¿Tuku tlan natlawaya xlakata ni namalakatsaliya la xlilhuwa kuchu nawaya?

XLIʼAKXILHTIT Tony, tiku lichuwinaw kxapulana artículo, max tanu la xtikitaxtunilh komo xla xtikatsilh pi xkgalhi akgtum taʼakglhuwit. Pero komo tlan xwa lhuwa kuchu chu xtasiya pi nitu xtlawani, lakpuwa pi putum tlan xwi. ¿Tuku xlakata litaʼakgskgawilh?

Xlakata kuchu ni liwana xma’akxilhni tuku xlikana xlama. Maski xla ni xʼakxilha, xʼakskitit ni liwana xmakgtaya nakatsi la xwi xmakni, xtapuwan chu tuku xmakgkatsi. Chu akxni tlakg xwa kuchu tlakg ni xkatsi tuku xtlawa.

Na xlin kuenta pi nila xmachokgo la xwaputun kuchu. Alberto nachuna xʼakgspula. Pulana ni xlitaya pi xmalakatsali la xwa kuchu. Xla wan: «Tsekg xakwa kuchu, chu akxni xakmalakatsali xaklakpuwan pi nitu xlama o ni kuenta xaktlawani. Akit chuntiya xakwaputun kuchu». Wa xlakata maski lhuwa tuku xkawanikan Tony chu Alberto xlakan xlakpuwankgo pi kuchu nitu xkatlawani. Pero uma nichuna xwanit, xlakata kuchu xkaʼakgchipanit. ¿Tuku tlan natlawakgo tiku nachuna titaxtumakgo?

Liwana kalakkaxwili tuku natlawaya

Lhuwa tiku makgxtakgkgonit kuchu stalanikgonit uma xtastakyaw Jesús: «Komo milakgastapu xalak mimpakgastakat maʼakgchakgxniman, kamaxtu chu kamakganti. Xlakata tlakg tlan namakgatsankgaya tuku litakgatsi mimakni chu ni minchatuminika naʼan kʼGehena» (Mateo 5:29).

Liwana tasiya pi Jesús malakatsalima tuku wan. Pero xla xlakaskin pi xʼakgatekgswi pi lu xlakaskinka namapanuyaw putum tuku malaktlawi la talalinaw Dios. Chu maski uma lu nakinkakatsaniyan xtachuna akxni wi tuku nachukuktikan kkimaknikan, tlawa pi natamakgatliniyaw tapuwan nema nakinkalinan namalakatsaliyaw la wakan kuchu. Wa xlakata komo wi tiku waninitana pi wix lhuwa waya kuchu, nialh lu kawat. a Komo akxilha pi nila machokgoya, nialh para tsinu kawat. Maski lu tuwa namakgkatsiya namakgxtakga tlakg tuwa nakitaxtuniyan komo ni namakgxtakga.

Pero ¿tuku la komo wi tiku lhuwa wa kuchu pero ni xakgotni? ¿Tuku nalakkaxwili xlakata ni namalakatsali la xlilhuwa kuchu nawa?

Niku tekgskan tamakgtay

1. Ankgalhin katlawa oración. Putum tiku kanajlanikgo Dios chu makgapaxuwaputunkgo, Biblia kawani: «Putum kilhtamaku kamakatsinitit Dios mintalakgaputsitkan, chu katasaskinitit xliputum minakujkan chu kapaxtikatsinitit akxni tlawaniyatit oración; chu Dios nakamaxkiyan takaksni nema latamanin nila akgatekgskgo, chuna, xpalakata Jesucristo» (Filipenses 4:6, 7). Pero ¿tuku nawana kmiʼoración xlakata namakgkatsiya xtakaksni Dios?

Pulana, miliʼakgatekgsat pi nila makgxtakga kuchu chu nalitayaya pi wix lipina kuenta. Nachuna, komo nawaniya Dios tuku lakkaxwilinita natlawaya xla namakgtayayan, namakgxtakga kuchu chu ni katikgalhi lhuwa taʼakglhuwit. Proverbios 28:13 wan: «Tiku matsekga xtalakgalhin nitlan kitaxtuniyacha, pero tiku wan chu nialh chuna tlawa nalakgalhamankan». Jesús nakinkawanin pi kaskiniw Dios: «Ni kamasta talakaskin naktlawayaw tuku nitlan, wata kakinkakuentajtlawa xlakata Satanás nitu nakinkatlawaniyan» (Mateo 6:13, nota). ¿Tuku tlan natlawaya xlakata nalimasiyaya pi xlikana tuku wana kmiʼoración? ¿Chu niku natekgsa xtakgalhtin miʼoración?

2. Kaputsa litliwakga kBiblia. Kalakapastakti pi «xtachuwin Dios xastakna chu lhuwa litliwakga kgalhi [...] chu tlan masiya tuku lakpuwan chu tuku tlawaputun xnaku» (Hebreos 4:12). Tuku kamakgtayanit tiku lu xakgotnin wa nalikgalhtawakgakgo chu nalilakpuwankgo makgapitsi versículos xalak Biblia chali chali. Chuna la wa Salmista, «paxuwa chixku tiku ni stalani xtastakyawkan tiku nitlan likatsikgo, [...] wata lipaxuwa xlimapakgsin Jehová; kakuwani chu katsisni likgalhtawakga». Chu alistalh wan tuku xlakata: «Putum tuku natlawa tlan nakitaxtuni» (Salmo 1:1-3).

Alberto, tlan makgxtakgli kuchu xlakata xkatakgalhtawakga Biblia xtatayananin Jehová. Xla wa: «Xlikana kkatsi pi komo ni xkintimakgtayalh xtastakyaw Biblia nila xaktimakgxtakgli kuchu chu la uku nialh xaklatamalh».

3. Kamachokgo mimakni. Biblia wan pi makgapitsi latamanin tiku xtapakgsikgo kcongregación xla kstalaninanin Cristo chu pulana kgotnin xwankgonit kalichakgeka «xʼespíritu kiDioskan» (1 Corintios 6:9-11). ¿La tlawaka uma? Wa espíritu santo kamakgtayalh namakgxtakgkgo kuchu. Wa xlakata xtachuwin Dios wan: «Ni kakgachitit [...] wata chuntiya kalitatsamatit espíritu» (Efesios 5:18; Gálatas 5:21-23). Jesucristo liwana wa «minTlatkan tiku wi kʼakgapun nakamaxki espíritu santo tiku skinikgo». Wa xlakata wa: «Chuntiya kaskintit, chu nakamaxkikanatit» (Lucas 11:9, 13).

Wa xlakata tiku makgapaxuwaputunkgo Dios talakaskin nakatsinikgo machokgokgo xmaknikan. Chu tuku nakamakgtaya wa nalikgalhtawakgakgo Biblia chu ankgalhin natlawakgo oración. Chu komo taxlajwaniyaw kalakapastakwi uma tamalaknun: «Tiku chananama chu wa lilakpuwan tuku tlawaputun espíritu, namakgala latamat nema ni kgalhi xlisputni kaj xlakata espíritu. Wa xlakata ni kalimakgxtakgwi chuna la tlawamaw tuku tlan, xlakata namakgalananaw akxni xlilat komo ni natlakgwanaw» (Gálatas 6:8, 9).

4. Kakuentajtlawa tiku katalalipina. Proverbios 13:20 wan: «Tiku katalalin xalakgskgalalan latamanin xaskgalala nawan, pero tiku katalalin tiku lu xalak tontos nitlan katikitaxtunilh». Komo chuna, tlan nawan pi nakawaniya miʼamigos pi nialh lhuwa kuchu katiwa. Chu ni kaks kalilakawanti komo makgapitsin nalikgalhkgamanankgoyan chu natlawaputunkgo pi chuntiya kamalakatsali la waya kuchu. Biblia wan pi lhuwa «kaks lilakawankgo» chu “lu nitlan kalichuwinankgo” xpalakata tiku xmakgxtakgputunkgolh “la xwakgo kuchu chu xtlawakgo xaʼakglakgwa paskua” (1 Pedro 4:3, 4). Komo miʼamigos chuna tlawakgoyan kakatamakgatlini.

5. Liwana kalakkaxwili tuku natlawaya. Romanos 12:2 wan: «Nialh kalikatsitit chuna la latamanin xalak uma kakilhtamaku, wata katalakgpalitit, kamasastitit chuna la lakpuwanatit, xlakata tlan liwana nalakgapasatit xtalakaskin Dios, nema xatlan, nema xaʼakgstitum, chu nema xla tlan akxilha». ¿Makgapaxuwaputunatit Dios? Komo chuna tuku nalakkaxwiliya kapulalilh xtastakyaw Biblia chu ni wa tuku wankgo latamanin. Pero ¿la nakatsiya la xlilhuwa nawaya kuchu?

Ni lu tuwa: komo nialh liwana lakapastaknana chu nialh katsiya tuku tlawapat, wamputun pi malakatsalinitata la wapat kuchu. Wa xlakata komo nawaya kuchu milikatsit la xlilhuwa nawaya, chu chuna katlawa, ni namalakatsaliya. Miʼakstu kalakputsananikanti. Chu kalakapastakti pi tlakg tlan ni nawaya kuchu nixawa namalakatsaliya.

6. Kakatsini nawana ni. Uma wamputun pi: «Komo nawana “tlan”, kamakgantaxti; pero komo nawana “ni”, na kamakgantaxti» (Mateo 5:37). Akxni wi tiku waniyan kawapara, maski ni tlawaniputunan tuku nitlan, kakatsini nawana ni. Pero ni xatasitsin nawana wata kawanti chuna la wan Colosenses 4:6: «Tlan katakgaxmatli mintachuwinkan, xtachuna la xlimakgamitit matsat, xlakata nakatsiyatit chuna la nakakgalhtiyatit chatunu chatunu lataman».

7. Kaputsa tamakgtay. Kaputsa amigos tiku namakgtayakgoyan namatliwakglha mintakanajla chu namakgtayakgoyan namakgxtakga kuchu. Biblia wan: «Tlakg tlan chatiy nixawa kaj chatum, xlakata lhuwa tuku makglhtinankgo xlakata lhuwa skujkgo. Xlakata komo chatum lhtuja, achatum tlan namaki xcompañero» (Eclesiastés 4:9, 10; Santiago 5:14, 16). Xlakata tuku lichuwinamaw, Instituto Nacional sobre el Abuso del Alcohol y el Alcoholismo, xla Estados Unidos, wan: «Akxni makgkatsiya pi lu waputuna kuchu kakaskini tamakgtay mifamilia chu miʼamigos».

8. Ni kataxlajwani. Santiago 1:22, 25 wan: «Kamakgantaxtitit xtachuwin Dios chu ni kajwatiya kakgaxpattit, ni miʼakstukan kalitaʼakgskgawitit ni xaxlikana mintalakapastaknikan. Pero tiku liwana lakputsanani limapakgsin nema xatakgatsin chu masta lakgtaxtut, chu chuntiya makgantaxti uma limapakgsin, litaxtunit chatum tiku makgantaxti xtachuwin Dios, nichuna la tiku kaj kgaxmatli chu patsankgalh; chu nalipaxuwa putum tuku natlawa».

Nialh xakgotni nawana

Xlikana pi ni putum tiku malakatsalikgo akxni wakgo kuchu ni xakgotni litaxtukgo. Pero tiku malakatsalikgo la wakgo kuchu o ankgalhin chuna tlawakgo tlan nakasmanipasa kuchu kxmakni o kxtalakapastakni. Xlakata nialh xakgotni nawan chatum lataman ni kaj talakaskin namakgxtakgputun kuchu chu tamakgtay xlakata takanajla. Alberto lakaspataka: «Akxni xakliskujma nakmakgxtakga kuchu xakmakgkatsi pi lu xkinkatsani kimakni xlakata ni xakwa kuchu. Wa uma kilhtamaku akxni kakxilhli pi na xakmaklakaskin xtamakgtay makuchina chu ni kajwatiya xtamakgtay kintakanajla».

Lhuwa tiku lu xakgotni xwankgonit nachuna lakpuwankgo. b Xlakata ni nakgachikgo chu namakgapaxuwakgo Dios makgapitsi latamanin katamaknukan khospital xlakata natayanikgo tasipanit nema makgkatsikgo xlakata ni wakgo kuchu o xlakata nakamaxkikan likuchun nema nakamakgtaya xlakata nialh lu nawaputunkgo kuchu. Asta xkgawasa Dios, tiku tlan xtlawa milagros wa: «Tiku lakgtliwakgan ni maklakaskinkgo makuchina, pero tiku tatatlakgo maklakaskinkgo makuchina» (Marcos 2:17).

Kakgalhakgaxmatwi Dios

Xalaktlan tastakyaw nema minkgo Biblia wa xaxlikana Dios tiku kamasta. Xla ankgalhin lakaskin tuku tlakg tlan kimpalakatakan. Alberto, tiku kgalhiya puxamatati kata lata makgxtakglhli kuchu chuntiya lipaxuwa akxni lakapastaka tuku titaxtunita. Maski xtasaputun xla wan: «Lu klipaxuwalh akxni kkatsilh pi tlan xaklakgpalilh kilatamat, pi Jehová xkimakgtayaputun, kiʼakgtekgsni, kililakgaputsa chu kimakgtaya akxni tlakg kmaklakaskin. Nikxni ktipaxtikatsinikgolh putum tuku tlawanit kimpalakata.

Wa xlakata, komo lhuwa waya kuchu o xakgotni wix, ni kataxlajwani. Alberto kaj akgtum liʼakxilhtit xpalakata lhuwa tiku chuna titaxtumakgo la wix, chu nialh wakgo lhuwa kuchu o asta makgxtakgkgonit. Xlakan liwana katsikgo pi tlan tuku tlawakgonit chu wix nachuna namakgkatsiya.

Komo nalakkaxwiliya pi nialh lhuwa nawaya o namakgxtakga kuchu liwana kalakapastakti umakgolh xtachuwin Jehová: «¡Komo xkgalhakgaxpatti kilimapakgsin!, mintakaksni xtachuna xwa la akgtum kgalhtuchokgo, chu tuku xaʼakgstitum xtlawa xtachuna xwa la takgayawana xalak pupunu» (Isaías 48:18).

[Notas]

[Dibujo chu recuadro]

 «¿Kmalakatsalima la xlilhuwa kwa kuchu?»

Kakgalhskinkanti:

• «¿Tlakg kwama kuchu nixawa xapulana?»

• «¿Chali chali kwama kuchu?»

• «¿Tlakg xatliwakga kuchu kwama?»

• «¿Kwa kuchu xlakata ni nakmakgkatsi pi lu ktlakgwanit o nialh naklakapastaka kintaʼakglhuwit?»

• «¿Kiwaninit chatum amigo o tiku xalak kifamilia, pi lhuwa kwama kuchu?»

• «¿Kkgalhinit taʼakglhuwit kkinchik, kimputaskujut o akxni xakpaxilhnama xlakata lhuwa kwa kuchu?»

• «¿Tuwa kmakgkatsi ni nakwa kuchu akgtum semana?»

• «¿Klisitsi komo makgapitsin ni wakgo kuchu?»

• «¿Ni kkawani amakgapitsin la xlilhuwa kwa kuchu?»

Komo nakgalhtinana pi chuna akgtum o liwaka umakgolh takgalhskinin, max malakatsalipat la wapat kuchu.

[Dibujo chu recuadro]

Xlakata nitlan nalimakgkatsiya alistalh

Akxni nina wanita kuchu kalakpuwanti:

• «¿Xlilat nakwa kuchu, o tlan nawan ni nakwa?»

Tastakyaw: Komo katsiya pi nila machokgoya la xlilhuwa waya kuchu tlakg tlan ni kawat.

• «¿La xlipalhuwa nakwa?»

Tastakyaw: Pulana kalakkaxwili la xlilhuwa nawaya xlakata ni namalakatsaliya.

• «¿Tuku kilhtamaku nakwa kuchu?»

Tastakyaw: Nikxni nawaya kuchu akxni namatlawaniya putlaw o akxni natlawaya akgtum taskujut niku talakaskin skgalalh natawilaya, chu na ni nawaya kuchu akxni natlawaya tuku xla takanajla. Na ni kawat kuchu komo nakgalhiya miskgata o komo wapat likuchun.

• «¿Niku nakwa kuchu?»

Tastakyaw: Nikxni kapit niku tasiya pi lhuwa wamaka kuchu, na ni tsekg kawat, chu na ni kawat kxlakatinkan tiku nitlan akxilhkgo wakan kuchu.

• «¿Tiku akxtum nakkatawa kuchu?»

Tastakyaw: Kakatawa miʼamigos o familiares tiku namakgtayakgoyan ni namalakatsaliya; nikxni kakatawa tiku malakatsalikgo la wakgo kuchu.

[Dibujo chu recuadro]

Atanu tiku nachuna titaxtulh

Supot, tiku lama kTailandia, lu xakgotni xwanit. Xapulana kaj katsisni xwa pero tsinu tsinu tsukulh limawaka tsukulh wa tsisa chu tastunut. Lakgachunin xakwa kaj xlakata xakkgachiputun. Pero ktsukulh katakgalhtawakga xtatayananin Jehová chu kkatsinilh pi Dios ni lakgati tiku kgotni. Wa xlakata nialh walh kuchu, pero titaxtulh kilhtamaku wapa chu xfamilia nitlan limakgkatsilh.

Maski chuna xla xpaxki Jehová chu xkakninaniputun chuna la xlilat. Xʼamigos tiku kstalaninanin Cristo chuntiya makgtayakgolh chu makgpuwantinikgolh xfamilia pi ni xlakpuwankgolh pi nikxni xʼama talakgpali chu tlakg lhuwa kilhtamaku akxtum xtatawilakgolh. Wa uma kilhtamaku akxni akxilhli pi 1 Corintios 6:10 wan: «Kgotnin [...] ni katimakglhtinankgolh xTamapakgsin Dios», uma makgtayalh naʼakxilha pi lu nitlan tuku xtlawama. Akxilhli pi xlimakgxtakgat xwanit uma nitlan talismanin.

Uma kilhtamaku liwana lakkaxwililh pi namakgxtakga kuchu. Xlakata xtamakgtay xʼespíritu santo, xtastakyaw xTachuwin Dios, xtamakgtay xfamilia chu congregación, liskujli namakgxtakga kuchu chu makgaxtakgli. Xfamilia lu lipaxuwalh akxni akxilhkgolh pi tamunulh la xtatayana Jehová. La uku, Supot lu tlan talalin Dios la ankgalhin xlakaskinit chu kamakgtaya amakgapitsin na nalakgapaskgo Jehová.