Nialh pekuanikgo lisputni

LIWANA xakxilhmakgolh pi xtalakatsuwima xlisputni kakilhtamaku, akxni xkgalhsputma kata 1970 Gary chu Karen taxtukgolh klanka kachikin chu ankgolh tlawakgo xchikkan kakiwin. Xlakpuwankgo pi xlakata tlan xlakgtaxtukgolh xakstukan wi tuku xtlawakgolh.

Wa xlakata, tamawakgolh libros, ankgolh niku xkamasiyanika chu kgalhskininankgolh xlakata uma. Chankgolh lhuwa tuku wakan chu tipuxamakaw kiwi nema mastakgo tawakat chu ni lu laklanka staka, makgstokgwilikgolh lhuwa laktsu talhtsi, chu xliskujnikan, katsinikgolh la xchanankgolh chu xtlawakgolh xaconserva makgapitsi tawakat... ¡Asta chatum tiku xtalalin kamasiyanilh la xmakgnikgolh animales chu la liwana xkaxtlawakgolh xlakata nitu xlanilh liwa chu komo putum xmakgasputkgolh, Karen liwa kalakgapasli tankgaxekg chu tuwan nema tlan wakan. Gary na katsinilh la gasolina tlawakan nema taxtuni kuxi, tlawalh akgtum cocina nema kiwi xlitatlawanit chu liwana kaxtlawalh niku xtawilakgolh nema ni xlimaklakaskilh tuku maklakaskinkan kkachikinin.

Karen wan: «Akit xkakxilha pi xʼama sputa la xlimaw kilatamatkan. Kaj xʼakxilhwi la lu nitlan xwi kakilhtamaku». Chu Gary na chuna xʼakxilha: Chuna la xtlawakgo lhuwa lakgkgawasan nakmakgtanulh xlakata ni xʼanalh guerra kVietnam chu nialh xkalakgmakganka tiku atanu xcolor, chu xalakatitum xwankgolh latamanin. Pero nila ktlawalh. Ktsukulh klakpuwan pi akinin latamanin nalamalakgsputuyaw».

 Na wan: Akgtum tsisni akxni xakkgalhi kilhtamaku ktsukulh klikgalhtawakga Biblia Tatsokgni xaGriego, putum klikgalhtawakgalh. Tlakg liwana klikgalhtawakgapa akgtati tsisni nema titaxtulh. Chu xliʼakgkitsis kilhtamaku kwanilh Karen: «Xaʼawatiya kilhtamaku lamaw. Nialh makgas kilhtamaku Dios namasputu tuku nitlan, kilitekgsatkan tiku nalakgtaxtukgo chu nanakatatapakgsiyaw». Tunkun tsukulh putsakgo xaxlikana takanajla ankgolh ktanu ktanu takanajla.

Ni makgas kilhtamaku titaxtulh chatum xtatayana Jehová lakgatlakgli xmalakchakan chu tsukukgolh likalhtawakgakgo Biblia. Karen wan: «Lu klipaxuwa xlakata kimasinika tuku masiya Biblia. Makgasa xakputsama xtakgalhtin xlakata xlisputni katiyatni, chu ktekgsli tuku xaxlikana. Kkatsilh pi namin kilhtamaku nema tlakg tlan. Na tlakg ktalakatsuwinilh Jehová, kinTlatikan xalak akgapun tiku Tlawanit putum kakilhtamaku».

Gary, na wan: «Tlakg xatapaxuwan klatamalh. Nila xakmakgxtakga chuntiya xaklikgalhtawakgama Biblia. Akxni kklikgalhtawalh tuku xlichuwinanitta chu kʼakxilhi pi xkgantaxtumakgolha, liwanakkatsilh pi nialh makgas namasputunan Dios. Klakapastaka pi klakpuwa: “Ni wa xlakaskinka nakkatsi liwana nalakkaxwilikan akxni namin tuku nitlan xliputum katiyatni, wantuku tlakg xlakaskinka wa, latamakan la Dios lakaskin”». Akxni katsikgolh uma tuku lu lilakgatit natawila Katiyatni, nialh lilipuwankgolh xlakata namin lisputni. Katsikgolh pi Dios nialh makgas namasputu xtaʼakglhuwit latamanin chu natlawa pi Katiyatni nawan akgtum paraíso.

¿La lakpuwankgo uku? Titaxtunit puxamakitsis kata, Karen wan: «Tlakg kpaxki Jehová chu kintakanajla tlakg tatliwakglhma. Chu na kkalitachuwinan xlakata Jehová amakgapitsi chu nalakgapaskgo chu na napaxkikgo. Gary chu akit klamakgtayayaw xlakata putum kifamilia tliwakga natawila xtakanajlakan chu makxtum nakskujnaniyaw Dios. Liwana klakkaxwiliyaw ni lhuwa tuku nakkgalhiyaw chuna tlan kkamakgtayayaw amakgapitsin».

Gary, wan: Chali chali kwani Dios pi kalimilh xTamapakgsin chu nialh kapatinankgolh lhuwa millones latamanin. Akxni kan lichuwinan Dios chu kkawani amakgapitsi uma tuku lu tlan tiku kkalakgapasa, kwani Jehová pi kakimakgtayalh maski kaj chatum tiku nak limasiyani Biblia. Chu xla chuntiya kinkgalhtima uma tuku kskinininit la uku titaxtunit puxamakitsis kata. Maski kkatsiyaw pi lhuwa tuku namin Katiyatni, Karen chu akit ni kpekuanaw xlakata namin lisputni» (Mateo 6:9, 10; 2 Pedro 3:11, 12).

[Epígrafe xla página 9]

Gary chu Karen kalimakgtaya latamanin tuku masiya Biblia