Akgtati takgalhskinin xlakata lisputni

JESUCRISTO lichuwinalh pi kilhtamaku akxni xmilh lisputni chuna xʼama la: «Wij nawan tlanka takatsanajwat, lantla niʼukxniku alay xtachuna, asta akxni Dios timalakatsukilh katuxawat, chu nialh ukxni pala chuna katiʼanampa alistalh» (Mateo 24:14, 21).

Uma tuku tiwanka pi xʼama kgantaxtu, chu amakgapitsi nema na xʼama kgantaxtu xlakata uma tema nema lichuwinan Biblia, tlawa pi lhuwa takgalhskinin natawila. Kaʼakxilhwi la kgalhtinan xTachuwin Dios akgtati takgalhskinin. Komo wix lakaskina tlan naputsaya kmiBiblia versículos nema tatsokgtawilakgonit.

1 ¿Tuku namalakgsputukan?

Biblia ni wan pi katiyatni niku lamaw namalakgsputukan; wata wan pi nikxni katilakgsputli. Anta kSalmo 104:5 wan pi Dios «liwana lakkaxwilinit» chu «nikxni kajchuna namalakgsputukan». Na ni masiya pi nalimalakgsputukan guerra putum tuku unu anan (Isaías 45:18). Jesucristo masiyalh pi makgapitsi latamanin nalakgtaxtukgo akxni namin lakgsputni nema xlichuwinanit (Mateo 24:21, 22). Chu akxni Biblia wan pi nachin lisputni, ¿tuku kilhchanima?

Mapakgsinanin nema nila kalipawankan. Dios makatsinilh Daniel chu xla tsokgli uma: «Dios xalak akgapun nawiliy akgtum tamapakgsin [anta kʼakgapun] nema nikxni katisputli. Chu tama tamapakgsin ni katimatitaxtinika atanu kachikin [nialh wa latamanin katimapakgsikgolh katiyatni]. Nakalakxpulay chu nakamasputuy putum tamapakgsin chu tama tamapakgsin xliputum kilhtamaku natawilay» (Daniel 2:44).

Guerra chu tuku laktlawama un chu katiyatni. Akxni salmista xlichuwinama tuku Dios natlawa wa: «Masputu guerra kxlitilanka katiyatni laktukxa arco chu xlikana laktsu laktsu tlawa lanza; chu kalhkuyu carro xla guerra» (Salmo 46:9). Na wan pi Dios “nakamasputuy tiku lakglakgalhimakgolh katuxawat” (Apocalipsis [Revelación] 11:18).

Lamakgnikan, latlawanikan tuku nitlan. Anta kxTachuwin Dios wan: «Wantiku xalakatitum wa nalatamakgo katiyatni, chu wantiku nitu tlawamakgolh talakgalhin anta natamakgxtakgkgo chu wantiku lixkajni xtayatkan  nakamalakgsputukan chu wantiku akgskgawinankgo, na nakamalalakgsputukan» (Proverbios 2:21, 22).

2 ¿Tukuya kilhtamaku namin lisputni?

Xlikana pi Dios lakkaxwilinit «kilhtamaku nalakgchan» xlakata nakamalakgsputukan tiku lixkajni likatsikgo chu xlakata nalakkaxwilikan tamapakgsin Katiyatni (Marcos 13:33). Pero, nitiku katsi tukuya kilhtamaku nalakgchan. «Wa mpi akxni yama nkilhtamaku nchuna nalay, chu xatu hora nawan [o akxni namin lisputni] —Jesús wa— tini katsiy, asta ni mpala wa ángeles xala kʼakgapun, chu na ni mpala wa xaKam, wampi xman wa nkinTlat.» (Mateo 24:36.) Maski niti katsi Jesús chu amakgapitsi kstalaninanin wankgolh la xʼama tawila Katiyatni akxni xʼamaja chin lisputni. Wa xlakata, akxni nakgantaxtukgo tuku tawanit kxlikalanka kakilhtamaku, nakatsiyaw pi lisputni mimaja. ¿Tuku nalikatsiyaw?

Akxni wi tuku masputunan, política chu tuku xalipekua wi nawan. Akgtum kilhtamaku, kstalaninanin kgalhskinkgolh Jesús tuku nalikatsikan akxni xaʼawatiya kilhtamaku wi nawan: «Xampi na nalalakatakikgoy akgatunu [...][«kachikinin», NM] chu laktlanka napuxkun nalatalatlaway, na natachikiy nkatuxawat nkaniwaj, na naʼanan ntatsinkstat, chu ntaklitwan. Wa yuma xkilhtsukut nawan ntakatsanajwa» (Marcos 13:8). Apóstol Pablo na wa xlakata uma: «Akxni sputmaja nawan [...] [«kakilhtamaku», NM] lhuwa skalajwa namin nkilhtamaku. Na naʼanankoy nchixkuwin nti nkaj nakstupaxkikan, chu wa nti xman wa lakgatikgoy ntumin chu xalakapakxnin chu natlankakatsikoy, [...] chu nalakg[...]makgankoy xnatlatnakan, ni ukxni ntu napaxkatsinikgo chu ni tu naliukxilhkgoy Dios. Chu ntlanka xtalakapastaknakan chu ni namakgantaxtikgoy ntu nawankgoy, chu nakgalhtampumaxtunankgoy ni namakgaxtakgtayaputunkgo wa ntu ni tlan, ni tsinu kgayaj nakatsankgoy, chu wa nti naxkajnikgoy ntu ntlan. Tsekg xalekgaman natlawanankgoy, chu nkalawa laktlawanin, chu lakapakxnin, na wata wa ntlakg nalakpaxkikgoy wa ntu nkaj nalilakastanankgoy, ni xawa wa ntu xla Dios» (2 Timoteo 3:1-5).

Natalichuwinan Dios kʼakglhuwa tachuwin. Jesús tiwa: «Na xapulh taliʼakgchuwinanit nawan xlikatlanka nkatuxawat yuma xatlan tamakatsinin xla tapakgsin; lakimpi paks nakgaxmatkgoy yuma ntalulokgtat xlipaks akgmakgat chixkuwin; akxniku nchu nachin xlikgatsputni nkatuxawat» (Mateo 24:14).

3 ¿Tuku nala alistalh?

Biblia ni masiya pi putum tiku tlan likatsikgo naʼankgo kʼakgapun chu putum kilhtamaku nalatamakgo kxlakatin Dios kʼakgapun. Wata, Dios tlawalh latamanin xlakata nalatamakgo kKatiyatni, chu Jesús masiyalh pi nakgantaxtu xlakata uma tuku wa: «Chapaxuwana lamakgo wa nti xalaksmalhwan, xampi wa namakgamakglhtinankgoy nkatiyatna, xlakan nawan» (Mateo 5:5; 6:9, 10). ¿Chu la nakitaxtunikgo tiku nanikgo akxni nina a min nawan lisputni? Biblia wan pi nakamalakastakwanikan (Job 14:14, 15; Juan 5:28, 29). ¿Tuku nala alistalh?

Kʼakgapun natawilayacha Jesús akxni namapakgsinan kxTamapakgsin Dios. Palakachuwina Daniel tsokgnalh: «Chuntiya xakʼakxilha tuku xaklimanaxnama ¡chu kakxilhti!, kpuklhni xmima chatum la xkgawasa chixku [wa Jesús tiku xmalakastakwanikanitta] na kakxilhli Kgolotsin [Jehová Dios] malakatsuwinika. Chu maxkika tamapakgsin, chu lilanka chu pumapakgsin, xlakata kachikinin, pulaklhuwa kachikinin chu tanu tanu tachuwin putum naskujnikgo. Wa xtamapakgsin akgtum tamapakgsin nema nikxni katisputli ni katititaxtulh, xtamapakgsin nikxni katimalakgsputuka» (Daniel 7:13, 14; Lucas 1:31, 32; Juan 3:13-16).

Ni katitatatlakgolh ni katipekuankgolh chu putum kilhtamaku nalatamakgo. Wantuku tiwa palakachuwina Isaías, «natlawakgo chiki  chu anta natawilakgo; chu nachankgo uvas chu nawakgo xtawakat. Ni atanu tiku natawila kchiki nema natlawakgo; ni katichananankgolh chu atanu tiku nawakgo» (Isaías 65:21-23). Xlakata uma kilhtamaku, apóstol Juan tiwa: «Uwi xputawilh Dios, anta wi kxlakgstipankan nchixkuwin; na wa natatawilakgo, chi nchu xlakan xchixkuwin nawankgoy, na watiya Dios xPuchinakan nawan. Na paks naxakanikgo Dios xlakgpixtajatkan: na nialh katianalh linin; chu na nialh katianalh ntalipuwan, ni mpala wa ntatasa, chu na ni mpala wa ntakatsanajwat; xampi wa xlipaks nkatuwaj, wa ntu xʼanan xakasiyaj, paks lakgsputli» (Apocalipsis [Revelación] 21:3, 4).

4 ¿Tuku kilitlawatkan xlakata nalakgtaxtuyaw?

Apóstol Pedro wa pi makgapitsi tiku nalatamakgo kxaʼawatiya kilhtamaku kaj xlikgalhkgamanankgolh xlakata Dios namasputu putum tuku nitlan kKatiyatni (2 Pedro 3:3, 4). Wa xlakata kawanilh tiku xlatamakgolh kxaʼawatiya kilhtamaku:

Wantuku katsiniyaw xlakata tuku tilalh makgasa. Chuna la wa Pedro, Dios «lapi na ni matsankgananikgolh [o katapatilh] xamakgan tachixkuwitat, wa mpi tilakgmaxtulh Noé nti ntiliʼakgchuwinalh [...] Dios [...], chu na timalakgtaxtilh nkalhatujun amakgapitsin, timakamilh chi nchu munkaklat muxtukgolh wa nti lakgachixkuwimakgankgolh  Dios lantla xlikatlanka nkatuxawat» (2 Pedro 2:5). Chu xlakata tiku xlilitsinankgolh wa: «Ni lakapastakpuntunkgoy mpi wa xpalakata xtachuwin Dios, wa akgapun, chuna ntilianalh akxni yama xamakgan, chu na chuna ntiyat, na wa ntiyat ntitasiyulh [...] Na watiya litum nchuchut, limasputupa yama xlikatlanka [...] nkatuxawat. Wampi wa ntu nchu akgapun, chu ntiyat * na watiya litum xtachuwin limakgapalama, litamakinit lhkuyat akxni xlikgalhtsputni Katuxawat akxni na[...]putsananikgoy wanti lakgachixkuwimakganankgolh Dios chu lantla natsankgakgoy» (2 Pedro 3:5-7).

Nakgalhakgaxmataw Dios. Pedro tiwa wantiku lakgtaxtuputunkgo «akgstitum kalatapatit kxlakatin Dios chu akgstitum kakakninanitit» (2 Pedro 3:11, Hua Xasasti Talaccaxlan, 1999). Akxni lichuwinalh «akgstitum kalatapatit», limasiyalh pi xlakata nalakgtaxtukan, ni kajwatiya talakaskin nawankan pi kanajlakan o namakgapaxawaputunkan Dios akxni kxlikgalhsputat kilhtamaku.

¿Tukuya tayat xlichuwinama Pedro? ¿Tekgsputuna xatakgalhtin anta kmiBiblia? Xtatayananin Jehová xatapaxuwan namakgtayakgoyan chu chuna wix tlan ni napekuana xlakata nakatsiya tuku namakgtayayan.

[Notas nema wilakgo kpágina]

[Epígrafe xla página 7]

Dios nikatimalakgsputulh Katiyatni wata wa namalakgsputu tiku tlawanimakgolh nitlan