LIWAKAYA akgtiy ciento kata, uma tsokgna wa pi nila nakanajlayaw putum tuku wan periódicos. La uku nachuna. Nila nakanajlayaw putum tuku wan Internet. Xlakata wi tecnología, lhuwa tuku xalaksasti maxtuma, chali chali tlan lhuwa tuku likgalhtawakgayaw. Lhuwa tuku anta tawan xaxlikana chu xlakaskinka, pero lhuwa kaj takgsanin. Wa xlakata kuentajkilitlawatkan. Akxni chatum lataman tsuku maklakaskin Internet, max nalakpuwan pi akgtum tamakatsin xaxlikana kaj xlakata anta wi kʼInternet o xlakata xʼamigo makaminilh. Max nakanajla asta wa tuku nila tamakanajla. Pero Biblia wan: «Tiku ni skgalala kanajla putum tuku wanikan, pero tiku skgalala liwana akxilha tuku natlawa» (Prov. 14:15).

Tiku ni skgalala putum kanajla, pero tiku xaskgalala kajwatiya kanajla komo liwana katsi pi xlikana. Lhuwa tuku talichuwinan kʼInternet lu tsukukan lichuwinankan, pero tuku anta tawan nixlikana. ¿Tuku tlan natlawayaw xlakata niti nakinkaʼakgskgawiyan? Akstu kakinkatlawanikan uma takgalhskinin: «¿Niku klikgalhtawakgalh? ¿Klikgalhtawakgalh kpágina xaʼoficial nema tlan nakanajlanikan o xtatsokgnit niku katiwa tiku tlan tsokgnankgo? ¿Ni takatsi tiku tsokgli? ¿Wanka pi ni xlikana uma kʼakgtum página kxaʼoficial?». * Skgalala kawaw (Prov. 7:7). Komo tuku likgalhtawakgamaw nila kanajlakan, max kaj taʼakgsanin. Chu komo nakinkalakgchinan akgtum tamakatsin nema nitlan lichuwinan achatum, ¿tuku natlawayaw? Kakinkakgalhskinkan: «¿Tiku nalakaskin pi putum kakatsikgolh uma tamakatsin? ¿Tuku xlakata nalakaskin pi katalakgatumilh?».

Makgapitsi tiku kalakgchin mensaje, tunkun kamalakgachanikgo xʼamigos. Malakgachakgo maski ni katsikgo komo xaxlikana o ni, chu ni lakpuwankgo la nakakitaxtuni amakgapitsin. Max xlakaskinka  litaxtuputunkgo o lakaskinkgo pi nawankan pi wa pulana malakgachakgolh (2 Sam. 13:28-33). Pero akinin kuentajkilitlawatkan. Ni lakaskinaw pi nitlan nalichuwinankan akgtum organización o chatum lataman.

Makgapitsi tunkun kamalakgachanikgo mensajes amakgapitsin akxni kalakgchin, maski ni liwana katsikgo komo xlikana o ni. ¿Tuku xlakata? Xlakata ni limaxtuputunkgo kilhtamaku naputsananikgo. Max wankgo: «Kiʼamigos tlan nalakputsanankgo komo katsiputunkgo komo xlikana». Pero max xʼamigos na ni putsanamputunkgo (Efes. 5:15, 16). Akxni ni liwana katsiya komo xlikana mensaje nema lakgchinan, kalakapastakti uma tachuwin: «Komo ni katsiya komo xlikana, la palhma nalakgmakgana».

Katlawaw uma takgalhskinin: «¿Klismaninit kkamalakgachani mensajes amakgapitsin? ¿Milh kilhtamaku talakaskilh wi tiku nakskini kakintapatilh xlakata kmalakgachalh mensaje nema ni xlikana? ¿Wi tiku kiwanilh nialh kakmalakgachanilh mensaje?». Komo kiʼamigoskan kgalhikgo Internet, tlan naputsakgo tamakatsin nema katsiputunkgo. Ni lakaskinkgo pi lhuwa correos natamalakgachaniyaw tuku makgalitsinan, fotos, o videos. Na ni kilimalakgachatkan discursos nema tagrabarlikgonit o maktum tatsokgni xla taʼakgchuwin chuna la matitaxtika. * Tlakg tlan komo kinchatunukan nalakputsananaw xlakata akgtum tema, kaputsaw versículos nema takilhtikgonit kBiblia nema limin akgtum artículo chu kalakkaxwiliw tuku nakgalhtinanaw ktamakxtumit.

¿Tuku kilitlawatkan komo naʼakxilhaw kʼInternet tamakatsin nema ni xlikana xlakata xtatayananin Jehová? Nialh kalikgalhtawakgaw chu ni kakanajlaw tuku wan. Ni kakamalakgachaniw amakgapitsin, xlakata komo chuna natlawayaw tlakg namaʼakgpitsiyaw takgsanin. Komo nitlan limakgkatsiyaw tuku likgalhtawakgaw kaskiniw Jehová kakinkamaxkin liskgalala chu kalitachuwinaw tiku tliwakga kgalhi xtakanajla (Sant. 1:5, 6; Jud. 22, 23). Ni kaks kililakawanatkan komo wi tiku nawan tuku nixlikana kimpalakatakan. Nachuna lichuwinanka Jesús. Chu wa pi xʼamaka kaputsastalanikan kstalaninanin chu nitlan xʼamaka kalichuwinankan (Mat. 5:11; 11:19; Juan 10:19-21). Komo lakgskgalalan akinin, nakatsiyaw komo wi tiku  kaj takgsanin tuku wan kimpalakatakan o putsama la nakaʼakgskgawi amakgapitsin (Prov. 2:10-16).

Na kuentajkilitlawatkan ni nakawaniyaw amakgapitsin tuku kgaxmataw xpalakata kinatalankan. Maski xaxlikana, max ni xlilat nawanaw (Mat. 7:12). Komo nakawaniyaw amakgapitsin nitlan tamakatsin xpalakata kinatalankan, nalimasiyayaw pi ni kapaxkiyaw chu ni katikamatliwakglhniw xtakanajlakan (2 Tes. 3:11; 1 Tim. 5:13). Max makgapitsi tamakatsin niti xlikatsit. Komo wi tiku namakatsininamputun xpalakata xlatamat nema nina katsikgokan, ni kilimakgtanutkan, wa katsi akxni namakatsininan chu chuna la natlawaputun. Nitlan nawan komo akinin wi tiku nawaniyaw, xlakata ni maxkimaw kakni chu max natlawaniyaw tuku nitlan.

La uku, tamakatsin lu lakapala tamalakgatumi. Makgapitsi xaxlikana chu makgtayanan, pero makgapitsi ni xaxlikana chu tlawaninan tuku nitlan. Kakatsi pi komo wi tiku namalakgachaniyaw mensaje, tiku namalakgachaniyaw kaj lakapala tlan lhuwa tiku nakamalakgachani. Wa xlakata, nitlan komo nakamalakgachaniyaw kiʼamigoskan putum tuku kinkalakgchinan. Maski Biblia wan pi tapaxkit putum kanajla, kilikuentajtlawatkan chu ni nalakpuwanaw pi putum tuku kinkalakgchinan xaxlikana (1 Cor. 13:7). Na ni nakanajlayaw putum tuku wankan xlakata xkachikin Jehová chu xpalakata kinatalankan. Liwana katsiyaw pi tiku wankgo taʼakgsanin tlawamakgolh la tlawa Satanás, «xtlat taʼakgsanin» (Juan 8:44). Wa xlakata ni putum kakanajlaw tamakatsin nema makglhtinanaw akgatunu kilhtamaku. Kalakapastakwi tuku wan Biblia: «Wantiku ni xalakgskgalalan xlikana pi xatontos nalitaxtukgo, pero tiku liwana akxilha tuku tlawa, xcorona litaxtu takatsin» (Prov. 14:18).