GUY HOLLIS PIERCE, tiku na xkatatapakgsi Lakgkgolotsin tiku Pulalinkgo xTatayananin Jehová, makgatsputulh la kskujnanima Dios unu kKatiyatni martes 18 xla marzo kata 2014, akxni xkgalhi 79 kata. Chu xlakata xlitaxtu xtala Cristo, malakastakwanika chu alh kʼakgapun (Heb. 2:10-12; 1 Ped. 3:18).

Guy Pierce lakachilh kʼAuburn (California, Estados Unidos) 6 xla noviembre kata 1934, tamunulh kkata 1955. Kkata 1977 tatamakgaxtokgli Penny, chu kamakgastakkgolh chalhuwa xkamanankan. Wa xlakata la xatlat xkalikatsini amakgapitsin. Kkata 1982, tala Pierce chu xpuskat, precursores litaxtukgolh. Kkata 1986, superintendente de circuito litaxtulh kʼEstados Unidos, chu akgkawitu kata chuna liskujkgolh.

Kkata 1997 makgtapakgsikgolh kfamilia Betel xalak Estados Unidos, chu kDepartamento de Servicio kskujma. Kkata 1998 litaxtulh xmakgtayana Comité de Personal xla Lakgkgolotsin tiku Pulalinkgo xTatayananin Jehová. Alistalh, 2 xla octubre kata 1999, ktamakxtumit nema tlawakan akgatunu kata xla Watch Tower Bible and Tract Society of Pennsylvania, makatsininanka pi tala Pierce na xlaksakkanit xlakata nakatatapakgsi Lakgkgolotsin tiku Pulalinkgo xTatayananin Jehová. Xaʼawatiya kata nema latamalh, tanu tanu comités niku kskujma: comité de Personal, de Redacción, de Publicación chu de Coordinadores.

Tala Pierce lu xapaxuwana xwanit, wa xlakata latamanin tiku tanu tanu xkachikinkan chu tanu la xkamakgastakkanit lu xlipaxuwakgo akxtum xtatawilakgo. Pero wantuku tlakg xtlawa pi xpaxkika, wa pi lu xpaxkinan, xtaktuju, xkgalhakgaxmata xlimapakgsin Jehová chu lu xlipawan. Tala Guy Pierce xlakpuwan pi tlakg ni tuwa pi Chichini ni xtaxtulh nixawa pi Jehová ni xmakgantaxtilh xtachuwin, chu xlakaskin pi putum latamanin xkatsikgolh uma.

Tala Pierce lu kskujnani Jehová. Tsisa xtaki chu xmin kilhtamaku makglhuwa asta akxni xtsiswanita kskuja. Kalakgapaxialhnalh natalan xlikalanka katiyatni xlakata nakamatliwakglha, xlimaxtu kilhtamaku xlakata nakatachuwinan tiku xalak familia Betel chu amakgapitsi tiku kskinikgo tastakyaw o tamakgtay, o tiku kaj akxtum xtatawilaputunkgo xlakata natapaxuwakgo. Xlakata lu tlan xkamakgamakglhtinan amakgapitsin, tlan xkatalalin chu xkawani lakstlan tachuwin nema xkikilhti kBiblia, uma tlawalh pi tiku lakgapaskgolh putum kilhtamaku nalakapastakkgo.

Xlikana pi xpuskat, kgalhchaxan xkamanan, xnatanatna chu kxuyatanatna o klhtanatna, chu tiku xliʼakxilhkgo la tlat lu nalakapastakkgo kintalakan chu kiʼamigokan. Sábado 22 xla marzo kata 2014, tala Mark Sanderson, tiku na katatapakgsi Lakgkgolotsin tiku Pulalinkgo xTatayananin Jehová, mastalh akgtum taʼakgchuwin kBetel xalak Brooklyn. Kxtaʼakgchuwin lichuwinalh takgalhkgalhin nema xkgalhi tala Pierce pi xʼama an kʼakgapun chu likgalhtawakgalh uma tuku Jesús wa: «Kxchik kinTlat, Ihuwa putawiIh anan [...]. Chi lapi nakan kakaxwiliniyan mimputawilhkan, pus nakmimpala amakgtum, na kit nakkaliyanan kkimpaxtun, lakimpi anta ntani nkit kwij nawan, na anta wixin natawilayatit. Na anta ntani nkit nakan, lakgapasatit xatiji» (Juan 14:2-4).

Lu nalakapastakaw tala Pierce. Pero lipaxuwayaw pi xlakgapasa tiji nema xlilh niku nalatama putum kilhtamaku.