1, 2. 1) ¿Tuku xlakata 24,000 israelitas ni tanukgolh kTiyat nema xKawanikanit pi Nakamaxkikan? 2) ¿Tuku xlakata lu xlakaskinka kimpalakatakan tuku kaʼakgspulalh israelitas?

NIALH makgas xtsankga xlakata israelitas xtanukgolh kTiyat nema xKawanikanit pi Nakamaxkikan. Pero lhuwa mil lakchixkuwin tsukukgolh katatalakgxtumikgo lakpuskatin xalak Moab. Xlakata uma, 24,000 israelitas nikgolh. ¡Lu nitlan! Lhuwa kilhtamaku xkgalhkgalhikgonit xlakata natanukgo kTiyat nema xKawanikanit pi Nakamaxkikan chu nialh makgas xtsankga. Ni tanukgolh xlakata ni kgalhakgaxmatkgolh Jehová chu katatalakgxtumikgolh amakgolh lakpuskatin (Núm. 25:1-5, 9).

² Uma liʼakxilhtit tsokgwilika kBiblia xlakata wi tuku nakatsiniyaw (1 Cor. 10:6-11). Biblia masiya pi nialh makgas nasputa «xaʼawatiya kilhtamaku» chu natsuku xasasti kakilhtamaku (2 Tim. 3:1, TNM; 2 Ped. 3:13). Lu nitlan, pero makgapitsi kskujnanin Jehová ni kgalhakgaxmatnankgonit chu tlawakgonit talakgxtumit xalimaxana. Patimakgolha xlakata  xtalakgalhinkan. Chu komo ni nalakgtaspitkgo Jehová nila katilatamakgolh putum kilhtamaku kParaíso.

3. ¿Tuku xlakata kstalaninanin Cristo maklakaskinkgo pi Jehová kakamakgtayalh nakuentajtlawakgo xtamakgaxtokgatkan? (Kaʼakxilhti xapulana dibujo.)

³ Kstalaninanin Cristo maklakaskinkgo pi Jehová kakamakgtayalh nakuentajtlawakgo xtamakgaxtokgatkan. ¿Tuku xlakata? Xlakata uma kakilhtamaku kajwatiya lakpuwankgo natalakgxtumikgo (kalikgalhtawakga Salmo 127:1). Kʼuma artículo naʼakxilhaw pulaklhuwa tuku nakamakgtaya. Xachixku chu xapuskat xlikuentajtlawatkan xnakujkan, talakaskin tlan natalalinkgo Dios, nakgalhikgo xatlan tayat nema Dios masiya, katapaxkit nalaxakgatli, nalamaxki kakni chu nalamaxki tuku maklakaskin achatum xlakata tuku makgkatsi chu xlakata talakgxtumit.

4. ¿Tuku tlawanit pi makgapitsi kstalaninanin Cristo natlawakgo talakgxtumit xalimaxana?

⁴ ¿Tuku max natlawa pi makgapitsi kstalaninanin Cristo natlawakgo talakgxtumit xalimaxana? Min kilhtamaku akxilhkgo tuku ni xlilat chuna la wa Jesús: «Kaxati kawa nti lakaniy nchatum mpuskat nitlan ntu nalakapastakniy, akxnitiya tunkan nkgalhilh ntalakgalhin [...] kxnaku», o xtachuna la tlawalha talakgxtumit xalimaxana (Mat. 5:27, 28; 2 Ped. 2:14). Lhuwa akxilhkgo tiku ni lhakganankgonit, likgalhtawakgakgo tuku tlawa natalakgxtumiputunkgo o tanukgo kpáginas xla Internet nema ni xlilat. Amakgapitsi akxilhkgo películas, obras de teatro o tuku matitaxtikan ktelevisión niku lu tasiya pi talakgxtumimaka. Chu makgapitsi ankgo niku lakchixkuwin chu lakpuskatin tapuxtukgo klhakgatkan akxni tantlimakgo o niku mastakan masajes nema natlawa pi natalakgxtumiputunkgo.

5. ¿Tuku xlakata kilikuentajtlawatkan kinakujkan?

⁵ Makgapitsi tlawakgo talakgxtumit xalimaxana xlakata lu tsukukgo talalinkgo tiku ni tatamakgaxtokgnit. Tiku xalak kakilhtamaku lu lakgatikgo tlawakgo tuku ni xlilat chu ni machokgokgo tuku tlawaputunkgo. Nachuna, putum akinin makglakgalhinanin chu kinakujkan max nakinkaʼakgskgawiyan. Wa xlakata, komo ni nakuentajtlawayaw, max natsukuyaw lakgatiyaw tiku ni tatamakgaxtokgnitaw (kalikgalhtawakga Jeremías 17:9, 10). Jesús lichuwinalh pi nitlan tlawaw, talamakgnit chu talakgxtumit xalimaxana anta taxtuyacha knaku (Mat. 15:19).

6, 7. 1) ¿Tuku max nakitaxtu komo nakgalhikan nitlan tapuwan knaku? 2) ¿Tuku tlan natlawakgo tiku tamakgaxtokgkgonit xlakata ni natlawakgo talakgxtumit xalimaxana?

⁶ Akxni chatiy latamanin lalakgatiy, tlakg ni tuwa nakgalhikgo nitlan tapuwan kxnakujkan. Max natsukukgo lichuwinankgo tuku kajwatiya xlitachuwinat tiku tatamakgaxtokgnit. Max wi tuku naliwilikgo xlakata nalaʼakxilhkgo chu nawankgo pi kaj xamakgtum latatanokglhli. Tsinu tsinu tlakg lapaxkikgo. Tlakg tuwa makgkatsikgo ni nalaʼakxilhkgo. Xlakata tlakg lapaxki tlakg tuwa makgkatsikgo nialh nalatachuwinan maski katsikgo pi nitlan tuku tlawamakgo (Prov. 7:21, 22).

⁷ Chan kilhtamaku akxni nialh lakapastakkgo xlimapakgsin Jehová. Tuku nitlan tlawaputunkgo chu tuku likgalhchuwinankgo tlawa pi nalamakgachipa, nalatsuka,  o nalasputa, nalaʼakgpixtiya chu nalaxama. Uma kajwatiya chuna xlitatlawat xchixku o xpuskat. Pero tuku nitlan tlawaputunkgo la liʼakgsiyat kalitaxtuni. Alistalh, nialh tayanikgo chu tlawakgo talakgxtumit xalimaxana (Sant. 1:14, 15). ¡Lu nitlan! Ni chuna xtitlawakgolh komo xtimastakgolh talakaskin pi Jehová xkamakgtayalh tlakg xmaxkikgolh kakni tamakgaxtokgat. Kaʼakxilhwi la tlan namaxkikan kakni tamakgaxtokgat.

8. Akxni talalinkan Dios, ¿la namakgtayanan ni natlawakan talakgxtumit xalimaxana?

⁸ (Kalikgalhtawakga Salmo 97:10.) Akxni xachixku chu xapuskat lu tlan talalinkgo Dios, kamakgtaya ni natlawakgo talakgxtumit xalimaxana. ¿Tuku xlakata? Xlakata akxni tlakg lakgapaskgo Jehová chu la likatsi, tlakg liskujkgo nachuna nalikatsikgo chu napaxkinankgo la xla. Uma kamakgtaya namachokgokgo tuku nitlan tlawaputunkgo chu ni natlawakgo talakgxtumit xalimaxana (Efes. 5:1-4). Nachuna, katsikgo pi Jehová nakamalakgaxokge tiku akgskgawi xpuskat o xchixku chu tiku tlawakgo talakgxtumit xalimaxana (Heb. 13:4). Wa xlakata, xchatiykan liskujkgo xlakata ni nalaʼakgskgawi.

9. 1) ¿Tuku xlakata José ni tlawalh tuku nitlan? 2) ¿Tuku kinkamasiyaniyan xliʼakxilhtit?

⁹ Komo kgalhakgaxmataw putum xlimapakgsin Jehová, nakinkamakgtayayan natayaniyaw tuku max nakinkamatlawiputunan talakgalhin. Makgapitsi chuna titaxtukgo xlakata limaxtukgo kilhtamaku akxtum nakatatawilakgo tiku kataskujkgo akxni nialhtu skujmakgo. Amakgapitsi nachuna titaxtukgonit kxtaskujutkan. Wa uma tuku titaxtulh chatum kgawasa xwanikan José. Kxtaskujut akxilhli pi xpuskat xmalana xlakgati. Chali chali xwani pi xtatalakgxtumilh. Akgtum kilhtamaku lichipalh klhakgat chu wanilh pi xtatamalh. Pero José ni lakaskilh chu tsalalh. ¿Tuku xlakata ni tlawalh tuku nitlan? Xlakata chuntiya xtalalimputun Jehová. Xlakata ni lakgalhinalh, José makgatsankgalh xtaskujut chu tamaknuka kpulachin. Pero titaxtulh kilhtamaku, Jehová sikulunatlawalh (Gén. 39:1-12; 41:38-43). ¿Tuku kinkamasiyaniyan xliʼakxilhtit? Pi maski wilaw ktaskujut o alakatanu, kililakgmakgatkan tuku natlawaputun pi nalakgalhinanaw.

10. ¿Tuku xlakata xasasti tayat kamakgtaya tamakgaxtokgat ni natlawakgo talakgxtumit xalimaxana?

¹⁰ Biblia lichuwinan xlakata «xasasti tayat». Kstalaninanin Cristo tiku kgalhikgo uma tayat, xaʼakgstitum chu ni makgxtakgnankgo chuna la Jehová. Komo xachixku chu xapuskat kgalhikgo uma xasasti tayat, nakamakgtaya ni natlawakgo talakgxtumit xalimaxana (Efes. 4:24). Uma na nakamakgtaya ni natlawakgo tuku xmaknikan tlawaputun, natayanikgo nixatlan tapuwan chu ni nakgalhiputunkgo tuku amakgapitsin kgalhikgo nema max natlawa pi nalakgalhinankgo (kalikgalhtawakga Colosenses 3:5, 6). Ni natlawakgo tuku xmaknikan tlawaputun kilhchanima pi lu naliskujkgo nalakgmakgankgo nixatlan tapuwan chu tuku nakamatlawiputun talakgxtumit xalimaxana (Job 31:1). Chu akxni kgalhakgaxmatkgo xlimapakgsin Jehová, xkajnikgo tuku nitlan chu liskujkgo natlawakgo tuku tlan (Rom. 12:2, 9).

11. ¿Tuku xlakata xasasti tayat tlakg matliwakglha tamakgaxtokgat?

 ¹¹ Komo xachixku chu xapuskat kgalhiputunkgo xasasti tayat, talakaskin nalikatsikgo la likatsi Jehová (Col. 3:10). Akgtum liʼakxilhtit, Jehová xalakgalhamanina, tlan likatsi, ni tlankajwa, makgapaxuwanan chu ni lakapala sitsi. Komo xachixku chu xapuskat liskujkgo nalikatsikgo la likatsi Dios, natatliwakglha xtamakgaxtokgatkan chu Jehová nakasikulunatlawa (Col. 3:12). Nachuna, komo namastakgo talakaskin pi takaksni nema masta Cristo napulalin xnakujkan, tlan natawilakgo chu ni katilatataʼakglhuwilh (Col. 3:15). Chu komo lapaxki, xchatunukan naliskujkgo nalakuentajtlawa chu nalamaxki kakni (Rom. 12:10).

12. ¿Tukuya tayat lakpuwana wix pi makgtayanan xatapaxuwan natawila tamakgaxtokgat?

¹² Akgtum tamakgaxtokgat lichuwinalh tuku tayat kamakgtayalh xatapaxuwan natawilakgo. Xachixku wa pi tapaxkit wa tuku tlakg xlakaskinka chu putum kilhtamaku liskujkgo xlakata nalimasiyakgo. Na wa pi talakaskin namakgapaxuwanankan chu ni lakapala nasitsikan. Xpuskat nachuna lakpuwan. Xla na wa pi lu xlakaskinka tlan nalikatsikan chu namaxkinankan kakni. Chu wa pi putum kilhtamaku liskujkgo xlakata ni tlankajwa nawankgo, maski min kilhtamaku tuwa makgkatsikgo.

13. 1) ¿Tuku talakaskin xlakata tliwakga natawila tamakgaxtokgat? 2) ¿Tuku xlakata uma lu xlakaskinka?

¹³ Xlakata tamakgaxtokgat tliwakga natawila, talakaskin pi xachixku chu xapuskat nakatsinikgo tlan nalalikatsini, nalalimasiyani tapaxkit chu talakgalhaman akxni nalatachuwinan (Efes. 4:32). Pero lhuwa tamakgaxtokgat ni chuna tlawakgo chu uma lakxtlawa xtamakgaxtokgatkan. Makgapitsi tlakg katapaxkit xakgatlikgo tiku ni lakgapaskgo o xʼanimaleskan nixawa tiku tamakgaxtokgkgo. Akxni katasitsi o pixlanka latachuwinankan, tlawa pi nialhla nalatalalinkan (Efes. 4:31). Na lu nitlan kitaxtu nitlan nalichuwinankan achatum o nalawanikan tuku nitlan mamakgkatsininan.

14. ¿Tuku ni xlitlawatkan tamakgaxtokgat?

¹⁴ Xlakata xatapaxuwan natawila tamakgaxtokgat, lu xlakaskinka pi xachixku chu xapuskat nalatachuwinankgo. Akxni Biblia wan pi anan «kilhtamaku akxni ni nachuwinankan», ni wamputun pi nialh nalatachuwinankan (Ecl. 3:7). Chatum tala puskat xalak Alemania tiku makgaxtokga, wan pi akxni tuwa tuku titaxtumaka tuwa kitaxtu ni nasitsikan, pero komo chatum nialh nachuwinan, nitlan namamakgkatsini achatum. Na ni xliwanat putum tuku nawamputun,  xlakata nitlan namamakgkatsini achatum chu tlakg naʼanan taʼakglhuwit. Akxni xachixku chu xapuskat ni akxtum tuku lakpuwankgo xlakata tuku natlawakgo, ni pixlanka latachuwinankgo o nialh latachuwinankgo xlakata nalakkaxtlawakgo, wata liskujkgo lakapala nalakkaxtlawakgo chu ni nalakilhnikgo.

15. Xlakata tlakg natatliwakglha tamakgaxtokgat, ¿tuku na xlitlawatkan xachixku chu xapuskat?

¹⁵ Xlakata tlakg natatliwakglha tamakgaxtokgat, xachixku chu xapuskat xlimaxtutkan kilhtamaku nalawani tuku lakpuwankgo chu tuku makgkatsikgo. Lu xlakaskinka tuku wankgo, pero na xlakaskinka la wankgo. Asta akxni titaxtumakgo tuku tuwa, xchatiykan liwana xlilakpuwanatkan tuku nawankgo chu akxni nachuwinankgo xlimasiyatkan pi lakgalhamanankgo chu mastakgo kakni. Chuna tlakg ni tuwa nalakgaxmatni (kalikgalhtawakga Colosenses 4:6). Na lu tlan kitaxtu namaklakaskinkan tachuwin nema tlan mamakgkatsininan (Efes. 4:29).

16, 17. ¿Tuku xlakata xlakaskinka pi xachixku chu xapuskat nakatsikgo tuku maklakaskin achatum xlakata tuku makgkatsi chu xlakata talakgxtumit?

¹⁶ Xlakata tlakg natatliwakglha tamakgaxtokgat, xachixku chu xapuskat xlikatsitkan tuku maklakaskin achatum xlakata tuku makgkatsi chu xlakata talakgxtumit (kalikgalhtawakga 1 Corintios 7:3, 4). Xlakata chuna natlawakgo, tlakg xlakaskinka xliʼakxilhatkan tuku lakaskin achatum (Filip. 2:3, 4).

¹⁷ Min kilhtamaku, xachixku o xapuskat ni limasiyani achatum pi paxki o ni tatalakgxtumiputun. Makgapitsi lakchixkuwin lakpuwankgo pi ni lakgtliwakgan komo tlan nalikatsinikgo xpuskatkan. Pero Biblia makgpuwantini xachixku pi naʼakgatekgsni xpuskat (1 Ped. 3:7). Nachuna, xachixku xliʼakgatekgsat pi xlakata tlan namamakgkatsini xpuskat ni kajwatiya xlitatalakgxtumit. Na xlimasiyanit pi paxki putum kilhtamaku. Komo  chuna natlawa, xpuskat max tlakg nalipaxuwa akxni natalakgxtumikgo. Akxni xchatiykan lalimasiyanikgo pi lapaxkikgo chu lalakgalhamankgo, tlakg ni tuwa nalamaxkikgo tuku maklakaskin achatum xlakata tuku makgkatsi chu xlakata talakgxtumit.

18. ¿Tuku xlitlawat xachixku chu xapuskat xlakata namatliwakglhkgo xtamakgaxtokgatkan?

¹⁸ Ni xlilat pi xachixku o xapuskat naʼakgskgawi tiku tatamakgaxtokgnit. Pero min kilhtamaku chuna la xlakata tiku xtamakgaxtokga ni xlimasiyani pi xpaxki (Prov. 5:18; Ecl. 9:9). Biblia kawani tamakgaxtokgat pi tlan ni natalakgxtumikgo kajwatiya komo akxtum lakkaxwilikgo chuna natlawakgo chu kaj ni makgas. ¿Tuku xlakata? Xlakata Satanás max nalimaklakaskin uma kilhtamaku xlakata nakamatlawiputun tuku nitlan (1 Cor. 7:5). Lu nitlan xkitaxtulh komo xachixku o xapuskat xtlawalh talakgxtumit xalimaxana kaj xlakata maxkikgolh talakaskin Satanás xkaliʼakxilhli. Akxni xachixku o xapuskat maxki tuku maklakaskin achatum xlakata tuku makgkatsi chu xlakata talakgxtumit, limasiyakgo pi tlakg xlakaskinka akxilhkgo tuku maklakaskin achatum. Liwana tasiya pi chuna tlawakgo xlakata lapaxkikgo chu ni kaj xlakata chuna xlitlawatkan. Komo tlakg matliwakglhputunkgo xtamakgaxtokgatkan, xlalimasiyanitkan pi lapaxkikgo chu xlitalakgxtumitkan (1 Cor. 10:24).

19. 1) ¿Tuku kilitlawatkan xlakata tlakg natatliwakglha kintamakgaxtokgatkan? 2) ¿Tuku xlakata lu xlakaskinka chuna natlawayaw?

¹⁹ Xlakata tlakg namatliwakglhkgo xtamakgaxtokgatkan, xachixku chu xapuskat liwana xlilakpuwanatkan ni namakgatsankgananikgo Jehová chu tiku tamakgaxtokgkgo (Mat. 19:5, 6). Lu nitlan xkitaxtulh komo xtlawaw talakgxtumit xalimaxana la uku akxni nialh makgas tsankga xlakata natanuyaw kParaíso. Akxni lichuwinanita pi 24,000 israelitas tatalakgxtumikgolh lakpuskatin xalak Moab, Biblia wan: «Wa nti mpuwan akgstitum lama, kuintaj katlawakaj, ni naʼakgtsankgatayay» (1 Cor. 10:12). La uku tlakg xlakaskinka pi nitu nalixkajwananaw chu nitu naliʼakglhuwatnanaw (2 Ped. 3:13, 14).