AKXNI xakkgalhi akgnajatsa kata nialh kstakli. La uku kkgalhi 43 kata chu kaj akgtum metro kililanka. Kinatlatni kiwanikgolh pi xakskujli xlakata nialh xaklakapastakli la kiliʼaktsu xakwanit. Wa xlakata ktsukulh ksta xtawakat kiwi kxkilhtin kinchik. Xlakata putum kilhtamaku tlan xtasiya niku xwi kilistat, lhuwa tiku xkimakgtamawanankgo.

Pero maski lhuwa xakskuja, ni kimakgtayalh. Akxni xakkan tamawanan takgalana xaklakachan kmostrador. Putum tuku xtlawakanit wa xkatlawanikanit latamanin tiku tlakg laklanka. Chu uma lu nitlan xkimamakgkatsini. Pero akxni xakkgalhi akgkutati kata tsukulh talakgpali kintapuwan.

Akgtum kilhtamaku, chatiy xTatayananin Jehová kimakgtamawanankgolh. Kinkgalhskinkgolh komo tlan xkimasiyanikgolh tuku wan Biblia, kkawanilh pi tlan. Kimasiyanikgolh pi katsinikan xlakata Jehová tlakg xlakaskinka nixawa la xaktasiya. Uma lu kimakgtayalh. Salmo 73:28 wa texto nema tlakg klakgatilh. Niku litsuku, wan: «Tlan kinkitaxtuni klakgtalakatsuwini Dios».

Ama kilhtamaku kifamilia xakkatawi kCosta de Marfil. Anta latamanin xkililakgasmanikgonita. Pero akgtum kilhtamaku kkaw tawilayaw kBurkina Faso, anta lu talakgpalilh kilatamat. Putum latamanin kaks xkiʼakxilhkgo, wa xlakata ni xaktaxtu kkinchik. Akxni xtitaxtunita akglhuwa semanas klakapastakli pi lu xaklakgatinit katsini xlakata Jehová. Pero kBurkina ni xʼanan tiku xkimakgalhtawakgelh. Wa xlakata ktsokgnalh ksucursal xla xtatayananin Jehová, chu malakgachaka chatum xapaxuwana misionera wanikan Nani. Kʼakgtum motocicleta chalh.

Niku xwi kinchik lhuwa tiyat xʼanan ktiji, wa xlakata tuwa xlaktlawankan. Chu akxni ksenan lixkajni xkawan. Nani makglhuwa mokgosli kxmotocicleta akxni xʼan kkinchik, pero ni lakpuwa nialh xʼalh. Akgtum kilhtamaku kiwanilh pi xaktaʼalh ktamakxtumit. Ni kkatsilh la nakkgalhti, xlakata kilitaxtut xwanit kkinchik chu xaktayanilh akxni latamanin kaks xkiʼakxilhkgolh. Nachuna, xlakata kxmoto xkililh Nani, tlakg tuwa xmakgkatsilh namatlawani. Pero kwanilh pi xakama taʼan. Tuku tlawalh pi ni xakpekualh wa tuku wan apulaktu texto nema lu klakgati, wan: «Kimputatsekgni ktlawanit Malana Jehová tiku lakgchan namapakgsinan».

 Nani chu akit makglhuwa ktajuchaw kkaputlunin. Pero komo lu xaklakgatiyaw xakanaw ktamakxtumit, ni kinkamaxlajwanin uma. Ktiji kaks xkiʼakxilhkgo latamanin. Pero ktamakxtumit, natalan xkilakalitsinikgo. Titaxtulh akgnajatsa papaʼ ktamunulh.

Texto nema lu klakgati lisputa uma: «Xlakata naklichuwinan putum tuku tlawanita». Uma xkimalakapastaka pi kilichuwinat xwanit xlakata Dios, pero xakkatsi pi lu tuwa xakkalh kʼakgatunu chiki. Akxni xapulana kkalh lichuwinan Dios, laktsu kamanan chu tiku laklankata kaks xkiʼakxilhkgo, xkistalanikgo chu xlilitsinkgo la xaktlawan. Uma nitlan xaklimakgkatsi. Tuku kimakgtayalh ni naktaxlajwani wa akxni xaklakapastaka pi uma latamanin lu xlakaskinkgo Paraíso chuna la akit. Xlakata tlakg tlan xakkalh lichuwinan Dios, ktamawalh akgtum triciclo nema kimakan xaklimatlawani. Komo lakakxtu xakkanaw, tiku xaktaʼan xkimakgtaya. Chu akxni lakgaju xakanaw na xtawaka ktriciclo. Xlikana, xapulana tuwa xakmakgkatsi nakkan lichuwinan Dios, pero lakapala klismanilh. Lu klakgatilh chu precursora regular klitaxtulh kata 1998.

Lhuwa latamanin kkalimakgalhtawakgelh Biblia, chu kgalhtati xtatayananin Jehová litaxtukgolh. Nachuna chatum kintala tsumat. Akxni kakxilha pi latamanin talakatsuwinikgo Jehová lu kimatliwakglha akxni tlakg klakaskin tamakgtay. Akgtum liʼakxilhtit, xakmakgalhtawakgema chatum kgawasa tiku xʼan kʼuniversidad kxkilhtin xchik. Alistalh kwanilh chatum tala pi wa xmakgalhtawakgelh. Titaxtulh kilhtamaku, ama kgawasa alh kCosta de Marfil. Akgtum kilhtamaku kmakglhtinalh maktum carta xalak Costa de Marfil akxni xakkgalhi paludismo. Carta xwan pi ama kgawasa na xlichuwinana Dios. ¡Lu klipaxuwalh!

Xlakata tlan kiʼakstu xaktamakgtakgalhli, akgtum organización tiku kamakgtayakgo tiku xatatatla lakachin kiwanikgolh pi xkimasiyanikgolh la tsapanankan. Chatum makgalhtawakgena akxilhli pi akit xaskulujwa. Wa xlakata kiwanilh pi tlan xkimasiyanika la tlawakan lichakgan. Chu kimasiyanikgolh. La uku kkinchik ktlawa lichakgan nema lichakgenankan chu nema lipaxkan. Tiku kimakgtamawanankgo kawanikgo amakgapitsin pi lichakgan nema ktlawa lu tlan. Kkimoto nema kgalhi akgtutu llanta klin lichakgan niku kiskinikan.

La uku tlakg katsan kistipun. Wa xlakata kata 2004 nialh precursora kwa. Pero chuntiya klichuwinan Dios asta la kmatlani.

Latamanin wankgo pi putum kilhtamaku klakalitsin. Chuna xlakata kpaxuwa. ¿Katsiya tuku xlakata? Xlakata tlan kinkitaxtuninit klakgtalakatsuwini Dios. (Lichuwinanit Sarah Maiga.)