1. ¿Tuku xlakata lu xlakaskinka namatliwakglhaw pi lu tlan natalalinaw Jehová?

XTATAYANANIN Jehová kgalhiyaw tuku lu xtapalh. Wa pi tlan talalinaw Jehová. Lu xlakaskinka pi lu namatliwakglhaw la talalinaw. ¿Tuku xlakata? Xlakata xkakilhtamaku Satanás chu kintalakgalhinkan max namaxlajwani.

2. 1) ¿Tuku kilhchanima wi tiku talalinkan? (Kaʼakxilhti nota.) 2) ¿Tuku natlawayaw xlakata tlakg natatliwakglha la talalinaw Jehová?

² ¿Xlikana miʼamigo liʼakxilha Jehová? ¿Tlakg matliwakglhputuna la talalipina? Santiago 4:8 kinkawaniyan la natlawayaw: «Wa Dios nti nkatalakatsuwinitit, na nakatalakatsuwiniyan». Chuna la akxilhaw xlakata wix chu Jehová tlan amigo nalitaxtuyatit, wi tuku militlawatkan. * (Kalikgalhtawakga nota.) Komo wix natalakatsuwiniya Jehová, xla natalakatsuwiniyan. Chuna la natalakatsuwiniya  Jehová, tlakg natatliwakglha la talalipina chu xlikana miʼamigo nawan. Chu namakgkatsiya chuna la Jesús akxni wa pi tiku xmalakgachanit xlikana lama. Chu na wa: «Klakgapasa nkit» (Juan 7:28, 29). Kaʼakxilhwi tuku natlawayaw xlakata natalakatsuwiniyaw Jehová.

3. ¿La tlan natachuwinanaw Jehová?

³ Komo talakatsuwiniputunaw Jehová, lu xlakaskinka natachuwinanaw. ¿La natlawayaw? Kawiliw akgtum liʼakxilhtit. Komo chatiy amigos tiku makgat wilakgo latachuwinamputun, ¿tuku tlan natlawakgo? Makglhuwa nalatsokgnani chu nalatachuwinan kteléfono. Nachuna la xlakata la talalinaw Jehová. ¿La tachuwinanaw? Akxni makglhuwa tlawaniyaw oración (kalikgalhtawakga Salmo 142:2). Chu Jehová kinkalitachuwinanan Biblia. Xlakata nakgaxmataw tuku kinkawaniyan, talakaskin makglhuwa nalikgalhtawakgayaw Biblia chu nalilakpuwanaw tuku likgalhtawakgayaw (kalikgalhtawakga Isaías 30:20, 21). Chuna la naʼakxilhaw kʼuma artículo, komo chuna natachuwinanaw Jehová, xlikana natalalinaw.

4, 5. 1) ¿La limaklakaskin Jehová Biblia xlakata nakinkatachuwinanan? 2) Kalimaklakaskinti akgtum liʼakxilhtit xlakata nalichuwinana.

⁴ Katsiyaw pi tamakatsin nema min kBiblia tlan nakamakgtaya putum latamanin. Pero Biblia na tlan nakinkamakgtayayan kinchatunukan natalakatsuwiniyaw Dios. Wa xlakata, kuenta kilitlawatkan tuku makgkatsiyaw akxni likgalhtawakgayaw chu lakputsananiyaw tuku wan Biblia. Na kililakpuwanatkan la nalilatamayaw tuku likgalhtawakgayaw. Akxni chuna tlawayaw, xtachuna la Jehová kinkatalitachuwinaman Biblia. Chu akxni akxilhaw pi kinkamakgtayayan, tlakg tatliwakglha la talalinaw (Heb. 4:12; Sant. 1:23-25).

⁵ Kawiliw akgtum liʼakxilhtit. Anta kMateo 6:19, 20, Hua Xasasti Talaccaxlan, 1999, Jesús wa: «Ni [...] katuwa kamamakgstokgwilitit wantu xtapalh tumin [...] unu katiyatna». Uma wamputun pi wa Jehová tiku tlakg xlakaskinka xliwanat kkilatamatkan. ¿Tuku makgkatsiyaw akxni likgalhtawakgayaw uma  texto? Komo chuna tlawamaw namakgkatsiyaw pi makgapaxuwayaw Jehová. Pero, ¿chu komo naʼakxilhaw pi talakaskin nalakgpaliyaw kilatamatkan chu tlakg naskujnaniyaw Dios? Naʼakgatekgsaw pi Jehová kinkamakgtayaman xlakata naʼakxilhaw tuku kilitlawatkan xlakata tlakg natalakatsuwiniyaw.

6, 7. 1) Akxni likgalhtawakgayaw Biblia, ¿tuku tlawa xlakata la talalinaw Jehová? 2) Akxni likgalhtawakgayaw Biblia, ¿tuku tlakg xlakaskinka naʼakxilhaw?

⁶ Xlikana pi akxni likgalhtawakgayaw Biblia akxilhaw tuku kililakgpalitkan kkilatamatkan xlakata tlakg tlan naskujniyaw Dios. Pero na akxilhaw lakswan xtayat chu tuku tlawa nema limasiya pi paxkinan. Akxni katsiyaw putum uma, tlakg paxkiyaw. Chu xla, na tlakg kinkapaxkiyan. Chu uma tlawa pi tlakg natalalinaw (kalikgalhtawakga 1 Corintios 8:3).

⁷ Komo talakatsuwiniputunaw Jehová, xlakaskinka nalikgalhtawakgayaw Biblia chuna la xlilat. Jesús wa pi xlakata tlan nalatamayaw putum kilhtamaku talakaskin liwana nalakgapasaw Jehová (Juan 17:3). Xlikana pi kBiblia lhuwa tuku tlan nakatsiniyaw nema lu lilakgatit. Pero akxni nalikgalhtawakgayaw Biblia ni wa tlakg xlakaskinka naʼakxilhaw, wata nalikgalhtawakgayaw xlakata liwana lakgapasputunaw Jehová (kalikgalhtawakga Éxodo 33:13; Sal. 25:4).

8. 1) ¿Akxni likgalhtawakgayaw tuku Jehová tlawanilh mapakgsina Azarías, ¿tuku max nalakpuwankgo makgapitsi? 2) Xlakata liwana lakgapasaw Jehová, ¿tuku liwana katsiyaw?

⁸ Komo xlikana kiʼamigokan akxilhaw Jehová, ni nalitaʼakglhuwiyaw akxni Biblia ni wan tuku xlakata Dios wi tuku chuna tlawalh. Akgtum liʼakxilhtit, kalilakpuwaw tuku talichuwinan xlakata Azarías, chatum mapakgsina xalak Judá. Akxni xmapakgsinama, kachikin xkakninani nixaxlikana dioses. Pero mapakgsina ni chuna tlawalh, xlakata Biblia wan pi «chuntiya tlawalh tuku xaʼakgstitum kxlakatin Jehová» (2 Rey. 15:1-5). Maski chuna, Jehová tlawalh pi xkgalhilh akgtum snun tajatat. ¿Tuku xlakata? Kʼuma versículos ni lichuwinankan tuku xlakata. Makgapitsi max nalakpuwankgo pi Jehová ni tlawalh tuku xaʼakgstitum chu ni xlilat tuku tlawanilh. Pero akinin liwana lakgapasaw Jehová chu katsiyaw pi xla putum kilhtamaku tlawa tuku xaʼakgstitum (Jer. 30:11). Wa xlakata, maski ni katsiyaw tuku xlakata Dios makgatatatlalh uma mapakgsina, liwana katsiyaw pi tlawalh tuku xaʼakgstitum.

9. ¿Tuku xlakata Jehová tlawalh pi mapakgsina Azarías xtatatlalh?

⁹ Kʼatanu libro xalak Biblia tlakg talichuwinan xlakata mapakgsina Azarías, tiku na lilakgapaskan Uzías (2 Rey. 15:7, 32). Libro xla 2 Crónicas 26:3-5, 16-21, wan pi «tlawalh tuku xaʼakgstitum kxlakatin Jehová». Pero na lichuwinan pi alistalh lanka tsukuka makgkatsikan. Akgtum kilhtamaku xtlawaputun tuku kajwatiya sacerdotes xlitlawatkan xwanit. Biblia wan pi 81 sacerdotes wanikgolh pi nitlan tuku xtlawama chu malakgachokgoputunkgolh. Pero mapakgsina lu lanka xmakgkatsikan, kasitsinilh chu ni kakgaxmatnilh. Xlikana pi uma kinkamakgtayayan nakatsiyaw tuku xlakata Jehová tlawalh pi xtatatlalh.

10. 1) ¿Tuku xlakata ni talakaskin nakatsiyaw putum tuku xlakata Jehová wi tuku tlawa? 2) ¿Tuku nakinkamakgtayayan tlan nalipawanaw pi Dios putum kilhtamaku tlawa tuku xlilat?

 ¹⁰ Tuku lichuwinaw wi tuku lu xlakaskinka kinkamasiyaniyan. Pulakatunu tuku talichuwinan xlakata mapakgsina Azarías, kinkamakgtayayan nakatsiyaw tuku xlakata Dios tlawalh pi xtatatlalh. Pero Biblia lichuwinan lhuwa tuku lanit chu ni lichuwinan pulakatunu tuku xlakata chuna lalh. Akxni chuna la, ¿tlan nalakpuwanaw pi Jehová ni tlawalh tuku xaʼakgstitum? O ¿nalipawanaw pi Dios putum kilhtamaku tlawa tuku xaʼakgstitum? (Deut. 32:4.) Biblia lichuwinan lhuwa tuku nakinkamakgtayayan liwana nalakgapasaw Jehová chu nalipawanaw. Komo lakgapasaw chu paxkiyaw, ni katitalakaskilh putum nakatsiputunaw tuku xlakata wi tuku tlawa. Chu, ¿tuku nakinkamakgtayayan tlan nalipawanaw pi Dios putum kilhtamaku tlawa tuku xlilat? Akxni nalikgalhtawakgayaw Biblia. Chuna tlan xlikana xʼamigo Jehová nawanaw (Sal. 77:12, 13).

11-13. ¿Tuku xlakata wanaw pi Dios kgaxmata akxni tlawaniyaw oración? (Kaʼakxilhti xapulana dibujo.)

¹¹ Akxni tlawayaw oración, malankiyaw Dios, paxtikatsiniyaw chu skiniyaw tamakgtay. Uma tlawa pi tlakg natalakatsuwiniyaw (Sal. 32:8). Pero komo xlikana xʼamigo Jehová litaxtuputunaw, liwana kilikanajlatkan pi kinkakgaxmatniyan akxni tlawaniyaw oración.

¹² Makgapitsi wankgo pi Dios ni kgaxmata  oraciones. Wankgo pi oración kajwatiya kinkamakgtayayan xlakata tlakg tlan namakgkatsiyaw. Lakpuwankgo pi oración kinkamakgtayayan nalakpuwanaw kkintaʼakglhuwitkan chu natekgsaw la kiakstukan nalakkaxtlawayaw. Xlikana pi oración tlan kinkamamakgkatsiniyan. Pero akxni tlawaniyaw oración Jehová, xlikana kinkakgaxmatniyan. ¿Tuku xlakata chuna wanaw?

¹³ Kalilakpuwaw Jesús. Akxni nina xmin kKatiyatni, akxilhli la Jehová xkakgalhti xʼoraciones latamanin. Chu akxni xlama kKatiyatni, Jesús tlawalh oración chu wanilh Dios putum tuku xlakpuwan chu tuku xmakgkatsi. Akgtum kilhtamaku tantaskaka tlawalh oración (Luc. 6:12; 22:40-46). Nachuna, xla kamasiyanilh kstalaninanin natlawakgo oración. Komo xkatsilh pi Jehová ni kgaxmata oraciones ¿xtlawalh oración Jesús? Ni xtlawalh. Xla liwana xkatsi pi Dios kgaxmata oraciones. Wa xlakata wanilh xTlat: «Tata, paxkatsinilh kmaxkiyan mpi kinkgaxpatninita. Xakkatsiy mpi xaliankgalhin kinkgaxpatniya» (Juan 11:41, 42). Akinin na liwana katsiyaw pi Jehová kinkakgaxmatniyan akxni tlawaniyaw oración (Sal. 65:2).

14, 15. 1) ¿Tuku xlakata lakatanks kiliwanitkan Jehová tuku maklakaskinaw akxni tlawaniyaw oración? 2) ¿La makgtayalh oración chatum tala puskat?

¹⁴ Max min kilhtamaku ni akxilhaw la Jehová kinkakgalhtiyan kioracioneskan. Pero komo lakatanks nawaniyaw tuku maklakaskinaw, naʼakxilhaw la nakinkakgalhtiyan kioracionkan. Chuna tlakg tlan kiʼamigokan nawan. Komo xliputum kinakujkan nawaniyaw tuku lilipuwanaw, xla nakinkatalakatsuwiniyan.

 ¹⁵ Kalichuwinaw xliʼakxilhtit chatum tala tiku wanikan Carmen. * (Kaʼakxilhti nota.) Xla lichuwinan pi akxni nina xtajubilarli xʼan lichuwinan Dios, pero ni xlakgati. Akxni tajubilarlilh, chatum kgolotsin makgpuwantinilh xlakata precursora regular xlitaxtulh. Carmen wan: «Klakpuwa pi naktlawa precursorado chu nachuna chali chali ktsukulh kskini Jehová pi xmakgtayalh nalakgati naklichuwinan xTachuwin». ¿Kgaxmatnilh Dios xʼoraciones? La uku akgtututa kata lata Carmen liskujma precursora regular. Chu wan pi kilhtamaku nema limaxtu xlakata nalichuwinan Dios chu xtamakgtay natalan, tlakg katsininit la nalichuwinan Dios. ¡La uku lu lakgati lichuwinan Dios! Pero wan pi tuku tlakg xlakaskinka wa pi la uku tlakg tlan talalin Jehová nixawa xapulana. Chuna la akxilhaw, oración makgtayalh uma tala, xlikana xʼamiga Jehová nawan.

16, 17. 1) ¿Tuku kilitlawatkan xlakata chali chali tlakg tlan xʼamigo Dios nawanaw? 2) ¿Tuku naʼakxilhaw kʼartículo nema aku mima?

¹⁶ Tlan chuntiya natalakatsuwiniyaw Jehová putum kilhtamaku. Wa xlakata, chuntiya kalikgalhtawakgaw Biblia xlakata nakgaxmatniyaw chu chuntiya kalimaklakaskiw oración xlakata natachuwinanaw. Komo chuna natlawayaw, tlakg tlan xʼamigo Dios nalitaxtuyaw. Chu xlakata xtamakgtay, tlan natayaniyaw taʼakglhuwit.

¹⁷ Xlikana, maski makglhuwa natlawaniyaw oración Jehová, max chuntiya nakgalhiyaw taʼakglhuwit. Chu uma max natlawa pi nialh nalipawanaw Jehová. Max nalakpuwanaw pi xla ni kgaxmata kioracionkan chu akstu nakinkakgalhskinkanan komo chuntiya xʼamigo litaxtuyaw. Komo chuna makgkatsiyaw, ¿tuku tlan natlawayaw? Naʼakxilhaw kʼartículo nema aku mima.