Lhuwata kata, kilikgalhtawakgakan wankgonit pi akxni Biblia wan Gog xalak Magog, kilhchanima Satanás akxni xtamakxtukanita kʼakgapun. ¿Tuku xlakata chuna xtalichuwinan kkilikgalhtawakgakan? Xlakata libro xla Apocalipsis, o Revelación wan pi Satanás nakatalachipa xkachikin Jehová nema wi xlikalanka katiyatni (Apoc. 12:1-17). Wa xlakata xlakpuwanaw pi Gog xkilhchanima atanu xtukuwani Satanás.

Pero natalakgpali tuku xtaʼakgatekgsa. Kaʼakxilhwi tuku xlakata. Pulana, akxni Biblia wan pi namasputukan Gog, wan pi Jehová natlawa pi Gog nawakgo animales nema kgoskgo chu wakgo liway chu animales xalak luku (Ezeq. 39:4). Chu na wan pi Jehová namaxki «Gog akgtum putaknun kʼIsrael» (Ezeq. 39:11). Pero Satanás chatum espíritu, wa xlakata animales nila wakgo chu na nila maknukan kKatiyatni. Biblia na wan pi Satanás nalakgachinukan 1,000 kata niku xapulhman. Wa xlakata nila katiwalh tantum animal chu nipara katimaknuka (Apoc. 20:1, 2).

Xlipulaktiy, Biblia wan pi akxni nakgalhsputa 1,000 kata, Satanás nataxtu niku xakapulhman chu «naʼakgskgawikgo ntachixkuwitat, wa nti wilakgo lantla xlikatlanka nkatuxawat. Wa cha Gog, chu Magog, lakimpi namamakxtumikgoy» xlakata natlawakgo guerra (Apoc. 20:8). Komo Satanás wa Gog xlitaxtulh, uma xwamputulh pi xakstu xʼakgskgawika. Chu nila chuna nala. Wa xlakata akxni libros xla Ezequiel chu Apocalipsis lichuwinankgo Gog, ni wa kilhchanima Satanás.

Komo ni wa, ¿tiku Gog xalak Magog? Xlakata nakatsiyaw, nalikgalhtawakgayaw tuku wan Biblia chu naputsayaw tiku natlawaniputun tuku nitlan xkachikin Dios. Biblia lichuwinan pi Gog xalak Magog, «mapakgsina xalak norte», chu nachuna «reyes xala kkatiyatna», namasputuputunkgo xkachikin Dios (Ezeq. 38:2, 10-13; Dan. 11:40, 44, 45; Apoc. 17:14; 19:19). Takgatekgsa pi uma ni pulaklhuwa talachipat, watiya talachipat kilhchanima, kaj tanu tanu tukuwani kgalhikgo. ¿Tuku xlakata chuna wanaw? Xlakata Biblia wan pi putum kachikin nakatlawaniputunkgo tuku nitlan xkachikin Dios, akxni chuna natlawakgo nalitsuku Armagedón (Apoc. 16:14, 16).

Akxni tamalakxtumiyaw putum umakgolh versículos nema lichuwinankgo akxni wan pi xaʼawatiya nakatlawaniputunkan tuku nitlan xkachikin Dios, akgatekgsaw pi Gog xalak Magog ni Satanás.  Gog xalak Magog litaxtukgo lhuwa kachikinin. ¿Wa «mapakgsina xalak norte» tiku nakapulalin umakgolh? Ni liwana katsiyaw. Pero max wa, xlakata Jehová wani Gog: «Nataxtuyapi niku xwila, niku tlakg makgat anta knorte, wix chu lhuwa kachikinin nataminkgoyan, xputumkan kgewilakgo kawayu, akgtum lanka congregación, asta lhuwa soldados» (Ezeq. 38:6, 15).

Palakachuwina Daniel na xtachuna tuku lichuwinalh xlakata mapakgsina xalak norte akxni wa: «Naʼanan tamakatsinin nema namakgasitsi, lata niku taxtuyacha chichini chu lata knorte, chu xlikana lu sitsinit nataxtuyacha xlakata namasputunan chu lhuwa tiku nakamasputu. Chu nawili xtiendas xtachuna la palacios xlakgstipan niku wi lanka pupunu chu xasanto sipi nema Lilakgatit; chu namasputukan, chu niti katimakgtayalh» (Dan. 11:44, 45). Uma tuku wa Daniel na tsinu xtachuna tuku lichuwinan Ezequiel xlakata Gog xalak Magog (Ezeq. 38:8-12, 16).

¿Tuku nala akxni kxaʼawatiya natlawaniputunkan tuku nitlan xkachikin Jehová? Daniel 12:1 wan: «Chu ama kilhtamaku natayayacha Miguel, xalanka príncipe tiku takaxtawilanit xlakata nakamakgtaya xkamanan minkachikin». Na wampara, «chu xlikana naʼanan talakgaputsit chuna la nikxni xʼananit lata analh lanka kachikin asta amacha kilhtamaku». Uma kilhchanima lanka takatsanajwat. Chu awatiya, wan pi tiku xalak xkachikin Dios nalakgtaxtukgo, putum tiku tatsokgtawilanit xtukuwani klibro. ¿Tuku wamputun Daniel 12:1? Pi Jesucristo wa tiku lata 1914 tayacha, wa tiku natalachipanan, xlakata nakinkamakgtayayan kʼArmagedón. Apocalipsis 19:11-21 na lichuwinan tuku xtachuna natlawa Jesucristo akxni xaʼawatiya natlawaniputunkan tuku nitlan xkachikin Dios.

Pero ¿tiku Gog chu Magog nema talichuwinan kʼApocalipsis 20:8? Wa putum tiku nalakatayakgo xtamapakgsin Jehová chu natlawaniputunkgo tuku nitlan xkachikin akxni nakaliʼakxilhnikan xtakanajkan klikgalhsputat 1,000 kata. Umakgolh latamanin ni katiʼakxilhputunkgolh xkachikin Dios chuna la tlawa Gog xalak Magog. Pero chuna la Dios namalakgsputu Gog xalak Magog kʼArmagedón, na nakamalakgsputu umakgolh latamanin (Apoc. 19:20, 21; 20:9). Wa xlakata Biblia limapakuwi Gog chu Magog, putum tiku nalakatayakgo xtamapakgsin kxkgalhsputat 1,000 kata.

Xtatayananin Jehová lu xlakaskinka akxilhaw nalikgalhtawakgayaw Biblia. Wa xlakata lu skgalalh wilaw xlakata nialh makgas naʼakgatekgsaw tiku «mapakgsina xalak norte». Pero maski ni katsiyaw tiku nakapulalin latamanin xlakata nakinkatlawaniputunkgoyan tuku nitlan, pulaktiy tuku liwana katsiyaw. Xapulana wa pi Gog xalak Magog chu xsoldados nakatlajakan chu nakamasputukan. Chu xlipulaktiy, wa pi kimapakgsinakan Jesucristo nakinkalakgmaxtuyan chu namasta talakaskin nalatamayaw kxasasti kakilhtamaku niku putum tlan natawila (Apoc. 7:14-17).