¿Xlikana pi nialh tuku talakgalhin?

NINA makgas sacerdotes xlichuwinankgo pi nitlan tlawakan «pulaktujun xalaklanka talakgalhin»: tiku lanka makgkatsikan, lhuwa tuku kgalhiputunkan, lakgkatsaninankan, tasitsi, lhuwa talakgxtumiputunkan, puxtokgwayankan chu lhkititnankan. Akxni xmastakgo xtaʼakgchuwinkan xkawanikgo tiku xkgaxmatkgo pi xlakgmakgankgolh xtalakgalhinkan xlakata ni xlipatinankgolh. Pero la uku tanu tuku wankgo. Chatum tsokgna wan: «Uku lhuwa takanajla nialh lichuwinankgo talakgalhin, wata lichuwinankgo tuku tlan nalimakgkatsikgo tiku kgaxmatmakgolh».

Periodistas akxilhmakgolh tuku tlawamakgolh chu uma tuku wankgo:

▪ «Tachuwin, “talakgalhin”, “nitlan limakgkatsikan talakgalhin” chu “talakgmaxtut” nialhti kuenta tlawa; la uku tuku lu xlakaskinka akxilhkan wa tuku kamakgtayakgo xlakata tlan namakgkatsikgo chu namakgantaxtikgo tuku lakpuwankgo natlawakgo.» (Star Beacon, de Ashtabula, Ohio.)

▪ «Nialhti pekuani natlawa talakgalhin.» (Newsweek.)

▪ «Nialhti lakpuwan: “¿Tuku lakaskin Dios naktlawa?”, wata lakpuwankgo: “¿Tuku tlan natlawa Dios kimpalakata?”.» (Chicago Sun-Times.)

Xlakata lamaw kkakilhtamaku niku tanu tanu la lakpuwankgo chu lhuwa tuku mastakan talakaskin natlawayaw chu wankgo pi nitlan naliwanikan la lima xlatamat achatum. Latamanin nitlan akxilhkgo, komo wi tiku naliwani tuku nitlan tlawama achatum. Wi tiku wankgo: «Tuku wix lakpuwana namakgtayayan, pero ni nakawaniya amakgapitsi nachuna natlawakgo. Chatunu chatunu xakstu lakpuwan la nalin xlatamat. Niti tlan nawan: “Uma tlan chu uma nitlan”. Lu xlakaskinka tuku wankgo amakgapitsin chu na lu xlakaskinka tuku wana».

Uma talakapastakni litasiya xlakata tuku wankgo latamanin. Chuna, lhuwa tiku kaj likgalhkgamanankgo tachuwin talakgalhin. Nachuna, tanu tuku limapakuwikgo tuku pulana talakgalhin xliʼakxilhkgo. La uku nialhti pekuan akxni kgaxmatkgo tachuwin «akgskgawima xpuskat o xchixku», «akxtum latawi» chu «tiku tatalakgxtumi xtachixku o xtapuskat».

Tasiya pi chuna la lakpuwankgo latamanin lu talakgpalinit. ¿Tuku xlakata tanu la lakpuwankan uku? ¿Xlikana pi nialh talakgalhin tuku tlawakgokan? Chu, ¿la kiliʼakxilhatkan uma tema kinchatunukan?