La kinkamakgtayayan talakgmaxtut
La kinkamakgtayayan talakgmaxtut
«Wanti nkanajlaniy xaKam, kgalhiy xlatamat wa ntu xaliankgalhin; wampi wa nti ni kgalhakgaxmata xaKam, ni katiʼukxilhli latamat, wampi [...] napatiy xtasitsi [...] Dios.» (JUAN 3:36)
1, 2. ¿Tuku xlakata tsukuka maʼakgpitsikan uma revista?
UMA revista kxlipulaktati takgalhtawakga xla papaʼ octubre xla kata 1879 uma tuku wa: «Wantiku liwana likgalhtawakgakgo Biblia kaks lilakawankgo xlakata akxilhkgo pi Biblia lu xlakaskinka akxilhkan xlakata makgnika Cristo». Chu awatiya wa: «Nipara tsinu kuenta katlawaniw tuku natlawa pi nialh xlakaskinka naʼakxilhaw pi Cristo mastalh xlatamat xlakata nakinkalakgmaxtuyan o tiku nawan pi ni talakaskin pi Jesús nakinkalakgmaxtuyan ktalakgalhin» (kalikgalhtawakga 1 Juan 2:1, 2).
2 Pulaktu tuku xlakata tsukuka maʼakgpitsikan uma revista wa xlakata ni namasputukan wantuku masiya Biblia xlakata talakgmaxtut. Kxkgatsputat XIX tlakg lhuwa tiku xwankgo pi max ni xlikana pi Jesús nilh xlakata nakinkalakgmaxtuyan ktalakgalhin chu klinin. Wa xlakata artículos xla uma revista lu “xkilhtamaku maxkikgoy ntu nawakgoy” xlakata takanajla (Mateo 24:45). Akxni amakgolh kata lhuwa tiku xtsukumakgolh kanajlakgo kʼevolución, akgtum tamasiy nema masiya pi chixku ni kgalhi talakgalhin. Uma tamasi masiya pi latamanin tlakg tatlanitilhamakgolh, chu nialh xlakaskinka wi tiku nakalakgmaxtu. Xlakata umakgolh tapuwan, lu xlakaskinka uma tuku tastakyaw nema Pablo wanilh Timoteo: «Kamaki wa ntu ntalimakuintajlinita. Kuintaj natlawaya, ni nakgaxpata wa ntu nkaj chunata takgalhchuwin ntu ni kgalhiy xlakgasi, chu yuma ntu ni akxtum taʼan nkintakanajlakan, wa ntu wanikan tastakat, [o takatsin] maski ni wa. Wa ntu kstalanikgoy makgapitsin, chuna nchu litamakgatlinikgolh ntakanajla» (1 Timoteo 6:20, 21).
3. ¿Tukuya takgalhskinin naʼakxilhaw uku?
3 Akinin nikxni «litamakgatlini[putunaw] ntakanajla». Wa xlakata lu tlan komo natlawayaw umakgolh takgalhskinin: «¿Tuku xlakata kmaklakaskin uma talakgmaxtut? ¿Tuku titaxtukgolh Jehová chu Jesús xlakata kinkalakgmaxtukan? ¿Tuku kilitlawat xlakata nakililakgmaxtukan xtamakamastan Cristo kxtasitsi Dios?»
Nalakgtaxtuniyaw kxtasitsin Dios
4, 5. ¿Tuku limasiya pi Dios chuntiya sitsininit uma lixkajni kakilhtamaku?
4 Biblia wan chu nachuna putum tuku latilhanit kilhtamaku limasiya pi lu nitlan kitaxtulh xlakata Adán lakgalhinalh, wan pi «xtasitsi [...] Dios» chuntiya kasitsininit latamanin (Juan 3:36). Limasiya pi chuna xlakata putum niyaw. Xtamapakgsin Satanás, ni la kamakgtaya latamanin xlakata ni napatinankgo ni para chatum mapakgsina tlan nakamaxki latamanin putum tuku lu maklakaskinkgo (1 Juan 5:19). Asta la uku, lhuwa guerras anankgo chu lu latlawanikan tuku nitlan chu lhuwa talimaxkgen anan.
5 Xlikana pi uma kakilhtamaku nema lu lixkajni Jehová nitu kasikulunatlawama. Pablo masiyalh pi «xtasitsi [...] Dios, lakatanks takatsiy mpi namin[acha] nkakgapun xpalakata xlipaks wa nti lakgachixkuwimakgankgoy Dios» (Romanos 1:18-20). Chuna, wantiku ni namakgxtakgkgo tuku nitlan tlawamakgolh nema Dios ni lakgati nalipatinankgo. La uku tamakatsininama xtasitsi Jehová, Biblia tamalakxtumi la akxni tazones lipuxtakgamakaminkan xtasitsin Jehová kxkakilhtamaku Satanás, kilhchanima lhuwa tuku nitlan naʼakgspula. Umakgolh tamakatsin lu lichuwinan xlikgalhtawakgakan xTatayananin Jehová (Apocalipsis 16:1).
6, 7. ¿Tukuya taskujut pulalimakgolh kstalaninanin Cristo tiku xatalaksakni, chu tukuya malakcha chuntiya lakkiya xlakata tlan natanukgo tiku tapakgsikgojku kxkakilhtamaku Satanás?
6 ¿Wamputun uma pi nialh la nalakgtaxtuniyaw xkakilhtamaku Satanás chu nialhla natalalinaw Dios? Ni, nichuna Jehová chuntiya malakkiyawanit malakcha xlakata tlan natalalinaw. Wantiku xatalaksakni «xpalakachuwinanin nCristo» litaxtukgo, pulalimakgolh natalichuwinan Dios xlakata nakamakgtaya putum latamanin. Xlakata kawanimakgolh latamanin «katalakatsuwinitit Dios» (2 Corintios 5:20, 21).
7 Apóstol Pablo wa pi «wa Jesús, nti nkintikalakgmaxtun xpalakata ntasitsi[...] ntu namin» (1 Tesalonicenses 1:10). Jehová nalimasiya xtasitsi akxni xliputum kilhtamaku nakamalakgsputu latamanin tiku ni makgxtakgkgo tuku nitlan tlawamakgolh (2 Tesalonicenses 1:6-9). ¿Tiku nalakgtaxtukgo? Biblia kinkawaniyan tiku: «Wanti nkanajlaniy xaKam, kgalhiy xlatamat wa ntu xaliʼankgalhin; wampi wa nti ni kgalhakgaxmata xaKam, ni katiʼukxilhli latamat, wampi [...] napatiy xtasitsi [...] Dios» (Juan 3:36). Chuna la akxilhaw, akxni nachan kilhtamaku akxni Jehová nalimin xtasitsi chu namasputu uma kakilhtamaku, nalakgtaxtukgo tiku nalimasiyakgo pi kanajlanikgo Jesús chu lipawankgo xtamakamastan.
La makgtayanan talakgmaxtut
8. 1) Komo Adán chu Eva xtikgalhakgaxmatnikgolh Dios, ¿la lu tlan xtilatamakgolh? 2) ¿La litasiyalh pi Jehová xliputum kilhtamaku tlawa tuku xalakatitum?
8 Akxni Dios katlawalh Adán chu Eva ni lakgalhinanin xwankgonit. Komo xtikgaxmathikgolh Jehová akxtum chu xatapaxuwan xtalatamakgolh xkamanan kxakalipaxaw Katiyatni. Lu nitlan, pero xapulana kinatlatnikan ni kgalhakgaxmatniputunkgolh Dios, wa xlakata Dios katamakxtulh kjardín xaʼEdén chu laklhkawililh pi xnikgolh putum kilhtamaku. Xlakata lakgalhinanin wankgolh, xkamanan na lakgalhinanin wankgolh. Wa xlakata kgolonkgolh chu nikgolh, chuna Jehová limasiyalh pi makgantaxti xtachuwin chu putum tuku tlawa xalakatitum. Dios xwaninit Adán pi komo xwakgolh ama tawakat xnikgolh chu makgantaxtilh xtachuwin.
9, 10. 1) Xlakata xkaman Adán akinin, ¿tuku xlakata niyaw? 2) ¿La tlan nalakgtaxtuniyaw linin?
9 Xkamanan Adán, kinkamatitaxtinikan talakgalhin wa xlakata tlawaputunaw tuku nitlan chu niyaw. Xlakata akxni Adán lakgalhinalh, putum akinin nina xlakachinaw wa xlakata kinputumkan niyaw. Pero komo niti kxokgolh tuku xtalakaskin xlakata nakalakgmaxtukan latamanin chu ni xnikgolh, xlitasiyalh pi Jehová ni makgantaxti xtachuwin. Wa xlakata putum akinin nachuna titaxtumaw la Pablo, xla wa: «Katsiyaw mpi wa xlimapakgsin Dios, wa spiritu mastanit; wampi wa nkit, kaj chixku lantla amakgapitsin nchixkuwin, ktastaninit nakimapakgsiy ntalakgalhin. ¡Kgoxuta nkit! ¿Ti nakimalakgtaxtiniy yuma nkintiyatliwa [...] naniy?» (Romanos 7:14, 24).
10 Kajwatiya Jehová tiku tlan xlakkaxwililh chu xlimasiyalh pi xalakatitum xlakata tlan xkatapatilh latamanin xtalakgalhinkan chu xkalakgmaxtulh tuku xkalimalakgaxokgemaka, linin. ¿La tlawalh? Malakgachalh xKgawasa tiku lu xpaxki xlakata xlakachilh katiyatni, ni xkgalhilh talakgalhin chu chuna tlan xmakamastalh xlatamat xlakata xkalilakgmaxtulh latamanin. Pero Jesús ni chuna tlawalh la Adán xla ni lakgalhinalh. «Ni tsinu ntlawalh ntalakgalhin.» (1 Pedro 2:22.) Wa xlakata tlan xkgalhilh kamanan tiku ni xkgalhikgolh talakgalhin. Pero, mastalh talakaskin pi xtalamakgasitsin Dios xmakgnikgolh xlakata chuna tlan xkalakgmaxtulh xkamanan Adán chu tlan xkgalhikgolh latamat nema ni kgalhi xlisputni putum tiku xkanajlanikgolh. Biblia wan: «Xman chatum Dios wi, chu na chuna xman chatum nti napalakachuwinankgoy nchixkuwin kxlakatin Dios, wa Jesucristo [...] titamastalh [...] nkintikalilakgmaxtun nkilipakskan» (1 Timoteo 2:5, 6).
11. 1) ¿Tuku tlan natamalakxtumiyaw xlakata la makgtayanan talakgmaxtut? 2) ¿Tiku na namakgtaxtukgo xlakata talakgmaxtut?
11 Xlakata naʼakgatekgsaw la kinkalakgmaxtukanan, katamalakxtumiw uma. Lhuwa latamanin xmakikgonit xtuminkan kʼakgtum banco pero banco kamakgkgalhan xtuminkan chu xlakan lhuwa tuku nialhla xokgokgolh. Pero xmalananin banco katamaknukan kpulachin akglhuwa kata. Pero tiku kamakgkgalhanka xtuminkan, ¿tuku natlawakgo? Xlakata ni kgalhikgo tumin kajwatiya tuku lakpuwankgo pi max kakalakgalhamalh tiku kgalhi tumin, chu katamawalh banco xlakata nakapuxokgonikan xtuminkan chu xlakan tlan nalixokgonankgo. Nachuna, Jehová chu xKgawasa tiku lu paxki, katamawanit xkamanan Adán chu kalitamawaka xkgalhni Cristo, chuna kalilakgmaxtukan ktalakgalhin. Wa xlakata Juan tiku xMununan tlan wa: «Kaʼukxilhtit aktsu xkalhnilu [o xborrego] Dios, nti namapanuniy xtalakgalhin ntachixkuwitat» (Juan 1:29). Kakilhtamaku nema kamapanunikan xtalakgalhinkan kilhchanima tiku lamakgolh chu tiku nikgonitta.
Wantuku titaxtukgolh Jehová chu Jesús xlakata talakgmaxtut
12, 13. ¿Tuku kinkamasiyaniyan xlakata Abrahán xʼama makamasta xkgawasa?
12 Maski ni la liwana akgatekgsaw la makgkatsikgolh Jehová chu xKgawasa tiku paxki xlakata mastakgolh talakgmaxtut, Biblia lichuwinan tuku nakinkamakgtayayan xlakata naʼakgatekgsaw la makgkatsikgolh. Kalichuwinaw Abrahán. Kalakpuwaw la xmakgkatsima Abrahán akxni akgtutu kilhtamaku xtlawama xlakata xʼama Moria, xlakata Dios xwaninit: «Katlawa litlan kalipi minkgawasa Isaac tiku lhuwa paxkiya anta kMoria, chu xatalhkun kakimakamastani anta kxakgspun sipi nema nakwaniyan» (Génesis 22:2-4).
13 Na kalakpuwaw la tlakg nitlan makgkatsilh akxni chalh niku xwanikanit, akxni tsukulh kaxwili chiwix xlakata anta xmakamastalh xkgawasa chu la xmakgkatsima akxni xchiminitta xkgawasa chu la xlipatinama akxni tiyalh cuchillo chu xaʼamaja makgni xkgawasa. Chu la uku kalakpuwaw, ¿la xmakgkatsima Isaac akxni xchimikanitta chu kajwatiya xkgalhima akxni nayawanikan cuchillo asta xlimakgnika? Maski xʼángel Jehová machokgolh akxni xʼamaja makgni, uma tuku lalh kinkamasiyaniyan pi lu tuwa makgkatsilh Jehová xlakata mastalh talakaskin pi xlakskujnin Satanás xmakgnikgolh xKgawasa. Chu chuna la Isaac liwana xtamastama namakgnikan uma limasiya chuna la Jesús tamastalh chu lipatinalh asta nilh kimpalakatakan (Hebreos 11:17-19).
14. ¿Tuku titaxtulh Jacob nema kinkamakgtayayan naʼakgatekgsaw la lipatinalh Jehová xlakata mastalh talakgmaxtut?
14 Atanu tuku na nakinkamakgtayayan naʼakgatekgsaw la patinalh Jehová, wantuku titaxtulh Jacob. Xkgawasa Jacob nema tlakg xpaxki xwanikan José, pero amakgapitsi xkamanan xlakgkatsananikgo chu ni xakxilhputunkgo. Akgtum kilhtamaku, Jacob malakgachalh xkgawasa José xlakata xʼalh kaʼakxilha xnatalan, wantiku xkuentajtlawamakgolh borregos kxnorte Hebrón 100 kilómetros xlilakgamakgat. Maski xkatsi pi xnatalan ni xʼakxilhputunkgo xatapaxuwan alh. ¡Kalakpuwanti la makgkatsilh Jacob akxni xnatalan masiyanikgolh xtlat xlhakgat José nema lhuwa kgalhni xpasanit! Akxni akxilhli wa: «¡Xlhakgat kinkgawasa! ¡Max tantum xalipekua animal walh! ¡Max laktsu laktsu tlawalh José!». Uma tuku akgspulalh lhuwa kilhtamaku lu lilipuwa (Génesis 37:33, 34). Xlikana pi Jehová ni lakgaputsa xtachuna la latamanin tiku kgalhikgo talakgalhin. Pero uma kinkamakgtayayan naʼakgatekgsaw la makgkatsilh Jehová akxni akxilhli pi mapatinika chu makgnika xKgawasa tiku lu paxki anta unu kKatiyatni.
La litamakgtayayaw talakgmaxtut
15, 16. 1) ¿La limasiyalh Jehová pi makgamakglhtinalh xtamakamastan Jesús? 2) ¿La makgtayanitan talakgmaxtut?
15 Akxni Jehová malakastakwanilh xKgawasa tiku nikxni makgxtakgli maxkilh akgtum makni xaʼespiritual (1 Pedro 3:18). Alistalh tipuxum kilhtamaku katasiyanilh kstalaninanin, kamatliwakglhnilh xtakanajlakan chu kamasiyanilh la xʼamakgolh lichuwinankgo Dios. Alistalh alh kʼakgapun, anta niku makamaxkilh Dios kxtapalh xkgalhni nema kstajtamakganit xlakata tlan xkalitamawaka wantiku lu xlikana kstalaninanin, wantiku lipawankgo tamakamastan nema mastalh. Jehová makgamakglhtinalh wa xlakata liyawalh Cristo pi xkamaxkilh espíritu santo kstalaninanin tiku xtamakxtumikgonit anta kJerusalén kPentecostés xla kata 33 (Hechos 2:33).
16 Xtamakgalhtawakgen Jesús wantiku xatalaksakni tunkun tsukukgolh kawanikgo latamanin pi kalakgtaxtunikgolh xtasitsi, katamunukgolh kxtukuwani xlakata nakatapatikan xtalakgalhinkan (kalikgalhtawakga Hechos 2:38-40). Akxni ama kilhtamaku nema ni katitapatsankgalh asta la uku, Dios kamalakatsuwima lhuwa millones latamanin xalak tanu tanu kachikinin xlakata tlan natalalinkgo Dios anta kxtukuwani Jesucristo tiku kalakgmaxtu (Juan 6:44). La uku na xlakaskinka naʼakxilhaw a pulakti takgalhskinin: ¿Pi wi tiku putum kilhtamaku nalatama kaj xlakata tlan likatsi? Akxni tlantiya talalinaw Dios komo ni nakuentajtlawayaw, ¿namakgatsankgayaw?
17. ¿La kiliʼakxilhatkan xlakata tlan talalinaw Dios?
17 Niti minini nalakgmaxtukan. Pero kaj xlakata kanajlakgo ktalakgmaxtut millones lakpuskatin chu lakchixkuwin tlan talalinkgo Dios chu kgalhkgalhimakgolh nalatamakgo xliputum kilhtamaku kxakalipaxaw Katiyatni. Pero ni kapatsankgaw pi xlakata tlan natalalinaw Jehová komo ni kuentajnatlawayaw namakgatsankgayaw. Komo lakaskinaw nakinkalakgmaxtuyan akxni nalimin xtasitsi, chali chali nalimasiyayaw pi paxtikatsiniyaw “lantla lakgmaxtunalh nCristo Jesús” (Romanos 3:24; kalikgalhtawakga Filipenses 2:12).
Chuntiya kalimasiyaw pi kanajlaniyaw talakgmaxtut
18. ¿Tuku ama pulaktu nema nalimasiyayaw pi kanajlaniyaw tamakamastan?
18 Texto nema litsuku uma artículo, Juan 3:36, limasiya pi pulaktu tuku tlan nalimasiyayaw pi kanajlaniyaw kiMalanakan Jesucristo, wa nakgalhakgaxmatniyaw. Xlakata lu tuwa tuku Jehová chu Jesús titaxtukgolh kililakpuwanatkan pi nalatamayaw chuna la Jesús masiyalh (Marcos 7:21-23). Wantiku ni namakgxtakgkgo tuku nitlan «la talakgxtumit nema ni xlitatlawat», «lixkani takgalhkaman», chu «tuku xalixkajni», la tiku akxilhkgo tiku nitu lhakganankgonit, paks tiku chuna limakgolh xlatamatkan, Dios kalikgalhkgalhima xtasitsi (Efesios 5:3-6, NM).
19. ¿Tuku tlan natlawayaw nema nakinkamakgtayayan nalimasiyayaw pi kanajlaniyaw talakgmaxtut?
19 Xlakata paxtikatsiniyaw tamakamastan, putum kilhtamaku kilitlawatkan la wan Biblia «xasantujlani mililatamatkan, chu xkakninanin Dios nawanatit» (2 Pedro 3:11). Lu xlakaskinka nalimaxtuyaw kilhtamaku xlakata natlawayaw oración, nalikgalhtawakgayaw Biblia, naʼanaw ktamakxtumit, nakatakgalhtawakgayaw familia chu nalichuwinanaw Dios. Na ni napatsankgayaw «lantla ntu ntlan natlawayatit, chu nalamakgtayayatit, [...] wa lakgatiy Dios» (Hebreos 13:15, 16).
20. ¿Tuku tasikulunalin namakglhtinankgo tiku nalimasiyakgo pi kanajlanikgo talakgmaxtut asta kxkgatsputat kakilhtamaku?
20 Akxni nalimin xtasitsi Jehová kʼuma kakilhtamaku nema xalixkajni, ¡lu napaxuwayaw xlakata limasiyaw pi lu paxtikatsiniw kxtamakamastan Jesucristo! Kxasasti xkakilhtamaku Dios nema wanit pi nalimin, nikxni katipatsankgaw pi Jehová kinkamaxkin talakgmaxtut xlakata ni xpatiw xtasitsi (kalikgalhtawakga Juan 3:16 chu Apocalipsis 7:9, 10, 13, 14).
Kakgalhtiw makgapitsi takgalhskinin
• ¿Tuku xlakata talakaskin kakinkalakgmaxtukan?
• ¿Tuku titaxtukgolh Jehová chu Jesús xlakata kinkalakgmaxtukgon?
• ¿Tuku tasikulunalin limin talakgmaxtut?
• ¿La limasiyayaw pi kanajlaniyaw kxtamakamastan Jesús nema kinkalilakgmaxtun?
[Takgalhskinin]
[Epígrafe xla página 17]
Chuntiya lakkiya malakcha xlakata natalalinaw Jehová
[Epígrafe xla página 19]
Akxni lakapastakaw la makgkatsikgolh Abrahán, Isaac chu Jacob, tlakg akgatekgsaw la lu lipatinankgolh Jehová chu Jesús xlakata kinkalakgmaxtukgon