Dios lakaskin pi nalakgapasaw xtukuwani

Xlikana pi lu tlan tamakgkatsi akxni natachuwinana chatum puxku kʼakgtum tamakxtumit. Chu kawiliw akgtum liʼakxilhtit chatum tiku puxku limapakuwikan «Mapakgsina», nawaniyan: «Kintukuwani kakilimapakuwi». ¿Nixlikana pi lu xlipaxuwa chu xmakgkatsi pi lu xlakaskinka akxilhan?

ANTA kBiblia, Dios kinkawaniyan: «Akit Jehová. Wa uma kintukuwani» (Isaías 42:8). Maski lhuwa tuku limapakuwikan la «Malakatsukina», «Tiku kgalhi xliputum litliwakga» chu «Tiku tlakg lanka», xliputum kilhtamaku kaskininit pi xlakskujnin ni kapekuankgolh chu kalimapakuwikgolh xtukuwani.

Akgtum liʼakxilhtit, palakachuwina Moisés chuna limatsukilh xʼoración nema tlawanilh Dios: «Kakintapati Jehová» (Éxodo 4:10). Mapakgsina Salomón nachuna tlawalh akxni makamastanika Jehová templo xalak Jerusalén. Wanilh Dios: «Wix Jehová» (1 Reyes 8:22, 23). Chu palakachuwina Isaías akxni kapalakachuwinalh kachikin Israel wa: «Wix Jehová, wix kinTlatkan» (Isaías 63:16). Uma limasiya pi kinTlatkan xalak akgapun lakaskin pi nalimaklakaskinaw xtukuwani.

Xlakata tuku lichuwinaw, lakgapaskan xtukuwani Dios ni kajwatiya nakatsiyaw xtukuwani chu nalimapakuwiyaw akxni natachuwinanaw. Lataman tiku paxki chu lipawan Jehová, Jehová wani: «Akit na naklakgmaxtuj [«tiku kilakgapasa», NM]» (Salmo 91:14). Xlakata Jehová nakinkamakgtayayan, lu xlakaskinka nalakgapasaw xtukuwani, chu uma ni wamputun pi kaj nakatsiyaw xtukuwani. Wa xlakata, ¿tuku wamputun nalakgapasaw xtukuwani Dios?