«Spíritu, paks lakputsananiy asta maski [...] [tuwa] xtalakapastakna Dios»
«Spíritu, paks lakputsananiy asta maski [...] [tuwa] xtalakapastakna Dios»
«Wa Spíritu, paks lakputsananiy asta maski wantu [...] [tuwa] xtalakapastakna Dios.» (1 CORINTIOS 2:10)
1. ¿Tuku wa apóstol Pablo 1 Corintios 2:10 pi tlawa espíritu santo, chu tukuya takgalhskinin naʼakxilhaw la uku?
¡LU PAXTIKATSINIYAW xlakata lhuwa tuku tlawa xʼespíritu santo Jehová! Biblia wan pi kinkamakgtayayan chu Dios kinkamaxkiyan, chu na masiya pi masta tamakatsin chu kinkapalakachuwinanan (Juan 14:16; Hechos 2:38; Romanos 8: 16, 26, 27). Pero apóstol Pablo wa pi wi atanu tuku lu xlakaskinka na tlawa: «Wa Spíritu, paks lakputsananiy asta maski wantu [...] [tuwa] xtalakapastakna Dios» (1 Corintios 2:10). Jehová limaklakaskin xʼespíritu santo xlakata namakatsininan tuku tuwa xlakata Dios. Komo ni xkinkamakgtayan espíritu santo ¡nila xʼakgatekgswi xtalakaskin Dios! (Kalikgalhtawakga 1 Corintios 2:9-12.) Pero ¿la tlawa espíritu santo xlakata «lakputsananiy asta maski wantu [...] [tuwa] xtalakapastakna Dios»? ¿Tiku kalimaklakaskilh Jehová kxapulana siglo xlakata namakatsininan tuku xaxlikana? ¿La lakputsanani espíritu santo tuku tuwa akgatekgskan, chu tiku kalimaklakaskin xlakata nakamasiyani amakgapitsi?
2. ¿La pulaktiy xʼama makgtayanan espíritu santo?
2 Jesús lichuwinalh pulaktiy tuku na xʼama tlawa xʼespíritu santo Dios. Akxni atsinu xtsankga namakgnikan Jesús, kawanilh kstalaninanin: «Kintlat kkimpuxokgo namakamin Espíritu Santo [...] nakamakgtayayan, [...] na luwa liwana nakamalakapastakayan xlipaks kintapakgsit wantu kkamaxkinitan» (Juan 14:26, Hua Xasasti Talaccaxlan, [TXS] 1999). Pulana, espíritu santo xʼama kamasiyani kstalaninanin Cristo xlakata xʼama kamakgtaya naʼakgatekgskgo tuku ni xʼakgatekgskgo, chu xlipulaktiy xʼama kamalakapastaka chu chuna liwana xmakgantaxtikgolh tuku xkamasiyanikanit.
Kxapulana siglo
3. ¿La limasiyalh Jesús pi «wantu [...] [tuwa] xtalakapastakna Dios» tsinu tsinu xtakatsilh?
3 Maski Cristo lhuwa tuku xalaksasti tamakatsin kamasiyanilh kstalaninanin, lhuwa tuku xkatsankganijku nakatsinikgo. Jesús wa: «Lhuwaku kkgalhiy nkatuwa ntu nakkawaniyan, kaj wampi ni la nchu akgatakgsatit. Wampi akxni xla namin, yama Spiritu xla talulokgtat, wa nakamakgatanksayan xlipaks ntu ntalulokgtat» (Juan 16:12, 13). Chuna la lichuwinalh Jesús espíritu santo xʼamaka limaklakaskinkan xlakata tsinu tsinu xmasiyalh tuku lu tuwa xlakata Dios.
4. ¿La kamasiyanilh espíritu santo kstalaninanin Cristo chu la kamalakapastaknilh kPentecostés?
4 «Spiritu xla talulokgtat» o xaxlikana, mastaka kPentecostés xla kata 33, chu kamaxkika 120 kstalaninanin Cristo tiku xtamakxtumikgonit kJerusalén. Akxni kamaxkika espíritu santo tasiyalh chu takgaxmatli (Hechos 1:4, 5, 15; 2:1-4). Akxni ama kilhtamaku kstalaninanin Jesús tanu tanu tachuwin tsukukgolh lichuwinankgo wantuku «ntlanka likakni ntu ntlaway Dios» (Hechos 2:5-11). Xchanit kilhtamaku akxni xkamakatsinika xasasti tuku xlikatsitkan. Makgasa palakachuwina Joel xlichuwinanita pi Jehová xʼama masta xʼespíritu santo (Joel 2:28-32). Ama kilhtamaku latamanin xakxilhmakgolh la xkgantaxtuma tuku xlichuwinanit Joel chu nipara tsinu xlakpuwankgo pi chuna xʼama kgantaxtu. Alistalh Pedro chuwinalh chu wa tuku xkilhchanima uma tuku xlama (kalikgalhtawakga Hechos 2:14-18). ¿La tlawalh xlakata xwa tuku xkilhchanima tuku xlama? Wa makgtayalh espíritu santo, tiku maʼakgatekgsnilh pi xkgantaxtuma tuku xlichuwinanit Joel. Nachuna, espíritu santo malakapastaknilh xlakata ni kaj lichuwinalh tuku xwanit Joel, na lichuwinalh akgtiy salmos nema tsokgli David (Salmos 16:8-11; 110:1; Hechos 2:25-28, 34, 35). Wantuku akxilhkgolh chu kgaxmatkgolh latamanin na wa tuku xalaktuwa xlakata Dios.
5, 6. 1) Akxni xtitaxtunit Pentecostés kata 33, ¿tukuya takgalhskinin nema lu xlakaskinka tamastalh xtakgalhtin xlakata xasasti talakkaxlan? 2) ¿Tiku lakkaxwilikgolh umakgolh takgalhskinin?
5 Pero xʼanan lhuwa tuku xkatsankgani liwana naʼakgatekgskgo kstalaninanin Cristo xalak kpulana siglo. Kawiliw akgtum liʼakxilhtit, ni liwana xkatsikgo tuku xkilhchanima xasasti talakkaxlan nema tsukulh kPentecostés. ¿Kaj judíos chu tiku xlimakgolh xlatamatkan la judíos xʼamakgolh makgtanukgo kʼuma talakkaxlan? ¿O na xʼamakgolh makgtapakgsikgo latamanin tiku ni judíos xwankgonit chu na xʼamaka kalilaksakkan espíritu santo? (Hechos 10:45.) Tiku ni judíos xwankgonit, ¿xtalakaskin pi pulana xmakgantaxtikgolh xLimapakgsin Moisés chu xtacircuncidarlikgolh? (Hechos 15:1, 5.) Lu xtalakaskin natakatsi xtakgalhtin umakgolh takgalhskinin. Xtalakaskin xlakputsananika uma tuku lu xalaktuwa akgatekgskan xlakata Dios chu xtalakaskin xkamakgtayalh espíritu santo. Pero ¿tiku xwankgolh xatakgalhtin?
6 Xʼamakgolh mastakgo xtakgalhtin kstalaninanin Cristo tiku xpulalinkgo xkachikin Dios. Chu xlakan tlawakgolh umakgolh takgalhskinin. Kawiliw akgtum liʼakxilhtit, Pablo, Bernabé chu Pedro na anta xwilakgolh ktamakxtumit akxni Lakgkgolotsin tiku xPulalinkgo xkachikin Jehová lichuwinankgolh tuku xlitasiya pi Jehová xkamakgamakglhtinama tiku ni judíos xwankgonit chu nitu xtacircuncidartlawakgonit (Hechos 15:7-12). Espíritu santo kamakgtayalh lakgkgolotsin xʼakxilhkgolh tuku wan Tatsokgni xalak Biblia xaHebreo xlakata uma, chu wi tuku lakkaxwilikgolh chu katsokgnanikgolh congregaciones tuku lakkaxwilikgolh (kalikgalhtawakga Hechos 15:25-30 chu 16:4, 5; Efesios 3:5, 6).
7. ¿Tuku na limaklakaskinka xlakata natakatsi xaxlikana xalaktuwa xla Dios?
7 Alistalh tlakg takatsilh tuku ni liwana xkatsikgo akxni Dios kamatsokgnilh Juan, Pedro, Santiago chu Pablo libros xalak Biblia. Alistalh akxni putum xtatsokgnita Biblia, nialh analh tiku xwankgo tuku aku nala chu Dios nialhti wi tuku kamaʼakxilhnilh (1 Corintios 13:8). ¿Chuntiyaku xʼama kamasiyani chu xkamalakapastakalh espíritu santo kstalaninanin Cristo? ¿Chuntiyaku xʼama kamakgtaya xlakata xʼakgatekgskgolh tuku lu tuwa xlakata Dios? Biblia xlichuwinanita pi xʼama kamakgtaya.
Kxaʼawatiya kilhtamaku
8, 9. ¿Tiku xlimaxkgakgenankgolh liskgalala xlakata Dios kxaʼawatiya kilhtamaku?
8 Chatum ángel wa tuku xʼama la kxaʼawatiya kilhtamaku: «Tiku xaskgalalan lu tlan namaxkgakgenankgo chuna la xmaxkgakgenat akgapun chu nachuna tiku nakamasiyanikgo tuku xaʼakgstitum, chuna la staku ni sputa xmaxkgakgenat [...] chu xaxlikana takatsin tlakg natalhuwi» (Daniel 12:3, 4). ¿Tiku umakgolh tiku xʼamakgolh kgalhikgo liskgalala chu xlitaxtukgolh la tuku maxkgakgenan? Jesús mastalh xatakgalhtin akxni lichuwinalh trigo chu nixatlan tuwan o palhma. Akxni lichuwinalh «xlikgalhsputat kakilhtamaku», wa: «Akxniku nchu wa nti xatlan chixkuwin, namaxkgakganankgoy xtachuna nchichini, anta kxtapakgsin xTlatkan» (Mateo 13:39, 43). Akxni Jesús wa tuku xwamputun uma liʼakxilhtit, wa pi «wanti xatlan chixkuwin» «kxtapakgsin xTlatkan» uma kilhchanima tiku kalaksakkanit xlakata naʼankgo kʼakgapun (Mateo 13:38).
9 ¿Xʼamakgolh maxkgakganankgo putum tiku kalaksakanit xlakata naʼankgo kʼakgapun? Tlan nawanaw pi chuna xlakata putum xʼamakgolh lichuwinankgo Dios, xmakgalhtawakganankgolh chu xlamatliwakglhkgolh ktamakxtumit. Chu tiku kalaksakkanit xʼamakgolh kawilinikgo liʼakxilhtit amakgapitsi kstalaninanin Cristo (Zacarías 8:23). Pero na wi tuku xʼama la kxaʼawatiya kilhtamaku: xʼama takatsi tuku lu tuwa akgatekgskan xlakata Dios. Kawiliw akgtum liʼakxilhtit, xʼama takatsi tuku xwamputun tuku xlichuwinanit Daniel, ama kilhtamaku nema ni xtakatsi (Daniel 12:9). Pero ¿la lakputsanani la uku espíritu santo tuku tuwa akgatekgskan chu tiku kalimaklakaskin xlakata nakamasini?
10. 1) ¿Tuku limaklakaskin espíritu uma xaʼawatiya kilhtamaku xlakata nalimasiya tuku lu tuwa akgatekgskan? 2) Kawanti la tlakg liwana taʼakgatekgsli tuku wamputun templo xaʼespiritual.
10 La uku akxni tlakg talakaskin liwana namakgatekgsnankan akgtum tamasiy xlakata Dios nema lu tuwa chu ni liwana xtakgatekgsa, espíritu santo kamakgtaya xlakata namakgatekgsninankgo natalan tiku pulalinkgo niku tatlawa taskujut xla xTatayananin Jehová xlikalanka katiyatni nema palakachuwinankgo «skujni xatalipaw chu xaskgalala» (Mateo 24:45; 1 Corintios 2:13). Lakgkgolotsin tiku Pulalinkgo xTatayananin Jehová liwana lakputsananikgo komo max wi tuku natsokgwilikan (Hechos 15:6). Chu wantuku xlitatsokgtawilat tsokgwilikgo xlakata nakinkalimakgtayakgoyan (Mateo 10:27). Minkilhtamaku liwana wankgo pi tuku pulana xwankgonit ni liwana xʼakgtekgskgonit (kaʼakxilhti recuadro «Espíritu makgatekgsninan tuku wamputun templo xaʼespiritual»).
La litamakgtayayaw tuku tlawa espíritu santo la uku
11. ¿La litamakgtayayaw xlakata espíritu santo lakputsanani tuku tuwa akgatekgskan xlakata Dios?
11 Putum akinin kstalaninanin Cristo litamakgtayaw xlakata espíritu lakputsanani tuku laktuwa xlakata Dios. Chuna la xkamakgtaya apóstoles, pulana nakinkamakgtayayan naʼakgatekgsaw tuku likgalhtawakgayaw, chu alistalh nalakapastakaw chu natlawayaw tuku katsiniw (Lucas 12:11, 12). Akinin tlan naʼakgatekgsaw tuku xalak tuwa nema talichuwinan kkilikgalhtawakgakgan maski ni lhuwa kata anitaw kʼescuela (Hechos 4:13). Pero ¿tuku tlan natlawayaw xlakata tlakg liwana nakaʼakgatekgsniyaw? Kaʼakxilhwi tuku nakinkamakgtayayan.
12. ¿Tuku kilitlawatkan akxni nakgalhtawakgayaw chu tuku xlakata?
12Kaskinti espíritu santo. Akxni nalikgalhtawakgaya xlakata Biblia, kaskinti kamakgtayan espíritu santo. Chuna katlawa maski miʼakstu nakgalhtawakgaya o kaj tsinu nakgalhtawakgaya. Akxni chuna natlawaya limasiyaya pi tataktujuya chu namakgapaxuwaya minTlat xalak akgapun. Chuna la lichuwinalh Jesús, Jehová namaxkiyan lhuwa espíritu santo komo lu xlikana naskiniya (Lucas 11:13).
13, 14. ¿La kinkamakgtayayan pulana nalikgalhtawakgayaw tuku naʼakxilhaw ktamakxtumit xlakata naʼakgatekgsaw tuku lu tuwa xlakata Dios?
13Pulana kalikgalhtawakga tuku naʼakxilha ktamakxtumit. Lakskujni liyawakanit xlakata “xkilhtamaku kinkamaxkiyan ntu nawayaw”. Lakskujni kinkalimaxkiyan likgalhtawakga, lakkaxwili tamakxtumit niku talikgalhtawakga umakgolh likgalhtawakga. Chu akxni lakskujni kinkaskiniyan “paks natalan” wi tuku nalikgalhtawakgayaw katsi pi lu xlakaskinka (1 Pedro 2:17; Colosenses 4:16; Judas 3). Akxni makgantaxtiyaw tastakyaw nema kinkamaxkiyan mastayaw talakaskin pi espíritu santo nakinkamakgtayayan (Apocalipsis 2:29).
14 Akxni nalikgalhtawakgaya tuku naʼakxilha ktamakxtumit, kalismani naputsaya textos xalak Biblia chu kaʼakxilhti pi na watiya tema lichuwinama tuku likgalhtawakgapat. Akxni chuna natlawaya tlakg naʼakgatekgsa xlakata Dios (Hechos 17:11, 12). Komo kBiblia nalikgalhtawakgaya textos, tlakg natamakgxtakga kmintalakapastakni chu alistalh tlan nalakapastaka, xlakata espíritu santo namakgtayayan. Nachuna namakgtayayan xlakata nakatsiya niku wilakgolh versículos kBiblia chu alistalh tlakg lakapara nakatekgsa.
15. ¿Tuku xlakata nalikgalhtawakgayaw likgalhtawakga nema aku taxtutilhama chu la tlan natlawayaw?
15Putum kalikgalhtawakga tuku aku taxtutilha. Putum likgalhtawakga nema makglhtinanaw asta nema ni talikgalhtawakga ktamakxtumit, kinkamakgtayayan. Nachuna revistas nema katlawakan xlakata nakamaxkikan latamanin, katlawakan xlakata nakinkalimakgtayakanan. Kkakilhtamaku niku lhuwa tuku kilitlawatkan max namin kilhtamaku wi tiku nakgalhiyaw. Tlan nalimaklakaskinaw ama kilhtamaku xlakata wi tuku nalikgalhtawakgayaw tuku nina alikgalhtawakgayaw. Wilakgolh tiku kgaxmatkgo grabaciones akxni tlawankgo o matlawanimakgolh xputlawkan. Kalakapastakwi pi putum likgalhtawakga liwana lakapastakkan akxni katsokgkan chu katiwa lu nalikgalhtawakgaputun chu tlakg nakatsiputun xlakata Dios (Habacuc 2:2).
16. ¿Tuku xlakata natsokgwiliyaw chu alistalh nalakputsananiyaw tuku ni liwana akgatekgswi akxni kgalhtawakgaw?
16Kalimaxtu kilhtamaku xlakata nalilakpuwana. Akxni likgalhtawakganitata Biblia chu amakgapitsi kilikgalhtawakgakan kalilakpuwanti xlakata tuku likgalhtawakga. Akxni nakgalhtawakgaya max wi tuku ni liwana naʼakgatekgsa chu tlakg nakatsiputuna. Kakatsokgwili chu alistalh tlakg kalakputsanani. Akxni wi tuku lu katsiputunaw tlakg lakputsananiyaw. Akxni chuna tlawayaw tlakg katsiniyaw, chu uma litaxtu la tuku «lanka xtapalh» nixawa tumin chu tuku nakatsiniyaw nakinkamakgtayayan akxni namaklakaskinaw (Mateo 13:52, NM).
17. ¿Tuku likgalhtawakgapat wix o tuku talikgalhtawakgapat mi familia?
17Kalakkaxwili kilhtamaku akxni Nakakninaniya Dios kFamilia. Lakgkgolotsin tiku Pulalinkgo xkachikin Jehová kinkawanikgoyan nalimaxtuyaw kilhtamaku akgatunu semana xlakata nakgalhtawakgayaw o nakatakgalhtawakgayaw kifamiliajkan. Chu chuna la lakkaxwilika la natatlawa tamakxtumit, kinkamakgtayayan xlakata tlan nakatakgalhtawakgayaw kifamiliajkan. ¿Tuku tlan natatlawa? Makgapitsi likgalhtawakgakgo Biblia chu lakputsananikgo makgapitsi textos nema lakgatikgo chu tsokgwilikgo kxBibliajkan tuku xlakaskinka akxilhkgo. Lhuwa familias lilakpuwankgo la putum familia namakgantaxti tuku likgalhtawakgamakgolh. Makgapitsi natlatni laksakkgo temas nema lakpuwankgo pi nakamakgtaya xfamilia o kaj likgalhtawakgaputunkgo. Chu chuna la natitaxtutilha kilhtamaku chatunu chatunu naʼakxilhtilhayaw la tlakg tlan natlawayaw. *
18. ¿Tuku xlakata maski laktuwa xlakata xTachuwin Dios na kilikgalhtawakgatkan?
18 Jesús wa pi espíritu santo xkinkamakgtayan, wa xlakata nalikgalhtawakgayaw maski wi tuku laktuwa xlakata Dios. Tamakatsin xalak tuwa na «takatsin xlakata Dios» chu na kilikgalhtawakgatkan (kalikgalhtawakga Proverbios 2:1-5). «Wa ntu lakaxtlawanikgonit Dios wa nti mpaxkikgoy.» Wa xlakata kalimaxtu kilhtamaku xlakata tlakg nakatsiniya tuku wan kxTachuwin. Espíritu santo namakgtayayan: «Xampi wa Spíritu, paks lakputsananiy asta maski wantu [...] [tuwa] xtalakapastakna Dios» (1 Corintios 2:9, 10).
[Notas nema wilakgo kpágina]
^ párr. 17 Na kaʼakxilhti Nuestro Ministerio del Reino xla octubre kata 2008, kpágina 8, tlawakgonit xtatayananin Jehová.
¿La xkgalhtinanti?
• ¿La pulaktiy kinkamakgtayayan espíritu santo xlakata nalakputsananiyaw tuku «[tuwa] xtalakapastakna Dios»?
• ¿Tiku kalimaklakaskilh espíritu santo makgasa xlakata nalimasiya tuku tuwa akgtekgskan xlakata Dios?
• ¿La liwana makgatekgsanan la uku espíritu santo tuku ni liwana xtakgatekgsa?
• ¿Tuku kilitlawatkan xlakata nalitamakgtayayaw tuku tlawa espíritu santo?
[Takgalhskinin]
[Epígrafe xla página 30]
Espíritu makgatekgsninan tuku wamputun templo xaʼespiritual
Pulaktum «wantu [...] [tuwa] xtalakapastakna Dios» tuku timakatsininanka kxapulana siglo, wa pi tabernáculo xala makgasa chu templos xalak Jerusalén xlimasiyamaka templo xaʼespiritual nema tlakg xlakaskinka xʼama tawila. Wa uma templo Pablo limapakuwilh «xasantujlani wa yama kxchik Dios [...], wa ntu ntiwililh nkimPuchinakan, na ni mpala kaj chixku nti xwililh» (Hebreos 8:2). Unu lichuwinama akgtum lanka templo xaʼespiritual nema Dios lakkaxwilinit xlakata tlan natalakatsuwiniyaw, uma kilhchanima xlakata Jesucristo tamakamastalh kimpalakatakan chu litaxtulh xapuxku sacerdote.
«Xasantujlani wa yama kxchik Dios» tsukulh kata 29 akxni Jesús tamunulh chu akxni Jehová wa pi wa xtamakamastalh wantiku ni xkgalhi talakgalhin (Hebreos 10:5-10). Akxni Cristo nilh chu malakastakwanika tanulh kSantísimo xla templo xaʼespiritual chu makamastalh kxtapalh xtamakamastan «kxlakatin Dios» (Hebreos 9:11, 12, 24).
Pablo xlichuwinanita kʼatanu carta nema xtsokgnit pi kstalaninanin Cristo nema xkalaksakkanit xlitaxtukgolh «yuma patsaps [...] natsukuy kaxlakkgoy asta akxni nalitaxtuy akgtum xalilakgatit xtemplo Dios» Jehová (Efesios 2:20-22, TXS [1999]). Anta kʼuma texto apóstol lichuwinalh «xtemplo Dios», ¿na watiya xkilhchanima «xasantujlani wa yama kxchik Dios» nema lichuwinalh kxcarta nema alistalh kamalakgachanilh Hebreos? Akglhuwa kata xlakskujnin Jehová xlakpuwankgo pi chuna. Xlakpuwankgo pi kstalaninanin Cristo nema kalaksakkanit xlakata naʼankgo kʼakgapun xkamasiyanimaka unu kKatiyatni xlakata nalitaxtukgo la «nchiwix» xla templo xalak kʼakgapun xla Jehová (1 Pedro 2:5).
Pero max kata 1971, tiku kapalakachuwinankgo lakskujni xalipaw chu xaskgalala tsukukgolh akgatekgskgo pi templo nema Pablo lichuwinalh kʼEfesios ni xkilhchanima xalanka templo xaʼespiritual xla Jehová. Komo «yama kxchik Dios» xlitaxtukgolh kstalaninanin Cristo tiku xkalaksakkanit chu xlakastakwanankgonitta, uma templo xtawilalh asta “akxni xkinkatatawilan Cristo”, xlakata ama kilhtamaku tsukukgolh lakastakwanankgo tiku xkalaksakkanit (1 Tesalonicenses 4:15-17). Pero uma tuku lichuwinalh Pablo xlakata tabernáculo: «[Yama kxchik Dios] wa ntu nkaj xaliʼukxilhtit xwanit yuma nkilhtamaku wa ntu nchilha» (Hebreos 9:9).
Akxni liwana malakxtumikgolh umakgolh textos chu atanu textos, taʼakgatekgsli pi templo xaʼespiritual ni aku xtatlawama chu pi kstalaninanin Cristo ni xʼamakgolh litaxtukgo «nchiwix» nema kamasiyanimaka unu kKatiyatni xlakata nalitaxtukgo xtemplo Dios. Wata xlichuwinama pi kskujmakgolha kxkilhtin xaSanto templo xaʼespiritual xla Dios chu chali chali “maxkikgo mpaxkatsinit Dios” (Hebreos 13:15).
[Epígrafe xla página 31]
¿La tlakg liwana naʼakgatekgsaw tuku «[tuwa] xtalakapastakna Dios»?