1, 2. 1) ¿Niku xkakninanikgo Dios makgasa? 2) ¿Tuku xlakpuwan Jesús xlakata templo xalak Jerusalén? 3) ¿Tuku naʼakxilhaw kʼuma artículo?

XLAKSKUJNIN Jehová putum kilhtamaku kgalhikgonit niku kakninanikgo Dios. Akgtum liʼakxilhtit, akxni Abel max wi tuku xmakamaxki Jehová xwili kʼakgtum pumakamastan (Gén. 4:3, 4). Noé, Abrahán, Isaac, Jacob chu Moisés na tlawakgolh pumakamastan (Gén. 8:20; 12:7; 26:25; 35:1; Éx. 17:15). Nachuna, Jehová alistalh kawanilh israelitas pi xtlawakgolh akgtum tabernáculo xlakata xkakninanikgolh (Éx. 25:8). Chu alistalh kawanika pi xtlawakgolh templo (1 Rey. 8:27, 29). Akxni israelitas taxtukgolh kBabilonia, tsukukgolh tamakxtumikgo ksinagogas (Mar. 6:2; Juan 18:20; Hech. 15:21). Xapulana kstalaninanin Cristo kchiki xtamakxtumikgo (Hech. 12:12; 1 Cor. 16:19). La uku tamakxtumiyaw klhuwa miles Pukgalhtawakga xla xtatayananin Jehová xlikalanka katiyatni.

² Jesús lu xmaxki kakni templo xla Jerusalén. Akxni kstalaninanin akxilhkgolh la xpaxki templo, lakapastakkgolh tuku xwan salmo: «Ixliwakg kinaku klakgkatsan» minchik (Sal. 69:9; Juan 2:17). Xlikana pi Pukgalhtawakga ni «xchik Jehová», chuna  la xwanit templo (2 Crón. 5:13; 33:4). Pero xlakata anta kakninaniyaw Jehová kilimaxkitkan kakni. Kʼuma artículo naʼakxilhaw tuku wan Biblia xlakata la nalikatsiyaw, la nakuentajtlawayaw chu la namakgtayananaw xlakata tlakg natatlawa Pukgalhtawakga. * (Kalikgalhtawakga nota.)

3-5. 1) ¿Tuku akgtum Pukgalhtawakga? 2) ¿La kiliʼakxilhatkan tamakxtumit?

³ Pukgalhtawakga anta tlakg xlakaskinka niku kakninaniyaw Jehová. Akinin akxilhaw pi Jehová kinkamaskiwiyan tamakxtumit. ¿Tuku xlakata? Xlakata kinkamakgtayayan tlakg tlan natalalinaw. Nachuna, xkachikin Jehová limaklakaskin tamakxtumit xlakata kinkalimatliwakglhan chu kinkalimasiyaniyan tuku kilikatsitkan. Wantuku kinkamasiyanikanan ktamakxtumit xtachuna taway nema Jehová chu Jesús kinkamaxkikgoyan akgatunu semana. Lu lanka talakgalhaman pi kinkawanikgoyan nawayanaw «kxpuway» o kxmesa (1 Cor. 10:21).

⁴ Jehová kinkawaniyan kBiblia pi kiliʼanatkan ktamakxtumit xlakata nakakninaniyaw chu nalamatliwakglhaw (kalikgalhtawakga Hebreos 10:24, 25). Xlakata kakninaniyaw Jehová, ni makgatsankgaputunaw tamakxtumit, kajwatiya ni anaw akxni xlikana nila. Limasiyayaw pi paxtikatsiniyaw tamakxtumit akxni pulana likgalhtawakgayaw tuku nalichuwinankan chu akxni mastayaw kintakgalhtinkan (Sal. 22:22).

⁵ Komo xaʼakgstitum nalikatsiyaw ktamakxtumit chu kuentajtlawayaw, nalimasiyayaw pi maxkiyaw kakni Dios. Lakaskinaw pi xlakata xaʼakgstitum likatsiyaw tlan nalichuwinankan xtukuwani Jehová nema wi kmakgapitsi letreros xla Pukgalhtawakga (natekgsa tuku nawatiya lichuwinan 1 Reyes 8:17).

6. ¿Tuku wankgonit makgapitsi latamanin akxni lakgapaxialhnankgo kimPukgalhtawakgakan? (Kaʼakxilhti xapulana dibujo.)

⁶ Latamanin akxilhkgo pi lu maxkiyaw kakni kimPukgalhtawakgakan. Akgtum liʼakxilhtit, chatum chixku xalak Turquía wa pi lu kaks malakawanilh pi Pukgalhtawakga lu kaswan xwi chu liwana xtamakakinit, na kaks malakawanilh la tlan xlhakganankgonit chu lu xpaxuwakgo akxni xmakgachipakgo. Uma chixku tsukulh an kputum tamakxtumit chu ni lhuwa kilhtamaku titaxtulh tamunulh. Kʼakgtum kachikin xalak Indonesia tlawaka akgtum Pukgalhtawakga. Natalan kawanikgolh xtalakatsukjkan, mapakgsina xalak kachikin chu makgapitsi mapakgsinanin xʼankgolh akxilhkgo. Xmapakgsina kachikin lu kaks malakawanilh Pukgalhtawakga xlakata lu xatlan la xtatlawanit chu lu stlan la xwi jardín. Xla wa pi xlakata stlan kawan kpukgalhtawakga limasiya pi tlawayaw tuku lichuwinantapuliyaw.

7, 8. ¿La limasiyayaw kPukgalhtawakga pi maxkiyaw kakni Jehová?

⁷ Wa Jehová tiku kinkawaniyan pi naʼanaw ktamakxtumit. Chu lu xlakaskinka akxilha la lhakgananaw chu la likatsiyaw akxni anta wilaw. Wa xlakata ni namalakatsaliyaw. Na ni nawanaw la nalhakganankan chu ni namalakatsaliyaw tuku nalakaskinaw katlawaka. Pero ni naʼanaw chuna la tawilayaw kkinchikkan. Jehová lakaskin pi akinin chu tiku kinkalakgapaxialhnankgoyan tlan namakgkatsiyaw kpukgalhtawakga. Wa xlakata ni anaw la natasiya pi kaj akglakgwa lhakgananitaw o ni takaxtayanitaw.  Na ni malakgachayaw mensajes chu ni katachuwinantawilayaw amakgapitsin, na nitu nawayaw o nakgotnanaw ktamakxtumit. Nachuna natlatni kamasiyanikgo kamanan pi ni nakgosnankgo chu ni nakgamankgo kpukgalhtawakga (Ecl. 3:1).

⁸ Anaw kpukgalhtawakga xlakata nakakninaniyaw Jehová chu nakatsiniyaw la xtayat. Wa xlakata ni tlawayaw negocios kxpulakni pukgalhtawakga (Natekgsa tuku nawa lichuwinan kNehemías 13:7, 8). Kalakapastakwi akxni Jesús akxilhli makgapitsi latamanin tiku kstanamakgolh ktemplo, lu sitsilh chu katlakgaxtulh (Juan 2:13-17).

9, 10. 1) ¿Tuku tlawakgo xtatayananin Jehová xlakata tlakg natatlawa pukgalhtawakga? 2) ¿La kitaxtunit xlakata lu tlan skujkgo natalan? 3) ¿La kamakgtayanit xkachikin Jehová congregaciones tiku ni lu kgalhikgo tumin xlakata xpukgalhtawakgakan?

⁹ Lhuwa natalan lu lhuwa skujkgo xlakata tlawakgo pukgalhtawakga kxliputum katiyatni. Xlakan tlawakgo planos, tlawakgo pukgalhtawakga chu na kaxtlawakgo chu ni matajenankgo. Wa xlakata akgkukitsis kata nema titaxtunit tatlawanit akgkitsis Pukgalhtawakga akgatunu kilhtamaku. Chu xliputum tatlawanit liwaka 28,000 Pukgalhtawakga.

¹⁰ Biblia wan pi tiku lhuwa tuku kgalhikgo kamakgtayakgolh tiku ni lu kgalhikgo (kalikgalhtawakga 2 Corintios 8:13-15). Wa xlakata tiku pulalimakgolh xTatayananin Jehová limaklakaskinkgo natalan tiku ni matajenankgo chu nachuna maklakaskinkgo tumin nema kimputumkan maskiwinanaw xlakata tlakg natatlawa pukgalhtawakga niku natalakaskin. Wa xlakata, lhuwa pukgalhtawakga tlawakanit xpalakatakan natalan tiku ni lu kgalhikgo tumin.

11. 1) ¿Tuku wankgo natalan xlakata xasasti xpukgalhtawakgakan? 2) ¿La makgkatsiya akxni lilakpuwana umakgolh kinatalankan?

¹¹ Anta kCosta Rica kaj akgtsayan kilhtamaku litatlawalh akgtum Pukgalhtawakga. Natalan wankgo pi xlakata kaj lakapala tatlawalh la akgtum tamanaxni. Paxtikatsinikgo Jehová, xkachikin chu nachuna natalan. Lu paxtikatsinikgo chu lu paxuwakgo, xlakata uma tuku Jehová kamaskiwilh. Kimputumkan lipaxuwayaw akxni akxilhaw pi paxtikatsinikgo Jehová tuku tlawa xpalakatakan. Chu lu lipaxuwayaw pi kinatalankan xlikalanka katiyatni tlan nakgalhikgo xPukgalhtawakgakan xlakata natamakxtumikgo. Liwana tasiya pi Jehová kasikulunatlawama la tatlawama lhuwa Pukgalhtawakga. Akxni tatlawa xasasti Pukgalhtawakga lhuwa latamanin tsukukgo ankgo xlakata nakatsinikgo xlakata Jehová (Sal. 127:1).

12. ¿La namakgtayananaw xlakata tlakg natatlawa Pukgalhtawakga?

¹² ¿La namakgtayananaw xlakata tlakg natatlawa Pukgalhtawakga? Tlan naʼanaw  makgtlawayaw. Chu kimputumkan tlan namastayaw tumin xlakata tlan nakatlawakan. Komo putum natlawayaw tuku natalakaskin xlakata tlan namakgtayananaw tlakg napaxuwayaw. Chu tuku tlakg xlakaskinka, namaxkiyaw kakni Jehová Dios. Nachuna tlawaputunaw la tlawakgolh xlakskujnin Dios xala makgasa. Xlakan xatapaxuwan mastakgolh tumin xlakata xtatlawalh niku tlan xkakninanika Jehová (Éx. 25:2; 2 Cor. 9:7).

13, 14. Chuna la wan Biblia, ¿tuku xlakata kaswan xlitawilat chu ni akgawani natawila kkimpukgalhtawakgakan?

¹³ Jehová xasanto chu nitu lixkajwanan chu ni lakgati akglakgwa natawilananan. Wa xlakata talakaskin pi kaswan katawilalh kimPukgalhtawakgakan chu ni akgawani natawila (kalikgalhtawakga 1 Corintios 14:33, 40). Xlakata santos nawanaw chuna la Jehová, talakaskin pi kintapuwankan chu tuku natlawayaw xaʼakgstitum xliwanat chu nachuna la kakninaniyaw. Chu paxnitaw nawan akxni naʼanaw ktamakxtumit (Apocalipsis [Revelación] 19:8).

¹⁴ Komo kaswan natawila kimpukgalhtawakgakan ni katimaxanaw akxni nakawaniyaw amakgapitsin kaʼankgolh. Chu xlakan naʼakxilhkgo pi xlikana latamaputunaw kxasasti kakilhtamaku niku nitu natalixkajwanan. Na naʼakxilhkgo pi xasanto kiDioskan tiku natlawa pi akgtum paraíso nawan katiyatni (Is. 6:1-3; Apoc. 11:18).

15, 16. 1) ¿Tuku xlakata minkilhtamaku tuwa makgkatsiyaw kaswan natawila kimPukgalhtawakgakan? 2) ¿Tuku xlakata kaswan kiliwilitkan kimPukgalhtawakgakan? 3) ¿La lakkaxwilikanit natakaxaka kkimPukgalhtawakgakan? 4) ¿Tuku namakgtlawayaw kimputumkan?

¹⁵ Min kilhtamaku tuwa makgkatsiyaw kaswan nawiliyaw kimpukgalhtawakgakan. ¿Tuku xlakata? Xlakata tanu tanu la akxilhaw akxni kaswanwi. Makgapitsi lamakgolh niku lhuwa anan pokgxni chu putlun. Chu makgapitsi lamakgolh niku ni lu anan chuchut o tuku talakaskin xlakata nalikaxakanankan. Chu xlakata la kinkamakgastakkan na talakgpali la akxilhaw tuku kaswan. Pero  maski tanu tanu niku wilaw chu tanu tuku lakpuwankgo kintalakatsujkan xlakata uma. Akinin kaswan kilikgalhitkan kimPukgalhtawakgakan chu ni akgawani xlitawilat. ¿Tuku xlakata? Xlakata anta kakninaniyaw Jehová (Deut. 23:14).

¹⁶ Komo lakaskinaw pi kimpukgalhtawakgakan kaswan natawila, natalakaskin akgtum programa. Wa lakgkgolotsin xalak congregación tiku lakkaxwilikgo programa chu akxilhkgo makgapitsi tuku wi kpukgalhtawakga. Nachuna lakkaxwilikgo natalan xlakata liwana natakaxaka. Nachuna makgapitsi tuku wi kpukgalhtawakga kaj lakgachunin natalakaskin naxakakan.

17, 18. 1) ¿Tuku kinkamasiyanikgoyan xlakskujnin Dios xala makgasa? 2) ¿Tuku xlakata putum kilhtamaku tlan xlitawilat kimpukgalhtawakgakan?

¹⁷ Xlakskujnin Jehová xala makgasa xkuentajtlawakgo templo xlakata tlan xtawilalh. Akgtum liʼakxilhtit, mapakgsina Jehoás mapakgsinalh pi xlimaklakaskinka tumin nema xmaskiwinankanit xlakata xlikaxtlawaka templo (2 Rey. 12:4, 5). Titaxtulh 200 kata, mapakgsina Josías na limaklakaskilh tumin nema xmaskiwinankanit xlakata xlikaxtlawaka templo (kalikgalhtawakga 2 Crónicas 34:9-11). ¿Tuku kinkamasiyaniyan uma? Pi akinin na kilikuentajtlawatkan pi putum kilhtamaku tlan natawila kimpukgalhtawakgakan chu nakaxtlawayaw tuku natalakaskin.

¹⁸ Kmakgapitsi sucursales katsikanit pi lhuwa Pukgalhtawakga ni liwana kakuentajtlawakanit kxpulakni chu kxmakni. Minkilhtamaku chuna la xlakata ni lhuwa anan tiku tlan nakaxtlawakgo chu min kilhtamaku xlakata ni kgalhikgo tumin xlakata nalikaxtlawakgo. Pero komo ni nakaxtlawayaw kimpukgalhtawakgakan tsinu tsinu nialh tlan katiwa. Chu latamanin tiku naʼakxilhkgo nitlan nalakpuwankgo kimpalakatakan. Wa xlakata fuerza kilitlawatkan pi putum tlan natawila kimpukgalhtawakgakan. Chuna namalankiyaw Jehová chu ni paxkat natlawayaw tumin nema maskiwinankgo kinatalankan.

19. ¿Tuku natlawaya xlakata namaxkiya kakni mimpukgalhtawakga?

¹⁹ Textos nema akxilhwi kʼuma artículo kinkamakgtayayan namaxkiyaw kakni kimPukgalhtawakgakan. Kalakapastakwi pi putum kimpukgalhtawakgakan xla Jehová, niti xla chu nipara xla akgtum congregación. Komo maxkiyaw kakni Jehová na maxkiyaw kakni kintamakxtumitkan chu kimpukgalhtawakgakan. Na xatapaxuwan namastayaw tumin xlakata natatlawa pukgalhtawakga chu lu naliskujaw xlakata kaswan natawila chu putum tlan natawila. Wa xlakata, nachuna katlawaw la tlawalh Jesús chu kamaxkiw kakni niku kakninaniyaw Jehová (Juan 2:17).