PUKSNANKIWI xalak Líbano lu laklanka. Komo katamalakxtumiyaw olivos ni lu laklanka, xlakata ni talhman stakkgo chu lu lakglhkgotili. Pero lu lakgtliwakga chu tlan asta akgtum mil kata makgapalakgo. Xtankgaxekg lu laklhman chu lakpalha. Maski natankamikan, tlan nakgalhapumpara komo xtankgaxekg staknamakgolhku.

Uma kinkamalakapastakayan tuku lichuwinalh chatum xlakskujni Dios xala makgasa tiku xwanikan Job. Xla wililh akgtum liʼakxilhtit, kgantum kiwi, max xlichuwinama xakiwi olivo. Wa pi maski nakakan tlan nastakpara. Maski lu kaskakni, akxni senan uma kiwi amakgtum tlan akgpumpara la «xasasti kiwi» (Job 14:7-9). Job wililh uma liʼakxilhtit xlakata nalimasiya pi komo xnilh xlipawan pi Jehová tlan xmalakastakwanilh (Job 14:13-15).

Akxni tiku skuja kkapukuxtun akxilha pi kgantum kiwi tankamikanit, lakaskin pi kastakpa. Nachuna, akxni Jehová akxilha pi nikgo kskujnin chu lhuwa amakgapitsi latamanin, lakaskin pi kalatamaparakgolh (Mat. 22:31, 32; Juan 5:28, 29; Hech. 24:15). Akinin na lakaskinaw pi kalatamaparakgolh. ¡Lu nalipaxuwayaw akxni nachan uma kilhtamaku!