1, 2. 1) ¿Tuku tlawalh Jehová makgasata? 2) ¿Tuku akstu kakgalhskinkan la uku makgapitsi latamanin?

CHUNA la katsiyaw kimputumkan ni tatatlaputunaw. Komo milh kilhtamaku xkgalhiya lu tuwa tajatat, max akstu kgalhskinka komo xpimpat paksa. O max akstu kgalhskinkana komo miʼamigo o kmifamilia wi tiku lu tatatla. Biblia lichuwinan makgapitsi latamanin tiku na akstu xkakgalhskinkan komo xʼamakgolh pakskgo. Chuna akstu xkgalhskinkan mapakgsina Ocozías, xkgawasa Acab chu Jezabel. Xla mokgosli chu xkatsiputun komo xʼama paksa. Alistalh mapakgsina Ben-hadad xalak Siria na xkatsiputun komo xʼama paksa (2 Rey. 1:2; 8:7, 8).

² Akxni xtsokgmaka xtachuwin Dios, milh kilhtamaku Jehová maklakaskilh xlitliwakga xlakata nakamapaksa makgapitsi latamanin. Asta kamaxkilh xlitliwakga makgapitsi palakachuwinanin xlakata nakamalakastakwanikgo tiku xnikgonita (1 Rey. 17:17-24; 2 Rey. 4:17-20, 32-35). Wa xlakata, makgapitsi latamanin tiku tatatlakgo kakgalhskinkan komo  la uku Dios nalimaklakaskin xlitliwakga xlakata nakamapaksa.

3-5. 1) ¿Tuku tlan tlawakgo Jehová chu Jesús? 2) ¿Tuku takgalhskinin nakgalhtiyaw?

³ Jehová tlan limaklakaskin xlitliwakga xlakata natlawa pi makgapitsi latamanin natatatlakgo. Akgtum liʼakxilhtit, Jehová limalakgaxokgelh akgtum tajatat mapakgsina xalak Egipto chu xtala tsumat Moisés (Gén. 12:17; Núm. 12:9, 10; 2 Sam. 24:15). Chu akxni israelitas ni kgalhakgaxmatkgolh, Dios kalimalakgaxokgelh plagas chu tajatat (Deut. 28:58-61). Pero Jehová na tlan limaklakaskin xlitliwakga xlakata nakamakgtaya kskujnin chu tlan tlawa pi ni natatatlakgo (Éx. 23:25; Deut. 7:15). Milh kilhtamaku kamapaksalh kskujnin. Akgtum liʼakxilhtit, mapaksalh Job akxni lu xtatatla chu xniputun (Job 2:7; 3:11-13; 42:10, 16).

⁴ Chuna la Jehová, Jesús tlan kamapaksa latamanin. Akxni xlama kkatiyatni, kamapaksalh leprosos, epilepticos, tiku nila xlakawanankgo, tiku nila xtlawankgo chu atanu tatatlanin (kalikgalhtawakga Mateo 4:23, 24; Juan 9:1-7). Tuku tlawalh Jesús kinkamalakpuwaniyan putum tuku natlawa kParaíso. Akxni anta nalatamayaw ni chatum lataman nawan ktatatla (Is. 33:24).

⁵ Wa xlakata, komo lu tatatlayaw, ¿kililakpuwanatkan la uku pi Jehová o Jesús nakinkamapaksakgoyan? ¿Tuku pulana kiliʼakxilhtkan komo wi tuku likuchumputunaw?

6. ¿Tuku wan Biblia xlakata milagros nema xtlawakgo xapulana kstalaninanin Cristo?

⁶ Jehová kamaxkilh xʼespíritu santo xapulana kstalaninanin Cristo, chu makgapitsi tlan tlawakgolh milagros (Hech. 3:2-7; 9:36-42). Akgtum liʼakxilhtit, makgapitsi mapaksakgolh tatatlanin chu makgapitsin xchuwinankgo atanu tachuwin nema ni xkatsinikgo (1 Cor. 12:4-11). Pero Biblia lichuwinalh pi xʼama sputa milagros, chu chuna lalh (1 Cor. 13:8). Wa xlakata la uku ni lakpuwanaw pi Dios natlawa akgtum milagro xlakata nakinkamapaksayan o nakamapaksa kifamiliajkan.

7. ¿La kinkamatliwakglhan Salmo 41:3?

⁷ Pero komo lu tatatlayaw, Jehová tlan nakinkamamakgkatsiniyan chu nakinkamakgtayayan. Chuna kamakgtayalh kskujnin xala makgasa. Mapakgsina David tsokgli: «Paxuwa tiku makgtaya tiku nitu kgalhi, Jehová nalakgmaxtu akxni tuwa natitaxtu. Jehová namaki chu natlawa pi ni nani» (Sal. 41:1, 2, TNM). ¿Xwamputun David pi komo chatum lataman xala uku namakgtaya tiku nitu kgalhi, nikxni katinilh? Ni. Xwamputun pi komo lataman xtatatlalh, Dios xmakgtayalh chu xkuentajtlawalh (Sal. 41:3). Tlan limakgkatsiyaw akxni katsiyaw pi Jehová katsi tuku patimaw chu kinkalakapastakan. Xla kinkamaxkiyan litliwakga  chu liskgalala xlakata natayaniyaw tajatat. Nachuna kinkatlawan pi tlan napaksaw komo nakgalhiyaw akgtum tajatat.

8. Chuna la akxilhwi kSalmo 41:4, ¿tuku wanilh David Jehová akxni xtatatla?

⁸ Salmo 41 lichuwinan akxni mapakgsina David lu xtatatla. Max lu xlakgaputsa xlakata Absalón xmakglhtiputun xtamapakgsin. Pero David lu xtatatla chu nila tuku xtlawa. Xkatsi pi taʼakglhuwit nema xkgalhi wa xlakata talakgalhin nema xtatlawanit Bat-seba (2 Sam. 12:7-14). ¿Tuku tlawalh? Wanilh Jehová: «Kakilakgalhamanti. Kakimapaksa, xlakata ktlawanit talakgalhin kmilakatin» (Sal. 41:4). David xkatsi pi Jehová xtapatinit xtalakgalhin chu skinilh xtamakgtay akxni xtatatla. Pero ¿xlakaskin pi Jehová xtlawalh akgtum milagro chu xmapaksalh?

9. 1) ¿La makgtayalh Jehová mapakgsina Ezequías? 2) ¿La xlakaskin David pi Jehová xmakgtayalh?

⁹ Makgasata, Jehová limaklakaskilh xlitliwakga xlakata nakamapaksa makgapitsi latamanin. Akgtum liʼakxilhtit, mapakgsina Ezequías xʼama niy, Jehová tlawalh pi xpaksli chu xlatamalh 15 kata (2 Rey. 20:1-6). ¿Na xlakaskin David pi Jehová xlimapaksalh akgtum milagro? Ni. Xla xlakaskin pi Dios xmakgtayalh chuna la xmakgtayalh chatum lataman tiku tlan likatsi «tiku nitu kgalhi». David tlan xʼamigo Jehová xwanit, wa xlakata xwani pi tlan xmamakgkatsinilh chu xkuentajtlawalh akxni xtatatlalh. Na wanilh pi xmakgtayalh xlakata tlan xlatamapa. Akinin na tlan naskinaw tuku skilh David (Sal. 103:3).

10. ¿Tuku kinkamasiyaniyan tuku titaxtukgolh Trófimo chu Epafrodito?

¹⁰ Apóstol Pablo chu atanu kstalaninanin Cristo xkgalhikgo litliwakga xlakata xkamapaksakgolh latamanin (kalikgalhtawakga Hechos 14:8-10). Akgtum liʼakxilhtit, akgtum kilhtamaku Pablo mapaksalh chatum chixku tiku klhkuyatla chu lu snun xtatatla. Hechos 28:8 wan pi tlawalh «oración, pus tiwililh xmakan kxokgspun, na timapaksalh». Pero Pablo ni putum kamapaksalh latamanin tiku kalakgapasli. Akgtum liʼakxilhtit, xkgalhi chatum amigo xwanikan Trófimo, tiku kstalaninit akxni xlichuwinama Dios (Hech. 20:3-5, 22; 21:29). Akxni xʼamakgolh, Trófimo tatatlalh. Pero Pablo ni mapaksalh, wa xlakata Trófimo nialhla stalanilh (2 Tim. 4:20). Pablo xkgalhi atanu xʼamigo, xwanikan Epafrodito. Biblia lichuwinan pi tatatlalh chu xʼamaja xniy, pero ni wan pi apóstol mapaksalh (Fil. 2:25-27, 30). Chuna la akxilhaw, Pablo chu amakgapitsi kstalaninanin Cristo ni putum kamapaksakgolh xnatalan.

11, 12. 1) ¿La max makgtayalh makuchina Lucas Pablo? 2) ¿Tuku katsiyaw xlakata Lucas?

¹¹ Lucas makuchina xwanit chu milh kilhtamaku akxtum taʼalh Pablo akxni makgat kkachikin xʼan lichuwinan Dios (Hech. 16:10-12; 20:5, 6; Col. 4:14). Max wa Lucas makgtayalh Pablo chu amakgapitsi kstalaninanin Cristo akxni xtatatlakgo, akxni makgat xʼankgo (Gál. 4:13). Chuna la wa Jesús, tiku tatatlakgo  lakaskinkgo namakgtayakgo makuchina (Luc. 5:31).

¹² Lucas ni kaj watiya xlakgati stakyawanan xlakata ni natatatlakan. Xla xlikana makuchina xwanit. Wa xlakata akxni tsokgli libro xla Lucas chu xla Hechos, limaklakaskilh makgapitsi tachuwin nema kaj makuchinanin xlimaklakaskinkgo chu na lichuwinalh makgapitsi la mapaksanalh Jesús. ¿Tuku kilhtamaku chu niku katsinilh makuchina nalitaxtu? Biblia ni lichuwinan. Pero max kʼakgtum escuela niku xmasiyakan la makuchinankan nema xwi kLaodicea, lakatsu niku xwi lanka kachikin Colosas. Max wa xlakata Pablo lichuwinalh Lucas akxni tsokgli carta nema kamalakgachanilh colosenses chu kawanilh pi xkamalakgachani xtapakgachipat.

13. ¿Tuku kililakapastakatkan akxni kinkawanikanan pi wi tuku tlan nalikuchunaw?

¹³ La uku ni anan chatum tala tiku tlan nakinkamapaksayan. Pero makgapitsi natalan kinkamakgtayaputunkgoyan xlakata tlakg tlan natawilayaw chu max nakinkawanikgoyan tuku tlan namaklakaskinaw, maski nitu kawaninitaw. Xlikana, makgapitsi max makgtayanan. Akgtum liʼakxilhtit, Pablo xkatsi pi Timoteo xtatatla xlakata xpakatsan, max xlakata xwanit chuchut nema xtalakgalhinit. Wa xlakata wanilh pi xwalh tsinu vino (kalikgalhtawakga 1 Timoteo 5:23). * (Kalikgalhtawakga nota.) Pero kilikuentajtlawatkan tuku nakinkawanikanan. Max chatum tala lu nakinkawaniyan pi nakinkamatlaniyan akgtum likuchun o atanu nema ni likuchun. O max nakinkawaniyan pi wi tuku kawaw o ni kawaw. Max nakinkawaniyan pi wa makgtayalh chatum xalak xfamilia tiku nawa tajatat xkgalhi. Uma ni wamputun pi na nakamakgtaya amakgapitsin. Wi tiku kamakgtaya likuchun o tuku kamaxkikan, pero makgapitsi katlawani nitlan (kalikgalhtawakga Proverbios 27:12).

14, 15. 1) ¿Tuku xlakata kuenta kilitlawatkan xlakata likuchun? 2) ¿Tuku kinkamasiyaniyan Proverbios 14:15?

¹⁴ Kimputumkan ni tatatlaputunaw xlakata tlan nalatamayaw chu naskujniyaw Jehová. Pero xlakata makglakgalhinanin akinin, tatatlayaw. Max tlan nalaksakaw tuku nalikuchumputunaw, chu akinin kinkalakgchanan nalaksakaw tuku nakinkalimakuchikanan. Pero kuenta kilitlawatkan. Makgapitsi latamanin nakinkawanikgoyan pi kgalhikgo likuchun nema nakinkamapaksayan. Pero max chuna wankgo xlakata tlajaputunkgo lhuwa tumin. Max nawankgo pi lhuwa latamanin maklakaskimakgolh chu kamakgtayanit. Pero ni tlan kaj katuwa namaklakaskinaw kaj xlakata tlakg  tlan namakgkatsiyaw chu tlakg makgas nalatamayaw. Proverbios 14:15 wan pi lataman tiku skgalala ni putum kanajla tuku wanikan, wata pulana lakpuwan tuku natlawa.

¹⁵ Komo kuenta natlawayaw, nakatsiyaw tuku natlawayaw akxni nakinkawanikanan tuku namaklakaskinaw, chuna kilitlawatkan komo tiku kinkawaniman ni makuchina. Akstu kakinkakgalhskinkan: «¿Liwana kkatsi pi ama vitamina, dieta o tuku kiwanika pi naklipaksa kamakgtayanit amakgapitsi latamanin? Maski makgapitsi kamakgtayanit, ¿la klikatsi pi na nakimakgtaya? ¿Tlakg kililakputsanat xlakata tuku kiwanimaka o tlakg tlan nakkgalhskin chatum makuchina? (Deut. 17:6).

16. ¿Tuku kililakpuwanatkan akxni wi tuku likuchumputunaw?

¹⁶ Na kuenta kilitlawatkan tukuya estudios nakinkatlawanikanan chu tuku nalaksakaw nalikuchunaw (Tito 2:12). Lu xlakaskinka kuenta natlawayaw komo ni liwana katsiyaw tuku kinkawanikanan nalikuchunaw. ¿Tlan liwana nakinkawaniyan la limaklakaskinkan? ¿Wi tuku ni liwana taʼakgatekgsa tuku kilimakuchiputun? ¿Lhuwa makuchinanin maklakaskinkgo? (Prov. 22:29.) Max  wi tiku nakinkawaniyan pi tekgskanit uma likuchun niku lu makgat chu lhuwa makuchinanin nina lakgapaskgo. Pero ¿xlikana anan tuku tlan likatsikan pi anan ama likuchun? O max asta nakinkamaxkiputunan likuchun nema «kgalhi litliwakga nema tawan pi tlan nakinkamakgtayayan». Uma lu katuwa nawili kintakanajlakan. Jehová ni lakaskin pi namaklakaskinaw magia o atanu litliwakga (Deut. 18:10-12; Is. 1:13).

17. ¿Tuku lakaskinaw kimputumkan?

¹⁷ Akxni xlamakgolh xapulana kstalaninanin Cristo, natalan tiku xpulalinkgo la xtalichuwinan Dios, kamalakgachanikgolh maktum carta kstalaninanin Cristo xlakata xkawanikgolh pi wi tuku ni xlitlawatkan xwanit. Carta xlisputa uma tachuwin: «¡Lu tlan katawilatit!» (Hech. 15:29). Uma tachuwin xlimaklakaskinkan akxni wi tiku xʼamaja. Pero kinkamalakapastakayan pi lakaskinaw tlan natawilayaw kimputumkan.

18, 19. ¿Tuku nakinkamaxkiyan Jehová kparaíso?

¹⁸ Xlakata makglakgalhinanin akinin, kimputumkan tatatlayaw. Akxilhnitawa pi la uku Jehová ni katitlawalh milagros xlakata nakinkamapaksayan. Pero katsiyaw pi kilhtamaku nema aku mima Dios nakinkamakglhtiyan putum kintajatatkan. Apóstol Juan lichuwinalh «nchuchut xla latamat» chu makgapitsi «nkiwi xla latamat» nema kamapaksa putum latamanin (Apocalipsis [Revelación] 22:1, 2). ¿Xkilhchanima wi tuku tlan nawayaw la uku o kparaíso? Ni. Xkilhchanima putum tuku Jehová chu Jesús natlawakgo xlakata tlan nalatamayaw putum kilhtamaku (Is. 35:5, 6).

¹⁹ Lu kgalhkgalhimawa latamat kparaíso. Maski nina chin ama kilhtamaku, tlan limakgkatsiyaw xlakata katsiyaw pi Jehová kinkapaxkiyan chu katsi la patinanaw akxni tatatlayaw. Chuna la David, kanajlayaw pi Jehová ni kintikamakgxtakgni. Komo ni namakgxtakgaw, putum kilhtamaku nakinkakuentajtlawayan (Sal. 41:12).