Xkachikin Jehová kinkakuentajtlawayan
Xkachikin Jehová kinkakuentajtlawayan
«Klanka tamakxtumit nakmalankiyan.» (SALMO 35:18, NM)
1-3. 1) ¿La chatum kstalanina Cristo kalipekua natawila xtakanajla? 2) ¿Niku tlan natamakgtayakgo xlakskujnanin Dios?
AKXNI xkgalhikgo vacaciones Joe chu xpuskat ankgolh lilakgastanankgo kchuchut laktsu skiti o tamakgnin nema tanu tanu xcolorkan, xalaklanka chu xalaktsu. Wilikgolh xvisorkan chu wilikgolh tuku tlan xlijaxanankgolh, xlatajumakgolh kxkgalhni chuchut chu tsinu tsinu tlakg kapulhman ankgolh. Alistalh xpuskat akxilhli pi lu kapulhman niku ankgolh chu wanilh xchixku: «Lu kapulhmana niku wilaw», Joe kgalhtilh: «Nitu kapuwanti. Akit kkatsi tuku ktlawama». Pero alistalh akxilhli pi xtsalakgonit skiti. Akxni katsilh tuku xlakata xtsalakgonit skiti, akxilhli tantum tiburón nema xlakgmima. Xkatsi pi ama tiburón xʼama wa. Uma lanka skiti nema makgapekuanan lu lakgtalakatsuwilh, pero nixkatsi tuku xlakata uma skiti alh chu nialh akxilhkgolh.
2 Komo chatum tala xmastalh talakaskin pi tsinu tsinu xtsukulh lakgati xkakilhtamaku Satanás, max katuwa tuku xlipaxuwalh nema anan anta, max xalakwan taskujut chu lhuwa tuku xkgalhiputulh uma natlawa pi xakalipekua natawila, la akxni wi tiku tsuku an niku xakapulhman kchuchut. Joe, tiku lichuwinamaw, kgolotsin xalak akgtum congregación wan: «Tuku kiʼakgspulalh kchuchut, kimasiyanilh pi kkintakanajlakan max nachuna nakinkaʼakgspulayan, lu xlakaskinka ni kalipekua nawiliyaw kintakanajlakan, uma wamputun pi ni namakgxtakgaw congregación chu ni nakatalalinaw tiku nitlan xtayatkan». Tlan nawanaw pi xlakaskinka ni naʼanaw niku «xakapulhman chuchut» xlakata wi tuku nakinkaʼakgspulayan, nachuna kintakanajlakan natsuku xlajwanan komo kalipekua nawiliyaw. Komo chuna xkinkaʼakgspulan, xlakaskinka tunkun nataspitaw xkachikin Jehová xlakata Akgskgawini ni nakinkatlajayan.
3 Kakilhtamaku niku lamaw katlawani tuku nitlan kstalaninanin Cristo (2 Timoteo 3:1-5). Satanás katsi pi nialh makgas namasputukan wa xlakata kamatlawiputun tuku nitlan kstalaninanin Cristo tiku ni nakuentajtlawakgo (1 Pedro 5:8; Apocalipsis 12:12, 17). Pero Jehová kinkalilakgalhamanitan akgtum putatsekgni xlakata ni naxlajwanan kintakanajlakan: wa, congregación.
4, 5. ¿Tuku lakpuwankgo lhuwa latamanin xlakata kilhtamaku nema aku mima, chu tuku xlakata?
4 Tamakgtay nema mastakgo latamanin nila lu xlikana kinkamakgtayayan. Minkilhtamaku wi tuku kinkaʼakgspulayan, lhuwa latamanin pekuankgo xlakata max nakatlawanikan tuku nitlan, na lu kataparaxlama chu nachuna pekuanikgo akxni min tuku malakgsputunan. Ni kajwatiya ama, minkilhtamaku tatatlayaw chu kgolonaw. Chu tiku kgalhikgo tlan taskujut, xchikkan, tumin chu ni tatatlakgo na ni katsikgo la xlilhuwa kilhtamaku chuna natawilakgo.
5 Chu latamanin na nila kamakgtayakgo amakgapitsin xlakata tlan namakgkatsikgo kxnakujkan o xʼanimajkan chu xtalakapastaknikan. Lu nitlan, pero lhuwa tiku xlakpuwankgo pi akxni xtamakgaxtokgkgolh chu xkgalhikgolh xfamiliajkan tlan xmakgkatsikgolh, pero ni chuna kakitaxtunima. Asta tiku kgalhikgo xtakanajlakan ni katsikgo tuku natlawakgo. Lhuwa ni kanajlakgo pi nakamakgtaya tuku kamasiyani tiku pulalinkgo xtakanajlakan, xlakata akxilhkgo pi tlawakgo talakgxtumit xalimaxana chu masiyakgo tuku Biblia ni masiya. Komo ni tekgskgo atanu tuku nalipawankgo kajwatiya lipawankgo tuku wankgo lakgskgalalan lakchixkuwin o tlawakgo tuku lakpuwankgo pi tlan. Wa xlakata lhuwa latamanin pekuankgo chu wata ni lakpuwanputunkgo xlakata kilhtamaku nema aku mima.
6, 7. 1) ¿Tuku xlakata akinin xlakskujni Dios ni lu lilakgaputsayaw xlakata kilhtamaku nema aku mima? 2) ¿Tuku nalikgalhchuwinanaw uku?
6 Kstalaninanin Cristo ni lu lilipuwankgo o lilakgaputsakgo xlakata tuku aku nala. Maski nawatiya taʼakglhuwit kgalhiyaw la amakgapitsin ni chuna lakkaxtlawayaw la xlakan lakkaxtlawakgo (kalikgalhtawakga Isaías 65:13, 14 chu Malaquías 3:18). ¿Tuku xlakata? Xlakata kBiblia katsinitaw la wi kakilhtamaku chu kinkamasiyaninitan la nalakkaxtlawayaw taʼakglhuwit nema nakgalhiyaw. Wa xlakata ni lu lilakgaputsayaw kilhtamaku nema aku mima. Xlakata skujnaniyaw Jehová, ni kinkaʼakgskgawiyan tuku masiya ni xaxlikana takanajla, na katsiyaw pi nitlan natlawayaw talakgxtumit xalimaxana chu tuku kitaxtu alistalh. Wa xlakata akinin tlan wilaw nixawa kakilhtamaku (Isaías 48:17, 18; Filipenses 4:6, 7).
7 Anta kBiblia wilakgolh liʼakxilhtit nema kinkamakgtayayan xlakata lu xlakaskinka naʼakxilhaw tamakgtay nema Jehová kamaxki kajwatiya tiku kakninanikgo. Akxni nalikgalhtawakgayaw umakgolh liʼakxilhtit nakinkamakgtayayan nakatsiyaw la wi kintalakapastaknikan chu kintayatkan. Chuna tlakg tlan nalimaklakaskinaw tastakyaw nema Dios kinkamaxkinitan xlakata ni naxlajwanan kintakanajlakan (Isaías 30:21).
«Xaktuwasmaja»
8. ¿Tiku ni katalalinkgo xlakskujni Jehová?
8 Putum kilhtamaku nema titaxtunita xlakskujnanin Dios tiku liwana lakpuwankgo pi wa Dios nakgalhakgaxmatkgo ni lu katalalinkgo tiku ni kgalhakgaxmatnikgo. Jehová makgasa tiwa pi wantiku tatayakgo Satanás ni xʼamakgolh kaʼakxilhputunkgo xkachikin Dios (Génesis 3:15). Xlakata liwana lakapastakkgonit pi natlawakgo xtalakaskin Dios, xlakskujnanin Dios ni kgalhiputunkgo xtayatkan la xtayat tiku xalak kakilhtamaku (Juan 17:15, 16; 1 Juan 2:15-17). Pero, lakgachunin makgapitsi na tlawaputunkgo tuku tlawakgo xalak kakilhtamaku. Wa xlakata minkilhtamaku lakpuwankgo: ¿pi lu xlakaskinka ni naktlawa tuku xalak kakilhtamaku?
9. ¿Tuku xlitaʼakglhuwima tiku tsokgli Salmo 73?
9 Chatum kskujni Dios tiku tsokgli Salmo 73, max xalak xfamilia Asaf xwanit, xlakata ni xtlawa tuku tlawakgo xalak kakilhtamaku xlakpuwan komo tlan tuku xlaksaknit natlawa kxlatamat. Ni xʼakgatekgsa o ni xmakgachakgxi tuku xlakata wantiku nitlan xlikatsikgo tlan xkakitaxtunima chu xtasiya pi xpaxuwakgo chu wantiku xtlawamakgolh xtalakaskin Dios lhuwa xpatinamakgolh (kalikgalhtawakga Salmo 73:1-13).
10. ¿Tuku xlakata lu xlakaskinka nalakputsananiyaw tuku xlitaʼakglhuwima tiku tsokgli Salmo?
10 ¿Milh kilhtamaku akxni nachuna lakpuwanti la salmista? Komo chuna, ni kalakpuwanti pi xlajwanama mintakanajla. Lhuwa xlakskujnin Jehová asta wantiku tsokgkgolh Biblia lakgachunin nachuna xlakpuwankgo (Job 21:7-13; Salmo 37:1; Jeremías 12:1; Habacuc 1:1-4, 13). Putum tiku makgapaxuwaputunkgo Dios xlitlawatkan uma takgalhskinin: xlakata akit kkgalhakgaxmatnima Jehová, ¿ni anan atanu tuku tlakg tlan naktlawa? Uma takgalhskinin na xtachuna la takgalhskinin nema titlawalh Satanás anta kjardín xaʼEdén, malakpuwaninamputulh komo Dios lakgchan namapakgsinan (Génesis 3:4, 5). Wa xlakata lu xlakaskinka nalakputsayaw tuku xlakpuwama tiku tsokgli Salmo. ¿Pi tlan nakalakgkatsananiyaw tiku nitlan likatsikgo chu limasiyaputunkgo pi tlan kakitaxtunima? ¿Tlan namakgxtakgaw xtalakaskin Jehová chu wata na natlawayaw tuku nitlan? Satanás lakaskin pi chuna xtlawaw.
11, 12. 1) ¿Tuku makgtayalh salmista nakatsi tuku natlawa, chu tuku kinkamasiyaniyan xliʼakxilhtit? 2) Chu wix, ¿tuku makgtayan xlakata nachuna nalakpuwana la salmista?
11 ¿Tuku makgtayalh tiku tsokgli Salmo xlakata xkatsilh tuku tlan? Maski tiwa pi nialh xtlawaputun tuku tlan, lakgpalilh xtalakapastakni akxni tanulh «kxtemplo Dios» (NM) chu anta katachuwinalh tiku xlikana kakninanikgo Dios chu tsukulh lilakpuwan xtalakaskin Dios. Ama kilhtamaku akgatekgsli tuku xʼama kaʼakgspula tiku tlawakgo tuku nitlan chu ni xlakaskin nachuna xʼakgspulalh. Akgatekgsli pi chuna la xlimakgolh xlatamatkan xtiyamakgolh «ni xatlan tiji» (NM). Putum tiku makgxtakgkgo Jehová, «lu nitlan la nalisputkgo». Pero, tiku skujnikgo Dios nakamakgtaya (kalikgalhtawakga Salmo 73:16-19, 27, 28). Katsiyaw pi lu xlikana tuku lichuwinankgo umakgolh textos. Max lhuwa tiku lakpuwankgo pi tlan nalinkgo xlatamatkan la nalimputunkgo, chu ni nakgalhakgaxmatnikgo Dios pero alistalh nalakgaxokgokgo tuku nitlan tlawakgo (Gálatas 6:7-9).
12 ¿Tuku na kinkamasiyaniyan uma tuku nitlan xlakpuwama salmista? Pi kaj kxkachikin Dios tlan makglhtinanaw xaxlikana tamakgtay chu liskgalala. Akxni salmista alh kxtemplo Dios tsukulh liwana lakapastaknan chu tsukulh lakpuwan wantuku xalakatitum. La uku, nachuna makgamakglhtinanaw xalakgskgala tastakyaw chu tuku limatliwakglhaw kintakanajlakan kcongregación. ¡Wa xlakata Jehová kinkaskiniyan xlenkgalhin naʼanaw ktamakxtumit! Anta natatliwakglha kintakanajlakan chu nakinkamakgtayakanan natlawayaw tuku tlan (Isaías 32:1, 2; Hebreos 10:24, 25).
Liwana kalaksakwi tiku nakatalalinaw
13-15. 1) ¿Tuku akgspulalh Dina, chu tuku kinkamasiniyan? 2) ¿Tuku xlakata akxni katalalinaw kinatalankan lu kinkamakgtayayan?
13 Wantuku tiʼakgspulalh Dina xtsumat Jacob kinkamasiyaniyan pi lu nitlan nakatalalinaw tiku lixkajni likatsikgo. Génesis lichuwinan pi Dina lu xkalakgapaxialhnan laktsuman xalak Canaán tiku xwilakgolh lakatsu niku xwi xfamilia. Pero wantiku xalak Canaán ni xtlawakgo tuku Jehová xkaskini natlawakgo xlakskujnin. Chuna la wankgo arqueológos, wantuku titlawakgolh kxlatamatkan xalak Canaán, kakninanikgolh ídolos, tlawakgolh talakgxtumit xalimaxana, lixkajni xtayat xkgalhikgo chu xkgalhikgo takaknin nema Dios ni akxilhputun xlakata talakgxtumit (Éxodo 23:23; Levítico 18:2-25; Deuteronomio 18:9-12). ¿Tuku akgspulalh Dina xlakata xkatalalin ama laktsuman?
14 Chuna la wan Biblia, Siquem xalak Canaán, «tiku tlakg tlan xlikatsi nixawa amakgapitsi tiku xwilakgolh kxchik xtlat» chipalh Dina chu «xafuerza tatalakgxtumilh» (Génesis 34:1, 2, 19). ¡Lu nitlan kitaxtulh! ¿Lakpuwana wix pi Dina xkatsi pi chuna xʼama akgspula? Max Dina kaj tlan xkatalalimputun lakgkgawasan chu laktsuman xalak Canaán chu xlakpuwan pi nitu xʼamakgolh tlawanikgo. Pero ni chuna kitaxtulh la xlakpuwan.
15 Uma tuku lichuwinan Biblia wi tuku xlakaskinka kinkamasiyaniyan: nila nalakpuwanaw pi nitu nakinkaʼakgspulayan komo nakatalalinaw tiku ni skujnikgo Dios. Biblia kinkawaniyan: «Tiku nitlan nakatalalinaw natlawakgo pi namakgxtakgaw xatlan talismanin» (1 Corintios 15:33, NM). Pero tlan kinkakitaxtuniyan akxni katalalinaw tiku paxkikgo Jehová, nawatiya takanajla kgalhikgo chu linkgo xlatamatkan la skin Dios. Xlakan kinkawanikgoyan natlawayaw tuku tlan (Proverbios 13:20).
«La uku nialh xalixkajni mimaknikan»
16. ¿Tuku wa apóstol Pablo xlakata makgapitsi kstalaninanin Cristo xalak Corinto?
16 Congregación lhuwa tiku kamakgtayanit xlakata namakgxtakgo lixkajni tayat. Anta kxapulana carta nema kamalakgachanilh corintios Pablo kalitachuwinalh pi xlakgpalikgonit xtayatkan xlakata xmakgantaxtikgolh tuku Dios kskin. Makgapitsi xtlawakgonit talakgxtumit nema ni xlilat, xkakninanikgonit ídolos, xʼakgskgawikgo tiku xtawilakgolh, xtatalakgxtumikgo tiku xtachixku o xtapuskat, makgapitsi xkgalhanankgo chu lhuwa xwakgo kuchu. Pero apóstol kawanilh: «La uku nialh xalixkajni mimaknikan» (kalikgalhtawakga 1 Corintios 6:9-11, NM).
17. ¿La kamakgtayanit tuku masiyay Biblia kxlatamatkan lhuwa latamanin?
17 Wantiku ni kanajlanikgo Dios ni kgalhikgo wantuku nalipulalinkgo xlatamatkan. Xakstukan laksakkgo tuku natlawakgo o na tlawakgo tuku nitlan tlawakgo amakgapitsin, chuna xtlawakgo kstalaninanin Cristo xalak Corinto akxni nina xkanajlanikgo Cristo (Efesios 4:14). Pero akxni liwana katsikan tuku wan xTachuwin Dios chu xtalakaskin lu makgtayanan. Kalakgpalini xlatamatkan tiku tlawakgo tuku wan xTachuwin Dios (Colosenses 3:5-10; Hebreos 4:12). Akxni nina xkatsikgo tuku skin Jehová, lhuwa kinatalankan xtlawakgo putum tuku xtlawaputunkgo. Pero wankgo pi ni xpaxuwakgo. Chu wankgo pi tlan makgkatsikgolh akxni tanukgolh kxkachikin Dios chu tsukukgolh lilatamakgo chuna la wan Biblia.
18. ¿Tuku tlawalh chatum tsumat, chu tuku kinkamasiyaniyan?
18 Pero wantiku makgxtakgkgo xkachikin Dios kitaxtu la akxni wi tiku tsuku an «niku xakapulhman chuchut» makgxtakgkgo congregación chu lu lilakgaputsakgo alistalh. Chatum tala nawanaw pi xtukuwani Tania wan pi tsukulh kgalhtawakga akxni aktsinajku xwanit pero akxni makgatsilh 16 kata, tsukulh lakgati «tuku xʼanan kakilhtamaku». Pero wa lipatinalh tuku xtlawama, la akxni makgalh kskgata maski niʼaxlakachin. Tania wan: «Akgtutu kata nema ktaxtulh kxkachikin Dios lu nitlan tuku tlawanilh kintalakapastakni nema lu tuwa nakpatsankga. Wantuku lu nitlan klimakgkatsi wa akxni klakapastaka pi kmakgnilh kiskgata. [...] Kkatsi pi makgapitsi laktsuman chu lakgkgawasan na tlawaputunkgo tuku tlawakgo xalak kakilhtamaku. Akit kkawaniyan: “¡Ni katlawatit!”. Pulana max nalipaxuwayatit pero alistalh lu xalilakgaputsa kitaxtu. Kaj limin talipuwan akxni tlawakan tuku xalak kakilhtamaku, kkatsi xlakata chuna kiʼakgspulalh. Ni kataxtutit kxkachikin Jehová. Kaj anta natekgsatit tapaxuwan».
19, 20. ¿La kinkamakgtayayan congregación chu tuku kilitlawatkan xlakata nalitamakgtayayaw?
19 Komo xmakgxtakgwi congregación nema Jehová kinkalikuentajtlawayan, ¿tuku nakinkaʼakgspulayan? Lhuwa nipara tsinu lakpuwanputunkgo namakgxtakgkgo congregación, xlakata lakapastakkgoyku la xwi xlatamatkan akxni ni xlakgapaskgo xaxlikana takanajla (Juan 6:68, 69). Ni nakamakgxtakgaw kinatalankan komo lakaskinaw pi Jehová chuntiya nakinkakuentajtlawayan chu ni nalipatinanaw tuku limin xkakilhtamaku Satanás. Tlan nakatalalinaw chu naʼanaw kputum tamakxtumit, nakinkamakgtayayan naʼakxilhaw pi xlimapakgsin Dios wa xatlan chu kinkawanikanan nakgalhakgaxmataw. ¡Anan lhuwa tuku xlakata nalimalankiyaw Jehová “klanka tamakxtumit” chuna la tlawalh salmista! (Salmo 35:18.)
20 Putum kstalaninanin Cristo kgalhikgo taʼakglhuwit nema tlawa pi tuwa makgkatsikgo namakgantaxtikgo xlimapakgsin Jehová. Chu akxni chuna kaʼakgspula tlan nakawanikan tuku tlan natlawakgo. ¿Tuku tlan natlawakgo chatunu chatunu xalak kcongregación xlakata nakamakgtayakgo? Artículo nema alistalh naʼakxilhaw nakinkamasiyaniyan la tlan nakamakgtayayaw chu nakamatliwakglhaw kinatalankan (1 Tesalonicenses 5:11).
¿La xkgalhtinanti?
• ¿Tuku kinkamasiyaniyan tuku akgspulalh tiku tsokgli Salmo 73?
• ¿Tuku kinkamasiyaniyan tuku akgspulalh Dina?
• ¿La kinkakuentajtlawayan congregación xla kstalaninanin Cristo?
[Takgalhskinin]
[Epígrafe xla página 11]
Anta katamakgxtakgti niku ni kapulhman ni kamakgxtakgti congregación