Tuku kinkamaxkiyan Dios kxkachikin kinkalimatliwakglhan

«Kalipitit nkimukiwi kmiokgspunkan [...] na natakgsniyatit ntajaxni [...] [kmilatmatkan].» (MATEO 11:29)

1. ¿Tukuya limapakgsin kamaxkilh Jehová israelitas ksipi wanikan Sinaí chu tuku xlakata mastalh?

AKXNI Jehová kamaxkilh Limapakgsin israelitas ksipi wanikan Sinaí, na kamapakgsilh pi sábado ni kskujkgolh. Dios maxkilh Moisés uma limapakgsin xlakata nakawani israelitas: «Akgchaxan kilhtamaku miliskujat, pero xliʼakgtujun kilhtamaku ni miliskujat, xlakata najaxa mintoro chu mi burro chu xlakata najaxa xkgawasa miskujni chu tiku kaj makgwi kminpulatamat» (Éxodo 23:12). Chuna Dios xkalimasiyani israelitas pi xkapaxki chu xkalakgalhaman, lakkaxwililh pi akgtum kilhtamaku akgatunu semana xjaxkgolh, xlakata xkgalhiparakgolh litliwakga.

2. ¿La kamakgtayalh israelitas xlakata kamapakgsika ni kskujkgolh sábado?

² Pero ¿wamputun pi kaj nitu xtlawakgo israelitas sábado? Ni. Ama kilhtamaku xkakninanikgo Dios. Chu lhuwa tuku tlan xtlawakgolh natlatni, tlan xkamasiyanikgolh xkamanankan xlakata «xmakgantaxtikgolh xlimapakgsin Jehová» chu xlilatamakgolh tuku xaʼakgstitum (Génesis 18:19). Ama kilhtamaku familias chu tiku tlan xlatalalinkgo xlilakpuwankgo xlakata tuku xtlawanit Jehová, xatapaxuwan xtawilakgo (Isaías 58:13, 14). Pero wantuku tlakg xlakaskinka, sábado xkilhchanima akxni Cristo xʼama mapakgsinan Akgtum Mil Kata chu akxni lu xlikana napaxuwakgo latamanin (Romanos 8:21). ¿Chu kkinkilhtamakujkan? Akinin kstalaninanin Cristo, ¿tuku tlan natlawayaw xlakata chuntiya napaxuwayaw chu “namakgantaxtiyaw xlimapakgsin Jehová”?

Akxni akxtum katatawilayaw kinatalankan kinkamatliwakglhan

3. ¿La xlamakgtayakgo xapulana kstalaninanin Cristo chu tuku xkitaxtu?

³ Apóstol Pablo wa pi congregación la kgantum «talayaw nema matliwakglha tuku xaxlikana» (1 Timoteo 3:15, NM). Xapulana kstalaninanin Cristo xlamakgtayakgo. Putum xlapaxkikgo chu xlamatliwakglhkgo (Efesios 4:11, 12, 16). Kawiliw akgtum liʼakxilhtit akxni Pablo xwi kʼÉfeso lakgapaxialhnankgolh natalan xalak Corinto. ¿La limakgkatsilh xlakata lakgapaxilhnanka? Pablo kinkawaniyan: «Klipaxuway mpi minkgonit Estéfanas, chu Fortunato, chu Acaico [...] xampi wa makgpuwantinikgolh kinaku» (1 Corintios 16:17, 18). Nachuna makgkatsilh Tito akxni xkitaspitnit xlakata kamakgtayalh natalan xalak Corinto chuna la wa apóstol Pablo kxcarta nema kamalakgachanilh: «Lhuwa kgalhiy tapaxuwan kaj xpalakata lantla  makgtayatit» (2 Corintios 7:13; Hua Xasasti Talaccaxlan, [TXS] 1999). Nachuna limakgkatsiyaw akinin xtatayananin Jehová, akxni katatawilayaw kinatalankan kinkamatliwakglhkgoyan.

4. ¿La kinkamatliwakglhan akxni anaw ktamakxtumit?

⁴ Putum katsiyaw pi lu lipaxuwayaw akxni anaw ktamakxtumit. Anta “akxtum lamakgapaxuwayaw” chu «akxtum lipawanaw kimPuchinakan nakkinakujkan» (Romanos 1:12; Xasasti Talaccaxlan). Kinatalankan xlikana tlan katalalinaw, kapaxkiyaw chu kamaxkiyaw kakni, ni kaʼakxilhaw la tiku kaj katatanokglhaw chu ni liwana kalakgapasaw. Akxni kaʼakxilhaw makgatunu anaw ktamakxtumit kinkamatliwakglhkgoyan chu tlan limakgkatsiyaw (Filemón 7).

5. ¿La tlan nalamatliwakglhaw klaklanka tamakxtumit?

⁵ Atanu tuku na lipaxuwayaw wa akxni anaw klaklanka tamakxtumit nema tatlawa kxkachikin Dios. Umakgolh tamakxtumit kinkamatliwakglhkgoyan xlakata masiyakan tuku xaxlikana xalak Biblia, umakgolh tamakxtumit na tlawakgo pi nakalakgapasaw amakgapitsi tiku tlan nakatalalinaw (2 Corintios 6:12, 13). Pero ¿tuku tlan natlawayaw komo akinin maxananaw chu ni chuwinamputunaw? Pulaktum tuku nakinkamakgtayayan xlakata tlan nakatalalinaw amakgapitsin wa namakgtayananaw niku tawila laklanka tamakxtumit. Chatum tala tiku makgtayanalh klanka tamakxtumit xaʼakgtati kilhtamaku, wa: «Akit niti xakkalakgapasa anta ktamakxtumit kajwatiya kifamilia chu kaj ni lhuwa amigos. Pero xlakata kmakgtayanalh xlakata nakkaxakanan, lhuwa natalan kkalakgapasli. Lu klipaxuwalh».

6. ¿La tlan namatliwakglhaw kintakanajlakan akxni kgalhiyaw vacaciones?

⁶ Israelitas makgtutu akgatunu kata xʼankgo kJerusalén xlakata nakakninanikgo Dios (Éxodo 34:23). Lakgachunin xmakgxtakgkgo xtaskujutkan chu tuku kstakgo chu akglhuwa kilhtamaku xtlawankgo kxakapokgxniwa tiji xlakata xʼankgo kʼumakgolh tamakxtumit. Pero nikaj xʼankgo makgatsankgakgo xkilhtamakujkan xlakata «lu xlipaxuwakgo [...] akxni xkilhtlinikgo Jehová» (2 Crónicas 30:21). Nachuna la uku lhuwa xlakskujnanin Dios lu tlan limakgkatsikgo akxni taʼankgo xfamiliajkan xlakata nalakgapaxialhnankgo Betel, chuna la kalilakgapaskan xsucursales xla xtatayananin Jehová. La uku tlan xlakkaxwili xkatapi mi familia kBetel.

7. 1) ¿La kinkamakgtayakgoyan convivios? 2) ¿La natlawayaw convivios xlakata nakinkamatliwakglhan chu ni napatsankgayaw?

⁷ Akxni tlawayaw convivios chu akxtum katatawilayaw kifamiliajkan chu tiku katalalinaw lu kinkamatliwakglhan. Xaskgalala mapakgsina Salomón wa: «Ni anan atanu tuku tlakg makgapaxuwa chatum chixku, kajwatiya akxni wayan chu kgotnan chu nalipaxuwa xlakata lhuwa skujnit» (Eclesiastés 2:24). Akxni akxtum katatawilayaw kinatalankan, ni kajwatiya kinkamatliwakglhan, na tlakg tlan katalalinaw, xlakata tlakg kalakgapasaw. Xlakata ama convivios nakinkamatliwakglhan chu ni lakapara napatsankgayaw, tlakg tlan ni lu lanka xlitatlawat chu wi tiku naliyawakan xlakata nakuentajtlawa tuku tatlawama. Tlakg chuna xlitatlawat akxni namastakan tuku likgachikan.

Akxni lichuwinanaw Dios kinkamatliwakglhan

8, 9. 1) ¿Tuku xmasiya Jesús chu tuku xmasiyakgo escribas chu fariseos? 2) ¿La kinkamakgtayayan nalichuwinanaw xTamapakgsin Dios?

⁸ Jesús lhuwa lichuwinalh Dios chu kawanilh kstalaninanin pi nachuna xtlawakgolh. Kawanilh: «Kaskinitit litlan malana wa nti xla lananat [o tachananat], lakimpi namalakgachakgoy skujnin namakikgoy lananat [o tuku tamakgalanit]» (Mateo 9:37, 38). Latamanin lu tlan xlimakgkatsikgo xlakata Jesús xlichuwinan «xatlan tamakatsinin» (Mateo 4:23; 24:14). ¡Fariseos lu laktuwa limapakgsin xmatlawikgo latamanin pero Jesús ni chuna xtlawa! (Kalikgalhtawakga Mateo 23:4, 23, 24.)

⁹ Akxni lichuwinanaw xTamapakgsin Dios ni kajwatiya kamakgtayayaw tiku kinkakgaxmatnikgoyan nakatsinikgo xlakata Dios, na kinkamakgtayayan liwana natamakgxtakga kkinakujkan chu kintalakapastaknikan tuku lu xlakaskinka masiya Biblia. Wa xlakata salmista wa: «¡Kapaxkatlikatsinitit Dios! Snun tlan litlinikan salmos kiDioskan. Lan tamakglhkatsi y minini katlinikaj» (Salmo 147:1). ¿Tlan tlakg xlimaxtu kilhtamaku xlakata  xatapaxuwan nalichuwinana Jehová?

10. ¿Tuku likatsiyaw pi liwana makgantaxtimaw kintaskujutkan maski latamanin ni kinkakgaxmatnikgoyan?

¹⁰ Xlikana wi niku tlakg kgaxmatkgo xlakata Dios chu wi niku niti kgaxmata (kalikgalhtawakga Hechos 18:1, 5-8). Komo wila niku ni lu kgaxmatputunkan xlakata Dios, kalilakpuwanti tuku tlan tlawapat xlakata skujnipat Dios. Ni kapatsankga pi ni kaj paxkat nawan kilhtamaku nema limaxtuya xlakata nalichuwinana Jehová (1 Corintios 15:58). Nachuna, tuku nalitasiya pi liwana skujnanipat Dios ni wa komo nakgaxmatkgo o ni nakgaxmatkgo latamanin. Liwana kakatsi pi wa Jehová tlawa pi latamanin tiku xlikana katsiniputunkgo xlakata xTamapakgsin, wi tiku kakamasinilh (Juan 6:44).

Akxni Kakninanikan Dios kFamilia matliwakglhnan

11. ¿Tukuya taskujut kaliyawanit Jehová xalaknatlatni chu la tlan namakgantaxtikgo?

¹¹ Wixin xanatlatni kalakgchanan nakalitachuwinanatit minkamanan xlakata Jehová chu xtalakaskin (Deuteronomio 11:18, 19). ¿Lakkaxwilinitata la nakamasiyaniya minkamanan xlakata kinTlatikan tiku lu kinkapaxkiyan? Jehová lhuwa tuku kalimakgtayayan xlakata tlan namakgantaxtiyatit uma lu xlakaskinka taskujut, nakuentajtlawayatit xtakanajlakan mifamilia. ¿La kamakgtayayan? Kamaxkiyan lhuwa libros, revistas, videos chu grabaciones nema lu matliwakglha kintakanajlakan.

12, 13. 1) ¿Tuku tlan kitaxtu xlakata Kakninanikan Dios kFamilia? 2) ¿Tuku tlan natlawakgo natlatni xlakata uma tamakxtumit lu namatliwakglhnan?

¹² Nachuna, skujni xalipaw lakkaxwililh pi akgtum kilhtamaku akgatunu semana nakakninanikan Dios kfamilia xlakata nalikgalhtawakgakgo Biblia. Lhuwa natlatni wankgo pi xlakata chuna tlawamakgolh kamakgtayama tlakg nalapaxkikgo chu tlakg tlan latalalinkgo chu na kamakgtayama tlakg natalakatsuwinikgo Jehová. Pero ¿la xlitatlawat xlakata xlikana namatliwakglhnan?

¹³ Akxni Kakninanikan Dios kFamilia xatapaxuwan xliwanat chu ni kaj nalilakgachanikgo. Xlakata akinin skujniyaw chatum «Dios tiku xapaxuwana», lakaskin pi xatapaxuwan nakakninaniyaw (1 Timoteo 1:11, NM; Filipenses 4:4). Lanka tasikulunalin xlakata kgalhiyaw akgtum kilhtamaku akxtum nalikgalhtawakgayaw tuku lu xlakaskinka masiya Biblia. Xalaknatlatni lhuwa la tlan natlawakgo akxni nakamasiyanikgo xkamanan. Kawiliw akgtum liʼakxilhtit, Brandon, kgalhi 10 kata chu kxchik maxkika talakaskin namatitaxti akgtum taʼakgchuwin nema xwanikan: «¿Tuku xlakata kBiblia limaklakaskinkan tantum luwa akxni talichuwinan Satanás?». Xlakata Brandon xkalakgati luwa, ni xlakgati pi Dios xlimaklaskilh tantum luwa akxni xkilhchanima Akgskgawini. Amakgapitsi familias laksakkgo pulaktum tuku lichuwinan Biblia chu kawanikan chatunu chatunu kalikgalhtawakgakgolh tuku nakalakgchan o natlawakgo chuna la tiku lichuwinan Biblia. Akxni chuna tlawakan ni kajwatiya lipaxuwakan na nakamakgtaya kamanan namakgtanukgo xlakata tuku likgalhtawakgamakgolh chu tastakyaw xalak kBiblia na natamakgxtakga kxtalakapastaknikan. *

Ni katlawaw tuku ni lu xlakaskinka

14, 15. 1) ¿Tuku xlakata tlakg talhuwinit taʼakglhuwit chu tapekua uma xaʼawatiya kilhtamaku? 2) ¿Tuku atanu taʼakglhuwit kgalhiyaw akinin kstalaninanin Cristo?

¹⁴ Uma xaʼawatiya kilhtamaku tlakg talhuwima taʼakglhuwit chu kalipekua lamaw. Lhuwa millones latamanin ni kgalhikgo tumin, ni kgalhikgo taskujut chu tiku kgalhikgo taskujut ni kaʼakchani tumin, kaj lakapara makgasputkgo, takgalana katamawanikgo tuku maklakaskinkgo xfamiliajkan (na kaʼakxilhti Ageo 1:4-6). Políticos chu amakgapitsi tiku pulalinkgo kachikinin nila tuku tlawakgo xlakata nakamalakgsputukgo tiku makgninankgo chu kamakgapekuan latamanin chu atanu tuku nitlan lama kkakilhtamaku. Chu nachuna lhuwa latamanin lakgaxokgomakgolh tuku nitlan laksakkgolh natlawakgo kxlatamatkan (Salmo 38:4).

¹⁵ Akinin kstalaninanin Cristo na kgalhiyaw taʼakglhuwit chu talakgaputsit nema anan kxkakilhtamaku Satanás (1 Juan 5:19). Lakgachunin,  tlakg kgalhiyaw taʼakglhuwit xlakata wi tuku tlawaputun kamakgxtakgwi Jehová. Chuna la wa Jesús: «Akit [...] kimputsastalakanit, pus nachuna chu wixin [...] nakaputsastalakananit» (Juan 15:20). Pero maski «kinkaputsastalamakan, wanpi Dios ni lhtuj kinkamakgxtakgnitan» (2 Corintios 4:9). ¿Tuku xlakata chuna wanaw?

16. ¿Tuku kinkamakgtayayan chuntiyaku napaxuwayaw?

¹⁶ Jesús kinkawaniyan: «Kakilakgtantit xlipaks wixin wanti skujtamakganitantit, chu nkukananitantit, lakimpi kit nakkamajaxayan» (Mateo 11:28). Akxni lu lipawanaw kxtalakgmaxtut Jesucristo, litaxtu la wanimaw Jehová pi kakinkapulalin chu xla nakinkamaxkiyan «yuma lanka litliwakga, ni kilakan, wa ntapakgsiniy Dios» (2 Corintios 4:7). Nachuna “makgtayana” —espíritu santo— matliwakglha kintakanajlakan. Uma ni kaj kinkamakgtayayan natayaniyaw taʼakglhuwit, na kinkamakgtayayan chuntiyaku napaxuwayaw (Juan 14:26, TXS [1999]; Santiago 1:2-4).

17, 18. 1) ¿Tuku talakapastakni ni kilikgalhitkan akinin xlakskujni Dios? 2) ¿Tuku max nakinkaʼakgspulayan komo kajwatiya natlawaputunaw tuku nalipaxuwayaw kkilatamatkan?

¹⁷ Nachuna, akinin xlakskujni Jehová ni namastayaw talakaskin pi nachuna nalakapastakaw la lakapastakkgo xalak kakilhtamaku tiku kajwatiya tlawaputunkgo tuku lipaxuwakgo (kalikgalhtawakga Efesios 2:2-5). Komo ni chuna nalakapastakaw max na natlawaputunaw «tuku tlawaputun kimaknikan chu tuku akxilhputun kilakgastapukan, lhuwa masiyakan tuku kgalhikan klatamat» (1 Juan 2:16, NM). O max nalakpuwanaw pi nalipaxuwayaw akxni natlawayaw tuku lakaskinaw nema Jehová ni lakgati (Romanos 8:6). Kalichuwinaw tuku tlawakgo: makgapitsi maklakaskinkgo droga, kuchu, akxilhkgo ktelevisión o alakatunu lakchixkuwin o lakpuskatin nema ni lhakganankgonit, takgaman niku kalipekua wilikgo xlatamatkan chu amakgapitsi tuku nitlan tlawakan xlakata nalipaxuwakgo. Wantuku «liʼakgskgawinan» Satanás xlakata natlawa pi nalakpuwanaw pi tuku nitlan wa tlan lipaxuwakan (Efesios 6:11, NM).

¹⁸ Xlikana ni talakgalhin nawayanaw, nakgotnanaw chu nalipaxuwayaw tuku tlan pero kuenta kilitlawatkan ni namalakatsaliyaw. Ni namastayaw talakaskin pi uma wa tlakg xlakaskinka nawiliyaw kkilatamatkan. Lu xlakaskinka ni namalakatsaliyaw chu ni namastayaw talakaskin pi wantuku nitlan lipaxuwaputunaw nakinkatlajayan, tlakg kilikuentajtlawatkan uma xaʼawatiya kilhtamaku nema lamaw. Komo kajwatiya natlawaputunaw tuku akinin lipaxuwaputunaw, max natlawa pi lhuwa nakinkamakglhtiyan kilhtamaku chu asta “kaj xman chunatiya nalilatamayaw, na ni pala kaj lhuwa xman chunata nalaktlawamiyaw kinkilhtamakujkan lantla lipawanaw Cristo” (2 Pedro 1:8).

19, 20. ¿Tuku kilitlawatkan xlakata natatliwakglha kintakanajlakan?

¹⁹ Tiku chuna lakapastaknankgo chuna la lakapastaka Jehová katsikgo pi tapaxuwan nema anan kʼuma kakilhtamaku kaj lakapara natitaxtu. Moisés chuna xakxilha chu akinin nachuna akxilhaw (Hebreos 11:25). Komo matliwakglhputunaw kintakanajlakan chu xlikana tlan makgkatsiputunaw, kilimakgantaxtitkan xtalakaskin kinTlatikan xalak akgapun (Mateo 5:6).

²⁰ Xlakata namatliwakglhaw kintakanajlakan kalichuwinaw Dios. Akxni chuna natlawayaw «nalakgmakganaw xlipaks wantu lixkajni talakgalhin [...], lipaxuw kgalhkgalhimaw nawan yama tlanka, chu likakni kilhtamaku lantla xla laklhkawilinit namakgantaxti [...] kiDioskan wanti na kimaʼakgaputaxtinakan, Jesucristo» (Tito 2:12, 13). Komo makgamakglhtinanaw xlimapakgsin Jesús. Kalimasiyaw pi Jesús kgalhi limapakgsin chu kamastaw talakaskin putum kilhtamaku kakinkapulalin. Akxni chuna natlawayaw xlikana napaxuwayaw.

[Notas nema wilakgo kpágina]

¿La xkgalhtinanti?

• ¿Tuku tlawakgo la uku xlakskujni Jehová xlakata natatliwakglhkgo?

• ¿La kinkamatliwakglhan akxni lichuwinanaw Dios chu la kamatliwakglha tiku kalitachuwinanaw?

• ¿Tuku tlan natlawakgo xalaknatlatni xlakata akxni Kakninanikan Dios kFamilia lu namatliwakglhnan?

• ¿Tuku max natlawa pi naxlajwanan kintakanajlakan?

[Takgalhskinin]