1-3. ¿Tuku xlakata Pablo liwana xkatsi pi tlan xlipawan Jehová putum kilhtamaku? (Kaʼakxilhti xapulana dibujo.)

KXAPULANA siglo kstalaninanin Cristo xalak Roma lu tuwa tuku xtitaxtumakgo. Romanos lu xkaputsastalanikgo. Xkalimawakakan pi ni xkaʼakxilhputunkgo latamanin chu xwankan pi wa klhkuyukgonit kachikin. Lhuwa kstalaninanin Cristo xkatamaknukan kpulachin, chu amakgapitsi xkatamaknukan niku xwilakgo animales nema xalakluku xlakata xkawakgolh. Amakgapitsi xkaxtokgowakakan kkiwi chu xastakna xkalhkuyukan xlakata xlimakaxkgakgeka kachikin katsisni. Kstalaninanin Cristo xkatsikgo pi nachuna max xkaʼakgspulalh.

² Kʼuma lu xakalipekua kilhtamaku, romanos chipakgolh apóstol Pablo. Max xakstu xkgalhskinkan komo natalanin xʼamakgo makgtayakgo. ¿Tuku xlakata? Xlakata milh kilhtamaku, titaxtulh tuku lu tuwa chu nitiku makgtayalh. Pero Pablo wa pi Jehová limaklakaskilh Jesús xlakata xmakgtayalh chu xmaxkinit litliwakga nema xmaklakaskin. Asta  wa pi lakgmaxtuka «kxkilhni lapanit» o león (2 Tim. 4:16, 17). * (Kalikgalhtawakga nota.)

³ Pablo xlakapastaka la Dios xmakgtayanit pulana chu liwana xkatsi pi xʼama makgtayapara. Liwana xkatsi pi Jehová xʼama maxki litliwakga xlakata xtayanilh uma taʼakglhuwit chu atanu taʼakglhuwit nema xkgalhilh alistalh. Lu liwana xkatsi pi kiMalanakan xʼama lakgmaxtu maski xtitaxtulh kaxatukawa tuku nitlan (2 Tim. 4:18). Xkatsi pi maski natalan nila xmakgtayakgolh, Jehová chu Jesús xʼamakgo makgtayakgo putum kilhtamaku. Liwana xkatsi uma.

4, 5. 1) ¿Tiku tlan nakinkamakgtayayan putum kilhtamaku? 2) ¿Tuku tlan natlawaya xlakata tlakg tlan natalalipina Jehová?

⁴ ¿Minit kilhtamaku titaxtu lu tuwa taʼakglhuwit chu makgkatsi pi miʼakstu xwila? Max makgatsankga mintaskujut o kgalhi taʼakglhuwit kʼescuela. Max xtatatlaya o xkgalhiya atanu lu tuwa taʼakglhuwit. Max lu lilipuwanti akxni akxilhti pi nitiku xmakgtayayan. Xlikana pi makgapitsi taʼakglhuwit lu tuwa chu latamanin nila lakkaxtlawakgo. ¿Tuku tlan natlawaya? Biblia kinkawaniyan pi kalipawaw Jehová (Prov. 3:5, 6). ¿Xlikana tlan nalipawanaw? Chuna. Biblia lhuwa tiku lichuwinan nema kinkamasiyaniyan pi Jehová xlikana kamakgtaya kskujnin.

⁵ Komo wix kgalhiya akgtum taʼakglhuwit chu nitiku makgtayayan, ni kalakpuwanti pi nila katilakkaxlalh. Katlawa chuna la Pablo chu kaʼakxilhti taʼakglhuwit la tuku namakgtayayan nalipawana Jehová xliputum minaku. Na kaliʼakxilhti taʼakglhuwit la tuku namakgtayayan nakatsiya pi Jehová kuentajtlawayan. Uma natlawa pi tlakg nalipawana Jehová chu tlakg natalalipina.

6. ¿Tuku xlakata min kilhtamaku tuwa makgkatsiyaw nalipawanaw Jehová akxni titaxtumaw lu xatuwa taʼakglhuwit?

⁶ Kalakpuwanti pi kgalhiya lu tuwa taʼakglhuwit chu lu lilakgaputsapat. Tlawanita tuku tlan tlawaya xlakata nalakkaxtlawaya chu skininita tamakgtay Jehová. Komo chuna tlawanita, tlan nialh nalilipuwana chu nalipawana pi Dios namakgtayayan (kalikgalhtawakga Salmo 62:8 chu 1 Pedro 5:7). Komo xlikana xʼamigo Jehová litaxtuputuna, xlakaskinka nalipawana. Xlikana pi min kilhtamaku, tuwa tamakgkatsi. ¿Tuku xlakata? Pulaktum, wa pi Jehová min kilhtamaku ni lakapala kgalhti oración (Sal. 13:1, 2; 74:10; 89:46; 90:13; Hab. 1:2).

7. ¿Tuku xlakata min kilhtamaku Jehová ni lakapala kgalhti oración?

⁷ ¿Tuku xlakata min kilhtamaku Jehová  ni lakapala kgalhti oración? Xlakata naʼakgatekgsaw, kalakapastakwi pi Biblia wan pi Jehová kinTlatkan chu akinin xkamanan (Sal. 103:13). Natlatni ni putum kilhtamaku kamaxkikgo xkamanan putum tuku skinkgo. Chu akxni wi tuku kamaxkikgo, min kilhtamaku ni lakapala kamaxkikgo. Nachuna, min kilhtamaku kamanan wi tuku skinkgo chu alistalh nialh lakaskinkgo. Natlatni na katsikgo komo wantuku skimakgo xkamanan nakatlawani tuku nitlan o nakatlawani tuku nitlan amakgapitsin. Komo putum kilhtamaku lakapala xkamaxkikgolh tuku kaskinikgo, natlatni xlitaxtukgolh la xlakskujni xkamanan. Pero natlatni katsikgo tuku maklakaskinkgo xkamanan chu tukuya kilhtamaku tlakg tlan nakamaxkikgo. Jehová nachuna tlawa. Xla kinkapaxkiyan, katsi tuku maklakaskinaw chu tukuya kilhtamaku tlakg tlan nakinkamaxkiyan. Wa xlakata talakaskin nakatsiniyaw nakgalhkgalhinanaw chu naʼakxilhaw la Jehová kinkakgalhtiyan (natekgsa tuku na wa lichuwinan kʼIsaías 29:16 chu 45:9).

8. ¿Tuku kinkawaniyan Jehová?

⁸ Kalakapastakti pi Jehová na katsi tuku kinchatunukan tlan tayani (Sal. 103:14). Xla putum kilhtamaku kinkamaxkiyan litliwakga nema maklakaskinaw. Max namin kilhtamaku namakgkatsiyaw pi nialh kgalhiyaw litliwakga. Pero Jehová kinkawaniyan pi komo akgtum taʼakglhuwit lu tuwa, xla nakinkamakgtayayan natayaniyaw (kalikgalhtawakga 1 Corintios 10:13). Liwana katsiyaw pi Jehová katsi tuku tlan tayaniyaw, chu uma tlan kinkamamakgkatsiniyan.

9. Komo Jehová ni lakapala kgalhti mioración, ¿tuku tlan natlawaya?

⁹ Komo Jehová ni lakapala kgalhti mioración, ni kalakpuwanti pi ni katikgalhtin. Kalakapastakti pi xla kinkamakgtayaputunan, pero putsa tukuya kilhtamaku tlakg tlan chuna natlawa. Biblia wan pi Jehová kgalhkgalhi xlakata nakinkamakgtayayan chu nakinkamasiyaniyan talakgalhaman, xlakata xla xaʼakgstitum likatsi. Chu wan pi tiku lipawankgo paxuwakgo (Is. 30:18).

10-12. 1) ¿Tuku xlakata tuwa kuentajtlawakan tiku xalak familia nema tatatla? 2) ¿Akxni kgalhiyaw taʼakglhuwit chu lipawanaw Jehová, ¿tuku kitaxtu xlakata la talalinaw? Kawili akgtum liʼakxilhtit.

¹⁰ Kpárrafo 2 lichuwinaw pi Pablo lakgmaxtuka «kxkilhni lapanit» (2 Tim. 4:17). Komo na titaxtunita lu tuwa taʼakglhuwit chu makgkatsiya la Pablo, ¿tuku militlawat? Lu xlakaskinka pi nalipawana Jehová. Akgtum liʼakxilhtit, ¿kuentajtlawapat chatum mifamilia tiku tatatla? Xlikana pi skininita Jehová namaxkiyan litliwakga chu namakgtayayan nalaksaka tuku tlan. * (Kaʼakxilhti nota.) Tlan  ni lu nalilipuwana xlakata katsiya pi Jehová akgatekgsa tuku titaxtupat. Katsiya pi Jehová namakgtayayan natayaniya chu ni namakgatsankgananiya (Sal. 32:8).

¹¹ Pero max namin kilhtamaku namakgkatsiya pi Jehová ni makgtayaman. Max makuchinanin ni liwana katsikgo la namakuchikgo mi familia tiku tatatla. O max xlakaskina pi mifamilia tlan xmamakgkatsinikgon pero wata kaj tlakg nitlan tuku tlawakgo. Akxni chuna la, xlakaskinka pi chuntiya naskiniya Jehová kamaxkin litliwakga chu chuntiya katalakatsuwini (kalikgalhtawakga 1 Samuel 30:3, 6). Alistalh, akxni naʼakgatekgsa la makgtayan Jehová, tlakg tlan natalalipina.

¹² Kalichuwinaw xliʼakxilhtit Linda, chatum tala puskat. * (Kaʼakxilhti nota.) Lhuwa kilhtamaku kakuentajtlawalh xnatlatni akxni nina xnikgo. Linda lichuwinan pi xla, xchixku chu xtala, makglhuwa nialh xkatsikgo tuku natlawakgo. Xmin kilhtamaku xmakgkatsikgo pi nialhla xtayanikgo. Pero la uku liwana katsikgo pi Jehová kamakgtayalh. Liwana katsi pi Jehová kamaxkilh litliwakga nema xmaklakaskinkgo, liwaka akxni nialh xkatsikgo tuku natlawakgo.

13. ¿La makgtayalh Rosa xlakata xlipawan Jehová?

¹³ Komo lu lipawanaw Jehová, xla nakinkamakgtayayan natayaniyaw akxni titaxtuyaw laklanka taʼakglhuwit. Wa uma tuku titaxtulh Rosa, chatum tala puskat. Xchixku ni xtatayana Jehová litaxtu chu xlakxtlawama xtamakgaxtokgat kxlakatin mapakgsina. Watiya uma kilhtamaku, xtala kgawasa Rosa katsilh pi xkgalhi akgtum xasnun tajatat. Chu ni lhuwa papaʼ titaxtulh, nilh xpuskat xtala. Lu tuwa makgkatsilh Rosa, putum uma tuku titaxtulh. Akxni tlakg tlan makgkatsilh, precursora regular litaxtulh. Pero uma kilhtamaku nilh xtse. ¿Tuku makgtayalh natayani putum uma? Chali chali xtlawani oración Jehová, maski ni lu xlakaskinka tuku xʼama tlawa. Rosa wan pi Jehová litaxtulh chatum xaxlikana amigo. Na wan pi katsinilh tlakg nalipawan Jehová, nixawa xaktsu nalipawankan o nakalipawan amakgapitsi latamanin. Xmakgkatsi pi Jehová xlikana xmakgtayama, xlakata putum kilhtamaku xkgalhi tuku xmaklakaskin. Xmakgkatsi pi akxtum xtaskujma Jehová.

14. ¿La namakgtayayan Jehová komo natamakxtukan kcongregación tiku xalak mifamilia?

¹⁴ Kalichuwinaw atanu lu tuwa taʼakglhuwit. Max tamakxtukanit kcongregación chatum xalak mifamilia. Wix katsiya pi Biblia wan pi ni kilitachuwinatkan tiku tamakxtukanit kcongregación (1 Cor. 5:11; 2 Juan 10). Pero xlakata lu paxkiya mifamilia, max nalakpuwana pi uma limapakgsin lu tuwa namakgantaxtiya. ¿La tlan namakgtayayan Jehová? Xla namaxkiyan litliwakga xlakata ni namakgatsankgananiya chu nakgalhakgaxpatniya. Kalipawanti Jehová chu  kaʼakxilhti wantuku titaxtupat la tuku namakgtayayan tlakg natalakatsuwiniya.

15. ¿Tuku xlakata Adán ni kgalhakgaxmatli Jehová?

¹⁵ Tlan natamalakxtumiyaw uma, tuku titaxtulh Adán. ¿Tuku xlakata walh xtawakat kiwi nema maxkilh Eva? ¿Walh xlakata xlakpuwan pi tlan ni xkgalhakgaxmatnilh Dios chu chuntiyaku xlatamalh? Nichuna, Biblia kinkawaniyan pi «ni wa Adán wa nti ntitakgskgawilh» (1 Tim. 2:14). ¿Tuku xlakata kgaxmatnilh xpuskat nixawa Jehová? Xlakata tlakg xpaxki xpuskat nixawa Jehová (Gén. 3:6, 17). ¿Tuku kinkamasiyaniyan uma?

16. ¿Tiku tlakg kilipaxkitkan nixawa chatum lataman? ¿Tuku xlakata?

¹⁶ Tuku tlawalh Adán kinkamasiyaniyan pi tlakg kilipaxkitkan Jehová nixawa atanu lataman (kalikgalhtawakga Mateo 22:37, 38). ¿Tuku xlakata? Xlakata wa tuku tlakg nakamakgtaya kifamiliajkan, maski skujnikgo o ni skujnikgo Jehová. Wa xlakata, kaliskujti tlakg napaxkiya Jehová chu tlakg nalipawana chali chali. Komo lilipuwana pi chatum xalak mifamilia tamakxtukanit kcongregación, kawani Jehová tuku makgkatsiya (Rom. 12:12; Filip. 4:6, 7). * (Kaʼakxilhti nota.) Maski lu lipuwampat, kaʼakxilhti tuku titaxtupat la tuku namakgtayayan tlakg tlan natalalipina Jehová. Chuna tlan nalipawana chu liwana nakatsiya pi komo nakgalhakgaxpata Jehová, tlakg tlan nakitaxtu tuku natlawaya.

17. Komo chuntiya lu nalichuwinanaw Dios, ¿tuku nakinkamaxkiyan Jehová?

¹⁷ ¿Tuku xlakata Jehová lakgmaxtulh Pablo «kxkilhni lapanit»? Pablo wa pi xlakata tlan chuntiya xlichuwinalh Dios chu xmasputulh taskujut nema xlakgayawanit (2 Tim. 4:17). Jehová na kinkamaxkinitan taskujut, wa pi nalichuwinanaw Dios. Xla xmakgtayana kinkaliʼakxilhan (1 Cor. 3:9; 1 Tes. 2:4). Komo chuntiya lu nalichuwinanaw Dios, liwana kakatsiw pi xla nakinkamaxkiyan tuku maklakaskinaw (Mat. 6:33). Nachuna, ni lu tuwa katimakgkatsiw nakgalhkgalhiyaw pi xla kakinkakgalhtin kiʼoracioneskan.

18. ¿Tuku tlan natlawayaw xlakata tlakg tlan xʼamigo Jehová nawanaw chu tlakg nalipawanaw?

¹⁸ Chali chali kaliskujti xlakata tlakg tlan natalalipina Jehová. Akxni natitaxtuya taʼakglhuwit, kaliʼakxilhti la tuku namakgtayayan tlakg natalakatsuwiniya Jehová. Kalikgalhtawakga Biblia chu kalakputsanani tuku wan, chu kalimaxtu kilhtamaku nalilakpuwana tuku likgalhtawakgapat. Chuntiya katlawa oración chu chuntiya kaskujni Jehová. Komo chuna natlawaya, tlan nalipawana pi Jehová namakgtayayan natayaniya taʼakglhuwit nema kgalhiya la uku chu nema namin alistalh.