TASKUJUT nema tlakg xlakaskinka kilitlawatkan la uku, wa nalichuwinanaw xTamapakgsin Dios. Akxni lichuwinanaw Tamapakgsin palakachuwinamaw Jehová, chu uma lu lanka talakgalhaman. Pero min kilhtamaku tuwa namakgkatsiyaw chuntiya xatapaxuwan nalichuwinanaw. ¿Tuku xlakata?

Makgapitsi natalan taxlajwanikgo xlakata lhuwa latamanin ni wilakgo kxchikkan chu ni anan tiku nakatachuwinankgo. Chu akxni wilakgo kxchikkan lhuwa tiku ni kgaxmatputunkgo chu asta nitlan kalikatsinikan natalan. Atanu natalan, lhuwa niku kalakgchan nalichuwinankgo Dios, chu lhuwa tiku kgaxmatputunkgo, pero xlajwanankgo xlakata lakpuwankgo pi nikxni tlan nakalitachuwinankgo Dios putum latamanin. Chu amakgapitsi taxlajwanikgo xlakata akglhuwata kata lichuwinamakgo chu lisputni nina min.

Umakgolh max natlawa pi nialh nalipaxuwayaw akxni lichuwinanaw Dios. Xlikana, katsiyaw pi tuwa kitaxtu nalichuwinanaw xlakata uma kakilhtamaku wa akgchipanit Satanás (1 Juan 5:19).

Max na wi tuku tuwa makgkatsiya akxni lichuwinana Dios. Pero liwana kakatsi pi Jehová namakgtayayan. ¿Tuku namakgtayayan tlakg napaxuwaya? Kaʼakxilhwi pulaklhuwa tuku tlan natlawaya.

Kata kata lhuwa tiku tamunukgo chu xtatayananin Jehová litaxtukgo. Komo wix nina makgas tamunu, tlan lhuwa tuku nakatsiniya xlakata tiku lhuwata kata lata tamunukgonit. Chu komo lhuwata kata lata tamununita, lhuwa tuku tlan nakamasiyaniya tiku xalaksasti. Uma natlawa pi wix napaxuwaya.

Jesús xkatsi pi kstalaninanin xlakaskinkgo tamakgtay xlakata tlan liwana xlichuwinankgolh Dios (Luc. 8:1). La uku, tiku xalaksasti na lakaskinkgo pi liwana nakamasiyanikan.

 ¿La tlan nakamakgtayayaw tiku xalaksasti? Kalakapastakwi pi ni kajwatiya talakaskin naʼankan lichuwinankan Dios xlakata tlan makgalhtawakgena nawankan. Talakaskin pi atanu tala tiku lu katsini lichuwinan Dios namakgtaya chu xatapaxuwan natlawa. Wa xlakata, komo makgasa lichuwinana Dios, pulana kamasiyani tiku xasasti la nalakkaxwili tuku nalichuwinan chu la natlawa. Xlipulaktiy, kamasiyani la nakatachuwinan latamanin. Xlipulaktutu, kamasiyani la namasta likgalhtawakga. Xlipulaktati, kamasiyani la nakalakgampara tiku tlakg katsiputunkgo. Chu xlipulakkitsis, kamasiyani la namatsuki takgalhtawakga xalak Biblia. Na xlakaskinka nawaniya pi tlan tuku tlawama chu la tlakg tlan natlawa (Ecl. 4:9, 10). Komo tiku xasasti naʼakxilha la tlawa tiku katsini lichuwinan Dios chu nachuna natlawa, lu tlan makgalhtawakgena nalitaxtu alistalh (Luc. 6:40). Na tlakg tlan namakgkatsi xlakata nakatsi pi wi tiku tlan namakgtaya akxni namaklakaskin.

Maski lu lhuwa liskujaw, min kilhtamaku nipara chatum tekgsaw tiku nalitachuwinanaw Dios. Wa xlakata kajwatiya tlan tachuwinanaw tiku akxtum taʼanaw. ¿Minit kilhtamaku chuna akgspulanitan? Kalakapastakti pi Jesús «xlichatiyun» kamalakgachalh kstalaninanin (Luc. 10:1). Chuna tlan xlamakgtayalh chu xlamakgpuwantinilh (Rom. 1:12).

¿Tuku tlan nalitachuwinana tiku tapina? Tlan xlitachuwinanti tuku tlan kitaxtuninitan akxni lichuwinanita Dios, tuku katsini akxni miʼakstu xkgalhtawakgapat o akxni katakgalhtawakga mi familia, o tuku kgaxpati ktamakxtumit nema matliwakglhni. ¿Chu komo akxtum tapina tiku ni liwana lakgapasa? Tlan nakgalhskina la xtatayana Jehová litaxtulh, tuku xlakata kanajla pi tekgsnit tuku xaxlikana o niku kskujnanima Dios makgasa. Na tlan nalichuwinanatit tuku kaʼakgspulanitan akxni xlichuwinampatit Dios. Chuna, maski latamanin nakgaxmatkgo o ni, wixin tlan nalamatliwakglhatit (1 Tes. 5:11).

Xlakata chuntiya xatapaxuwan nalichuwinana, talakaskin miʼakstu nakgalhtawakgaya akgatunu semana. «Skujni xalipaw chu xaskgalala», kinkamaxkinitan lhuwa likgalhtawakga nema tlan kiakstukan nalikgalhtawakgayaw (Mat. 24:45, TNM). Akgtum liʼakxilhtit, tlan xputsa tuku xlakata lu xlakaskinka nalichuwinanaw. Tlakg  nakatsiya xlakata uma krecuadro « ¿Tuku xlakata lu xlakaskinka nalichuwinanaw Dios?».

Kalikgalhtawakga pulakatunu tuku limin recuadro chu kalilakpuwanti. Uma namakgtayayan chuntiya nalichuwinamputuna. Na kaputsa kBiblia atanu tuku xlakata xlakaskinka nalichuwinanaw Dios. Komo limaxtuya kilhtamaku nalilakpuwana uma, namakgtayayan tlakg nalipaxuwaya akxni nalichuwinana.

Xkachikin Jehová putum kilhtamaku kinkawaniyan pi maski lichuwinanaw akgatunu chiki, na tlan tanu tanu la nalichuwinanaw. Akgtum liʼakxilhtit, kinkawaniyan pi tlan nalimaklakaskinaw carta, teléfono, nalichuwinanaw ktiji, niku lamakgo lhuwa latamanin o niku skujkgo. Na tlan nalakkaxwiliyaw naʼanaw lichuwinanaw niku ni lhuwa anankgo o ni anan nipara chatum xtatayana Jehová.

¿Tlan chuna xtlawa? Lhuwa tiku chuna tlawakgonit chu lu tlan kakitaxtuninit. Kalichuwinaw akgtutu liʼakxilhtit.

Chatum tala puskat akxilhli pi kʼakgtum artículo nema xmin La Natlawayaw xTaskujut Dios, xlichuwinan la namatsukiyaw takgalhtawakga xalak Biblia chu chuna tlawaputulh. Wa xlakata kamalaknunilh takgalhtawakga xalak Biblia kgalhtutu tiku xkataskuja. Lu kaks lilakawa xlakata xkgalhtutukan kgalhtawakgaputunkgolh chu tsukukgolh ankgo ktamakxtumit.

Xkachikin Jehová na kinkawaniyan pi nalilakapastakaw tiku max nalakgatikgo artículos nema limin revistas. Anta kʼEstados Unidos, chatum superintendente viajante likgalhtawakgalh akgtum artículo xla ¡Despertad! nema xlichuwinan llantas. Wa xlakata lakpuwa nakalini revista putum tiku  kstakgo llanta kʼuma kachikin. Uma tala chu xpuskat na kilakgolh kliwaka 100 pumakuchin xlakata xmastakgolh revista nema xlimin artículo nema wanikan «Los retos del médico de hoy». Tala wan pi chuna latamanin tlakg lakgapaskgo kilikgalhtawakgakan chu taskujut nema tlawayaw. Na wan pi la uku, xla chu xpuskat tlakg kalakgapaskgo tiku lamakgo kʼuma kachikin chu tlakg ni tuwa nakalakgamparakgo tiku tlakg katsiputunkgo.

Atanu tala puskat malakgachalh maktum carta niku pulalinkan taskujut xliputum katiyatni xla xtatayananin Jehová, xlakata napaxtikatsini pi kinkawanikan nalichuwinanaw Dios kteléfono. Lichuwinalh pi xtse xkgalhi 86 kata chu lu xtatatla, wa xlakata xlichuwinan Dios kteléfono. Chu tlan limakgalhtawakgelh Biblia chatum puskat tiku kgalhi 92 kata.

Tuku likgalhtawakga wan pi katlawaw lu tlan kitaxtu. ¡Kamaklakaskinti! Komo chuna natlawaya, tlakg nalipaxuwaya akxni nalichuwinana Dios.

¿Tuku talakaskin xlakata tlan nakitaxtuniyan akxni nalichuwinanaw Dios? Makgapitsi lakpuwankgo pi talakaskin namakgpitsiyaw lhuwa likgalhtawakga, lhuwa tiku nakalimakgalhtawakgeyaw Biblia o lhuwa tiku nakamakgtayayaw xtatayananin Jehová nalitaxtukgo. Pero uma ni xlikana. Kalilakpuwanti Noé. ¿Tlan kitaxtunilh akxni lichuwinalh Dios? Chuna. Pero, ¿la xlilhuwa tiku kamakgtayalh xlakata kskujnin Jehová xlitaxtukgolh? Kajwatiya xfamilia. ¿Tuku kinkamasiyaniyan uma? Pi wantuku tlakg xlakaskinka, wa ni namakgatsankgananiyaw Jehová (1 Cor. 4:2).

Lhuwa natalan akgatekgskgo pi xlakata chuntiya xatapaxuwan nalichuwinankgo, talakaskin nalakkaxwilikgo tuku xlikana tlan namakgantaxtikgo. ¿Tuku tlan natlawakgo? Natekgsa makgapitsi liʼakxilhtit krecuadro nema wanikan « Kalakkaxwili natlawaya tuku xlikana tlan namakgantaxtiya».

Kaskini Jehová kamakgtayan lu nalipaxuwaya akxni nalichuwinana Dios. Akxni namakgantaxtiya tuku xlakkaxwilinita, tlan namakgkatsiya xlakata tlawapat putum tuku tlan tlawaya.

Xlikana pi min kilhtamaku tuwa kitaxtu nalichuwinankan Dios. Pero pulaklhuwa tuku namakgtayayan chuntiya napaxuwaya akxni nalichuwinana. Katachuwinanti tala tiku akxtum tapinita. Ni tuku kalaktlawalh liwana nakgalhtawakgaya miʼakstu akgatunu semana. Kalitsakgsa natlawaya tuku kinkawaniyan skujni xalipaw. Kalakkaxwili natlawaya tuku xlikana tlan namakgantaxtiya. Chu tuku tlakg xlakaskinka, kalakapastakti pi Jehová maxkinitan lanka talakgalhaman nalichuwinana xtukuwani chu chatum xtatayana nalitaxtuya (Is. 43:10). Liwana kakatsi uma: komo chuntiya xatapaxuwan nalichuwinana Dios, napaxuwaya kmilatamat.