1. ¿Tuku xlakata lu xlakaskinka nakgalhiyaw takanajla? (Kaʼakxilhti xapulana dibujo.)

¿MILH kilhtamaku akstu kgalhskinka komo Jehová nalakgmaxtuyan akxni namin lanka takatsanajwat? Apóstol Pablo wa kHebreos 11:6 pi komo lakgtaxtuputunaw lu xlakaskinka tliwakga nakgalhiyaw kintakanajlakan, komo ni tliwakga natawila kintakanajlakan nila katimakgapaxuwaw Dios. Max wi tiku nawan, putum latamanin kgalhikgo takanajla. Pero 2 Tesalonicenses 3:2 wan pi nichuna. Ama akgtiy textos liwana masiyakgo pi lu xlakaskinka tliwakga nakgalhiyaw kintakanajlakan.

2, 3. 1) ¿Tuku xlakata tliwakga kilikgalhitkan kintakanajlakan? 2) ¿Tuku takgalhskinin nakgalhtiyaw kʼuma artículo?

² Apóstol Pedro wa pi lu xlakaskinka nitu namaxlajwani kintakanajlakan (kalikgalhtawakga 1 Pedro 1:7). Xlakata lanka takatsanajwat lu lakatsuwa wi, lakaskinaw pi tliwakga natawila kintakanajlakan nema tlan nakinkalakgmaxtuyan (Heb. 10:39). Wa xlakata, lu xlakaskinka pi chali chali tlakg tliwakga nakgalhiyaw kintakanajlakan. Komo namatliwakglhaw, Jesús nakinkalakgmaxtuyan akxni namin malakgsputu xalixkajni kakilhtamaku. Pero tlan naskiniyaw Jehová tuku chatum chixku skinilh Jesús: «¡Kakimakgtaya komo wi niku kintsankgani takanajla!»  (Mar. 9:24). Na tlan naskiniyaw Dios tuku apóstoles skinikgolh Jesús: «Kakinkamaliwakani nkintakanajlakan» (Luc. 17:5).

³ Kʼuma artículo nakgalhtiyaw umakgolh takgalhskinin: ¿La nakgalhiyaw akgtum tliwakga takanajla? ¿La limasiyayaw pi kgalhiyaw tliwakga takanajla? Chu ¿tuku xlakata liwana katsiyaw pi komo naskiniyaw takanajla Jehová, nakinkamaxkiyan?

4. ¿Tuku liʼakxilhtit nakinkamakgtayayan tlakg tliwakga nakgalhiyaw kintakanajlakan?

⁴ Jehová lakaskin tliwakga nakgalhiyaw kintakanajlakan. Wa xlakata matsokgwilinalh kBiblia xlakata tiku lu tliwakga xwi xtakanajlakan (Rom. 15:4). Makgapitsi liʼakxilhtit wa Abrahán, Sara, Isaac, Jacob, Moisés, Rahab, Gedeón chu Barac (Heb. 11:32-35). Pero na lu kaks kinkamalakawaniyan xtakanajlakan makgapitsi natalan xala uku. *

5. ¿La limasiyalh Elías pi tliwakga xwi xtakanajla, chu tuku takgalhskinin natlawayaw?

⁵ Akgtum liʼakxilhtit xalak Biblia, wa xla Elías. Kaʼakxilhwi pulakkitsis akxni limasiyalh pi tliwakga xwi xtakanajla. Xapulana, akxni Elías wanilh mapakgsina Acab pi Jehová xʼama tlawa pi ni ksenalh. Wanilh pi xlikana chuna xʼama kgantaxtu, xlakata Jehová chuna xwanit (1 Rey. 17:1). Xliʼakgtiy, Elías xlipawan pi akxni ni ksenalh Dios xʼama maxki tuku xmaklakaskilh chu amakgapitsin (1 Rey. 17:4, 5, 13, 14). Xliʼakgtutu, Elías xkatsi pi Jehová tlan xmalakastakwanilh xkgawasa chatum puskat tiku xninita xchixku (1 Rey. 17:21). Xlimakgtati, Elías liwana xkatsi pi Jehová xʼama makamin lhkuyat xlakata klhkuyulh xtamakamastan ksipi Carmelo (1 Rey. 18:24, 37). Xliʼakgkitsis, akxni nina ksputa kilhtamaku nema xwankanit pi ni ksenalh, Elías liwana xkatsi pi xʼamaja senan, asta wanilh Acab: «Kawayanti chu kakgotnanti; xlakata lu takgaxmata pi namin lankasen» (1 Rey. 18:41). Xlakata umakgolh liʼakxilhtit tlan akstu nakgalhskinkana: «¿Tliwakga kkgalhi kintakanajla chuna la Elías?».

6. Komo tliwakga kgalhiputunaw kintakanajlakan, ¿tuku kiliskinitkan Dios?

⁶ Komo tliwakga kgalhiputunaw kintakanajlakan, kiliskinitkan Dios pi kakinkamaxkin xʼespiritu santo. ¿Tuku xlakata? Xlakata takanajla na anta makgtanuma ktayat nema masta espíritu santo (Gál. 5:22). Jesús kinkamasiyanin pi tlakg kiliskinitkan Jehová espíritu santo chu liwana lichuwinalh pi Dios kamaxki tiku skinikgo (Luc. 11:13).

7. Kawanti akgtum liʼakxilhtit nema kinkamasiyaniyan tuku kilitlawatkan xlakata putum kilhtamaku tliwakga natawila kintakanajlakan.

⁷ Komo tliwakga kgalhiyaw kintakanajlakan, kilikuentajtlawatkan pi chuntiya tliwakga  natawila. ¿Tuku xlakata? Xlakata takanajla xtachuna niku wi lhkuyat. Pulana max lu lanka lhkuyat. Pero komo nialh namapuniyaw kiwi, namixa. Nachuna kintakanajlakan. Komo ni lakaskinaw naxlajwanan, chali chali kilikgalhtawakgatkan Biblia. Uma natlawa pi tlakg napaxkiyaw Jehová chu Biblia, chu putum kilhtamaku tliwakga natawila kintakanajlakan.

8. ¿Tuku nakinkamakgtayayan tliwakga natawila kintakanajlakan?

⁸ Xlakata kintakanajlakan chuntiya tliwakga natawila, ni kajwatiya kilikatsitkan tuku kinkamasiyanikan akxni nina xtamunuyaw (Heb. 6:1, 2). Akgtum liʼakxilhtit, tlan nalikgalhtawakgayaw la kgantaxtunit makgapitsi tuku tatsokgnit kBiblia. Chuna la likgalhtawakgatilhamaw Biblia, kiliʼakxilhatkan komo limasiyamaw kkilatamatkan pi xlikana tliwakga wi kintakanajlakan (kalikgalhtawakga Santiago 1:25 chu 2:24, 26).

9, 10. ¿La kinkamakgtayayan tliwakga natawila kintakanajlakan 1) kinatalankan? 2) kintamakxtumitkan? 3) akxni lichuwinankan Dios?

⁹ Apóstol Pablo wa pi kstalaninanin Cristo tlan nalamatliwakglhniyaw «takanajla» nema kgalhiyaw kinchatunukan (Rom. 1:12). ¿Tuku kilhchanima? Pi xlakaskinka akxtum nakatalayaw kinatalankan xalak congregación, chu tlakg matliwakglhaw kintakanajlakan akxni katatawilayaw tiku ni makgxtakgkgonit Dios maski tuwa tuku xtitaxtumakgolh (Sant. 1:3). Tiku nixatlan amigos laktlawakgo kintakanajlakan, pero tiku xatlan amigos tlawakgo pi tlakg tliwakga natawila kintakanajlakan (1 Cor. 15:33). Wa xlakata Biblia kinkawaniyan pi ni kamakgatsankgaw kintamakxtumitkan, xlakata anta lamatliwakglhniyaw kintakanajlakan (kalikgalhtawakga Hebreos 10:24, 25). Nachuna, tuku katsiniyaw ktamakxtumit kinkamakgtayayan tlakg tliwakga natawila kintakanajlakan. Romanos 10:17 wan pi chuna la tlakg nakatsiyaw xlakata Biblia, tlakg tliwakga natawila kintakanajlakan. Wa xlakata kilitlawatkan uma takgalhskinin: «¿Kkan kputum tamakxtumit?».

¹⁰ Tuku na nakinkamakgtayayan tliwakga natawila kintakanajlakan wa nakamasiyaniyaw amakgapitsin tuku masiya Biblia. ¿Tuku xlakata? Xlakata akxni lichuwinanaw Dios, katsiniyaw nalipawanaw Jehová chu ni napekuanaw chuna la ni pekuankgolh xapulana kstalaninanin Cristo (Hech. 4:17-20; 13:46).

11. 1) ¿Tuku xlakata Josué chu Caleb lu tliwakga xwi xtakanajlakan? 2) ¿La tlan nastalaniyaw xliʼakxilhtitkan?

¹¹ Akxni akxilhaw la Jehová kgalhti kiʼoracioneskan chu la kinkamakgtayayan, tlakg tatliwakglha kintakanajlakan. Wa tuku kamakgtayalh Josué chu Caleb. Akxni ankgolh skgalakgo tiyat nema Jehová xkawaninit pi nakamaxki, limasiyakgolh pi xlipawankgo pi Dios xʼama kamakgtaya. Chuna la titaxtulh kata, xtakanajlakan tlakg tatliwakglhli, xlakata xʼakxilhkgo pi Jehová chuntiya xkamakgtaya. Wa xlakata Josué liwana kawanilh israelitas pi Jehová  putum kilhtamaku xmakgantaxtinit tuku xkawaninit. Alistalh kawanilh: «Kapekuanitit Jehová chu ni namakgatsankgananiyatit la naskujnaniyatit». Na kawanilh: «Pero akit chu putum kinchik, akinin nakskujniyaw Jehová» (Jos. 23:14; 24:14, 15). Komo akinin na nalipawanaw Jehová, naʼakxilhaw la kinkamakgtayayan (Sal. 34:8).

12. ¿La limasiyayaw pi tliwakga wi kintakanajlakan?

¹² Kstalanina Cristo Santiago wa pi tuku xtlawa xlimasiya xtakanajla (Sant. 2:18). Tuku lichuwinalh, limasiyalh pi xlakata tuku tlawayaw limasiyayaw komo tliwakga wi kintakanajlakan. Kaʼakxilhwi apulaktu la tlan nalimasiyayaw pi tliwakga wi kintakanajlakan.

13. ¿Tuku xlakata limasiyayaw pi kgalhiyaw takanajla akxni lichuwinanaw Dios?

¹³ Akxni lichuwinanaw Dios, limasiyayaw pi kgalhiyaw takanajla. ¿Tuku xlakata? Xlakata akxni lichuwinanaw Dios limasiyayaw pi kanajlayaw pi lisputni lu lakatsu wi chu «ni katimakgapalalh» (Hab. 2:3). Komo katsiputunaw komo tliwakga wi kintakanajlakan, kilitlawatkan umakgolh takgalhskinin: «¿Lu xlakaskinka kakxilha naklichuwinan Dios? ¿Ktlawama tuku natalakaskin xlakata nakkalitachuwinan xtalakaskin Dios? ¿Kputsa la tlakg naklichuwinan Dios?» (2 Cor. 13:5). Komo fuerza tlawayaw nalichuwinanaw Dios, limasiyayaw pi tliwakga wi kintakanajlakan (kalikgalhtawakga Romanos 10:10).

14, 15. 1) ¿La tlan nalimasiyayaw pi kgalhiyaw takanajla kkilatamatkan? 2) Kawanti la limasiyalh akgtum familia xalak Asia pi tliwakga xwi xtakanajla.

¹⁴ Atanu tuku nalimasiyayaw pi kgalhiyaw takanajla wa akxni tayaniyaw taʼakglhuwit kkilatamatkan. Akxni kgalhiyaw tajatat, taxlajwaniyaw, max kgalhiyaw tajatat xla talipuwan, o ni kgalhiyaw tumin o amakgapitsi  taʼakglhuwit, kilikanajlatkan pi Jehová chu Jesús nakinkamakgtayayan «akxni lu[...] maklakaskinaw» (Heb. 4:16). Komo naskiniyaw tamakgtay Jehová, nalimasiyayaw pi xlikana kanajlaniyaw. Jesús wa pi tlan naskiniyaw Jehová «kinkaxtilanchujkan chuna la nakmaklakaskinaw xala tantaku» (Luc. 11:3, TNM). Anta kBiblia lhuwa wi liʼakxilhtit nema masiya pi Jehová tlan kinkamaxkiyan putum tuku namaklakaskinaw. Akgtum liʼakxilhtit, akxni ni senalh kʼIsrael, Jehová maxkilh chuchut chu liwat Elías. Biblia wan pi «cuervos xliminikgo tsisa chu kakgotanun kaxtalanchu chu liway», chu xlikgotnan chuchut nema xtitaxtu kkgalhtuchokgo (1 Rey. 17:3-6). Akinin na tlan nalipawanaw pi Jehová nakinkamaxkiyan tuku namaklakaskinaw.

¹⁵ Liwana katsiyaw pi komo namakgantaxtiyaw xtastakyaw Biblia, tlan namaxkiyaw tuku tlakg xlakaskinka kifamiliajkan. Kaʼakxilhti tuku tlawakgolh akgtum familia xalak Asia. Akgtum kilhtamaku xatlat akxilhli pi xtaskujut xtlawama natamakgatlini Jehová. Wa xlakata talakkaxlalh xpuskat pi nakgalhakgaxmatkgo Jehová chu xtlawakgolh tuku wan Mateo 6:33 chu Proverbios 10:4. Wa xlakata makgxtakgli xtaskujut chu tsukukgolh tlawakgo liwat chu kstakgo. Xapuskat wan pi lu palha skujkgolh, pero xlakata Jehová kakuentajtlawalh nikxni katsankganilh tuku nawakgo. ¿Nachuna titaxtunita chu tlakg tatliwakglhli mintakanajla?

16. ¿Tuku nala komo nalipawanaw Jehová?

¹⁶ Ni kapekuaw, liwana kakatsiw pi komo  nalipawanaw Jehová chu natlawayaw tuku kinkaskiniyan, nakinkamakgtayayan. Wa tuku xkilhchanima apóstol Pablo akxni kinkamalakapastakan tuku lichuwinalh Habacuc: «Nchixku nti ntalulokgninit kxlakatin Dios, man wa nalilatamay xtakanajla» (Gál. 3:11; Hab. 2:4). Nachuna, Pablo wa pi Dios lhuwa litliwakga kgalhi chu tlan nakinkamakgtayayan chuna la nipara lakpuwaw (Efes. 3:20). Tlawayaw tuku talakaskin xlakata naskujnaniyaw Dios, pero katsiyaw pi nila putum makgantaxtiyaw. Wa xlakata tlawayaw putum tuku matlaniyaw chu lipawanaw pi Jehová nakinkasikulunatlawayan. Xlikana, lu paxtikatsiniyaw pi kinkamakgtayayan.

17. 1) ¿La kakgalhtilh Jesús kstalaninanin akxni tlakg skinikgolh takanajla? 2) ¿La likatsiyaw pi komo tlakg naskiniyaw Jehová takanajla nakinkamaxkiyan?

¹⁷ Akxni nalikgalhtawakgakgoyaw uma artículo, max namakgkatsiyaw la apóstoles akxni wanikgolh Jesús: «Kakinkamaliwakani nkintakanajlakan» (Luc. 17:5). Jesús kakgalhtilh kata 33 kPentecostés. Ama kilhtamaku kamakaminilh espíritu santo chu kamakgtayalh tlakg naʼakgatekgskgo xtalakaskin Dios. Uma tlawalh pi tlakg tliwakga xtawilalh xtakanajlakan. Wa xlakata, lu lhuwa tsukukgolh lichuwinankgo Dios chuna la nikxni xtlawakgonit (Col. 1:23). Jehová kinkawaniyan pi nakinkamaxkiyan tuku naskiniyaw komo chuna «xtalakaskin» (1 Juan 5:14). Wa xlakata komo naskiniyaw pi tlakg kakinkamaxkin takanajla, nakinkamaxkiyan.

18. ¿La kasikulunatlawa Jehová tiku tliwakga takanajla kgalhikgo?

¹⁸ Komo xliputum kinakujkan nalipawanaw Jehová, xla nakinkasikulunatlawayan chu tlakg nakinkamaxkiyan takanajla akxni naskiniyaw. Nachuna, tlakg tliwakga natawila kintakanajlakan chu tlan nakinkawanikanan: «Xlilat nakalakgchanan kxtapakgsin Dios» (2 Tes. 1:3, 5).