1, 2. 1) ¿Tuku wa Jesús pi xʼama la kxaʼawatiya kilhtamaku? 2) ¿Tuku naʼakxilhaw kʼuma artículo?

JESÚS xkatawi xʼapóstoles Pedro, Andrés, Santiago chu Juan ksipi xla Olivos, lata niku xtaʼakxilha templo xla Jerusalén. Tsukulh kawani tuku xʼama la kxaʼawatiya kilhtamaku xla uma xalixkajni kakilhtamaku, akxni xʼama tawila la mapakgsina kxTamapakgsin Dios. Jesús kawanilh pi xʼama tawila «skujni xalipaw chu xaskgalala» unu kKatiyatni. Uma skujni xʼama kamaxki tuku xmaklakaskinkgolh xlakata takanajla kstalaninanin Cristo akxni xmaklakaskinkgolh (Mat. 24:45-47).

² Alistalh, Jesús kalitachuwinalh xlakata kgalhkaw laktsuman (kalikgalhtawakga Mateo 25:1-13). Kʼuma artículo nalichuwinanaw xlakata uma. Pulaktutu tuku naʼakxilhaw.  Pulana, ¿tuku xmasiyaputun Jesús akxni lichuwinalh uma? Xlipulaktiy, ¿la lilatamakgonit tiku kalaksakkanit naʼankgo kʼakgapun uma tuku lichuwinalh Jesús? Chu ¿tuku tlan nakakitaxtuni? Xlipulaktutu, ¿la tlan nalitamakgtayayaw la uku?

3. 1) Makgasa, ¿la xtalichuwinan kkilikgalhtawakgakan xlakata kgalhkaw laktsuman? 2) Akxni xlichuwinankan pulakatunu tuku tatsokgnit kBiblia nema ni lu xlakaskinka, ¿tuku max xkitaxtu?

³ Kʼartículo nema titaxtulh akxilhwi pi uma xaʼawatiya kata, skujni xalipaw lakgpalilh la lichuwinan tuku Biblia wan pi lanit. Makgasa, kilikgalhtawakgakan lhuwa xlichuwinan xlakata tuku max xkilhchani pulakatunu tuku Biblia wan. Pero la uku tlakg lichuwinan tuku kinkamasiyaniyan. Akgtum liʼakxilhtit, kalilakpuwaw xlakata kgalhkaw laktsuman. Xapulana, kilikgalhtawakgakan tlakg xlichuwinan pulakatunu tuku xlimin, la lámparas, aceite chu laktsu lametas. Pero akxni lhuwa xlichuwinanaw uma, nialh xlichuwinankan tuku tlakg xlakaskinka. Wa xlakata kʼuma artículo naʼakxilhaw tuku kinkamasiyaniyan.

4. 1) ¿Tiku litatawilat chu tuku xlakata chuna wanaw? 2) ¿Tiku laktsuman chu tuku xlakata chuna wanaw?

⁴ Xlakata nakatsiyaw tuku xmasiyaputun Jesús, pulana kilikatsitkan tiku kalichuwinamaka. ¿Tiku litatawilat? Jesús. ¿Tuku xlakata chuna wanaw? Xlakata atanu kilhtamaku, Jesús wa pi xlitaxtu la chatum litatawilat (Luc. 5:34, 35). ¿Chu tiku kilhchanima laktsuman? Wa «ni xalhuwa borregos», o tiku kalaksakkanit naʼankgo kʼakgapun. ¿Tuku xlakata chuna wanaw? Xlakata makgtum, Jesús kawanilh pi tiku kalaksakkanit naʼankgo kʼakgapun xʼamakgolh litaxtukgo la skujnin tiku mapasikgonit xlámparaskan chu kgalhkgalhimakgolh xmalana nakitaspita kʼakgtum tamakgaxtokgat (Luc. 12:32, 35, 36). Chu uma kinkamalakapastakayan tuku xlitlawatkan xwanit laktsuman nema talichuwinan kBiblia. Skgalalh xlitawilatkan xwanit chu xmapasikgolh xlámparaskan akxni xchilh litatawilat. Apóstoles Pablo chu Juan na wankgolh pi tiku kalaksakkanit litaxtukgo la laktsuman (2 Cor. 11:2; Apocalipsis [Revelación] 14:4). Putum uma kinkamakgtayayan nakatsiyaw pi tuku Jesús lichuwinalh xlakata kgalhkaw laktsuman wa xkamasiyaniputun tiku kalaksakkanit.

5. 1) ¿Tukuya kilhtamaku kgantaxtu tuku talichuwinan xlakata kgalhkaw laktsuman? 2) ¿Tuku xlakata chuna wanaw?

⁵ ¿Tukuya kilhtamaku kgantaxtu tuku talichuwinan xlakata kgalhkaw laktsuman? Kgantaxtu kxaʼawatiya kilhtamaku. ¿Tuku xlakata chuna wanaw? Kaʼakxilhwi. Tuku Jesús lichuwinalh limakgalhsputulh akxni litatawilat «milh» (Mat. 25:10). Krevista Makatsinina 15 xla julio kata 2013 akxilhwi pi tuku lichuwinan Mateo 24  chu 25 makgtsayan wan xlakata akxni Jesús namin o nachin. Chu akxilhwi pi Jesús nachin akxni sputmaja lanka takatsanajwat, akxni namin katalakkaxla latamanin chu namasputu uma xalixkajni kakilhtamaku. Wa xlakata katsiyaw pi tuku talichuwinan xlakata kgalhkaw laktsuman kgantaxtu kxaʼawatiya kilhtamaku, pero Jesús namin akxni lama nawan lanka takatsanajwat.

6. ¿Tuku xmasiyaputun Jesús akxni lichuwinalh kgalhkaw laktsuman?

⁶ ¿Tuku xmasiyaputun Jesús akxni kalichuwinalh kgalhakaw laktsuman? Xlakata nakatsiyaw, kaʼakxilhwi tuku talichuwinan kcapítulo 24 xla Mateo, Jesús lichuwinalh skujni xalipaw chu xaskgalala, kakilhchanima ni lhuwa tiku kalaksakkanit nakapulalinkgo kstalaninanin Cristo kxaʼawatiya kilhtamaku. Chu Jesús kawanilh pi xtalakaskin ni namakgxtakgkgo Dios. Chu akxni lichuwinalh kgalhkaw laktsuman, na watiya tuku Jesús xmasiyaputun. Pero uma wa xkalimasiyaniputun putum tiku kalaksakkanit naʼankgo kʼakgapun chu xlatamakgolhku kxaʼawatiya kilhtamaku. ¿Tuku xmasiyaputun? Pi putum skgalalh xlitawilatkan komo amputunkgo kʼakgapun (Mat. 25:13). ¿La makgantaxtimakgo tiku naʼankgo kʼakgapun tuku Jesús xmasiyaputun? Kaʼakxilhwi.

7, 8. 1) ¿Tuku xlakata skgalalh xwilakgolh xalakgskgalalan laktsuman? 2) ¿La takaxkgonit tiku kalaksakkanit naʼankgo kʼakgapun?

⁷ Jesús lichuwinalh kgalhkitsis xalaktontas laktsuman. Chuna kawanilh xlakata ni skgalalh xwilakgolh akxni chilh litatawilat. Jesús na lichuwinalh kgalhkitsis «lakgskgalalan» laktsuman. Chuna kawanilh xlakata xlakan skgalalh xwilakgolh. Pero ¿tuku xlakata skgalalh xwilakgolh? Pulaktiy tuku xlakata. Pulana, xlakata xtakaxkgonit,chu xlipulaktiy xlakata skgalalh xwilakgolh. Xputumkan skgalalh xlitawilatkan xwanit chu xmapasikgolh xlámparaskan kkatsisni. Lakgskgalalan laktsuman takaxkgolh akxni tlakg linkgolh aceite, pero xalaktontas ni lhuwa xlinkgo. Wa xlakata, ¿la skgalalh wilakgolh tiku kalaksakkanit naʼankgo kʼakgapun xlakata akxni namin Jesús?

⁸ Tiku kalaksakkanit liwana takaxkgonit xlakata natlawakgo putum tuku Jehová kalimapakgsinit asta akxni namin lisputni. ¿La takaxkgonit? Pulaklhuwa tuku tlawakgonit. Pulana, katsikgo pi xlakata tlan naskujnikgo Jehová talakaskin lhuwa tuku nalimakgxtakgkgo, pero xatapaxuwan tlawakgo. Xlipulaktiy, xlakata paxkikgo Jehová chu Jesús liwana lakapastakkgonit nikxni namakgxtakgkgo Dios maski ni katsikgo tukuya kilhtamaku namin lisputni. Chu xlipulaktutu, ni lhuwa tuku kgalhiputunkgo, ni tlawakgo talakgxtumit nema ni xlitatlawat, ni lakgkatsaninankgo chuna la tlawakgo amakgapitsin xalak kakilhtamaku. Tiku kalaksakkanit xtachuna la xalakgskgalalan laktsuman, tiku skgalalh xwilakgolh chu xmapasikgonit xlámparaskan.  Xlakan na skgalalh wilakgolh chu kgalhkgalimakgolh litatawilat, maski tasiya pi tamakgapalima (Filip. 2:15).

9. 1) ¿Tuku kawaninit Jesús tiku naʼankgo kʼakgapun xala uku? 2) ¿Tuku tlawakgonit tiku kalaksakkanit akxni wanka «¡Uwi litatawilat!»? (Na kaʼakxilhti nota.)

⁹ Apulaktu tuku xlakata lakgskgalalan laktsuman xtakaxkgonit wa pi skgalalh xwilakgolh. Pero ¿tuku xlakata Jesús wa pi kgalhkaw laktsuman lhtatakgolh akxni akxilhkgolh pi litatawilat xtamakgapalima? Chuna wa xlakata tiku kalaksakkanit la uku max nalhtatatawilakgo, o max atanu tuku natlawakgo akxni kgalhkgalhimakgolh nachin. Jesús xkatsi pi asta tiku skgalalh tawilaputun tlan atanu tuku nalitakgatsankga akxni kgalhkgalhinama. Wa xlakata, tiku kalaksakkanit chu ni makgxtakgkgo Dios lhuwa liskujkgonit xlakata skgalalh natawilakgo. ¿La tlawakgonit? Kalakapastakwi pi Jesús wa pi laktsuman kgaxmatkgolh akxni wanka: «¡Uwi litatawilat!». Xkgalhkawkan kgaxmatkgolh, pero kaj xalakgskgalalan skgalalh tawilakgolh (Mat. 25:5, 6, TNM; 26:41). Nachuna, tiku kalaksakkanit chu ni makgxtakgkgo Dios uma xaʼawatiya kilhtamaku na kgaxmatkgonit akxni wanka: «¡Uwi litatawilat!». ¿Chu tuku tlawakgonit? Liwana katsikgonit pi atsinu tsankga nachin Jesús chu skgalalh kgalhkgalhimakgolh. * (Kalikgalhtawakga nota.) Kalichuwinaw tuku lisputa uma tuku lichuwinalh Jesús, nema laklhkawilikanit kilhtamaku akxni nakgantaxtu.

10. ¿Tuku max akstu nakinkakgalhskinkanan xlakata tuku lawanikgolh xalaktontas chu xalakgskgalalan laktsuman?

¹⁰ Akxni nachina litatawilat, laktsuman tiku xalakgskgalalan chu tiku xalaktontas kgalhchuwinankgo. Xalaktontas kaskinikgo aceite tiku lakgskgalalan xlakata nakamujunikgo xlámparaskan. Pero xalakgskgalalan ni kamaxkikgo (kalikgalhtawakga Mateo 25:8, 9). Max uma tuku takgalhchuwin kilhchanima tuku nala akxni atsinu tsankga namin Jesús, akxni atsinu tsankga nasputa lanka takatsanajwat. Pero max nakinkakgalhskinkanan: «¿Tuku xlakata tiku kalaksakkanit chu ni makgxtakgkgo Dios ni katikamakgtayaputunkgolh amakgapitsin?». Xlakata naʼakgatekgsaw uma, kililakapastakatkan pi ama kilhtamaku tiku kalaksakkanit makglhtinankgonita nawan xaʼawatiya sello.

11. 1) ¿Tuku nala akxni atsinu tsankga natsuku lanka takatsanajwat? 2) Akxni lakgskgalalan laktsuman kawanikgo tiku xalaktontas kaʼankgolh tamawakgo aceite, ¿tuku wamputun?

¹¹ Akxni atsinu tsankga natsuku lanka takatsanajwat, putum tiku kalaksakkanit chu ni makgxtakgkgo Dios nema wilakgolh kKatiyatni makglhtinankgonita nawan xaʼawatiya sello (Apoc. 7:1-4). Uma wamputun pi xlikana naʼankgo kʼakgapun. Pero ¿tuku nakaʼakgspula tiku ni skgalalh natawilakgo chu namakgxtakgkgo Dios akxni atsinu tsankga natsuku lanka takatsanajwat? Ni katimakglhtinankgolh xaʼawatiya sello. Akxni natsuku  lanka takatsanajwat chu naʼakxilhkgo la nakamalakgsputukan putum nixaxlikana takanajla, tiku makgxtakgkgonit Dios kaks nalilakawankgo. Max ama kilhtamaku nakatsikgo pi ni skgalalh wilakgolh xlakata akxni nachin Jesús. Komo ama kilhtamaku naskinkgo nakamakgtayakan, ¿tuku nala? Xtakgalhtin natekgsaw akxni akxilhaw tuku latachuwinalh kgalhkaw laktsuman. Tiku lakgskgalalan ni kamaxkikgo aceite xalak tontas chu kawanikgo pi kaʼankgolh tamawakgo. Pero xlakata itat tsini, ni anan tiku nakastamaxki. Uma wamputun pi nialhla tuku natlawakgo.

12. 1) Akxni natawila lanka takatsanajwat, ¿tuku nakaʼakgspula tiku xatalaksakni pero namakgxtakgkgo Dios akxni nina makglhtinan xaʼawatiya sello? 2) ¿Tuku nakatlawani Jesús tiku nalikatsikgo chuna la xalaktontas laktsuman?

¹² Akxni natawila lanka takatsanajwat, ¿tuku nakaʼakgspula tiku xatalaksakni pero makgxtakgkgonit Dios? Tiku xatalaksakni chu ni makgxtakgkgo Dios nila katikamakgtayakgolh. Nialhla tuku natatlawa. Nakaʼakgspula chuna la xalaktontas laktsuman tiku ankgolh tamawakgo aceite: «Milh nchixku ntapuchuwani [o litatawilat]; cha nchu wa nti skgalalh xwilakgo, tatanukgolh nchixku ntapuchuwani ktapaxuwan, na talakchuwalh malakcha». Akxni Jesús namin akxni kgalhsputmaja nawan lanka takatsanajwat, nakamamakxtumi kʼakgapun xatalaksakni tiku ni xmakgxtakgkgo Dios (Mat. 24:31; 25:10; Juan 14:1-3; 1 Tes. 4:17). Pero nakalakgmakgan la tiku litaxtukgo la xalaktontas laktsuman. Xlakan max nawankgo: «Tlati, tlati, kakinkamalakkini». Pero Jesús nakawani chuna la amakgapitsi tiku makgxtakgkgo Dios: «Xlikana kkawaniyan, mpi ni kkalakgapasan» (Mat. 7:21-23; 25:11, 12).

13. 1) ¿Tuku xlakata katsiyaw pi Jesús ni xwamputun pi lhuwa tiku kalaksaknit namakgxtakgkgo Dios? 2) ¿Tuku xlakata tlan wanaw pi uma tuku talichuwinan masiya pi Jesús kalipawan tiku kalaksakkanit? (Kaʼakxilhti xapulana dibujo.)

¹³ ¿Xwamputun Jesús pi lhuwa tiku kalaksakkanit xmakgxtakgkgolh Dios chu atanu xtawi xlakgxokgokan? Ni. Xlakata naʼakgatekgsaw, kalilakpuwaw capítulo 24 xla Mateo. Akxni Jesús wanilh skujni xalipaw pi ni xlitaxtulh nixatlan skujni, ni xwamputun pi chuna xʼama la. Kaj xkawanima pi kuenta xtlawakgolh. Tuku wa xlakata kgalhkaw laktsuman watiya tuku kilhchanima. Jesús xkamasiyaniputun pi tiku kalaksakkanit kuenta xlitlawatkan. Chuna la kgalhkitsis laktsuman skgalalh tawilakgolh chu kgalhkitsis ni, chatunu tiku laksakkanit xlilakkaxwilit komo skgalalh natawila o namakgxtakga Dios. Pablo na watiya tuku kawanilh xnatalan tiku xkalaksakkanit (kalikgalhtawakga Hebreos 6:4-9; natekgsa tuku na xtachuna lichuwinan kDeuteronomio 30:19). Apóstol lakatanks kawanilh pi kuenta xtlawakgolh, pero na kawanilh pi xlipawan pi ni xʼamakgolh makgxtakgkgo Dios. Tamasiy nema mastalh Jesús akxni lichuwinalh kgalhkaw laktsuman na limasiya pi kalipawan tiku kalaksakkanit.  Katsi pi xchatunukan na tlan ni namakgxtakgkgo Dios chu namakglhtinankgo xtatlajakan.

14. ¿Tuku xlakata na tlan litamakgtayakgo amakgapitsi borregos tuku Jesús lichuwinalh?

¹⁴ Tuku Jesús lichuwinalh wi tuku kinkamasiyaniyan nema ni tuwa akgatekgskan: skgalalh kilitawilatkan. Chu maski uma tuku talichuwinan wa xkawanimaka tiku kalaksakkanit, amakgapitsi borregos na tlan nalitamakgtayakgo (Juan 10:16). ¿Tuku xlakata? Xlakata Jesús wa: «Wa ntu kwan, limakxtum kkawaniyan: Skgalalh katawilatit» (Mar. 13:37). Jesús lakaskin pi putum kstalaninanin skgalalh natawilakgo. Chu xputumkan tlan natlawakgo la tiku kalaksakkanit chu tuku tlakg xlakaskinka naʼakxilhkgo kxlatamatkan wa nalichuwinankgo Dios. Na kalakapastakwi pi xalaktontas laktsuman kaskinikgolh aceite xalakgskgalalan laktsuman. Nikxni chuna katlawaw la xalaktontas laktsuman. Ni kalakpuwaw pi atanu ni namakgxtakgkgo Dios, skgalalh natawilakgo chu natakaxkgo kimpalakatakan. Akinin chuna kilitlawatkan. Jesús nialh makgas namin xlakata putum nakatalakkaxla, chu kinchatunukan namastayaw kuenta. Wa xlakata skgalalh katawilaw.

15. ¿Tuku xlakata putum kstalaninanin Cristo lipaxuwayaw pi Jesús natatamakgaxtokga xlitatawilat?

¹⁵ Putum kstalaninanin Cristo lipaxuwayaw tamakgaxtokgat nema Jesús lichuwinalh. Akxni nasputa Armagedón, tiku kalaksakkanit naʼankgo kʼakgapun, nalitaxtukgo xlitatawilat Cristo (Apoc. 19:7-9). Chu tiku nalatamakgo kkatiyatni na nalitamakgtayakgo. ¿Tuku xlakata? Xlakata uma tamakgaxtokgat natlawa pi nakgalhikgo akgtum lu xatlan tamapakgsin. Wa xlakata, komo litaxtuyaw tiku xatalaksakni o ni, kaliskujwi xlakata skgalalh natawilayaw. Chuna tlan nalipaxuwayaw tuku Jehová wanit pi nakinkamaxkiyan.