«¡Xlikana kamininiyan pi luwa akgstitum kalatapatit[!]»
«¡Xlikana kamininiyan pi luwa akgstitum kalatapatit[!]»
«Kumu aya katsiyatit lantla namalakgsputukan yuma katiyatna, ¡xlikana kamininiyan pi luwa akgstitum kalatapatit kxlakatin Dios chu akgstitum kakakninanitit!» (2 PEDRO 3:11, Hua Xasasti Talaccaxlan, [TXS] 1999)
1. ¿Tuku xlakata lu kamakgtayalh kstalaninanin Cristo xala makgasa, xlimaktiy xcarta Pedro?
AKXNI Dios malakpuwanilh Pedro natsokga xlimaktiy xcarta, Akgskgawini akglhuwata kata lipekua xkaputsastalanima kstalaninanin Cristo. Pero nila xtlawa pi nialh lu xlichuwinankgolh Dios chu nila tlawalh pi congregaciones nialh xtalhuwikgolh. Wa xlakata atanu tuku tsukulh limaklakaskin nema makgasa xmakgtayanit xlakata nakamatlawi tuku nitlan. Chuna la wa apóstol Pedro, Akgskgawini xtlawaputun pi kstalaninanin Cristo nialh tlan xtawilalh xtakanajlakan, xlimaklakaskima tiku masiyakgo tuku ni xaxlikana, tiku «nilay ukxilhkgoy chatum puskat pala ni xlakan xtlawakgolh puwankgoy» chu tiku «skgalalh likatsikgo lantla nakgalhikgoy tumin» (2 Pedro 2:1-3, 14, TXS [1999]; Judas 4). Xtalakaskin pi natalan ni xmakgxtakgkgolh Jehová maski xkgalhikgolh lhuwa taʼakglhuwit. Chu lhuwa kamatliwakglhli xlimaktiy xcarta Pedro.
2. ¿Tuku lichuwinan kxlimaktiy xcarta Pedro capítulo akgtutu chu tukuya takgalhskinin naʼakstu kgalhskinkanaw?
2 Pedro tsokgnalh: «Xlimakgwa kpulamajku nkintiyatliwa mpi ankgalhin nakkamalakapastakayan nakkastakyawayan. Sampi kkatsiy mpi kaj ni makgas kilhtamaku nakmakgaxtakga nkintiyatliwa [...]. Na kuirsaj naktlawaniy asta ntani nakmakalaniy, lakimpi akxni kninitta nawan, xaliʼankgalhin tlan nalilakapastakatit yuma» (2 Pedro 1:13-15). Uma tuku wa Pedro limasiyalh pi xkatsi pi xʼamaja niy. Pero xlakaskin pi xtastakyaw putum kilhtamaku xtalakapastakli. Chu chuna kitaxtulh: xtastakyaw tatsokgtawilalh kBiblia chu putum akinin tlan nalikgalhtawakgayaw. Lu kinkamakgtayayan capítulo akgtutu, xlakata lichuwinan «akxni xlikgatsputnita nawan nkatuxawat» o xkakilhtamaku Satanás (2 Pedro 3:3, 7, 10). ¿Tukuya tastakyaw kinkamaxkin apóstol Pedro? ¿La tlan nakinkamakgtayakgoyan xlakata tlan natalalinaw Jehová?
3, 4. 1) ¿Tuku wa apóstol Pedro pi kilitlawatkan? 2) ¿Tuku pulaktutu nema kilitlawatkan naʼakxilhaw la uku?
3 Akxni Pedro xlichuwinanita pi xkakilhtamaku Satanás namalakgsputukan na wa: «¡Xlikana kamininiyan pi luwa akgstitum kalatapatit kxlakatin Dios chu akgstitum kakakninanitit!» (2 Pedro 3:11, 12). Apóstol nitu xtlawama akgtum takgalhskinin, xkawanima tuku xlitlawatkan xwanit. Apóstol xkatsi pi kajwatiya tiku xtlawakgolh xtalakaskin Jehová chu xlilatamakgolh la chatum kstalanina Cristo xlakgtaxtukgolh «kilhtamaku akxni [Dios] nakamalakgaxokge» latamanin (Isaías 61:2). Wa xlakata, wa: «Xatapaxkin, mpi alitastakyawanitantitta, kuintaj kakalitlawakantit, ni akxtum titaliʼakgtsankgakgoyatit xliʼakgtsankankan nkalawaj chixkuwin mpala naliʼakgchakgxatit ntu ntliwakglh wilanitit kmintakanajlakan» (2 Pedro 3:17).
4 Xlakata apóstol Pedro “xlistakyawakanita” pi kxaʼawatiya kilhtamaku kstalaninanin Cristo skgalalh xlitawilatkan xlakata ni xmakgxtakgkgolh Dios. Akxni xtitaxtunita akglhuwata kata apóstol Juan tlakg liwana wa tuku xlakata lu xlakaskinka pi kstalaninanin Cristo skgalalh xtawilakgolh. Apóstol maʼakxilhnika akxni Satanás xmakaminkanita kkatiyatni pi «tlanka tasitsin xkgalhiy», xkasitsinima «wa cha nti makikgoy [o tlawakgo] xlimapakgsin Dios, chu na kgalhikgo ntamakatsinin xpalakata Jesucristo» (Apocalipsis 12:9, 12, 17). Akinin katsiyaw pi xkachikin Dios tiku ni makgxtakgkgo wantiku kalaksakkanit xlakata naʼankgo kʼakgapun chu «kalhniluj» o borregos ni katikatlajaka (Juan 10:16). Pero chatunu chatunu kiʼakstukan natlawayaw uma takgalhskinin. ¿Nikxni ktimakgatsankgananilh Jehová? Pulaktutu tuku kilitlawatkan xlakata tlan nakgalhtiyaw uma takgalhskinin: 1) naliskujaw xlakata nakgalhiyaw xalakwan tayat nema xlikgalhitkan kstalaninanin Cristo, 2) akgstitum nalatamayaw chu nitu nalimaxkajwaniyaw kilatamatkan chu kintakanajlakan chu 3) tuku natlawayaw xlakata ni naxlajwanan kintakanajlakan akxni nakgalhiyaw taʼakglhuwit chu talakgaputsit. La uku naʼakxilhaw uma pulaktutu tuku kilitlawatkan.
Kaliskujwi nakgalhiyaw tayat nema xlikgalhitkan kstalaninanin Cristo
5, 6. ¿Tukuya xalakwan tayat kilikgalhitkan chu tuku xlakata talakaskin “fuerza natlawaniyaw”?
5 Wa uma tuku litsuku xlimaktiy xcarta Pedro: «Wixinin wanti kanajlayatit wantu Dios malaknuy najuerza katlawanitit pi ama mintakanajlatkan wantu wixin kgalhiyatit xlikana atsinu lakwan kristianos nakatlawatilhayan [...]. Kumu lu liwana akgatakgsatit nawan man katsiyatit laku namatliwakglhatit mimaknikan y nitu nalitlawayatit wantu lixkajni talakgalhin [...] wanti nitu pala nalisitsi wantu taʼukxilha o katlawankan, nachuna laku nalilakgachixkuwiyatit Dios milatamatkan. [...] Na lu xlakaskinka pi wa uma talakgalhamanin nakamaxkiyan litliwakge laki akxtum nalapaxkiyatit kumu la linatalan. Para wixinin wakg kgalhiyatit wantu akit kkawaniman y akgstitum lakgtsakgsapatit, niaj kaj xman chunatiya katilatapatit na nipara kaj lu xman chunata laktlawapinitantit kilhtamaku lata lipawanatit Cristo» (2 Pedro 1:5-8, Xasasti Tamacatzinín).
6 Xlikana xlakata tlan namakgantaxtiyaw tuku nakinkamakgtayayan nakgalhiyaw lakwan tayat nema xlikgalhitkan kstalaninanin Cristo talakaskin “fuerza natlawaniyaw”. Fuerza natlawaniyaw xlakata naʼanaw putum ktamakxtumit, chali chali nalikgalhtawakgayaw Biblia chu nalakkaxwiliyaw la kiʼakstukan nakgalhtawakgayaw. Na talakaskin fuerza natlawaniyaw xlakata akgatunu semana nakakninaniyaw Dios kfamilia, natlawayaw chuna la xatapaxuwan natawilakgo chu kakamakgtayalh kifamiliajkan tuku nakatalikgalhtawakgayaw. Akxni lismaninitawa tlakg nituwa namakgkatsiyaw chu tlakg nituwa natlawayaw akxni akxilhaw la kinkamakgtayaman.
7, 8. 1) ¿La lichuwinankgonit makgapitsi kstalaninanin Cristo xlakata Kakninanikan Dios kFamilia? 2) ¿La makgtayanitan wix akxni katakakninaniya Dios mifamilia?
7 ¿La akxilhkgo makgapitsi natalan xlakata limaxtumakgolh kilhtamaku akxni Kakninanikan Dios kFamilia? Chatum tala tsokgnalh: «Tanu tanu temas nema klikgalhtawakgamaw». Atanu tala wa: «Akit ni klakgatilh akxni wanka pi nialh xʼamaka tlawakan tamakxtumit niku xtalikgalhtawakga maktum libro kcongregación. Pero la uku kakninanimaw Dios kfamilia, chu kaʼakxilhma pi Jehová katsi tuku maklakaskinaw chu na katsi la nakinkamakgtayayan». Achatum tala wan: «Kimpuskat chu akit lu kinkamakgtayaman. Lu tlan uma tamakxtumit, chu tlan klakkaxwiliyaw tuku hora naktlawayaw. Kmakgkatsimaw pi kinchatiykan tlakg kinkamakgtayaman espíritu santo chu tlakg klipaxuwayaw kkanaw akxni klichuwinanaw Dios». Chu chatum tlat na wan: «Kinkamanan xakstukan lakputsananikgo tuku naklikgalhtawakgayaw chu xatapaxuwan katsinimakgolh. La uku kkatsimaw pi Jehová kinkakuentajtlawayan chu kinkakgalhtiyan akxni ktlawaniyaw oración». Chu wix, ¿la akxilha uma tlan tamakxtumit nema kinkamaxkinitan Jehová?
8 Ni kamasta talakaskin namalaktlawiyan tuku ni xlakaskinka. Chatum tala chu xpuskat wankgolh: «Kxaʼawatiya akgtati jueves nema titaxtunita wi tuku xlakata atsinu nialh xakamaw kgalhtawakgayaw pero ni kmastaw talakaskin». Na minkilhtamaku natalakaskin nalakgpaliyaw kilhtamaku xlakata natlawayaw uma tamakxtumit. Pero ni kamakgxtakgti nipara akgtum semana ni nakatakakninaniya Dios mifamilia.
9. ¿Tuku matliwakglhli Jeremías chu tuku kinkamasiyaniyan Jeremías?
9 Palakachuwina Jeremías kinkawilinin akgtum lu tlan liʼakxilhtit. Jeremías lu xpaxtikatsini la Jehová limakgtayalh xtachuwin, xlakata xmatliwakglha chuntiya xkalitachuwinalh Dios tiku ni xkgaxmatniputunkgo. Xla wa: «Xtachuwin Jehová kitaxtulh [...] la lhkuyat nema xtalakgachinunit kkilukut» (Jeremías 20:8, 9). Xtachuwin Dios na makgtayalh xlakata natayani akxni malakgsputuka Jerusalén. La uku kgalhiyaw xatakgatsin xTachuwin Dios, Biblia. Komo akinin liwana likgalhtawakgayaw chu nalakapastakaw chuna la Dios, xatapaxuwan nalichuwinanaw xlimapakgsin, nikxni namakgxtakgaw maski wi tuku nakinkamamakgxtakgniputunan Dios chu ni namaxkajwaniyaw la limaw kilatamatkan chu kintakanajlakan chuna la tlawalh Jeremías (Santiago 5:10).
“Akgstitum kalatapatit nitu nalixkajwananatit”
10, 11. ¿Tuku xlakata xlakaskinka “akgstitum nalatamayaw chu nitu nalixkajwananaw” chu wa xlakata tuku kilitlawatkan?
10 Kstalaninanin Cristo liwana katsiyaw pi lamaw kxaʼawatiya kilhtamaku. Wa xlakata ni kaks lilakawanaw akxni akxilhaw pi latamanin lakgatikgo tlawakgo tuku Jehová ni akxilhputun, la lhuwa tuku kgalhiputunkgo tuku ni xlakan, tlawakgo talakgxtumit nema lu xalaklixkajni chu lu nitlan latlawani. Max Satanás wa uma lakpuwan: «Xlakata nila kkamakgapekuan xlakskujni Dios, max tlan nakmaxkajwani chuna la linkgo xlatamatkan chu xtakanajlakan» (Apocalipsis 2:13, 14). Wa xlakata lu xlakaskinka kiliʼakxilhatkan tastakyaw nema Pedro kamaxkilh xnatalan: «Juerza katlawanitit lakimpi akxni namin Cristo xla nakamanokglhuyan pi wantu akgstitum lapatit, chu nitu limaxkajwalipatit talakgalhin milatamatkan, wata tlawapatit nawan wantu nalimakgapaxuwayatit» (2 Pedro 3:14).
11 Tachuwin «juerza katlawanitit» xtachuna tachuwin nema apóstol Pedro limaklakaskilh pulana wa uma: «Najuerza katlawanitit». Umakgolh tachuwin nema Jehová malakpuwanilh Pedro liwana masiya pi Jehová katsi lu tuwa “akgstitum nalatamayaw chu nitu nalixkajwananaw” uma wamputun pi ni namakgtanuyaw kxkakilhtamaku Satanás nema xalixkajni. Kaliwiliw akgtum liʼakxilhtit, kilimapanutkan nixatlan talakapastakni nema kgalhiyaw xlakata ni nastaktawila kkinakujkan (kalikgalhtawakga Proverbios 4:23 chu Santiago 1:14, 15). Chu nachuna kilitayanitkan akxni tiku ni lakgatikgo la linaw kilatamatkan nitlan “kinkalichuwinankgoyan” (1 Pedro 4:4).
12. ¿Tuku wan Lucas 11:13 pi xlikana nakinkamaxkikanan?
12 Xlakata lakgalhinanin akinin tuwa makgkatsiyaw natlawayaw tuku tlan (Romanos 7:21-25). Akxni skiniyaw Jehová kakinkamakgtayan tlan natlawayaw tuku tlan, xlakata Jehová kamaxki lhuwa espíritu santo tiku xlikana skinikgo (Lucas 11:13). Uma espíritu kinkamakgtayayan nakgalhiyaw lakwan tayat nema nakinkamakgtayayan tlan natalalinaw Dios, ni natlawayaw tuku nitlan chu tlan nalakkaxtlawayaw taʼakglhuwit nema kgalhiyaw, xlakata tlakg natalhuwi taʼakglhuwit chuna la talakatsuwitilhama xkilhtamaku Jehová.
Akxni titaxtuyaw talakgaputsit tlakg kinkamatliwakglhan
13. ¿Tuku nakinkamakgtayayan natayaniyaw talakgaputsit nema nakgalhiyaw?
13 Xlakata lamaw uma kxaʼawatiya xkakilhtamaku Satanás nakgalhiyaw taʼakglhuwit. Pero ni kamastaw talakaskin nakinkamaxlajwaniyan wata kalimasiyaniw Jehová pi lhuwa paxkiyaw chu tlakg kalipawaw Dios chu xTachuwin. Santiago wa: «Kinatalanin kaj nalipaxuwayatit akxni mpala tu luwa tuwaj talakgaputsit nakgalhiyatit. Xampi katsiyatit mpi wa yuma xaliʼukxilhtit mintakanajlakan, wa ntliwakglh kawiliyan» (Santiago 1:2-4). Akinin katsiyaw pi Jehová katsi «lantla malakgtaxtikgoy [...] nti maxkikgoy nkakni» (2 Pedro 2:9).
14. ¿La matliwakglhan xliʼakxilhtit José?
14 Kalichuwinaw, José, xkgawasa Jacob, xnatalan stakgolh xlakata kaj skujni xlitaxtulh (Génesis 37:23-28; 42:21). Biblia liwana wan pi José ni xlajwanalh xtakanajla, na ni wan pi José sitsinilh Jehová xlakata mastalh talakaskin natlawanikan tuku nitlan. Chu ni kajwatiya uma taʼakglhuwit kgalhilh. Alistalh limawakaka pi xlikgamanamputun chatum puskat chu wa xlakata litamaknuka kpulachin. Pero chuntiya ni xlajwanalh xtakanajla (Génesis 39:9-21). Talakgaputsit nema titaxtulh makgtayalh xlakata tlakg xtatliwakglhli xtakanajla chu alistalh lhuwa tasikulunalin makgamakglhtinalh.
15. ¿Tuku kinkamasiniyan tuku titaxtulh Noemí?
15 Xlikana akxni kgalhiyaw taʼakglhuwit kinkamakgalipuwanan. Max José makgalipuwa taʼakglhuwit nema titaxtulh. Katsiyaw pi lhuwa xlakskujni Dios nachuna makgkatsikgolh. Kalichuwinaw Noemí, Noemí nilh xchixku chu chatiy xlakgkgawasan, xla tiwa: «Nialh kakiwanitit Noemí. Kakiwanitit Mará [uma tachuwin wamputun «Xun»] xlakata Tiku kgalhi xliputum litliwakga xun tlawanit kilatamat» (Rut 1:20, 21). Asta akinin nachuna xmakgkatsiw komo chuna xtitaxtuw la akgspulalh Noemí. Pero Noemí nachuna tlawalh la José, nikxni xlajwanalh xtakanajla chu na ni makgxtakgli Jehová. Wa xlakata Jehová sikulunatlawalh (Rut 4:13-17, 22). Pero kxaKalipaxaw Katiyatni Jehová nakamalakastakwani xfamilia Noemí chu putum xlakskujni Dios tiku kapaxkiy chu nikgonitta xlakata Satanás chu xkakilhtamaku wi tuku katlawanikgolh. Chu nachuna: «Tuku titaxtunita nialh katitalakapastakli, na nialh katitawilalh kkinakujkan» (Isaías 65:17).
16. ¿La xlilakaskinka kiliʼakxilhatkan oración chu tuku xlakata?
16 Komo putum kilhtamaku nalakapastakaw pi Jehová lu kinkapaxkiyan, maski lu tuwa talipuwan nema natitaxtuyaw tlan natayaniyaw (kalikgalhtawakga Romanos 8:35-39). Maski Satanás nalitsakgsa xlakata lu nitlan namakgkatsiyaw, ni kintikatlajan komo “lakatitum ntu nalakapastakaw, chu na skgalalh natawilayaw xpalakata kiʼoraciónkan” (1 Pedro 4:7). Jesús kinkawanin: «Skgalalh katawilatit; ankgalhin natlawayatit mi oracionkan, lakimpi tlan namakalayatit xlipaks yuma katuwaj ntu nalay, chu xalan natayayachipitit xlakatin xKam nchixku» (Lucas 21:36). Jesús kinkawaniyan pi putum kilhtamaku natlawayaw oración. ¿Tuku xlakata? Xlakata nakinkamasiyaniyan pi la uku lu xlakaskinka naʼakxilhaw la natalalinaw Jehová chu xkgawasa. Komo tlan wilaw nawan kxlakatin Jehová chu Jesús kajwatiya uma nakinkalakgmaxtuyan akxni namin lisputni.
Chuntiya kaskujniw Jehová
17. ¿La kinkamakgtayayan xlakata la lichuwinankgolh Dios palakachuwinanin xala makgasa niku ni xkakgaxmatnikan?
17 Tuku kinkamaxkiyan Dios kxkachikin kinkamatliwakglhan. Apóstol Pedro kinkawaniyan pi lu xlakaskinka chuna natlawayaw, xla wa: «¡Xlikana kamininiyan pi luwa akgstitum kalatapatit kxlakatin Dios chu akgstitum kakakninanitit!» (2 Pedro 3:11, TXS [1999]). Apóstol Pedro max xlichuwinama pi xlakaskinka nalichuwinanaw xalakwan xalaksasti tamakatsin (Mateo 24:14). Xlikana lakalhuwa niku latamanin ni kgaxmatputunkgo xlakata Dios, ni lakaskinkgo nalichuwinanaw Dios o xlakata lhuwa taʼakglhuwit kgalhikgo. Xlakskujni Jehová xala makgasa na kgalhikgolh uma taʼakglhuwit. Pero nikxni makgxtakgkgolh xtaskujutkan, wata «makglhuwa» taspitparakgolh xlakata nakalitachuwinankgo xtamakatsin Jehová (kalikgalhtawakga 2 Crónicas 36:15, 16; Jeremías 7:24-26). ¿Tuku kamakgtayalh xlakata ni namakgxtakgkgo xtaskujtkan? Pulana, xʼakxilhkgo xtaskujutkan chuna la Jehová xakxilha ni la latamanin tiku ni xkanajlanikgo Dios chu xlipulaktiy lanka talakgalhaman xʼakxilhkgo xlakata xlichuwinankgo xtukuwani Dios (Jeremías 15:16).
18. ¿Xlakata talichuwinan xTamapakgsin Dios la na talimalanki xtukuwani Dios?
18 Jehová na kinkalakgalhamanitan pi tlan nalichuwinanaw xtukuwani chu xtalakaskin. Chu akxni Dios nakamalakgaxokge tiku ni kgalhakgaxmatputunkgo nila nawankgo pi niti kawanilh tuku xʼama kaʼakgspula. Chuna la faraón xalak Egipto, nakatsikgo pi wa Jehová tiku kamalakgaxokgema (Éxodo 8:1, 20; 14:25). Nachuna, Dios nakalimasiyani putum latamanin pi kskujnanin tiku ni makgxtakgkgo wa xkamalakgacha xlakata xkamakatsinikgolh tuku xʼama tlawa (kalikgalhtawakga Ezequiel 2:5; 33:33).
19. ¿La kiliʼakxilhatkan xlakata Jehová nina limin lisputni?
19 Tuku awatiya tsokgli Pedro kxlimaktiy carta nema kamalakgachanilh xnatalan wa: «Lantla makgapalama xliminat nkimPuchinakan, kaliʼakgatakgstit mpi kaj xpalakata xliʼakgaputaxtunkan amakgapitsin» (2 Pedro 3:15). Chuna la akxilhaw, ni kaj paxkat katlawaw kinkilhtamakujkan. Wa kakgalhiw tayat nema xlikgalhitkan tiku kstalaninanin Cristo, “akgstitum nalatamayaw chu nitu nalixkajwananaw” chu akxni natitaxtuyaw talakgaputsit chu taʼakglhuwit ni namastayaw talakaskin pi namaxlajwani kintakanajlakan chu chuntiya nalichuwinanaw xTamapakgsin Dios. Komo chuna natlawayaw, Jehová nakinkamaxkiyan tasikukunalin nema nalimin «xasasti akgapun» chu «xasasti ntiyat» (2 Pedro 3:13).
¿Lakapastaka?
• ¿Tuku nakinkamakgtayayan xlakata nakgalhiyaw tayat nema xlikgalhitkan kstalaninanin Cristo?
• ¿Tuku nakinkamakgtayayan xlakata “akgstitum nalatamayaw chu nitu nalixkajwananaw”?
• ¿Tuku kinkamasiyaniyan xlakata José chu Noemí?
• ¿Tuku xlakata lu lanka talakgalhaman nalichuwinanaw xTamapakgsin Jehová?
[Takgalhskinin]
[Epígrafe xla página 17]
¿Tuku namakgtayayan wix chu mifamilia xlakata nakgalhiyatit tayat nema xlikgalhitkan kstalaninanin Cristo?
[Epígrafe xla página 18]
¿Tuku kinkamasiyaniyan xlakata José titaxtulh talakgaputsit?