KJUNIO kata 1970 xakwi khospital xalak Pensilvania (Estados Unidos). Akxni 20 kata xakkgalhi. Soldado xakwanit chu xkimpasanit akgtum lu snun tajatat. Chatum enfermero itatna hora xʼakxilhma kimpresión. Xla ni lhuwa kata xkimpulani, chu kakxilhli pi lu xlakgaputsa xlakata kimpresión chuntiya xtaktama. Wa xlakata kkgalhskilh: «Nikxni akxilhnita akxni wi tiku niy?». Lakasnapapwanalh chu kiwanilh: «Nikxni». Xtasiya pi xakama niy, pero klakgtaxtulh. ¿Tlakg katsiputunatit xlakata kilatamat?

Kjunio kkata 1969 kalh kʼguerra kVietnam. Akxni kchalh kaj akgtum semana kimaxkika xlakata xaklismanilh lhkakna chu xlakata anta xtalakgpali hora. Xaklakgati kamakgtaya tiku xtatatlakgo, tiku xkatalakanit, chu cirujano xakwamputun. Wa xlakata xmakgtayana klitaxtulh niku xtlawakan operaciones. Chuna la kkawanin, anta niku xakskujma lu snun ktatatlalh.

Kskujli kʼakgtum hospital xla soldados kxdelta kgalhtuchokgo Mekong. Lhuwa helicópteros xliminkgo khospital soldados nema xkatalakanit. Akit lu xakpaxki kinkachikin chu lu xaklakgati kskuja. Wa xlakata xakliskuja xlakata nakkamakgtaya tiku xalak kinkachikin. Anta niku xtlawakan operaciones laklanka cajas xla likan xwankgonit, nema xkgalhikgo aire acondicionado. Chatiy makuchinanin chu chatiy enfermeros xtlawakgo putum tuku kxmakankan xwi. Akit na xakakxilha pi makgapitsi helicópteros xlinkgo xatsitsakga bolsas. Kiwanikgolh pi ni xkamaktikan xlakata xlinkgo soldados tiku xkamakgnikgonit bombas. Wa uma tuku nitlan xlama kʼguerra.

Kkalakgapasli xtatayananin Jehová akxni kgawasaku xakwanit. Xmakgalhtawakgekgo kintse. Nikxni tamunulh, pero akit xaklakgati tuku xmasiyanikan. Makgtum kintutlat chu akit ktitaxtuw kxlakatin akgtum Pukgalhtawakga. Kkgalhskilh  tuku xwanit uma chiki. Kiwanilh pi nipara tsinu xakkatalakatsuwinilh xtatayananin Jehová. Akit lu xaklipawan kintutlat, wa xlakata kuentajtlawanilh chu nikxni kkatachuwinampa xtatayananin Jehová.

Xlakata tuku kakxilhli kVietnam, lu xkimakgalipuwan akxni kkitaspitli kʼguerra. Xaklakpuwan pi niti xʼakgatekgsa tuku anta xlama. Klakapastaka pi latamanin xalak Estados Unidos xtaxtukgo kcalles xlakata xwankgo pi nitlan xʼakxilhkgo xlakata soldados xkamakgnikgo laktsu kamanan tiku nitu xlaklinkgo. Putum uma tlawalh pi nakputsa Dios.

Xlakata xakputsama Dios, ktsukulh kalakgapaxialhnan tanu tanu takanajla. Xakmakgkatsi pi xakpaxki Dios pero ni xaklakgati tuku xakakxilha kʼumakgolh takanajla. Alistalh kkilalh kʼakgtum pukgalhtawakga xla xTatayananin Jehová kDelray Beach (Florida). Domingo xwanit xla febrero kata 1971 akxni kkilalh xapulana tamakxtumit.

Akxni ktanulh kPukgalhtawakga, atsinu xtsankga nakgalhsputa xapulana tamakxtumit. Ktamakgxtakgli ktakgalhtawakga xla revista Makatsinina. Liwana xakakxilha tuku xlama chu tuku xwankan. Ni klakapastaka tuku xlichuwinan artículo xla revista, pero klakapastaka pi laktsu kamanan xputsakgo textos kxBibliajkan. Uma lu kaks kimalakawanilh. Akxni xakamaja, kintalakatsuwinilh chatum tala tiku xkgalhi max 80 kata. Xwanikan Jim Gardner. Kimaxkilh libro La verdad que lleva a vida eterna. Xatapaxuwan kmakglhtinalh chu klakkaxwiliw pi atanu jueves tsisa xakamaw tsukuyaw kgalhtawakgayaw.

Akxni sputli tamakxtumit kalh skuja. Xakskuja kʼakgtum hospital kBoca Ratón (Florida). Xaktsuku skuja 11 katsisni chu xaktaxtu 7 tsisa. Xlakata ama tsisni ni lhuwa tatatlanin chinkgolh, ktsukulh likgalhtawakga libro La verdad. Chatum enfermera kiʼakxilhli pi xaklikgalhtawakgama. Kilakgtalakatsuwilh, tiyalh libro chu lu xsitsinit akxni kinkgalhskilh komo xtatayana Jehová xakwamputun. Kmakglhtilh kilibro chu kwanilh pi maski kajku itat xaklikgalhtawakganit xaklakpuwamaja xTatayana Jehová nakwan.

Xapulana kilhtamaku akxni ktakgalhtawakgalh tala Gardner, kkgalhskilh: «¿Tuku nalikgalhtawakgayaw?». Xla kiwanilh: «Libro nema kmaxkin». Kwanilh pi maktuminika xaklikgalhtawakganita. Pero xla ni sitsilh chu kiwanilh: «Tlan, kaʼakxilhwi xapulana capítulo». Chuna la xakkgalhtawakgatilhamaw nila xakkanajla pi lhuwa tuku ni liwana xakʼakgatekgsnit. Tala xkiskini xakputsatilhalh lhuwa textos kkiBiblia. Xakkatsinima tuku masiya xaxlikana Dios, Jehová. Tama tsisa klikgalhtawakgaw akgtutu capítulos xla libro. Chu akgatunu jueves xaklikgalhtawakgayaw akgtutu capítulos. Lu xaklakgati tuku xakkatsinima. Akgtum lanka talakgalhaman pi uma tala kimakgalhtawakgena litaxtulh, xlakata xatalaksakni xwanit chu xlakgapasnit tala Russell.

 Akxni nina lhuwa semanas xaklikgalhtawakganit Biblia, ktsukulh klichuwinan Dios. Tuwa xakmakgkatsi akxni xakan lichuwinan Dios akgatunu chiki, pero Jim kimakgtayalh ni nakpekuan (Hech. 20:20). Xlakata lu kimakgtayalh, alistalh lu xaklakgati lichuwinan Dios. Klakpuwan pi tlakg xalanka talakgalhaman nema kkgalhi wa pi nakkamasiyani amakgapitsin xlakata Dios. Lu klakgati akxni klakpuwan pi kmakgtayama Dios kʼuma taskujut (1 Cor. 3:9).

Chu nakkawaniyan tuku lu xlakaskinka kakxilha. Wa xlakata akxni ktsukulh paxki Jehová (Apocalipsis [Revelación] 2:4). Uma kimakgtayalh ni nakkgalhi talipuwan xlakata guerra chu lhuwa amakgapitsi taʼakglhuwit (Is. 65:17).

Kkata 1971, nialh kkgalhilh niku tlan xaktamakgxtakgli. Ama kata antiyaku xakwi kchik kinatlatni. Pero kintutlat kiwanilh pi anta nila xtawi chatum xtatayana Jehová. Ni lhuwa tumin xakkgalhi, chu khospital xkixokgonikan xliʼakgatiyun semanas. Atsinu ni putum kintumin xaklitamawanit lhakgat nema xaklilh akxni xakalh lichuwinan Dios, xlakata tlan xlichuwinanka Jehová. Xakmakinit tsinu tumin, pero kMíchigan xwi, kʼestado niku klakachilh. Wa xlakata akglhuwa kilhtamaku kkimputlaw klhtatalh. Xakpaxa chu xaktakilhxwika kbaños nema xwilakgolh kʼgasolineras.

Akxni xaktamakgxtakgmajku kkimputlaw, akgtum kilhtamaku akxni ktaxtulh kkimputaskujut chu kkalh kPukgalhtawakga. Anta xaktamakxtumiyaw xlakata xakaw lichuwinanaw Dios. Pero xtsankga akgtiy hora xlakata xchinkgolh natalan. Wa xlakata kkakgalhilh kxchakgen Pukgalhtawakga.  Kaj xalan ktsukulh klakapastaka tuku ktitaxtulh kVietnam. Xmin kkintalakapastakni xkgalhni latamanin chu la xtakgankgawanan akxni xkalhkuyukan latamanin. Xtachuna la xakakxilhma chu xakkgaxmatma tiku xpatinamakgolh pi xkiskinimakgolh kkakamakgtayalh chu xkinkgalhskimakgolh komo ni xʼamakgolh nikgo. Akit xakkatsi pi xaʼamakgolh nikgo pero xakkawani lakwan tachuwin chu xakkamatliwakglha. Ama kilhtamaku nitlan klimakgkatsilh, lu klipuwa.

Ktlawanilh oración Jehová akxni lu xaktasama (Sal. 56:8). Ktsukulh lakpuwan la nawan talakastakwanat. Nikxni xaklakpuwanit pi lu lilakgatit. Jehová nakamalakastakwani lakgkgawasan tiku kakxilhli akxni nikgolh, chu nakatsinikgo xaxlikana. Akxni chuna nakgantaxtu, nakpatsankgayaw putum tuku kpatinaw kʼguerra (Hech. 24:15). Akxni kkakgatekgsli uma, tlakg ktsukulh paxki Jehová. Ama kilhtamaku asta la uku lu xlakaskinka kakxilha. Akxni kkgalhi taʼakglhuwit, klakapastaka la ktsukulh paxki Jehová ama kilhtamaku.

Akxni latamanin ankgo kʼguerra, tlawakgo tuku lu nitlan. Akit na ktlawalh. Pero lu kimakgtayanit naklilakpuwan kʼuma akgtiy textos xalak Biblia. Xapulana wa Apocalipsis 12:10, 11. Anta wan pi xkgalhni Jesús chu akxni lichuwinanaw Dios tlaja Akgskgawini. Xliʼakgtiy wa Gálatas 2:20, nema kimalakapastaka pi Jesús na nilh kimpalakata. Xlakata xtamakamastan Jesús, Jehová kintapatinit xlakata putum tuku ktlawalh makgasa. La uku tlan wi kintalakapastakni, chu lu kkawaniputun amakgapitsin pi Jehová chatum Dios xalakgalhamana (Heb. 9:14).

Minkilhtamaku klilakpuwan tuku ktitaxtulh kkilatamat, chu putum kilhtamaku klilakpuwan pi Jehová lu tlan kilikatsininit. Akgtum liʼakxilhtit, akxni tiku xkilimakgalhtawakga Biblia katsilh pi kkimputlaw xaktamakgaxtakgma, kiwanilh pi chatum tala puskat xrentarli makgapitsi cuartos. Liwana kkatsi pi Jehová kalimaklakaskilh xlakata xkimaxkilh niku tlan xaktawilalh. Jehová lu tlan likatsi. Putum kilhtamaku kakuentajtlawa xlakskujnin tiku ni makgxtakgkgo.

Mayo xla kata 1971 kkilalh kMíchigan. Akxni nina xaktaxtu kFlorida, ktamaknulh kkimputlaw lhuwa likgalhtawakga xlakata tlan xaklichuwinalh Dios ktiji. Pero nipara itat tiji xakan ay xakmasputunit likgalhtawakga. Xanikuta lu xatapaxuwan xaklichuwinan Dios. Klichuwinalh Dios kpulachin asta xakkamaxki likgalhtawakga lakchixkuwin kbaños nema xwilakgolh niku xjaxkan. Asta kiʼakstu kkgalhskinkan komo chatum tiku kmaxkilh likgalhtawakga lakgapasli Jehová (1 Cor. 3:6, 7).

Akxni ktsukulh likgalhtawakga Biblia, xakmalakatsali la lu aktanks xakkawani latamanin tuku nitlan xtlawamakgolh. Tlakg chuna xkiʼakgspula akxni xakkalitachuwinan kifamilia. Xlakata lu kkapaxki kinatalan John chu Ron, fuerza xaktlawaputun pi na kakanajlakgolh la akit. Alistalh kkaskinilh xkintapatikgolh xlakata tuku kkawanilh. Nina kanajlakgo chuna la akit, pero chuntiya kskini Jehová pi akgtum kilhtamaku na kakanajlakgolh la akit. Xlakata tamakgtay nema kimaxkinit Jehová, la uku tlakg tlan klikatsi akxni klichuwinan Dios.

Chuna la ktalalin Jehová wa tuku tlakg xlakaskinka kakxilha kkilatamat. Pero na wilakgolh tiku lu xlakaskinka kaʼakxilha tiku lu kkapaxki. Lu lhuwa kpaxki kimpuskat, Susan. Akit xaktatamakgaxtokgputun chatum puskat tiku xkimakgtayalh chuntiya xakskujnanilh Jehová. Susan lu xpaxki Jehová, akxni kintaskin xwanit, kkilakgapaxialhnalh kxchik. Kakxilhli pi xlikgalhtawakgama Makatsinina  chu xlimaklakaskima Biblia. Kaks klilakawa pi xputsa putum textos maski ni xlikgalhtawakgama akgtum artículo nema taʼakxilha ktamakxtumit. Kakxilhli pi lu xlakaskinka xʼakxilha la xtalalin Jehová. Ktamakgaxtokgwi diciembre xla kata 1971. Lu kpaxtikatsininan xlakata kkgalhi chatum puskat tiku lu kimakgtaya. Tuku tlakg klakgati xlakata Susan wa pi maski kimpaxki, tlakg paxki Jehová.

Jehová na kinkamaxkinitan chatiy lakkamanan tiku lu tlan likatsikgo, Jesse chu Paul. Mastakgonit talakaskin pi Jehová nakapulalin kxlatamatkan chu lu tlan talalinkgo (1 Sam. 3:19). Uma lu lipaxuwa Susan chu akit. Xchatiykan liwaka 20 kata xliputum kilhtamaku skujnanimakgolh Jehová. Chu chuntiya tlawamakgolh xlakata paxkikgo Jehová. Na kpaxtikatsininan pi tatamakgaxtokgkgolh chatiy lakpuskatin tiku lu tlan likatsikgo chu paxkikgo Jehová (Efes. 6:6). Kawanikan Stephanie chu Racquel, chu lu klipaxuwa xpalakatakan. Kkapaxki xtachuna la kilaktsuman.

Akgkuchaxan kata kskujnanilh Dios kRhode Island. Lhuwa amigos kkgalhilh. Kkalakapastakaku lakgkgolotsin tiku kkataskujli. Lu kkapaxtikatsini superintendentes viajantes tiku kimakgtayakgolh ama kata. Akgtum lanka talakgalhaman pi kkataskujli lakchixkuwin tiku chuntiyaku paxkikgo Jehová. Kkata 1987 kkilaw Carolina del Norte xlakata xakmakgtayanaw natalichuwinan Dios.  Anta na kkgalhiw lu tlan amigos. * (Kaʼakxilhti nota.)

Agosto xla kata 2002, Susan chu akit kinkawanikan nakmakgtapakgsiyaw kfamilia Betel xalak Estados Unidos kPatterson. Akit kskujli kDepartamento de Servicio chu Susan kLavanderia. Xla lu xlakgati uma taskujut. Agosto xla kata 2005 kimaxkika talakgalhaman pi naklitaxtu Lakgkgolotsin tiku Pulalinkgo xTatayananin Jehová. Xaklakpuwan pi nila xaktlawalh uma taskujut. Susan lu lanka taskujut makgkatsilh tuku xʼamakgolh lakgatayakgo. Pero la uku makglhuwa ktawakayaw kʼavión. Lu makgtayakgolh Susan tastakyaw nema maxkikgolh xlakpuskatin atanu tiku na litaxtukgo Lakgkgolotsin tiku Pulalinankgo xTatayananin Jehová. Xla liwana lakapastaknit pi chuntiya nakimakgtaya, chu wa xlakata lu kpaxki.

Kkiʼoficina kkgalhi lhuwa fotos nema kimalakapastaka tuku lu tlan ktitaxtunit kkilatamat. Jehová lu kisikulunatlawanit xlakata nikxni xlajwananit kintapaxkit nema pulana kmakgkatsilh.