¿Kinkamakgtayakgoyan staku?

AKGTUM tsisni akxni nitu wi puklhni kʼakgapun chu anta niku ni anan xmakgskgot kachikinin, tlan tasiya lhuwa staku la maktum lanka lhakgat xatsitsakga nema lhuwa diamantes kgalhi. Aku titaxtunit akgtutu ciento a tipuxumakaw kata akxni takatsilh la xlilanka staku chu la xlimakgat wilakgocha. Kaj tsinu katsiyaw la xlilhuwa litliwakga tamaklakaskin xlakata tlan naliskujkgo putum tuku anan xlikalanka kakilhtamaku.

Makgasa akxni lakatsukukgolh latamanin, xʼakxilhkgo la lu tlan chu ni akglakgwa xtatsuwikgo tuku anan akgapun la staku (Génesis 1:14). Xlakata tuku anan kʼakgapun lhuwa latamanin kamalakpuwani la mapakgsina David, titaxtunita akgtutu mil kata akxni wanilh Dios: «Akxni akit kakxilha ama akgapun y lata tu katlawanita, papaʼ y lhuwa staku nima ana kawilinita, akit kwan: “Dios, ¿tuku kilakgxtukan akin lakchixkuwin xlakata wix nakilalipuwanaj?”» (Salmo 8:3, 4).

Max lhuwa latamanin ni katsikgo pero umakgolh tuku wilakgolh kʼakgapun chu la tatsuwikgo kinkamakgtayayan kkilatamatkan. Kalichuwinaw Chichini nema tiyat tlawan xlitantumakgstilili o xlimakgstilili. Max katsiya pi Chichini tlawa kaʼanalh kakuwani, katsisni chu kata. Papaʼ na xtachuna tuku tlawa, Biblia wan pi xlakata «nalilhkakan kilhtamaku» o xlakata «tlan natawila calendario» (Salmo 104:19; La Nueva Biblia Latinoamérica, 2005). Putum katsiyaw pi tiku ankgo kpupunu chu tiku ankgo kpapaʼ akxilhkgo staku xlakata nakatsikgo niku wilakgolh. Wa xlakata lhuwa lakpuwankgo pi tuku wi kʼakgapun la staku o atanu, kaj mapitsikgo kilhtamaku, kata o nalimalankiyaw Dios xlakata tuku tlawanit. ¿Kinkamakgtayakgoyan xlakata nakatsiyaw tuku aku nala o tuku nitlan nala?

Astrología, ¿niku kilhtsukunit chu tuku xlakata?

Xlakata kaputsananikan tuku anan kʼakgapun xlakata nakapulalin latamanin makgasa lakatsukunit. Tapuwan pi uma talismanin lakatsukucha kMesopotamia, akxni xtsankga akgtutu mil kata  nalakachin Jesús. Wantiku xlakputsananikgo tuku anan kʼakgapun lu liwana xʼakxilhkgo la wilakgolh chu la xtatsuwikgo. Xlakata liwana xlaklhkawilikgo la tatsuwikgo staku chu atanu tuku anan kʼakgapun wa xlakata tlawakgolh calendarios chu tlan xwankgo akxni nala eclipses chu chuna lakatsukulh astronomía. Pero astrología ni kaj xʼakxilhkgo tuku tlawa Chichini chu Papaʼ kKatiyatni. Xlakan wankgo pi chuna la wi Chichini, Papaʼ, planetas chu staku tlawakgo lhuwa tuku nala unu kKatiyatni chu asta pulalinkgo xlatamatkan latamanin.

Lhuwa latamanin kakgalhskinkgo astrólogos xlakata nakawanikan tuku lakpuwankgo pi nakamakatsinikan tuku lama kʼakgapun xlakata nakatsikgo tuku aku nala chu tlan nalitamakgtayakgo. Amakgapitsin lakpuwankgo pi astrólogos tlan nakawanikgo la lakkaxwilikanit xlatamatkan o nakatsikgo akxni wi tuku tlan natlawakgo, la akgtum taskujut. ¿La chuna tlawakgo? Liwana akxilhkgo la wilakgolh tuku wi kʼakgapun chu «laklhkawilikgo» la akxtum taskujmakgolh Katiyatni. Chuna la naʼakxilhkgo pi xwilakgolh max staku o tuku anan kʼakgapun akxni wi tiku lakachin, lakpuwankgo pi namakgtaya o ni namakgtaya kxlatamat.

Xapulana astrólogos xlakpuwankgo pi Katiyatni kxitat akgapun xwi chu amakgapitsi planetas chu staku nema makxtum wilakgolh xlimakgstilitlawankgo o xlitalakgchokgomakgolh Katiyatni. Na xlakpuwakgo pi Chichini xtipulaktaxtu staku chu constelaciones nema makgat tasikgo chu akgtum kata xkilitalakgspita. Uma limapakuwikgolh «eclíptica» chu pulakkuti mapitsikgolh. Chu pulakatunu kilhchanima akgtum signo xla Zodíaco chu lin xtukuwani constelación nema xtipulaktaxtu Chichini akxni anta xtitaxtu. Na xkawanikan «chiki xalak akgapun», xlakata xlakpuwankan pi pulakatunu, xchik chatum dios xwanit. Akxni xtitaxtunit lhuwa siglos astrónomos katsikgolh pi Chichini niwa limakgstilitlawama Katiyatni wata Katiyatni limakgstilitlawama Chichini, wa xlakata astrología nialh kakanajlanika.

 Astrología lakatsukulh kMesopotamia, chu talakgatumilh xlikalanka Katiyatni. Akxni persas akgchipakgolhl Babilionia, na chalh kʼEgipto, kGrecia chu asta kʼIndia. Alistalh makgapitsi budistas linkgolh kʼAsia central, kChina, kTíbet, Japón chu ksureste xla Asia. Maski ni takatsi la liminka uma tamasiy niku xwilakgolh mayas, xlakan na xlimaklakaskinkgo astrología la kBabilonia. Max astrología xala uku kilhtsukucha kʼEgipto akxni Grecia xʼakgchipanit chu uma tlawalh pi nachuna nakanajlakgo judíos, musulmanes chu tiku wankgo pi kstalaninanin Cristo.

Asta xamakgan kachikin Israel na xlimaklakaskinkgo astrología. Akxni israelitas nina xkachilinkan kBabilonia ksiglo VII akxni nina xmin Jesús, Biblia lichuwinan pi mapakgsina Josías tiku ni xmakgxtakga Dios xmasputuputun tiku xmaxkikgo tamakamastan «chichini chu papaʼ chu constelaciones xla zodíaco chu putum tuku wi kʼakgapun» (2 Reyes 23:5).

Tiku kapulalin

Liwana katsiyaw pi Dios ni kamakgtaya tiku makgtanumakgolh kʼastrología, xlakata chuna la lichuwinan akgapun chu la skujmakgolh tuku anta anan nichuna la Dios lakkaxwilinit. Chu, takatsi pi anta niku takilhti ni xlikana, wa xlakata nila nalipawankan nakinkawaniyan tuku aku nala. Tuku tatsokgtawilanit xlakata uma, limasiya pi ni xaxlikana xlakata astrología.

Akgtum kilhtamaku, sacerdotes chu astrólogos xalak Babilonia nila wanikgolh tuku xwamputun xtamanixnat mapakgsina Nabucodonosor. Xpalakachuwina xaxlikana Dios Jehová, Daniel wa: «Tuku ni takatsi nema katsiputun mapakgsina, chu wantiku lakgskgalalan chu wantiku wankgo tuku aku nala, chu tiku liskujkgo magia, chu astrólogos nila makatsinikgo mapakgsina. Pero kakatsi pi wi chatum Dios xalak kʼakgapun Wantiku wan tuku niti katsi, wa namakatsini mapakgsina Nabucodonosor tuku nala kxaʼawatiya kilhtamaku» (Daniel 2:27,28). Daniel tlan makatsinilh mapakgsina tuku xwamputun xtamanaxnat, xlakata makgskilh xtamakgtay Jehová. «Wantiku makatsininan tuku ni takatsi» chu ni kalipawa Chichini, Papaʼ chu staku (Daniel 2:36-45).

Wantuku kaʼakgspulalh mayas limasiya pi astrología ni makgtayanan. Maski liwana xlaklhkawilikgo la tatsuwikgo staku chu tuku anan kʼakgapun ni kamakgtayalh xlakata ni xlakgsputli xtawilatkan ksiglo IX akxni xminita Jesús. Umakgolh pulakti liʼakxilhtit liwana limasiya pi tiku astrólogos nila makatsininankgo tuku aku  nala, kaj lakaskinkgo ni natalakatsuwinikan Dios xlakata nakatsikgo tuku aku nala.

Tuku wankgo astrólogos kaj takgsanin, uma kinkamakgtayayan nakatsiyaw tiku pulalima. Akxni Jesús lichuwinalh Akgskgawini wa: «Makgxtakgli tuku xaxlikana, xlakata ni lilatama tuku xaxlikana. Akxni akgsaninan kaj wa lichuwinan tuku lakpuwan xlakata xaʼakgsanina chu xatlat taʼakgsanin» (Juan 8:44, NM). Wa xlakata maski Satanás nalitaxtuputun «xʼángel xkgakganat» chu xdemonios «xtaskujnin talulokgtat» kaj kaʼakgskgawiputunkgo latamanin (2 Corintios 11:14, 15). Pero xlakata kgalhiyaw xTachuwin Dios katsiyaw pi “tlanka litliwakga, chu tlaway xaliʼakxilhtit, chu likaknit o tuku nila tamakanajla nema laklanka tuku tlawa nkaj liʼakgskgawin” xla Satanás (2 Tesalonicenses 2:9).

Tuku xlakata ni nalipawanaw astrología

Jehová Dios tiku wan tuku xaxlikana ni akxilhputun putum tuku takilhtinit ktaʼakgsanin (Salmo 31:5). Wa xlakata Biblia wan pi nipara tsinu namakgtanuyaw kʼastrología. «Niti naputsa skuwana, nipara skgoyuna, [...] nipara chatum tiku katasanikgo nin o tiku wan tuku aku nala nipara chatum tiku katachuwinan nin. Xlakata putum tiku chuna tlawa Jehová nipara tsinu akxilhputun.» (Deuteronomio 18:10-12.)

Atanu tuku xlakata ni nalipawanaw astrología, xlakata uma tlawa pi kxmakan Satanás chu xdemonios natawilayaw. Xtachuna la tiku limaklakaskinkgo drogas kxmakan kstana droga natawilakgo, nachuna tiku lipawankgo astrología nakaʼakgchipa tiku tlakg lanka akgskgawina Satanás. Wa xlakata tiku paxkikgo Dios chu tuku xaxlikana nipara tsinu lipawankgo tuku takilhtinit kʼastrología, xlakata makgantaxtikgo uma tastakyaw xalak Biblia «Kaxkajnitit tuku nitlan, chu kapaxkitit tuku tlan» (Amós 5:15).

Pero lhuwa latamanin lakgatikgo astrología xlakata lakpuwankgo pi tlan nakatsikgo tuku aku nala. Pero ¿xlikana tuku lakpuwankgo? Biblia kinkawaniyan pi niti la nakatsi tuku nala lichali akgtum semana, o akgtum kata (Santiago 4:14). Pero tlan nakatsiyaw tuku nala kkakilhtamaku. Biblia kinkawaniyan pi nialh makgas namin xTamapakgsin Dios nema skinaw kʼoración padrenuestro (Daniel 2:44; Mateo 6:9, 10). Nachuna wan pi uma Tamapakgsin namasputu tapatin nema anan (Isaías 65:17; Apocalipsis [Revelación] 21:4). Nachuna Dios ni lakkaxwili la nalinaw kilatamatkan; wata kinkawaniyan kalakgapaswi chu kakatsiw tuku natlawa kimpalakatakan. Chuna la wan Biblia Dios lakaskin pi «paks naʼakgaputaxtukgoy, chu nalakgapaskgoy wa ntalulokgtat» o tuku xaxlikana (1 Timoteo 2:4).

Chuna la akxilhmaw, Jehová Dios ni tlawalh tuku anan kʼakgapun xlakata napulalinkgo kilatamatkan. Wata kinkamalakapastakakgoyan xlitliwakga chu xlilanka Dios (Romanos 1:20). Akxni akxilhaw tuku tlan tlawa Dios, tlawa pi natalakatsuwiniputunaw chu nalikgalhtawakgayaw xTachuwin xlakata xatapaxuwan nalinaw kilatamatkan chu ni nalipawanaw akgtum tamasiy nema ktakgsanin takilhtinit. Chuna la wan Proverbios 3:5, 6: «Kalipawanti Jehová xliputum minaku, chu ni wa mintalakapastakni kalipawanti. Chu xliputum mintiji kuentajkatlawani, chu xla namatsaja mintiji».

[Epígrafe xla página 21]

Mayas lu xlipawankgo astrología

[Epígrafe xla página 22]

«Wi chatum Dios xalak kʼakgapun Wantiku wan tuku niti katsi, wa namakatsini [...] tuku nala kxaʼawatiya kilhtamaku»

[Epígrafe xla página 22]

Maski liwana xlaklhkawilikgo la tatsuwikgo staku chu tuku anan kʼakgapun ni kamakgtayalh mayas xlakata ni xlakgsputli xtawilatkan

[Epígrafe xla página 21]

EL CARACOL, TUKU MAYAS XLIʼAKXILHKGO AKGAPUN, KCHICHÉN ITZÁ (YUCATÁN, MÉXICO, 750-900 AKXNI XMINITA JESÚS)

[Epígrafe xla página 21]

Páginas 20 chu 21, de izquierda a derecha: staku: NASA, ESA, and A. Nota (STScI); astrónomo maya: © Albert J. Copley/age fotostock; tuku mayas xliʼakxilhkgo akgapun: El Caracol (fotografía), Mayan/Chichen Itza, Yucatan, Mexico/Giraudon/The Bridgeman Art Library