KILHTAMAKU 28 xla abril kata 2013 tlawaka akgtum tamakxtumit kNagoya (Japón). Liwaka 210,000 tiku kikgaxmatkgolh tuku lichuwinanka, makgapitsi anta xwilakgo chu makgapitsi kʼInternet akxilhkgolh. Anthony Morris, tiku katatapakgsi tiku pulalinkgo xtatayananin Jehová, na kilalh. Anta masiyalh xasasti libro ktachuwin japonés nema litapakuwi, Biblia: Evangelio chuna la tsokgli Mateo. Natalan lu paxuwakgolh, lhuwa makgapakgxnankgolh.

Libro kgalhi 128 páginas chu limin Evangelio xla Mateo, nema takilhtinit kTraducción del Nuevo Mundo. Tala Morris wa pi uma libro lu xlakaskinka chu tlawaka xlakata nakamakgtayakan japoneses. ¿Tuku xlakata lu xlakaskinka uma libro? ¿Tuku xlakata xtalakaskin xtlawaka? ¿Chu la makgamakglhtinankgolh japoneses?

Lhuwa kaks lilakawankgolh chuna la tatsokgnit uma libro. Ktachuwin japonés tlan aktsa tsokgnankan, matsukikan akxtu chu pakgalhu linkan o pakgotu natsokgnankan, matsukikan pakgxwiki chu pakgastakat o pakgkana linkan. La uku, atsinu ni putum likgalhtawakga kjaponés tsokgkan chuna la español. Chu likgalhtawakga xla xtatayananin Jehová ktachuwin japonés nachuna tsokgkan. Pero uma libro aktsa tsokgkanit, chuna la tsokgkan periódicos chu atanu likgalhtawakga xalak Japón. ¿Tuku xlakata? Xlakata chuna japoneses tlakg tlan likgalhtawakganankgo. Nachuna, tachuwin nema min tipaʼakxtu kʼakgatunu páginas xalak Biblia na kawilikanit la subtítulos kʼuma libro. Chuna, tiku likgalhtawakgakgo tlan katsikgo tuku tlakg xlakaskinka.

Akxni natalan makglhtinankgolh xlibrojkan, tunkun tsukukgolh likgalhtawakgakgo. Chatum tala puskat tiku kgalhi liwaka 80 kata, wa: «Makglhuwata klikgalhtawakganit Evangelio xla Mateo, pero xlakata kxsubtítulos uma libro chu xlakata aktsa tsokgkanit, tlakg tlan kʼakgatekgsnit Taʼakgchuwin xalak Sipi». Chu atanu tala tsumat wa: «Kaj puntsu maktuminika klikgalhtawakgakgolh. Chu maski klismaninit klikgalhtawakga tuku pakgotu tatsokgnit, kkatsi pi lhuwa tlakg lakgatikgo akxni aktsa tatsokgnit».

Uma libro lu nalitamakgtayakgo japoneses. ¿Tuku xlakata? Maski lhuwa ni lu katsikgo xlakata Biblia, likgalhtawakgaputunkgo. Tiku nikxni kgalhikgonit maktum Biblia, la uku tlan nalikgalhtawakgakgo tsinu tuku anta min.

¿Pero tuku xlakata laksakka Evangelio xla Mateo? Xlakata kJapón akxni latamanin kgaxmatkgo pi lichuwinankan Biblia, atsinu ni putum lilakpuwankgo Jesucristo. Chu uma Evangelio lichuwinan akxni lakachilh Jesús, tiku xnatlatni xala makgasa, Taʼakgchuwin xalak Sipi chu tuku lu xlakaskinka wankanit pi nala kxaʼawatiya kilhtamaku. Lhuwa japoneses katsiputunkgo xlakata uma temas.

 Natalan lu lakgatikgo mastakgo uma libro akxni lichuwinankgo Dios chu akxni kalakgamparakgo tiku tlakg katsiputunkgo. Chatum tala puskat, wa: «La uku tlakg ni tuwa kalixakgatlikan xTachuwin Dios latamanin. Watiya kilhtamaku akxni mastaka libro, wi tiku kmaxkilh maktum».

Anta kJapón latamanin makglhuwa wankgo: «Nkalaktanu kxatitsu malakcha», «ni timakapinikgoya mpaxni mimperla» o «ni tilakapastaka wa ntu xala lichali» (Mat. 6:34; 7:6, 13). Pero lhuwa ni katsikgo pi uma wa tuku Jesucristo lichuwinalh. Wa xlakata natalan kamasiyanikgo kxasasti libro. Akxni kamasiyanikan, kaks lilakawankgo chu wankgo pi putum kilhtamaku xlikgalhtawakgaputunkgo Biblia, maski kaj makgtum.

Akxni natalan kalakgamparakgo tiku makglhtinankgolh libro, lhuwa wankgo pi tunkun tsukukgolh likgalhtawakgakgo. ¡Makgapitsi maktuminika xlikgalhtawakgakgonita! Chatum chixku tiku kgalhi liwaka 60 kata wanilh chatum tala: «Makglhuwa klikgalhtawakganit chu lu kimatliwakglhnit. ¿Tlan tlakg xkimasiyani xlakata Biblia?».

Natalan na mastakgo uma libro akxni lichuwinankgo Dios niku anankgo lhuwa latamanin. Chatum tala puskat maxkilh xcorreo electrónico chatum tsumat tiku makglhtinalh libro. Kaj akgtum hora titaxtulh, tsumat malakgachanilh akgtum correo tala chu wanilh pi tsinu xlikgalhtawakganit libro chu tlakg xkatsiputun. Titaxtulh akgtum semana tsukulh likgalhtawakga Biblia chu alistalh tsukulh an ktamakxtumit.

Congregaciones xalak Japón makglhtinankgonit liwaka 1,600,000 copias xla uma libro. Chu xtatayananin Jehová maʼakgpitsikgo lhuwa miles akgatunu papa’. Niku tsuku libro, natalan tiku lakkaxwilikgolh wankgo: «Klakaskinaw pi akxni nalikgalhtawakgaya uma libro namakgtayayan tlakg nakatsiputuna xlakata Biblia».