1, 2. Maski tanu tanu kata o tanu talismanin kgalhiyaw, ¿la lakaskin Dios nakakninaniyaw?

KOMO wix chatum kgawasa o tsumat chu katatapakgsiya xtatayananin Jehová xliputum katiyatni, liwana kakatsi pi wix lu xlakaskinka. Klhuwa países tamunukgo akgatunu kata lhuwa lakgkgawasan chu laktsuman. ¡Lu lipaxuwayaw akxni kaʼakxilhaw pi liwana lakpuwankgonit naskujnanikgo Jehová!

² Xlikana pi lu tlan makgkatsiya akxni katatawilaya atanu lakgkgawasan chu laktsuman. Putum akinin tlan makgkatsiyaw akxni katapaxuwayaw tiku na watiya kata kgalhikgo la akinin. Pero maski tanu tanu kata o tanu talismanin kgalhiyaw, Jehová lakaskin pi makxtum nakakninaniyaw. Apóstol Pablo tsokgli pi xtalakaskin Dios wa pi «paks naʼakgaputaxtukgoy, chu nalakgapaskgoy wa [xaxlikana]» (1 Tim. 2:3, 4). Chu Apocalipsis o Revelación 7:9 wan pi tiku kakninanikgo Jehová minkgoyacha «kxlipaks ntiyat ntu anan, chu lantla ni ntipalit kilhtsukut anan, chu nti xalanin xlikatlanka nkatuxawat, chu ni ntipalit xtachuwinkan».

3, 4. 1) ¿Tukuya tayat kgalhikgo lhuwa lakgkgawasan la uku? 2) ¿La wan Efesios 4:25 pi kiliʼakxilhatkan natalan xalak congregación?

³ Lakgkgawasan chu laktsuman tiku wilakgo kxkachikin Dios  ni likatsikgo la tiku xalak kakilhtamaku. Tiku ni kakninanikgo Jehová xakstukan kapaxkikan chu tlawakgo tuku lakaskinkgo. Makgapitsi tiku lakputsananikgo la wi kakilhtamaku wankgo pi la uku tlakg wilakgo lakgkgawasan tiku xakstukan kapaxkikan nixawa makgasa. Chuna la chuwinankgo chu la lhakganankgo, limasiyakgo pi ni kamaxkikgo kakni tiku linkgoya kata chu amakgapitsin.

⁴ Uma talakapastakni kaniwa niku akxilhaw. Wa xlakata lakgkgawasan chu laktsuman tiku makgapaxuwaputunkgo Jehová xliskujatkan xlakata ni nakapasa. Pero uma talakapastakni ni aku lakatsukulh, Pablo kawanilh natalan pi ni xkgalhikgolh uma talakapastakni chuna la pulana xkgalhikgo. Pablo limapakuwilh «spíritu wa ntu asta [uku] skujma kxnakujkan lakgachixkuwimakgananin» (kalikgalhtawakga Efesios 2:1-3). Lu tlan tuku tlawamakgo kamanan tiku lakgmakgankgo uma tayat chu makxtum taskujputunkgo congregación. Xlatamatkan limasiya pi akgatekgskgo tuku wa Pablo pi «nchatunu amakgapitsin [...] latatapakgsiyaw» (Efes. 4:25). Chuna la talakatsuwima lisputni, tlakg xlakaskinka nawan pi makxtum nakatatawilayaw kinatalankan. Kaʼakxilhwi makgapitsi liʼakxilhtit xalak Biblia nema masiya pi uma lu xlakaskinka.

5, 6. Xlakata Lot chu xlaktsuman makxtum tawilakgolh, ¿tuku kinkamasiyaniyan?

⁵ Makgasa, Jehová xatapaxuwan kakuentajtlawalh kskujnanin xlakata lamakgtayalh chatunu chatunu akxni xtitaxtumakgo tuku tuwa. La uku, kskujnanin Dios tiku tanu tanu kata kgalhiyaw wi tuku kinkamasiyaniyan tiku kalichuwinan Biblia. Kalimatsukiw tuku titaxtulh Lot.

⁶ Lot chu xfamilia kalipekua xwi xlatamatkan xlakata xʼamaka malakgsputukan Sodoma, kachikin niku xwilakgolh. Wa xlakata makgapitsi ángeles wanikgolh pi xtaxtulh chu xʼalh kkasipijni. Wanikgolh: «¡Katsala xlakata ni naniya!» (Gén. 19:12-22). Lot chu chatiy xlaktsuman taxtukgolh kkachikin. Pero akxni kawanilh lakchixkuwin tiku xʼamakgo tatamakgaxtokgkgo xlaktsuman pi na xtaxtukgolh, xlakan lakpuwankgolh pi «xkgalhkgamanama». Wa xlakata nikgolh (Gén. 19:14). Kajwatiya lakgtaxtukgolh Lot chu xlaktsuman xlakata ni tamakgatlinikgolh.

7. ¿La kamakgtayalh Jehová tiku taxtukgocha kʼEgipto xlakata ni lamakgxtakgkgolh?

⁷ Kalichuwinaw atanu liʼakxilhtit. Akxni israelitas taxtukgolh kʼEgipto, ni tapitsikgolh chu ni tanu tanu tiji ankgolh. Chu akxni Moisés «stonkgli xmakan kxokgspun pupunu» xlakata Jehová xmapitsilh, ni xakstu patakutli o ni kaj makgapitsi israelitas katapatakutli pupunu. Chuna la katsiyaw, xlakata Jehová kakuentajtlawalh putum kachikin patakutli (Éx. 14:21, 22, 29, 30). Putum makxtum xwilakgolh, asta «lhuwa tiku ni israelitas xwankgonit» pero xkataʼankgonit (Éx. 12:38). Lu nitlan xkitaxtulh komo makgapitsi, max tiku lakgkgawasanku alakatanu xʼankgolh, niku xlakpuwankgolh pi tlakg tlan. Uma lu nitlan xkitaxtulh xlakata nialh xkgalhikgolh xtamakgtay Jehová (1 Cor. 10:1).

8. Kxkilhtamaku Jehosafat, ¿la limasiyalh xkachikin Dios pi makxtum xwi?

⁸ Kxkilhtamaku mapakgsina Jehosafat, xkachikin Dios xkgalhi lanka xtalamakgasitsin. Makgapitsi kachikin nema lakatsu xwilakgo kataminkgolh lhuwa ksoldados, xlakata xtatlawakgolh guerra (2 Crón. 20:1, 2). ¿Tuku tlawakgolh kskujnin Dios? Ni xakstukan kalipawanka, wata lipawankgolh Jehová (kalikgalhtawakga 2 Crónicas 20:3, 4). Ni putsakgolh la chatunu chatunu xlakkaxtlawakgolh uma, chuna la xlakpuwankgolh pi tlakg tlan. Biblia lichuwinan pi «putum tiku xalak Judá xyakgo kxlakatin Jehová putum uma kilhtamaku,  asta laktsu xlakgkgawasankan, xlakpuskatinkan chu xkamanankan» (2 Crón. 20:13). Putum akxtum xwilakgo maski tanu tanu kata xkgalhikgo, kgalhakgaxmatkgolh Jehová chu xla kakuentajtlawalh (2 Crón. 20:20-27). ¡Lu tlan liʼakxilhtit kinkawilinikgon xlakata tuku xlitlawat xkachikin Dios komo tayaniputun tuku tuwa!

9. Xlakata kstalaninanin Cristo kxapulana siglo makxtum xwilakgo, ¿tuku kinkamasiyaniyan?

⁹ Kstalaninanin Cristo kxapulana siglo na limasiyakgolh pi makxtum xwilakgolh. Akgtum liʼakxilhtit, akxni lhuwa judíos chu tiku ni judíos kstalaninanin Cristo litaxtukgolh, chuntiya «tliwakglh xwilakgo kxtakanajlakan ntu xmasiyunikgoy [apóstoles], chu ktamakxtumit, chu ktalakgchakgan kaxtalanchuj, chu ktatlawan oración» (Hech. 2:42). Akxni tsukuka kaputsastalanikan chu talakaskilh pi xlakuentajtlawakgolh, tlakg tasiyalh pi makxtum xwilakgo (Hech. 4:23, 24). ¿Akgatekgsaw tuku masiya uma? Akxni titaxtumaw tuku tuwa lu xlakaskinka makxtum natawilayaw.

10. ¿Tukuya kilhtamaku tlakg makxtum kilitawilatkan nawan?

¹⁰ Talakatsuwima tlakg xalipekua kilhtamaku. Palakachuwina Joel wan pi «akgtum kilhtamaku nema kapukswa chu kalipekua» (Joel 2:1, 2; Sof. 1:14). Kʼuma kilhtamaku tlakg xlakaskinka nawan pi xkachikin Dios makxtum natawilayaw. Kalakapastakwi tuku wa Jesús: “Xlipaks ntapakgsin wa ntu [akstu] xlatalatlawalh [...], nalakgsputa” (Mat. 12:25).

11. ¿Tuku kinkamasiyaniyan Salmo 122:3, 4 xlakata makxtum tawilakan? (Kaʼakxilhti xapulana dibujo.)

¹¹ Nialh makgas, akxni natsuku xtalakgaputsit uma kakilhtamaku, makxtum kilitawilatkan nawan, chuna la makxtum xyakgo chiki kJerusalén. Chuna xkayawakan, wa xlakata salmista wa pi Jerusalén «akgtum kachikin nima tliwakglh [wi]». Uma xtlawa pi tiku anta xwilakgo tlan xlakuentajtlawalh chu xlamakgtayalh. Chuna la makxtum xyakgo chiki, max xmalakapastaka salmista akxni «wakg ixkamanan Israel» xtamakxtumikgo xlakata nakakninanikgo Dios chu lu xlipaxuwakgo (kalikgalhtawakga Salmo 122:3, 4). La uku chu kilhtamaku nema aku mima, na chuntiya makxtum kilitawilatkan.

12. ¿Tuku nakinkamakgtayayan nalakgtaxtuyaw akxni namasputuputunkan xkachikin Dios?

¹² ¿Tuku xlakata tlakg makxtum kilitawilatkan akxni nachin xatuwa kilhtamaku? Capítulo 38 xla Ezequiel lichuwinan pi «Gog xalak kxtiyat Magog», namasputuputun xkachikin Dios. Ama kilhtamaku ni kiliputsatkan xtamakgtay kakilhtamaku chu ni kilalimakgxtakgatkan. Wata makxtum kilitatawilatkan kinatalankan. Xlikana, ni wamputun pi nalakgtaxtuyaw komo akxtum nakatalayaw amakgapitsin, natalakaskin pi chatunu nalimasiya pi lipawan Jehová chu kgalhakgaxmata (Joel 2:32; Mat. 28:20). Pero ¿tuku nakaʼakgspula tiku tamakgatlinikgonit xkachikin Dios chu stalanikgonit xtijikan? ¿Nalakgtaxtukgo? (Miq. 2:12.)

13. Uma tuku akxilhnitawa ¿tuku kamasiyani lakgkgawasan chu laktsuman tiku kakninanikgo Dios?

¹³ Kgawasa, ¿akxilha pi lu nitlan nakitaxtuniyan komo natamakgatliniya congregación? Talakatsuwimaw kkilhtamaku akxni tlakg makxtum kilitawilatkan nawan, lata tiku lakgkgawasanku asta tiku linkgoya kata. Wa xlakata la uku kilikatsinitkan akxtum naskujnaniyaw Jehová, xlakata uma nakinkamakgtayayan nalakgtaxtuyaw kilhtamaku nema aku mima.

14, 15. 1) ¿Tuku xlakata Jehová kinkamasiyaniman? 2) ¿Tuku tastakyaw kinkamaxkiyan Jehová xlakata nakinkamakgtayayan makxtum nakatatawilayaw kinatalankan?

¹⁴ Jehová kinkamakgtayayan «akxtum  naskujnani[yaw]» (Sof. 3:8, 9). Kinkamasiyaniman tuku natlawayaw kkilhtamaku nema aku mima, «akxni yama nkilhtamaku paks namakamaxkikan nCristo wantu anan» (kalikgalhtawakga Efesios 1:9, 10, Hua Xasasti Talaccaxlan, 1999). Jehová lakaskin pi xkamanan xalak akgapun chu xalak Katiyatni makxtum kakakninanikgolh. Chu chuna natlawa. Wa xlakata, kgawasa, ¿akxilha pi lu xlakaskinka akxtum natatawilaya xkachikin Jehová?

¹⁵ Jehová kinkamasiyaniman makxtum natawilayaw la uku xlakata chuna natawilayaw putum kilhtamaku. Wa xlakata Biblia makglhuwa kinkawaniyan nalakuentajtlawayaw: «Kalapaxkitit», «nkalalimakgtsiyajtit [o kalalimakgoxumixitit]» chu «kalalimatliwakglhtit nchatunu amakgapitsin» (1 Cor. 12:25; Rom. 12:10; 1 Tes. 4:18; 5:11). Jehová katsi pi makglakgalhinanin akinin chu wa xlakata min kilhtamaku tuwa makgkatsiyaw akxtum nakatatawilayaw kinatalankan. Wa xlakata kinkawaniyan: «Nalamatsankgananiyatit nchatunu amakgapitsin» (Efes. 4:32).

16, 17. 1) Kawanti pulaktum tuku xlakata ni kilimakgatsankgatkan tamakxtumit. 2) ¿Tuku kamasiyani lakgkgawasan chu laktsuman xliʼakxilhtit Jesús?

¹⁶ Jehová na limaklakaskin tamakxtumit xlakata makxtum natawilayaw. Hebreos 10:24, 25 kinkamalakapastakayan pi pulaktum tuku xlakata ni kilimakgatsankgatkan tamakxtumit wa pi kinkamakgpuwantiniyan «ktapaxkit, chu kxalakwan tatlaw». Pero Jehová na kinkamamakxtumiyan xlakata nalamatliwakglhaw xlakata «ntalakatsuwimaja yama [...] kilhtamaku».

¹⁷ Jesús kinkawilinin lu tlan liʼakxilhtit xlakata lu xlakaskinka xʼakxilha natatamakxtumi xkachikin Dios. Akxni xkgalhi 12 kata, kataʼalh xnatlatni kʼakgtum lanka tamakxtumit ktemplo. Akxni xtaspitmakgo, José chu María ni xtekgskgo, pero ni xlakata wi niku xkataʼanit amakgapitsi lakgkgawasan. Wata xkalitachuwinama Dios makgalhtawakgenanin xalak templo (Luc. 2:45-47).

18. ¿La makgtayanan kioracioneskan xlakata makxtum natawila congregación?

¹⁸ Chuna la lichuwinawa, xlakata lu makxtum natawilayaw, kilipaxkitkan amakgapitsin chu kiliʼanatkan ktamakxtumit. Pero na tlan kapalakaskinaw natalan kkioracioneskan. Akxni liwana waniyaw Jehová tuku tamakgtay maklakaskinkgo kinatalankan, kinkamalakpuwaniyan pi lu xlakaskinka nakamakgtayayaw. Chu  uma ni kajwatiya tlan tlawakgo chu xlitlawatkan tiku laklankata. Komo wix chatum kgawasa o chatum tsumat, kalilakpuwanti komo limaklakaskimpat umakgolh tamakgtay xlakata tlakg makxtum nakatatawilaya natalan xalak congregación. Komo chuna natlawaya, tlakg lakatsu natawilaniya xkachikin Dios chu makgat natawilaniya xkakilhtamaku Satanás akxni namasputukan.

19-21. 1) ¿Tuku kilhtamaku tlakg tasiya pi kskujnanin Jehová latapakgsinikgo chatunu chatunu? Kalichuwinanti makgapitsi liʼakxilhtit. 2) ¿Tuku kinkamasiyaniyan tuku tlawakgonit makgapitsi natalan akxni ananit tuku masputunan?

¹⁹ Kskujnin Jehová xala uku, limasiyakgo pi latapakgsinikgo chuna la wan Romanos 12:5. Uma tlakg litasiya akxni anan tuku masputunan. Papaʼ diciembre kata 2011, akgtum lanka un chu lhuwa sen tlawalh pi lu xlitatsamalh chuchut isla Mindanao xalak Filipinas. Kaj akgtum tsisni titaxtulh liwaka tipuxam mil chiki nitlan tuku akgspulakgolh, nachuna xchikkan lhuwa natalan. Pero sucursal alistalh makatsininalh: «Akxni nina xtsukukgo skujkgo comités de socorro, natalan xalak alakatanu aya xkinkamalakgachanikgonitan tuku xtamaklakaskin».

²⁰ Akxni tachikilh tiyat chu alistalh akgtum tsunami masputunalh kJapón, lhuwa natalan makgatsankganankgolh. Makgapitsi nialh tuku xkgalhikgo. Yoshiko, chatum tala puskat tiku xwi 40 kilómetros xlimakgat lata niku xwi Pukgalhtawakga xla xTatayananin Jehová, chu lakgsputli xchik, wan: «Kaks kinkamalakawanin pi lichali akxni xtachikinit tiyat, superintendente de circuito chu achatum tala kinkaputsakgon». Chu wampara: «Lu kpaxtikatsiniyaw pi congregación lu lhuwa kuentajtlawalh kintakanajlakan. Na kinkamaxkikgon tuku xaklitsitsijwaw, tatunu, bolsos chu lhakgat nema xakwiliw akxni xaklhtataw». Chatum tala tiku makgtapakgsi kcomité de socorro, wa: «Natalan xalak putum país lu makxtum xwilakgo chu xlamakgtayakgo. Asta natalan xalak Estados Unidos minkgolh makgtayanankgo. Akxni kkakgalhskiw tuku xlakata minkgolh maski lu makgat, kgalhtinankgolh: “Makxtum kkatawilaw kinatalankan xalak Japón chu xlakan maklakaskinkgo tamakgtay”». ¡Lu tlan limakgkatsiyaw pi makgtapakgsiyaw kkachikin nema kamakgtaya tiku tapakgsinikgo! Xlikana pi Jehová lu lipaxuwa akxni akxilha pi kskujnin lu makxtum wilakgolh.

²¹ Komo makxtum wilaw la uku, nakinkamakgtayayan makxtum natayaniyaw tuku tuwa namin, maski nialhla xkatachuwinaw natalan tiku wilakgolh kxlikalanka katiyatni. Uma talakpuwan nakinkamakgtayayan natayaniyaw tuku tuwa namin akxni nasputa uma kakilhtamaku. Fumiko, chatum tala tsumat xalak Japón tiku lakgtaxtulh akxni titaxtulh akgtum huracán, wa uma tuku wa: «Lakatsu wi lisputni. Chuntiya kilimakgtayatkan kinatalankan asta nachan ama kilhtamaku akxni nialhtu katimasputunalh».

22. Xlakata makxtum wilaw, ¿la nakinkamakgtayayan uma kkilhtamaku nema aku namin?

²² Putum tiku lu liskujaw xlakata makxtum natawilayaw, lata tiku lakgkgawasanku o tiku linkgoya kata, katsinimaw tuku natlawayaw xlakata nalakgtaxtuyaw akxni namasputukan uma nitlan kakilhtamaku nema ni makxtum wi. Chuna la makgasa, kiDioskan nalakgmaxtu xkachikin (Is. 52:9, 10). Putum kilhtamaku kalakapastakwi pi nalakgtaxtuyaw komo lu liskujaw xlakata namakgtapakgsiyaw kxkachikin Jehová nema makxtum wi. Tuku na nakinkamakgtayayan wa pi tlakg xlakaskinka naʼakxilhaw tuku makglhtinanitawa. Artículo nema aku mima nalichuwinan uma.