Kalamatliwakglhwi chatunu chatunu
Kalamatliwakglhwi chatunu chatunu
«Kalalimakgpuwantini[...]tit nchatunu amakgapitsin, chu [...] kalamatliwakglhtit nchatunu amakgapitsin.» (1 TESALONICENSES 5:11)
1. ¿Tukuya tasikulunalin kgalhiyaw xlakata tapakgsiyaw kcongregación, pero tukuya tapatin kgalhiyawku?
LHUWA tuku tlan makglhtinanaw akxni tapakgsiyaw kcongregación xla kstalaninanin Cristo. Pulana, lu tlan talalinaw Jehová. Xlakata mastayaw talakaskin pi xtachuwin Dios nakinkapulalinan, ni kgalhiyaw tapatin nema limin akxni lakatsalayaw tuku wan Biblia. Nachuna, lu tlan katalalinaw amigos tiku xlikana kinkapaxkikgoyan chu lakaskinkgo pi xatapaxuwan natawilayaw. ¡Lhuwa tasikulunalin! Pero, lhuwa natalan kgalhikgo taʼakglhuwit, wilakgolh tiku nila akgatekgskgo o ni makgachakgxi tuku xalaktuwa masiya Biblia, wi tiku tatatlakgo, tiku kgalhikgo tajatat xla talipuwan o lipatimakgolh xlakata wi tuku nitlan laksakkgolh natlawakgo kxlatamatkan. Putum na lipatinanaw tapatin nema kgalhikgo tiku ni skujnanikgo Dios.
2. Komo kinatalankan kgalhikgo taʼakglhuwit, ¿tuku kilitlawatkan chu tuku xlakata?
2 Putum nitlan limakgkatsiyaw akxni akxilhaw kintalakan wi tuku lilakgaputsama chu lipatinama. Chuna la lichuwinalh Pablo, congregación xtachuna la akgtum makni «lapi wa lakatum lakni [o makni], katsan, xlipaks [...] katsan [makni]» (1 Corintios 12:12, 26). Akxni wi tiku titaxtuma taʼakglhuwit kilimakgtayatkan. Wa xlakata, nakinkamakgtayayan naʼakxilhaw tuku wan Biblia xlakata makgapitsi kstalaninanin Cristo nema kamakgtayakgolh xnatalan akxni xkgalhikgo taʼakglhuwit. Akxni naʼakxilhaw pulakatunu liʼakxilhtit, kalilakpuwaw: «¿La tlan nachuna nakmakgtayanan? ¿La tlan nakkamakgtaya kinatalan xlakata natatliwakglha xtakanajlakan chu chuna nakmatliwakglha xcongregación Jehová?».
“Linkgolh”
3, 4. Áquila chu Priscila, ¿la makgtayakgolh Apolos?
3 Chuna la wan kHechos, akxni Apolos alh tawila kʼÉfeso, xla lu xkatsiniya la xlichuwinan Cristo: «Na lhuwa xkgalhiy ntakgpuwantin lantla aktanks xlichuwinan, chu xmasiyuy xpalakata nkimPuchinakan [Jesús]; maski xman wa xkatsiy xpalakata xtamunun Juan», pero ni xkatsi xlakata tamunut «kxtukuwini xaTlat, chu kxtukuwini xaKam chu kxtukuwini Spiritu Santo». ¿Tuku xlakata? Max xlakata xkgaxmatnit la xlichuwinankgo Dios kstalaninanin Juan tiku xmununan o na kakgaxmatnilh kstalaninanin Jesús akxni nina xchan Pentecostés xla kata 33. Maski lhuwa xlichuwinan xlakata xaxlikana, wi tuku lu xlakaskinka ni xkatsi. Pero amakgapitsi natalan makgtayakgolh. ¿La makgtayakgolh? (Hechos 1:4, 5; 18:25; Mateo 28:19.)
4 Akxni Áquila chu xpuskat Priscila tiku na kstalaninanin Cristo xwankgonit kgaxmatkgolh la Apolos ni xpekuan akxni lichuwinalh Dios kxpukgalhtawakgakan judíos, linkgolh xlakata tlakg namasiyanikgo tuku xlakaskinka masiya Biblia (kalikgalhtawakga Hechos 18:24-26). Uma tuku tlawakgolh limasiyakgolh pi xpaxkikgo. Max xlakan liwana lakapastakkgolh la nawanikgo xlakata ni xlisitsilh, xlakata kaj xmakgtayaputunkgo. Xlakata Apolos kajwatiya xtsankgani tlakg liwana nakatsi la lakatsukulh xapulana congregación. Chu max Apolos kapaxtikatsinilh xlakata uma tuku lu xlakaskinka masiyanikgolh. Uma tuku masiyanika, “lipikua kamakgtayalh” xnatalan xalak Acaya chu putum xlitliwakga xlichuwinan Dios (Hechos 18:27, 28).
5. ¿Tukuya tamakgtay xatapaxuwan mastakgo lhuwa millones xtatayananin Jehová chu tuku kitaxtu?
5 La uku, lhuwa millones xtatayananin Jehová lu kapaxtikatsinikgo tiku kamakgtayalh naʼakgatekgskgo tuku wan Biblia chu wa xlakata la uku lhuwa natalan lu tlan latalalin. Wantiku xmakgalhtawakganankgo akglhuwa papaʼ kamakgalhtawakgakgolh chu xatapaxuwan tlawakgolh xlakata xkatsikgo pi chuna tlan xlakgmaxtukgolh xlatamatkan (Juan 17:3). ¡Lu xlipaxuwakgo akxni xakxilhkgo pi tiku xkamakgalhtawakgamakgolh xʼakgatekgsmakgolh tuku xaxlikana, xmakgantaxtikgo tuku xkatsinimakgolh chu tamakamastanikgolh Jehová xlakata natlawakgo xtalakaskin!
“Lu tlan xlichuwinankgo yuma nkgawasa”
6, 7. 1) ¿Tuku xlakata Pablo laksakli Timoteo xlakata xtaʼalh lichuwinan Dios? 2) ¿La makgtayalh Pablo Timoteo xlakata tlakg nastaka xtakanajla?
6 Akxni Pablo chu Silas xlimakgtiy ankgolh lichuwinantapulikgo Dios titaxtukgolh kListra. Kʼama kachikin tlakg lakgapaskgolh Timoteo. «Luwa [...] [tlan] xlichuwinankgo xpalakata yuma nkgawasa natalanin nti xwilakgo kListra chu kʼIconio», Timoteo max xkgalhi 20 kata, kgawasaku xwanit. Xtse Eunice chu xnana Loida (xtsiyuna) kstalaninanin Cristo xwankgonit pero xtlat ni (2 Timoteo 1:5). Pablo max akgtiya kata xkalakgapasa uma familia, tikalakgapasli akxni xlipulana xkilanit niku xwilakgolh. Pero ama kilhtamaku tlakg talalilh Timoteo, xtasiya pi lu tliwakga xwi xtakanajla. Lakgkgolotsin xalak congregación mastakgolh talakaskin pi Timoteo xtaʼalh Pablo talichuwinanan Dios (kalikgalhtawakga Hechos 16:1-3).
7 Timoteo lhuwa tuku katsinilh xlakata xtaʼan apóstol Pablo tiku lu tliwakga xwi xtakanajla chu makgasa kskujnanima Dios. Chu uma tuku katsinilh Timoteo xlikana makgtayalh, wa xlakata chalh kilhtamaku Pablo tlan malakgachalh xlakata nakalakgapaxialhnan congregaciones xlakgxokgo. Akgkukitsis kata akxtum taskujli Pablo, uma makgtayalh lhuwa tuku xkatsilh chu max nialh xapekua wa, chu lu tlan xkuentajtlawa congregación (Filipenses 2:19-22; 1 Timoteo 1:3).
8, 9. ¿La tlan nakamakgtayayaw lakgkgawasan chu laktsuman? Kalichuwinanti akgtum liʼakxilhtit.
8 La uku anan lhuwa lakgkgawasan chu laktsuman tiku kstalaninanin Cristo chu lhuwa tuku tlan natlawakgo kxkachikin Jehová. Komo wixin tiku makgasa skujnanipatit Jehová chu tliwakga wi mintakanajlakan nakamakgtayayatit, max nalakpuwankgo tuku tlan xtlawakgolh kxkachikin Jehová chu alistalh tlakg nalakgatayakgo taskujut. Kalilakpuwantit lakgkgawasan chu laktsuman xalak mincongregaciónkan. ¿Kalakgapasatit tiku tasiyakgo pi lhuwa tuku tlan natlawakgo kxkachikin Dios chuna la Timoteo? Akxni wixin nakamakgtayayatit, max alistalh precursores nawankgo, betelitas, misioneros o superintendentes viajantes. ¿La tlan nakamakgtayakan xlakata nalaksakkgo tuku tlawaputunkgo chu tlan namakgantaxtikgo?
9 Maski titaxtunita puxumakaw kata, Martin tiku akgpuxumata kata wi kBetel, lu lipaxuwa akxni lakapastaka la chatum superintendente viajante makgtayalh. Akgtum kilhtamaku akxtum ankgolh lichuwinankgo Dios, chu viajante lu tlan lichuwinalh Betel, xlakata anta kskuja akxni kgawasaku xwanit. Chu wanilh pi na tlan kskujli kBetel chu chuna xmakgtayanalh xkachikin Jehová. Uma tuku lu tlan litachuwinanka ni patsankgalh chu makgtayalh xlakata tuku laksakli natlawa alistalh. ¡Ni katsiyaw la lu tlan nakamakgtaya lakgkgawasan chu laktsuman akxni nakalitachuwinana tuku tlan xtlawakgolh kxkachikin Jehová!
“Namakgpuwantinikgoyatit wanti” nitlan makgkatsikgo
10. ¿La makgkatsilh Epafrodito chu tuku xlakata?
10 Akxni Pablo xtamaknukanit kpulachin kRoma, Epafrodito alh lakgapaxialhnan. Congregación xalak Filipos malakgachalh Epafrodito, makgat tlawalh chu max lu tlakgwalh xlakata xlakgapaxianalh Pablo. Wi tuku xlinima xlakata xlitamakgtayalh Pablo chu na xtatamakgxtakgputun xlakata tlan xmakgtayalh. Pero akxni chalh kRoma, «tatatlalh asta ayuj ni nilh». Xlakata lakpuwa pi ni xmakgantaxtinit tuku xliyawakanit chipalh tajatat xla talipuwan (Filipenses 2:25-27).
11. 1) ¿Tuku xlakata ni nalakpuwanaw pi niti nakgalhikgo tajatat xla talipuwan anta kcongregación? 2) ¿Tuku wa Pablo xlakata tlan xmakgtayaka Epafrodito?
11 La uku lhuwa kgalhikgo tajatat xla talipuwan. Organización Mundial de la Salud wan pi xlikgalhakitsis latamanin naminkilhtamaku chatum nakgalhi tajatat xla talipuwan. Chu xlakskujni Jehová minkilhtamaku na kgalhikgo uma tajatat. Max xlakata nila kakuentajtlawakgo xfamilia, tatatlakgo o xlakata wi tuku nitlan tlawakgonit. ¿La tlan xmatliwakglhkgolh filipenses Epafrodito? Xtalakaskin natlawakgo tuku Pablo kawanilh: «Pus chi kamakgamakglhtinantit kxtukuwini nkinTlatikan, luwa chapaxuwanaj; na kamaxkikgotit nkakni amakgapitsin nti xtachuna lantla yuma. Sampi wa xpalakata kxtaskujut nCristo ayuj ni linilh, xlilakgaputsay xlatamat nalimakgatsiy ntu xkakitsankganiyan natlawayatit» (Filipenses 2:29, 30).
12. ¿La tlan nakamakgtayayaw tiku kgalhikgo tajatat xla talipuwan?
12 Akinin na nakamatliwakglhaw natalan tiku xlajwanankgonit chu wi tuku lilipuwankgo. Max wi tuku tlan nakawaniyaw xlakata la skujnanimakgolh Jehová nema tlan nakalimatliwakglhaw. Max lhuwa tuku tlawakgolh xlakata tlan xtamunukgolh o tlan naskujnikgo Dios la precursores o atanu. Tlan nakawaniyaw pi Jehová chu akinin lu kapaxtikatsiniyaw putum taskujut nema tlawamakgolh. Chu maski makgapitsi natalan nialhla lhuwa tuku tlawakgo xlakata lakgkgolotsina o tatatlakgo chuntiyaku nakamaxkiyaw kakni xlakata lhuwata kata liwana skujnanimakgolh Dios. Akxni katsiyaw pi kinatalankan titaxtumakgolh tuku nitlan kilitlawatkan uma tuku lakaskin Jehová natlawayaw: «Namakgpuwantinikgoyatit wanti laklatayakgoy [o nitlan makgkatsikgo], chu na namakgtayakgoyatit wa nti xaxlajwananin, paks kapaxuwanalipinikgotit amakgapitsin» (1 Tesalonicenses 5:14).
«Namatsankgananiyatit [o natapatiyatit], chu na namakgtsiyajatit»
13, 14. 1) ¿Tuku tlawanikgolh tiku xtlawama tuku nitlan natalan xalak Corinto chu tuku xlakata? 2) ¿Tuku kitaxtulh xlakata tamakxtuka tiku xtlawama talakgalhin?
13 Kcongregación xalak Corinto xwi chatum chixku tiku xtlawama talakgxtumit xalimaxana chu ni xmakgxtakga xtayat. Xtayat uma chixku xtlawama pi nialh xasanto xtawi uma congregación chu amakgapitsin tiku ni skujnikgo Jehová na nitlan xʼakxilhkgo. Wa xlakata Pablo mapakgsinalh pi xtamakxtuka kcongregación (1 Corintios 5:1, 7, 11-13).
14 Xlakata stakyawaka uma chixku lu tlan kitaxtulh. Akxni tamakxtuka, congregación tlan tawi chu uma chixku makgxtakgli tuku nitlan xtlawama chu alistalh limasiyalh pi xlikana nitlan xlimakgkatsi tuku xtlawanit. Wa xlakata akxni Pablo xlimakgtiy katsokgnanilh corintios kawanilh pi kamakglhtinamparakgolh. Pero wi atanu tuku xtalakaskin, kawanilh: «Namatsankgananiyatit, chu na namakgtsiyajatit, lakimpi ni wa mpala nalinitamakgan xpalakata xkatsit talipuwan» (kalikgalhtawakga 2 Corintios 2:5-8).
15. ¿La kiliʼakxilhatkan tiku kamakgamakglhtinamparakan kcongregación?
15 Kaʼakxilhwi tuku kinkamasiniyan uma tuku lichuwinamaw. Xlikana pi lu lilipuwanaw akxni wi tiku tamakxtukan congregación. Nachuna max tlawalh pi nitlan nalichuwinankan xtukuwani Dios chu congregación. Max asta kinkatlawanin tuku nitlan. Pero ¿tuku tatlawa komo tiku tlawanit talakgalhin kamaxki xcarta lakgkgolotsin niku wan pi taspitputumpara kcongregación? Lakgkgolotsin akxilhkgo xcarta chu skinikgo Jehová pi kakapulalilh. Komo naʼakxilhkgo pi xlikana nialh tlawama tuku nitlan chu mininiya namakgamakglhtinamparakan, uma nalitasiya pi Jehová tapatilha (Mateo 18:17-20). Wa xlakata komo Jehová tapatilha ¿ni xlikana pi akinin na kilitapatitkan? Komo akinin ni xtapatiputuw, ¿ni xlikana pi uma xlimasiyalh pi lakatayamaw xtalakaskin Jehová? Tlan nalatalalinaw kcongregación, chu lu tlan nalimakgkatsiyaw pi Jehová makgamakglhtinan kintakaknikan. ¿Ni xlikana pi “namasiyuniyaw pi paxkiyaw” putum tiku nialh tlawa tuku nitlan chu kamakgamakglhtinamparaka kcongregación? (Mateo 6:14, 15; Lucas 15:7.)
«Lhuwa kmaklakaskin»
16. ¿Tuku xlakata Pablo nitlan xlimakgkatsi xlakata tuku katlawanilh Marcos?
16 Biblia wi tuku kinkalimasiyaniyan pi nitlan nakasitsiniyaw natalan nema wi tuku kinkatlawanikgoyan. Biblia lichuwinan akxni Juan Marcos makgalipuwa Pablo. Akxni Pablo chu Bernabé xlimakgtum ankgolh lichuwinankgo Dios, na kataʼalh Juan Marcos xlakata nakamakgtaya. Pero akgtum kilhtamaku, ni takatsi tuku xlakata Juan Marcos kaʼakgxtakgwililh chu taspitli kxchik. Pablo lu lisitsilh uma tuku tlawalh. Wa xlakata akxni Pablo tsukulh lakkaxwili xlimakgti naʼan lichuwinan Dios, tataʼakglhuwilh Bernabé xlakata ni xlakaskin pi Marcos nakataʼampara. Nina xpatsankga pi xkaʼakgxtakgwilinit (kalikgalhtawakga Hechos 13:1-5, 13 chu 15:37, 38).
17, 18. ¿Tuku likatsiyaw pi Pablo chu Marcos lakkaxtlawakgolh xtaʼakglhuwitkan chu tuku kinkamasiyaniyan?
17 Liwana tasiya pi Marcos ni lu lilipuwa akxni Pablo ni limputulh, xlakata chuntiya skujnilh Jehová chu alakatanu niku taʼalh Bernabé lichuwinan Dios (Hechos 15:39). Chu Marcos nikxni makgxtakgli nalichuwinan Dios chu tlan xlipawankan, uma likatsiyaw xlakata alistalh Pablo lu tlan lichuwinalh. Chu akxni Pablo xtanuma kpulachin kRoma, tsokgnanilh Timoteo akgtum carta niku kskini kaʼalh akxilha chu na wanilh: «Kamakaxti Marcos, na katata; sampi lhuwa kmaklakaskin kxtaskujut nkinTlatikan» (2 Timoteo 4:11). Chuna la akxilhaw Pablo lu xpaxkiya Marcos.
18 Uma tuku lichuwinan Biblia wi tuku kinkamasiyaniyan, maski Pablo ni limputulh Marcos, ni xlajwanalh xtakanajla wata liskujli xlakata nalichuwinan Dios alakatanu. Xlakata xchatiykan tliwakga xwi xtakanajlakan, ni mastakgolh talakaskin pi xtasitsikan xkamamakgxtakgalh naskujnanikgo Dios. Wata Pablo alistalh tiwa pi Marcos lu xatlan makgtayana xwanit. ¿Tuku kilitlawatkan akxni tlantiya talalinaw chatum tala tiku xtakgalhiyaw taʼakglhuwit? Tlakg tlan napatsankgayaw tuku xkinkatlawaninitan chu wata nakamakgtayayaw amakgapitsin natatliwakglha xtakanajlakan. Komo naʼakxilhaw tuku tlan tlawakgo amakgapitsin namatliwakglhaw congregación.
Congregación chu wix
19. ¿La tlan nalamakgtayayaw chatunu chatunu akinin?
19 Umakgolh “tuwa kilhtamaku”, wix tlakg lakaskina pi minatalan namakgtayakgoyan, chu xlakan na lakaskinkgo nakamakgtayaya (2 Timoteo 3:1). Maski chatum kstalanina Cristo ni nakatsi la nalakkaxtlawa xtaʼakglhuwit, Jehová katsi la namakgtaya. Chu nalimaklakaskin natalan xalak congregación, chu asta wix tlan nalimaklakaskinan (Isaías 30:20, 21; 32:1, 2). Wa xlakata, putum akinin chuntiya kakgalhakgaxmatwi uma tuku tiwa Pablo: «Kalalimakgpuwantini[...]tit nchatunu amakgapitsin, chu [...] kalamatliwakglhtit nchatunu amakgapitsin xtachuna lantla tlawayatit» (1 Tesalonicenses 5:11).
¿La xkgalhtinanti?
• ¿Tuku xlakata xlakaskinka pi putum kcongregación nalamatliwakglhaw?
• ¿Tukuya taʼakglhuwit kgalhikgo kinatalankan chu la tlan xkamakgtayaw?
• ¿Tuku xlakata lakaskinaw pi na nakinkamakgtayakgoyan kinatalankan?
[Takgalhskinin]
[Epígrafe xla página 15]
Kakamakgtayaw kinatalankan tiku tanu tanu taʼakglhuwit kgalhikgo
[Epígrafe xla página 16]
Lhuwa natalan tiku kajku lakgkgawasan lu lhuwa tuku tlan natlawakgo kxkachikin Jehová