Lhuwa kamakglichuwinaw Dios
Lhuwa kamakglichuwinaw Dios
«Lu kalimaxtuw kilhtamaku xlakata nalichuwinanaw kiMalanakan.» (1 CORINTIOS 15:58, NM)
1. ¿Tuku kawanilh Jesús kstalaninanin pi xlitlawatkan?
AKGTUM kilhtamaku akxni ksputmaja kata 30, Jesús xlapula kSamaria lakatsu kkachikin nema wanikan Sicar, anta xwi akgtum pozo niku tijaxli, chu kawanilh kstalaninanin: «Kalakapitit, na kaʼukxilhtit nkapukuxtun, sampi lhmukukuta, na lixkganatta» o tlantiya namakikan tuku tamakgalanit (Juan 4:35). Jesús ni xlichuwinama akxni wi tuku makgalakan kkatiyatni, wata xlichuwinama xlakata xkaputsaka lakchixkuwin chu lakpuskatin tiku tlan likatsikgo chu kstalanikgolh. Xkawanima pi lu xtalakaskin xmatsukikgolha uma taskujut: ¡lhuwa taskujut xkgalhikgo chu nialh lhuwa kilhtamaku xʼanan!
2, 3. 1) ¿Tuku litasiya pi lamaw akxni limakita tuku tamakgalama? 2) ¿Tuku naʼakxilhaw kʼuma artículo?
2 Tachuwin nema Jesús kawanilh kstalaninanin tlakg xlakaskinka la uku, xlakata lamaw kilhtamaku akxni lu talakaskin pi latamanin nakatsikgo xlakata Dios, xtachuna la akxni «lhmukukuta, na lixkganatta» o tlantiya namakikan tuku tamakgalanit. Chu kata kata lhuwa millones latamanin kamasiyanikan xlakata latamat nema talichuwinan kBiblia chu lhuwa miles lakgatikgo chu tamunukgo. Kgalhiyaw lanka talakgalhaman xlakata na makgtayanamaw kʼuma lanka taskujut, nema Pulalima kiMalanakan Jehová. Wa xlakata katlawaw uma takgalhskinin: «¿Nachuna lu lhuwa kliskujma xlakata uma?» (1 Corintios 15:58).
3 Akgtutu kata aʼitat nema Jesús lichuwinalh Dios, kamasiyanilh kstalaninanin la xkamasiyanikgolh xlakata Dios latamanin. Kʼuma artículo naʼakxilhaw pulaktutu tuku lu xlakaskinka kamasiyanilh. Pulakatunu lichuwinan akgtum tlan tayat nema kilikgalhitkan tiku lu makgtayanamputunaw kʼuma taskujut. Kaʼakxilhwi uma pulaktutu lakwan tayat.
Xlakaskinka nataktujuyaw
4. ¿La limasiyalh Jesús pi lu xlakaskinka nataktujuyaw?
4 Kalilakpuwaw uma tuku lalh: Kstalaninanin xlamakglhuwima xlakata xkatsiputunkgo tiku tlakg xapuxku. Max kxlakankan xtasiya pi ksitsikgonit chu ni xlatalalimputun. Wa xlakata Jesús tasanilh chatum aktsu kgawasa, kxlakatinkan yawalh chu kawanilh: «Chuna mpi kaxati kawa nti xtaktujulh xtachuna xwa yuma aktsu kgawasa, wa yuma xatlanka anta kxtapakgsin akgapun» (kalikgalhtawakga Mateo 18:1-4). Ni xlilakapastakatkan chuna la tiku xalak kakilhtamaku tiku maxkikgo kakni tiku kgalhi limapakgsin, tumin chu tiku puxku litaxtu, xtamakgalhtawakgen xlikatsitkan xwanit pi tiku xlikana puxku, wa tiku «xtaktujulh» kxlakatin amakgapitsin. Komo xlakan xlakaskinkgo nakasikulunatlawa Jehová chu xtaskujputunkgo xlimasiyatkan pi xlikana xtaktujukgo.
5, 6. ¿La kinkamakgtayayan nataktujuyaw xlakata liwana namakgtayananaw, natalichuwinan Dios? Kalichuwinanti akgtum liʼakxilhtit.
5 Chuna la makgasa la uku lhuwa latamanin tuku tlakg kgalhiputunkgo kxlatamatkan, wa nakgalhikgo limapakgsin, lhuwa tumin chu puxku nawankgo. Wa xlakata ni limaxtukgo kilhtamaku xlakata xtakanajlakan (Mateo 13:22). Pero xlakskujnin Jehová katsikgo pi xlakata namakglhtinankgo tasikulunalin chu Jehová wantiku Pulalima uma taskujut nakamakgamakglhtinan, talakaskin pi “xtaktujukgolh” kxlakatin amakgapitsin. Chu xatapaxuwan chuna natlawakgo (Mateo 6:24; 2 Corintios 11:7; Filipenses 3:8).
6 Kalichuwinaw Francisco, tiku pulalin akgtum congregación xalak sudamérica. Akxni kgawasaku xwanit makgxtakgli universidad xlakata tlan precursor xwa. Kintalakan wan: «Titaxtulh kilhtamaku ktamakgaxtokgli. Tlan xaktiputsalh akgtum taskujut niku xaktlajalh lhuwa tumin. Pero klakkaxwiliw ni lhuwa tuku nakgalhiyaw chu akxtum precursores xakliskujwi. Alistalh kkgalhiw kamanan chu tlakg tuwa kmakgkatsiw. Pero Jehová kinkamakgtayan xlakata chuntiya xakliskujwi tuku xaklakkaxwilinitaw. Liwaka puxumakaw kata kgolotsin xalak congregación klitaxtunit chu lhuwa taskujut nema lu xlakaskinka kilakgayawakanit. Nikxni klakpuwanaw pi xlakata kaj ni lhuwa tuku kkgalhiyaw nitlan tuku ktlawaw».
7. ¿Tuku tlawapat xlakata namakgantaxtiya tuku wan Romanos 12:16?
7 Komo akinin ni lu xlakaskinka naʼakxilhaw «tuku lu xlakaskinka» akxilhkgo uma kakilhtamaku wata ni lu lhuwa tuku nakgalhiputunaw, namakglhtinanaw lhuwa tasikulunalin chu lhuwa tuku nakinkalakgayawakanan kʼuma taskujut (Romanos 12:16, NM; Mateo 4:19, 20; Lucas 18:28-30).
Tuku tlan nakitaxtu akxni lhuwa nalichuwinanaw Dios
8, 9. 1) Kalichuwinanti liʼakxilhtit xlakata talentos. 2) ¿Tiku kamatliwakglha xlakata tuku talichuwinalh kliʼakxilhtit?
8 Atanu tayat nema lu xlakaskinka xlakata liwana natlawayaw uma taskujut wa ni nalhkititnanaw. Jesús limasiyalh pi xlakaskinka ni nalhkititnanaw akxni lichuwinalh talentos. * Lichuwinalh chatum chixku tiku alh kʼalakatanu kachikin, chu kalimakgxtakgli kskujnin lhuwa tumin nema xkawanikan talentos. Xapulana kskujni maxkilh akgkitsis talentos; xlichatiy akgtiy chu xaʼawatiya maxkilh akgtum. Akxni alh xmalanakan, xapulana lakskujni chu xlichatiy lu tlan «maskujukgolh» tumin nema kamaxkika. Pero xaʼawatiya skujni, maknulh o akgtapulh xlakata «xalhkitit» xwanit. Akxni taspitli xmalanakan kawanilh xapulana xchatiykan kskujnin «nakmaxkiyan wantu tlakg lhuwa». Pero xlichatutu makglhtilh talento nema xmaxkinit chu tamakxtulh kxchik (Mateo 25:14-30).
9 Xlikana, nachuna skujputunaw la skujnin tiku ni xalhkitit litaxtukgolh nema lichuwinalh Jesús chu lu naliskujaw xlakata nakamasiyaniyaw amakgapitsin xlakata Dios. Pero ¿tuku natlawayaw komo nila lhuwa kilhtamaku limaxtuyaw xlakata nalichuwinaw? Max xlakata ni kgalhiyaw tumin, lu lhuwa hora skujaw xlakata tlan nakamakgtakgalhaw kifamiliajkan o max para tatatlayaw chu nialh kgalhiyaw litliwakga. Komo chuna titaxtumaw nakinkamakgtayayan liʼakxilhtit nema lichuwinalh Jesús xlakata talentos.
10. ¿La limasiyalh malana nema talichuwinalh pi tlan xtalakapastakni xkgalhi?
10 Kaʼakxilhwi pi malana nema lichuwinalh Jesús xkatsi pi ni lakxtum la xmaskujukgolh tumin xlakata «xlakgapaskgoy lantla xliskgalalakan chatunu chatunu» (Mateo 25:15, Hua Xasasti Talaccaxlan 1999). Wantiku pulana maxkika tumin tlakg litlajalh tumin, pero xlichatiy na matlajilh tumin. Pero xmalana kawanilh xchatiykan pi lu “tlan skujnin; makgantaxtinitantit mintaskujutkan” chu akxtum kamaskgawilh maski ni xtachuna xmatlajikgonit tumin (Mateo 25:21, 23). Nachuna Jehová, tiku Pulalima uma taskujut katsi tuku taʼakglhuwit kgalhiyaw chu na katsi la xlilhuwa kilhtamaku tlan naskujniyaw. Xla akxilhma tuku tlawamaw xlakata lu xlikana liwana naskujniyaw chu lhuwa tasikulunalin nakinkamaxkiyan (Marcos 14:3-9; kalikgalhtawakga Lucas 21:1-4).
11. Kalichuwinanti liʼakxilhtit nema limasiya pi tiku lhuwa skujnimakgolh makglhtinankgo lhuwa tasikulunalin maski tuwa titaxtumakgolh.
11 Kalichuwinaw Selmira, xalak Brasil. Chuna la skujnima Dios kinkamasiyaniyan pi ni talakaskin lhuwa tuku nakgalhiyaw o lu tlan natawilayaw xlakata tlan naskujnaniyaw Jehová. Titaxtunita akgpuxum kata akxni makgnika xchixku xlakata xmakgkgalhanamaka chu xakstu tsukulh kakuentajtlawa kgalhtutu xlaktsuman. Xla xmakgskuja kʼakgtum chiki, chu tantaku akglhuwa horas kskuja chu lu tuwa xlakata xchalh niku kskuja. Maski chuna xtitaxtuma, lakkaxwililh xkilhtamaku xlakata precursora regular nawan, chu alistalh chatiy xlaktsuman na precursoras regulares wankgolh. Chu kintalakan wan: «La uku liwaka puxum latamanin tiku kkamakgalhtawakganit chu la kifamilia kkaliʼakxilha. Chu lu tlan klatalalinaw. Chu lanka xtapalh kaʼakxilha nixawa lhuwa tumin xakkgalhilh». Uma limasiya pi tiku Pulalin uma taskujut sikulunatlawama Selmira xlakata lu tlan skujma.
12. ¿La nalimasiyayaw pi lu lichuwinamputunaw Dios?
12 Nila akxtum limaxtuyaw lhuwa kilhtamaku xlakata nalichuwinanaw Dios. Pero tlan fuerza natlawayaw xlakata tlakg naliskujaw. Komo liwana makgantaxtiyaw tastakyaw nema kinkawanikanan akgatunu semanas kTamakxtumit xlakata xTaskujut Dios, nakinkamakgtayayan tlakg liwana natlawayaw kintaskujutkan chu nakatsiniyaw pulaklhuwa la tlan nalichuwinanaw Dios (2 Timoteo 2:15). Tlan alistalh natlawayaw tuku ni lu xlakaskinka o nialh natlawayaw, xlakata tlakg lhuwa kilhtamaku nakataʼanaw lichuwinanaw Dios natalan (Colosenses 4:5).
13. ¿Tuku nakinkamakgtayayan xlakata ni nalhkititnanaw?
13 Ni kapatsankgaw pi wa nalitasiya pi paxkiyaw Jehová komo lu tlan skujnanimaw (Salmo 40:8). Xlichatutu lakskujni tiku lichuwinalh Jesús xpekuani xmalana chu xlakpuwan pi tuwa tuku kskin. Wa xlakata matsekgli tumin chu ni maskujulh xlakata xmalhuwilh xtumin xmalana. Tuku nakinkamakgtayayan ni nalhkititnanaw wa chali chali tlakg tlan natalalinaw Jehová, tiku Pulalima uma taskujut. Komo nalimaxtuyaw kilhtamaku xlakata nalilakapastakaw la paxkinan Dios chu ni tunkun sitsi, la lakgalhamanan chu atanu xalakwan xtayat, uma natlawa pi tlakg xatapaxuwan naskujnaniyaw (Lucas 6:45; Filipenses 1:9-11).
«Xasantujlanin nawanatit»
14. ¿Tuku lu xlakaskinka xlitlawatkan tiku na makgtayanamputunkgo natalichuwinan Dios?
14 Apóstol Pedro lichuwinalh Tatsokgni xaHebreo chu wa tuku Dios lakaskin natlawakgo latamanin tiku skujnikgo, xla wa: «Xtachuna xasantujlani wa nti nkatasaninitan, na chuna xlisantujlani kawantit wixin kmilatamatkan. Xampi chuna ntatsokgnit: “Xasantujlanin nawanatit, xampi xasantujlani nkit”» (1 Pedro 1:15,16; Levítico 19:2; Deuteronomio 18:13). Uma texto limasiya pi tiku lichuwinanaw Dios talakaskin pi ni tuku nalixkajwanan kilatamatkan chu kintakanajlakan. Chu tlan namakgantaxtiyaw uma lu xlakaskinka tuku taskin akxni naliskujaw xlakata xasanto nalatamayaw kkintakanajlakan. ¿Tuku nakinkamakgtayayan xlakata xasanto natawilayaw? Wa xtachuwin Dios.
15. ¿Tuku tlan tlawa xtachuwin Dios kkilatamatkan?
15 Anta kBiblia tamalakxtumikan xtachuwin Dios la chuchut nema lichakgakan tuku xalixkajni. Kawiliw akgtum liʼakxilhtit, apóstol Pablo lichuwinalh pi Cristo masantujlilh xlitatawilat, uma wamputun kstalaninanin tiku kalaksakkanit xlakata naʼankgo kʼakgapun, “kalichakgalh ntachuwin ntu xtachuna mpala chuchut” chu «xasantujlani nawan, ni mpala tu pasanit» wa xlakata kxlakatin Jehová xasanto wilakgolh (Efesios 5:25-27). Jesús xlichuwinanita pi xtachuwin Dios tlan mapanu tuku xalixkajni. Xla kawanilh kstalaninanin: «Xachakganita wixin xpalakata ntachuwin ntu kkalixakgatlinitan» (Juan 15:3). Wa xlakata xtachuwin Dios tlan nasantujtlawa kilatamatkan chu kintakanajlakan. Komo lakaskinaw pi Dios namakglhtinan kintasjutkan, lu xlakaskinka namastayaw talakaskin pi xtachuwin nakinkasantujtlawayan.
16. ¿Tuku tlan natlawayaw xlakata nitu nalixkajwanan kilatamatkan chu kintakanajlakan?
16 Tiku na natlawaputun uma taskujut pulana xlimakgxtakgat xalixkajni tayat chu tuku maxkajwani xtakanajla. Komo kgalhiputun uma talakgalhaman, tlan xlilakapastakat chu namakgantaxti xlimapakgsin Jehová (kalikgalhtawakga 1 Pedro 1:14-16). Xlakata ni xalixkajni natawilakan talakaskin napaxkan, nachuna xtachuwin Dios kinkamakgtayayan xlakata ni lixkajni natawila kintakanajlakan. Wantuku nakinkamakgtayayan wa nalikgalhtawakgayaw Biblia, naʼanaw ktamakxtumit chu naliskujaw xlakata namakgantaxtiyaw xlimapakgsin Dios. Komo chuna natlawayaw ni katitlawaw talakgalhin chu ni nalakapastakaw la kakilhtamaku (Salmo 119:9; Santiago 1:21-25). ¡Lu tlan limakgkatsiyaw pi xlakata xtachuwin Dios tlan “kinkachakganikanan” laklanka talakgalhin! (1 Corintios 6:9-11.)
17. ¿Tukuya tastakyaw xalak Biblia kilitlawatkan xlakata nitu nalixkajwananaw?
17 ¡Xatapaxuwan kamastaw talakaskin pi xtachuwin Dios kamatlanilh kilatamatkan! Kalilakpuwaw tuku max natitaxtuyaw. Akxni wi tiku nakinkastakyawayan xlakata talakgastan nema nitlan akxilhkan, ¿tuku tlawayaw xlakata uma? (Salmo 101:3.) Xlakata katsiya pi ni nakatalalipina tiku kataskuja o tiku katapina kʼescuela xlakata ni kanajlakgo tuku kanajlaya, ¿chuna tlawapat? (1 Corintios 15:33.) Chu komo kgalhiyaw akgtum talismanin nema Jehová nitlan akxilha, ¿fuerza tlawamaw xlakata namakgxtakgaw? (Colosenses 3:5.) Akinin ni makgtanuyaw kpolítica chu niti tatayayaw akxni anan takgaman chuna la tlawakgo amakgapitsin, ¿xlikana ni katatayayaw? (Santiago 4:4.)
18. ¿La kinkamakgtayayan akxni ni naxkajwanan kilatamatkan chu kintakanajlakan xlakata tlakg liwana naskujniyaw Jehová?
18 Komo nakgalhakgaxmatnanaw lhuwa tuku tlan nakinkakitaxtuniyan. Jesús tamalakxtumilh kstalaninanin la xamayak uvas wa: «Xlipaks nkinkgalhapu ntu ni tawakay xatawakat, napakgchukuy namakgan; chi nchu wa ntu yama ntawakay xatawakat, naʼakgmakganiy wa ntu sokgaliy lakimpi tlakg tlan natawakay xatawakat» (Juan 15:2). Wa xlakata komo namastayaw talakaskin pi xtachuwin Dios nakinkamakgtayayan, tlakg liwana naskujniyaw Dios.
Tasikulunalin nema kgalhiyaw chu nema aku namakglhtinanaw
19. ¿Tukuya tasikulunalin makglhtinankgolh kstalaninanin Jesús xlakata lhuwa lichuwinankgolh Dios?
19 Akxni chalh Pentecostés xla kata 33, kstalaninanin Jesús wantiku mastakgolh talakaskin nakamasiyani Jesús kamaxkika espíritu santo, nema kamakgtayalh xlakata “nalichuwinankgo xpalakata Jesús, asta awatiya kxtankgana tiyat” (Hechos 1:8). Umakgolh kstalaninanin lhuwa kalitachuwinakgolh xlakata Dios «xlipaks nchixkuwin nti wilakgo nkatuxawat» chu makgapitsi asta litaxtukgolh Lakgkgolotsin tiku xPulalinkgo xkachikin Dios, misioneros chu superintendentes viajantes (Colosenses 1:23). ¡Lhuwa tasikulunalin makglhtinankgolh chu latamanin lhuwa lipaxuwakgolh!
20. 1) ¿Tukuya tasikulunalin makglhtinanita xlakata liwana lichuwinampat Dios? 2) ¿Tuku kililakkaxwilitkan natlawayaw?
20 Komo tataktujuyaw, ni lhkititnanaw chu liwana makgantaxtiyaw xlimapakgsin Dios, lhuwa namakgtayananaw kʼuma taskujut. Akinin ni likatsiyaw chuna la kakilhtamaku tiku lhuwa tuku lipaxuwaputunkgo, kgalhiputunkgo lhuwa tumin, akinin ni lhuwa talakgaputsit kgalhiyaw chu katsiyaw tuku natlawayaw, na paxuwayaw chu tlan makgkatsiyaw (Salmo 126:6). Chu tuku tlakg xlakaskinka, katsiyaw pi “kintaskujutkan ntu ntlawamaw xpalakata nkimPuchinakan” ni kaj paxkat katiwa (1 Corintios 15:58). Jehová tiku Pulalima uma taskujut nakinkasikulunatlawaniyan “kintaskujutkan xla tapaxkit wa ntu akinin masiyuninitaw kxtukuwini” (Hebreos 6:10-12).
[Notas nema wilakgo kpágina]
^ párr. 8 Maski liʼakxilhtit nema lichuwinalh Jesús xlakata talentos xkalichuwinama kstalaninanin nema naʼankgo kʼakgapun, na kilhchanima putum akinin kstalaninanin Cristo.
¿Akgatekgswi uma tuku talichuwinalh?
• ¿Tuku xlakata talakaskin natataktujuyaw xlakata tlakg nalichuwinanaw Dios?
• ¿Tuku tlan natlawayaw xlakata lu lhuwa nalichuwinanaw Dios?
• ¿Tuku xlakata xlakaskinka tiku lichuwinankgo Dios ni namaxkajwaniyaw kilatamatkan chu kintakanajlakan?
[Takgalhskinin]
[Epígrafe xla página 25]
Akxni tataktujuyaw kinkamakgtayayan ni lhuwa tuku nakgalhiyaw kkilatamatkan chu tlan liwana naskujnaniyaw Dios