1. ¿Tuku tlawalh Manóah akxni katsilh pi tlat xʼama wan?

MANÓAH chu xpuskat israelitas xwankgonit. Xlakpuwankgo pi nikxni xʼamakgo kgalhikgo kamanan. Pero akgtum kilhtamaku, chatum ángel tasiyanilh chu wanilh lu tlan tamakatsin. Wanilh pi xʼama kgalhi kskgata. Akxni wanilh xchixku, xla lu lipaxuwalh. Pero na tsukulh lilakpuwan pi lhuwa taskujut xʼama lakgatayakgo. Ama kilhtamaku, lhuwa israelitas xtlawakgo tuku nitlan. ¿La xʼamakgo masiyanikgo aktsu xkgawasakan naskujnani chu napaxki Jehová? Manóah skinilh Jehová pi xmalakgachapa xʼángel xlakata xkawanilh la namakgastakkgo aktsu kgawasa (Juec. 13:1-8).

2. ¿Tuku taskujut lakgayakgo natlatni, chu tuku nakamakgtaya namakgantaxtikgo? (Na kaʼakxilhti recuadro « Tiku tlakg xlakaskinka nakalimakgalhtawakgeya Biblia».)

² Komo kgalhiya minkamanan, xlikana pi akgatekgsniya Manóah. Na lakgchanan nakamasiyaniya minkamanan naskujnanikgo chu napaxkikgo Jehová (Prov. 1:8). ¿Tuku namakgtayayan namakgantaxtiya uma taskujut? Pulaktum tuku lu xlakaskinka wa pi nakakninaniyatit Dios kfamilia akgatunu semana. Uma namakgtayayan nakamasiyaniya minkamanan xlakata Jehová chu tuku  wan Biblia (kalikgalhtawakga Deuteronomio 6:6-9 *). ¿Pero tuku atanu namakgtayayan? Xatlan xliʼakxilhtit Jesús. Xlikana pi ni kgalhilh xkamanan, pero lhuwa tuku kamasiyani natlatni xlakata la kamasiyanilh kstalaninanin. Kʼuma artículo naʼakxilhaw pi Jesús kamasiyanilh pi xkapaxki chu xtaktuju. Na xʼakgatekgsa la xmakgkatsikgo chu xkatsi la nakamakgtaya. Na naʼakxilhaw la tlan chuna natlawayaw.

3. ¿Tuku xlakata kstalaninanin Jesús liwana xkatsikgo pi xkapaxki?

³ Jesús xkawani kstalaninanin pi xkapaxki (kalikgalhtawakga Juan 15:9). Na xlimaxtu lhuwa kilhtamaku xlakata nakatatawila (Mar. 6:31, 32; Juan 2:2; 21:12, 13). Ni kajwatiya xmakgalhtawakgenakan xlitaxtu, wata lu tlan xtalalinkgo. Wa xlakata, kstalaninanin liwana xkatsikgo pi Jesús xkapaxki. ¿La tlan natlawaya la Jesús?

4. ¿La nakalimasiyaniya minkamanan pi kapaxkiya? (Kaʼakxilhti xapulana dibujo.)

⁴ Kalismani nakawaniya minkamanan pi kapaxkiya. Kakalimasiyani pi lu xlakaskinka kaʼakxilha (Prov. 4:3; Tito 2:4). Anta kʼAustralia, chatum xTatayana Jehová tiku wanikan Samuel wan pi akxni aktsinajku xwanit, akxni xʼamaja lhtata, xtlat xlikgalhtawakgani Ki libro xla takgalhtawakga xalak Biblia chu putum xkgalhti xtakgalhskinin nema xkgalhi. Alistalh xʼakgpixti, o ksnata chu xtsuka. Titaxtulh kata, Samuel kaks lilakawa akxni katsilh pi xtlat kstaknit kfamilia niku ni xlismanikan laʼakgpixtikan chu latsukkan. Pero xtlat fuerza xtlawanit nalimasiyani pi lu xpaxki. Xlakata uma, Samuel putum kilhtamaku xpaxuwa chu tlan xmakgkatsi, chu lu tlan latalalinkgolh. Komo  lismaniya nakawaniya minkamanan pi kapaxkiya, na namakgkatsikgo la Samuel. Wa xlakata, kakatsukti chu kaʼakgpixti, kalimaxtu kilhtamaku nakatachuwinana, nakatawayana chu nakatakgamanana.

5, 6. 1) Xlakata Jesús xkapaxki kstalaninanin, ¿tuku tlawalh xpalakatakan? 2) ¿La tlan nakastakyawakgo natlatni xkamanan?

⁵ Jesús wa: «Kstakyawakgo, na kʼakgastakyawakgo xlipaks wa nti kpaxkikgo» (Apocalipsis [Revelación] 3:19). * (Kalikgalhtawakga nota.) ¿La kastakyawalh Jesús kstalaninanin? Xla akxilhli pi putum kilhtamaku xlitaʼakglhuwimakgolh xlakata tiku tlakg xlakaskinka xwanit. Jesús akxilhli uma chu limasiyalh tapaxkit akxni kaʼakgastakyawalh. Putum kilhtamaku putsalh niku chu tuku kilhtamaku xatapaxkin xkaʼakgastakyawalh (Mar. 9:33-37).

⁶ Wix kapaxkiya minkamanan, wa xlakata katsiya pi talakaskin nakastakyawaya. Komo tlawakgo tuku nitlan, namin kilhtamaku tlan kajwatiya nakawaniya tuku xlakata nitlan tuku tlawakgolh. ¿Chu komo chuntiya ni nakgalhakgaxmatnankgo? (Prov. 22:15.) Katlawa tuku tlawalh Jesús, chuntiya kakapulalipi, kakamasiyani chu ni kasitsi akxni nakastakyawaya. Kaputsa niku natlawaya chu kilhtamaku akxni xlilat natlawaya, chu kakalimasiyani pi kapaxkiya. Anta kSudáfrica, chatum xtatayana Jehová wanikan Elaine lakapastaka la kstakyawakan. Liwana xwanikan tuku xlakaskinkgo pi xtlawalh. Akgtum liʼakxilhtit, xwanikgo pi komo ni xkgalhakgaxmatnalh, tliwakga xʼamaka stakyawakan. Chu alistalh xmakgantaxtikgo tuku xwanikgonit. Pero putum kilhtamaku xwanikgo tuku xlakata tliwakga kstakyawakgo chu nikxni xatasitsi chuna xtlawakgo. Xlakata uma, putum kilhtamaku katsilh pi xnatlatni lu xpaxkikgo.

7, 8. 1) ¿Tuku katsinikgolh xʼapóstoles Jesús akxni kgaxmatkgolh xʼoraciones? 2) Akxni tlawaya oración kxlakatin minkamanan, ¿la nakamasiyaniya nalipawankgo Jehová?

⁷ Akxni Jesús xʼamaka chipakan chu xʼamaka makgnikan, tlawalh uma oración: «[Abba, TNM], kinTlat, xlipaks nkatuwaj, paks tlan [makgantaxtiya] ntu natlawaputuna. Kaki[...]mapanuni yuma ntu nakiʼakgspulay, wampi ni wa ntu nkit klakaskin, wampi wa ntu wix lakaskina» (Mar. 14:36). * (Kalikgalhtawakga nota.) ¿Tuku katsinikgolh kstalaninanin Jesús akxni kgaxmatkgolh xʼoración? Katsinikgolh pi maski Jesús ni xkgalhi talakgalhin, kskini tamakgtay xTlat. Na katsinikgolh pi na xlitaktujutkan xwanit chu xliputsatkan xwanit xtamakgtay Jehová.

⁸ Minkamanan tlan lhuwa tuku nakatsinikgo  xlakata oraciones nema natlawaya. Xlikana, uma ni wamputun pi tlawaya oración kaj xlakata wi tuku nakamasiyaniya. Pero akxni tlawaya oración kxlakatinkan, nakamasiyaniya nalipawankgo Jehová. ¿La chuna natlawaya? Ni kajwatiya kaskini Jehová xpalakatakan, na kaskini mimpalakata. Anta kBrasil, chatum tala wanikan Ana wan pi akxni xnatlatni xkgalhikgo taʼakglhuwit, putum kilhtamaku kskinikgo tamakgtay Dios. Akgtum liʼakxilhtit, akxni xtata chu xnana tatatlakgolh, xnatlatni Ana skinikgolh Jehová litliwakga chu liskgalala xlakata liwana nalaksakkgo tuku natlawakgo. Akxni xkgalhikgo taʼakglhuwit, lipawankgolh Jehová, asta akxni tlakg tuwa xtitaxtumakgo. Uma tlawalh pi Ana xlipawa Jehová. Wix na tlan chuna natlawaya akxni nakatatlawaya oración minkamanan. Akgtum liʼakxilhtit, kaskini Jehová kamakgtayan ni napekuana xlakata nalitachuwinana Dios tiku mintalakatsu o xlakata naskiniya mimalana kmimputaskujut kamaxkin talakaskin napina klanka tamakxtumit. Minkamanan naʼakxilhkgo pi lipawana Jehová chu na nalipawankgo.

9. 1) ¿La kamasiyanilh Jesús kstalaninanin nataktujukgo chu natlawakgo tuku tlan xpalakata amakgapitsin? 2) Komo wix taktujuya chu kamakgtayaya amakgapitsin, ¿tuku natlawakgo minkamanan?

⁹ Jesús kamasiyanilh kstalaninanin nataktujukgo chu nakamakgtayakgo amakgapitsin. ¿La kamasiyanilh? Kawilinilh liʼakxilhtit (kalikgalhtawakga Lucas 22:27). Limaklakaskilh xlatamat xlakata naskujnani Jehová chu nakamakgtaya amakgapitsin. Chu kstalaninanin na chuna tlawakgolh. Xlakata miliʼakxilhtit, na tlan nakamasiyaniya minkamanan. Kalilakpuwanti tuku titaxtulh chatum xtatayana Jehová wanikan Debbie chu xchixku, Pranas. Kgalhikgo chatiy kamanan, chu Pranas, kgolotsin xalak  congregación. Debbie wan pi nikxni lakgsitsilh xchixku xlakata xlimaxtu kilhtamaku nakuentajtlawa congregación. Liwana xkatsi pi xʼama makgtaya xfamilia akxni xtalakaskilh (1 Tim. 3:4, 5). Xlakata tuku tlawakgolh Debbie chu Pranas, ¿la kamakgtayalh xkamanan? Pranas wan pi laktsu xkamanan xpaxuwakgo chu tlan xtalalinkgo putum natalan. Nachuna, putum kilhtamaku xmakgtayanankgo klaklanka tamakxtumit. La uku, putum familia skujnanimakgolh Jehová putum kilhtamaku. Komo taktujuya chu tlawaya tuku nakalimakgtayaya amakgapitsin, minkamanan nachuna natlawakgo.

10. ¿Tuku tlawalh Jesús akxni makgapitsi tiku xalak Galilea xputsamakgolh?

¹⁰ Jesús ni xkgalhi talakgalhin chu tlan xkatsi tuku xlakpuwamakgo latamanin (Juan 2:25). Wa xlakata ni kajwatiya xʼakxilha tuku xtlawakgo, na xʼakgatekgsa tuku xlakata chuna xtlawakgo. Akgtum liʼakxilhtit, makgtum makgapitsi latamanin xalak Galilea xputsamakgo Jesús (Juan 6:22-24). Pero xkatsi pi ni kaj xkgaxmatniputunkgo wata kaj kskiniputunkgo taway. Wa xlakata kastakyawalh, pero ni xatasitsi, chu kawanilh tuku xlitlawatkan wanit xlakata xtalakgpalikgolh (kalikgalhtawakga Juan 6:25-27).

11. 1) ¿La nalikatsiya komo minkamanan lakgatikgo lichuwinankgo Dios? 2) ¿La natlawaya xlakata minkamanan tlakg nalakgatikgo nalichuwinankgo Dios?

¹¹ Xlikana, wix ni chuna la Jesús chu nila katsiya tuku lakpuwamakgo minkamanan. Pero tlan naliskuja xlakata nakaʼakgatekgsniya tuku xlakata wi tuku tlawakgo. Akgtum liʼakxilhtit, max minkamanan na ankgo lichuwinankgo Dios akxni wix pina. Pero kakgalhskinka: «¿Tuku xlakata ankgo lichuwinankgo Dios? ¿Xlakata lakgatikgo? ¿O kaj xlakata wi tuku ktiwayaw?». Komo nakatsiya pi minkamanan ni lakgatikgo lichuwinankgo Dios, wi tuku katlawa xlakata tlakg nalakgatikgo. Wi tuku kakamatlawi nema ni laktuwa xlakata namakgkatsikgo pi na makglichuwinamakgolh Dios.

12. 1) ¿Tuku kamakgatekgsnilh Jesús kstalaninanin? 2) ¿Tuku xlakata kstalaninanin xlakaskinkgo pi Jesús xkamakgatekgsnilh?

¹² Apulaktu la Jesús kamakgtayalh kstalaninanin. Xla xkatsi pi komo wi tiku xtlawalh talakgalhin, max alistalh natlawa tlakg lanka talakgalhin. Wa xlakata kawanilh kstalaninanin pi kuenta xtlawakgolh. Akgtum liʼakxilhtit, kstalaninanin xkatsikgo pi ni xlitlawatkan xwanit talakgxtumit nema ni xlitatlawat. Pero Jesús kawanilh la max xtlawakgolh umakgolh talakgalhin. Kawanilh pi komo chatum chixku chuntiya xʼakxilhli chatum tiku ni xpuskat xlakata tatamaputun, tatlawamaja talakgalhin «kxnaku». Chu kamaxkilh uma tastakyaw: «Komo milakgastapu xalak minpakgastakat makgchakgxniman, kalakpimaxtuka» (Mat. 5:27-29, TNM). ¿Tuku xlakata xtalakaskin pi xkamakgatekgsnilh putum uma? Xlakata tiku xlamakgolh kxkilhtamakujkan lhuwa xtlawakgo talakgxtumit xalimaxana chu xʼakxilhkgo teatros nema xlitsama talakgxtumit chu laklixkajni tachuwin. Xlakata Jesús xkapaxki kstalaninanin, kawanilh pi xtamakgatlinikgolh tuku xtlawalh pi xlakgalhinankgolh.

13, 14. ¿La tlan nakamakgtayaya minkamanan ni nalaksakkgo nalipaxuwakgo tuku nitlan?

¹³ Milikuentajtlawat minkamanan xlakata ni natlawakgo tuku Jehová nitlan akxilha. Lu nitlan, pero asta laktsu kamanan katuwa wilakgolh, xlakata max naʼakxilhkgo tiku ni lhakganankgonit chu atanu fotos nema xalaklixkajni. ¿La nakakuentajtlawaya minkamanan? Xlikana, kakawani pi nitlan akxilhkan tiku ni lhakganankgonit. Pero ni kajwatiya uma.  Akstu kakgalhskinka: «¿Katsikgo kinkamanan pi nitlan akxilhkan tiku ni lhakganankgonit? ¿Tuku max natlawa pi naʼakxilhputunkgo? ¿Kiwanikgo putum tuku lakpuwankgo chu ni maxanankgo? Komo makgkatsikgo pi akxilhputunkgo tiku ni lhakganankgonit, ¿nakilitachuwinamputunkgo?». Maski minkamanan lu laktsinajku, tlan nakawaniya: «Komo namin kilhtamaku natekgsa kʼInternet niku limin fotos xla talakgxtumit chu max naʼakxilhputuna, kakiwani. Ni kapekuanti chu ni kalilakgaputsa, kmakgtayaputunan».

¹⁴ Akxni nalaksaka tuku nalipaxuwaya, pulana kalakpuwanti tuku liʼakxilhtit nawilinikgoya minkamanan. Tlat nema talichuwinalh kpárrafo 9 wan pi natlatni lhuwa tuku tlan nakawani xkamanan, pero kamanan natlawakgo putum tuku naʼakxilhkgo pi tlawakgo xnatlatnikan. Komo laksaka tatlakgni, películas chu likgalhtawakga nema ni limin tuku xalixkajni, max minkamanan nachuna natlawakgo (Rom. 2:21-24).

15, 16. 1) ¿Tuku xlakata liwana katsiya pi Jehová namakgtayayan nakamakgastaka minkamanan? 2) ¿Tuku naʼakxilhaw kʼatanu artículo?

¹⁵ ¿Tuku lalh akxni Manóah skinilh Jehová tamakgtay xlakata la namakgastaka aktsu xkgawasa? «Xaxlikana Dios kgaxmatnilh Manóah.» (Juec. 13:9.) Wa xlakata na liwana kakatsi pi Jehová nakgaxmata mioraciones chu namakgtayayan tlan nakamakgastaka minkamanan. Namakgtayayan tlan nalimasiyanikgoya minkamanan pi kapaxkiya, taktujuya chu kaʼakgatekgsniya.

¹⁶ Pero Jehová ni kajwatiya katimakgtayan nakamasiyaniya laktsu kamanan. Chuntiya namakgtayayan akxni minkamanan tlakg nastakkgo. Kʼartículo nema aku mima naʼakxilhaw la tlan natlawaya xliʼakxilhtit Jesús chu nalimasiyanikgoya minkamanan pi kapaxkikgoya, taktujuya chu kaʼakgatekgsniya. Chuna nakamasiyaniya naskujnanikgo Jehová.