, kʼakgtiy parábolas nema lichuwinawa, chatunu lakchixkuwin akxilhkgolh pi lu kxtapalh tuku xtekgskgonit chu limakgxtakgkgolh putum tuku xkgalhikgo xlakata ni xmakgatsankgakgolh tuku xtekgskgonit.

18. 1) ¿La kinkamakgtayayan umakgolh akgtiy parábolas? 2) ¿Tuku kinkamasiyaniyan umakgolh akgtiy parábolas xlakata Jehová chu Jesús?

¹⁸ ¿La kinkamakgtayayan umakgolh akgtiy parábolas? (Mat. 6:19-21.) Akstu kakgalhskinka: «¿Chuna klakpuwan la umakgolh chatiy lakchixkuwin tiku kalichuwinalh Jesús? ¿Lu kxtapalh kakxilha tuku xaxlikana? ¿Klimakgxtakga tuku kkgalhi xlakata ni nakmakgatsankga, o kmasta talakaskin pi atanu tuku natlawa pi nialh xlakaskinka nakakxilha?» (Mat. 6:22-24, 33; Luc. 5:27, 28; Filip. 3:8). Tapaxuwan nema kgalhiyaw xlakata tekgsnitaw tuku xaxlikana nakinkamatliwakglhan xlakata chuntiya pulana nawiliyaw kkilatamatkan.

19. ¿Tuku nalikgalhtawakgayaw kʼartículo nema aku mima?

¹⁹ ¿Liwana kgaxmatnitaw chu akgatekgsnitaw tuku wamputun umakgolh parábolas xlakata Tamapakgsin? Komo chuna, ni kajwatiya tlan nawanaw tuku wamputun, wata tlan nalilatamayaw tuku kinkamasiyaniyan. Artículo nema aku mima, nalikgalhtawakgaparayaw atanu akgtutu parábolas chu nakatsiyaw tuku kinkamasiyaniyan.