¿Makgtayanana xlakata namatliwakglhnan tamakxtumit?
¿Makgtayanana xlakata namatliwakglhnan tamakxtumit?
«Akxni ntamakgstokgatit, [...] kali[ta]tlawalh xlipaks lantla nalimakgtayakgoy xtakanajlakan amakgapitsin.» (1 CORINTIOS 14:26)
1. Chuna la lichuwinan 1 Corintios capítulo 14, ¿tuku lu xlakaskinka xlitatlawat ktamakxtumit?
«¡LU TLAN tamakxtumit kgalhiw chu lu kinkamakgtayan!» Max nachuna wanitaw akxni kilaw kʼakgtum tamakxtumit kxPukgalhtawakga xla xTatayananin Jehová. Xlikana lu kinkamatliwakglhan akxni anaw ktamakxtumit, chuna la xkamatliwakglha xapulana kstalaninanin Cristo. Pulaktu tuku lu xlakaskinka xlakata tawila tamakxtumit wa nakamatliwakglhni xtakanajlakan congregación. Apóstol Pablo makglhuwa lichuwinan kxapulana carta nema kamalakgachanilh natalan xalak Corinto. Kcapítulo 14 makglhuwa lichuwinan pi putum tuku talichuwinan ktamakxtumit, «nalimakgtayakgoy xtakanajlakan amakgapitsin» (kalikgalhtawakga 1 Corintios 14:3, 12, 26). *
2. 1) ¿Tuku xlakata lu kinkamatliwakglhan kintamakxtumitkan? 2) ¿Tukuya takgalhskinin namastayaw xtakgalhtin?
2 Katsiyaw pi tamakxtumit kinkamatliwakglhan chu kinkamakgtayayan, xlakata anta wi xespíritu santo Dios. Wa xlakata limatsukiyaw akgtum oración chu skiniyaw kinTlatikan xalak kʼakgapun kakinkamaxkin xespíritu santo. Pero na katsiyaw pi chatunu tiku ankgo ktamakxtumit tlan namakgtayanankgo xlakata tuku namatitaxtikan namatliwakglhnan. ¿Tuku tlan natlawayaw chatunu chutunu akinin xlakata tamakxtumit nema kgalhiyaw akgatunu semana kPukgalhtawakga xla xTatayananin Jehová tlan nalimakgkatsiyaw chu nalimatliwakglha kintakanajlakan?
3. ¿La xlilakaskinka tamakxtumit xla kstalaninanin Cristo?
3 Xlakata nakgalhtiyaw uma takgalhskinin, naʼakxilhaw tuku xlitlawatkan tiku matitaxtikgo tamakxtumit. Na naʼakxilhaw la tlan putum namakgtayananaw xlakata ktamakxtumit putum napaxuwayaw. Lu xlakaskinka naʼakxilhaw uma, xlakata tamakxtumit xasanto; chu akxni anaw chu makgtayananaw, likakninaniyaw Jehová (Salmos 26:12; 111:1; Isaías 66:22, 23).
Tamakxtumit, lakkaxwilika xlakata natalikgalhtawakga Biblia
4, 5. ¿Tuku xlakata talikgalhtawakga revista Makatsinina?
4 Putum akinin litamakgtayaputunaw akxni talikgalhtawakga Makatsinina. Wa xlakata talakaskin liwana naʼakgatekgsaw tuku xlakata litatlawa uma tamakxtumit akgatunu semana. Kaʼakxilhwi tuku xlakata likgalhtawakgayaw revista Makatsinina chu tuku kalakgpalinika artículos nema talikgalhtawakga.
5 Kgalhiyaw tamakxtumit niku likgalhtawakgayaw revista Makatsinina xlakata nakinkamakgtayayan nalikgalhtawakgayaw Biblia. Uma tamakxtumit nema tatlawa akgatunu semana, talikgalhtawakga xtachuwin Dios chu wankan tuku wamputun, chuna la xtatlawa akxni xlama Nehemías (Nehemías 8:8; Isaías 54:13).
6. 1) ¿Tuku lakgpalika kʼartículos nema talalikgalhtawakga krevista Makatsinina? 2) ¿Tuku xlitatlawat akxni akgtum texto pulana wi tachuwin kalikgalhtawakga?
6 Xlakata katsiyaw pi libro nema tlakg xlakaskinka akxilhaw wa Biblia, wi tuku lakgpalika kʼartículos nema talikgalhtawakga: la uku limin makgapitsi textos niku pulana wan kalikgalhtawakga. Kawanikan natalan kalikgalhtawakgakgolh umakgolh versículos anta kxBibliajkan akxni tatlawama tamakxtumit (Hechos 17:11). ¿Tuku xlakata? Xlakata akxni akxilhaw xtastakyaw Dios anta kkiBibliajkan, tlakg chan kinakujkan o kkiʼanimajkan (Hebreos 4:12). Wa xlakata, akxni nina talikgalhtawakga umakgolh textos, wantiku matitaxtima tamakxtumit ni lu lakapala naskin kalikgalhtawakgaka textos, xlakata natalan na tlan natekgskgo.
Tlakg kgalhiyaw kilhtamaku xlakata nalimasiyayaw kintakanajlakan
7. ¿La tlan nalimasiyayayaw kintakanajlakan akxni talikgalhtawakga revista Makatsinina?
7 Atanu tuku na lakgpalika, wa pi artículos nema talikgalhtawakga nialh lu laklanka. Xlakata nialh lhuwa kilhtamaku lin natalikgalhtawakga párrafos, tlakg anan kilhtamaku xlakata natalan namastakgo xtakgalhtinkan. Wa xlakata natalan xalak congregación tlan nalimasiyakgo xtakanajlakan xlakatin amakgapitsin. Kawiliw akgtum liʼakxilhtit, tlan nakgalhtinankgo akgtum takgalhskinin nema wi krevista, nawankgo tuku wamputun akgtum texto xalak Biblia chu nawankgo tuku limasiya pi akxni makgantaxtiyaw tastakyaw xalak Biblia kinkamakgtayayan. Na nalimaxtukan kilhtamaku xlakata natalichuwinan dibujos nema wilakgolh (kalikgalhtawakga Salmos 22:22; 35:18, chu 40:9).
8, 9. ¿Tuku xlitlawat tiku namatitaxti tamakxtumit niku talikgalhtawakga revista Makatsinina?
8 Uma kilhtamaku nema akgataxtu, liwana natalimaklakaskin xlakata natalan tlan tlakg namastakgo xtakgalhtinkan akxni natalikgalhtawakga revista Makatsinina talakaskin pi ni lu lhuwa nachuwinankgo akxni namastakgo xtakgalhtinkan chu nachuna ni lu lhuwa nachuwinan tiku matitaxtima uma tamakxtumit. ¿Tuku namakgtaya tiku matitaxtima tamakxtumit pi xtachuwin kaj natamakgatsi wantuku kgalhtinankgolh natalan, xlakata putum nalitatliwakglhkgo?
9 Akgtum liʼakxilhtit nalikgalhtiyaw uma takgalhskinin. Akxni liwana matitaxtikan tamakxtumit niku talikgalhtawakga revista Makatsinina tlan natamalakxtumiyaw la pixtum xanat nema lu stlan tasiya. Xtachuna la xanat nema lichuwinaw tanu tanu tasiyakgo, nachuna tamakxtumit niku talikgalhtawakga revista Makatsinina tlan namastakan tanu tanu takgalhtin. Chuna la xanat ni akxtum la tasiyakgo, chu tanu tanu xcolor, xtakgalhtin tiku wilakgo ktamakxtumit nachuna ni lakxtum. Chu, ¿tuku tlan natamalakxtumiyaw akxni ni makglhuwa chuwinan tiku matitaxtima tamakxtumit? Tlan tamalakxtumiyaw tuwan nema tapachikan xanat xlakata lilakgatit natasiya. Tiku matitaxtima tamakxtumit xlilakapastakat pi ni lhuwa tuku nawan, kaj natamakgatsi xtakgalhtin tiku wilakgolh ktamakxtumit. Akxni chuna tlawa tiku matitaxtima tamakxtumit tlakg nalitamakgtayakgo tiku anta wilakgolh.
«Putum kilhtamaku kalimalankiw Dios kintachuwinkan»
10. ¿La xʼakxilhkgo xapulana kstalaninanin Cristo tamakxtumit xalak congregación?
10 Tuku wa Pablo xlakata xtamakxtumitkan kstalaninanin Cristo anta 1 Corintios 14:26-33 kinkamakgtayayan naʼakgatekgsaw la xtlawakan tamakxtumit kxapulana siglo. Chatum tiku liskuja xlakata lakputsanani Biblia uma tuku tsokgli xlakata umakgolh versículos: «Tuku xlilakgapaskan takanajla xala makgasa wa xlakata putum tiku xʼankgo lu lanka talakgalhaman xʼakxilhkgo wi tuku na tlan xmastakgolh. Ni kaj xʼankgo kgaxmatkgo; wata xʼankgo xlakata wi tuku xmakglhtinankgolh chu na tlan xmastakgolh». Xapulana kstalaninanin Cristo xʼakxilhkgo tamakxtumit la niku tlan xlimasiyakgolh xtakanajlakan (Romanos 10:10).
11. 1) ¿Tuku tlawa pi tamakxtumit nakinkamatliwekglhan, chu tuku xlakata? 2) ¿Tuku nakinkamakgtayayan xlakata tlakg tlan namastayaw kintakgalhtinkan? (Kaʼakxilhti nota.)
11 Akxni limasiyayaw kintakanajlakan ktamakxtumit “nalitamakgtayakgo xtakanajlakan amakgapitsin”. Max nachuna akxilhaw maski akglhuwata kata anaw ktamakxtumit, lu tlan makgkatsiyaw akxni mastakgo xtakgalhtinkan kinatalankan. Lu tlan limakgkatsiyaw xtakgalhtin chatum tala puskat tiku lina lhuwa kata chu nikxni makgxtakgnit Jehová; na kinkamakgtayayan akxni wi tuku lu tlan wan chatum kgolotsin xapaxkina, chu lipaxuwayaw akxni chatum aktsu kgawasa wi tuku wan xlakata lu paxki Jehová. La akxilhwi akxni mastayaw kintakgalhtinkan putum tlan makgtayananaw xlakata tamakxtumit nakinkamatliwakglhan. *
12. 1) ¿Tuku kinkamasiyanikgoyan Moisés chu Jeremías? 2) ¿La kinkamakgtayayan oración akxni mastayaw takgalhtin ktamakxtumit?
12 Pero, tiku maxanankgo lu tuwa makgkatsikgo namastakgo xtakgalhtinkan. Komo chuna makgkatsiya kalakpuwanti pi wilakgo makgapitsi natalan tiku nachuna makgkatsikgo. Asta xlakskujnin Dios la Moisés chu Jeremías wankgolh pi nila xchuwinankgo xlakatin amakgapitsin (Éxodo 4:10; Jeremías 1:6). Pero chuna la Jehová kamakgtayalh xlakata xlakgachixkuwilikgolh xlakatin amakgapitsin, na namakgtayayan (kalikgalhtawakga Hebreos 13:15). ¿Tuku tlan natlawaya xlakata Dios namakgtayayan tlan namastaya mintakgalhtin? Pulana, tuku tlan natlawaya wa liwana kalikgalhtawakga tuku naʼakxilhaw tamakxtumit. Alistalh, akxni nina pina kPukgalhtawakga xla xTatayananin Jehová, kaskini Jehová namakgtayayan xlakata tlan namastaya takgalhtin ktamakxtumit (Filipenses 4:6). Xlakata skimpat tuku «wa lantlata xtalakaskin», liwana kakatsi pi Jehová nakgalhti mi oración (1 Juan 5:14; Proverbios 15:29).
Tamakxtumit nema matliwakglha kintakanajlakan
13. 1) ¿La nakamakgtaya tiku ankgo ktamakxtumit? 2) ¿Tukuya takgalhskinin akstu nakatlawanikan lakgkgolotsin?
13 Pablo wa pi tamakxtumit lu xlakaskinka xlakata: makgtayanan, matliwakglhnan chu tlan namamakgkatsini tiku ankgo (1 Corintios 14:3). * Lakgkgolotsin xakstu nakakgalhskinkan komo tuku wankgo kamatliwakglhkgo natalan. Xlakata nakatsikgo komo chuna tlawamakgolh, xlakaskinka naʼakxilhkgo la katatlawalh Jesús akgtum tamakxtumit xtamakglhtawakgen akxni xmalakastakwanikanita.
14. 1) ¿Tuku lalh akxni Jesús nina xtlawa akgtum tamakxtumit? 2) ¿Tuku xlakata apóstoles tlan limakgkatsikgolh akxni akxilhkgolh pi «Jesús, [ka]xakgatlikgolh»?
14 Pulana, kaʼakxilhwi tuku lalh akxni nina xtlawakan uma tamakxtumit. Akxni nina xmakgnikan Jesús, xʼapóstoles «makgaxtakgkgolh xlipakskan [...], tilaktsalatamakgolh» chu chuna la xlitachuwinanit «natakgawaniyatit nchatunu» (Marcos 14:50; Juan 16:32). Alistalh akxni Jesús xlakastakwanita, kawanilh xʼapóstoles tiku lu kxlajwanankgonit pi xʼama katakgalhi akgtum lu xlakaskinka tamakxtumit. * Wa xlakata «xkgalhakawitukan limakgalhtawakgat, tiʼankgolh kGalilea nkaʼakgtum nkgastin ntani[ku] xwanikgonit Jesús». Akxni chankgolh apóstoles «Jesús, [ka]xakgatlikgolh» (Mateo 28:10, 16, 18). ¡Lu tlan max makgkatsikgolh apóstoles xlakata Jesús kaputsalh! Chu, ¿tuku kalitachuwinalh Makgalhtawakgana?
15. 1) ¿Tuku kawanilh Jesús xʼapóstoles akxni katatamakxtumilh chu la kalikatsinilh? 2) ¿La kamakgtayalh apóstoles uma tamakxtumit?
15 Jesús wa uma tuku pulana kawanilh: «Xlipaks limapakgsin, kintamaxkinit». Chu alistalh kalimapakgsilh: «Kapitit, na kamasiyunikgotit». Chu xaʼawatiya, kawanilh uma lu tlan tachuwin: «Nakkatalatamayan nchali chali, asta nasputa katuxawat» (Mateo 28:18-20). ¿Tuku tlawalh Jesús? Ni kakilhnilh xʼapóstoles. Ni kakgalhskilh tuku xlakata makgxtakgkgolh chu tuku xlakata kxlajwananit xtakanajlakan nema xtlawalh pi tlakg nitlan xmakgkatsikgolh. Wata Jesús kawanilh pi xkapaxki chu xTlat nachuna chu kalakgayawalh akgtum lu xlakaskinka taskujut. Xlakata chuna tlawalh, ¿la limakgkatsikgolh xʼapóstoles? Lu kamatliwakglhli, tlan limakgkatsikgolh, wa xlakata alistalh kaʼakxilhparaka xlakata «xmasiyukgoy, xliʼakgchuwinankgoy Jesucristo» (Hechos 5:42).
16. Chuna la tlawalh Jesús, ¿tuku xlitlawatkan lakgkgolotsin xlakata namatliwakglhnan tamakxtumit?
16 La uku, lakgkgolotsin tlawakgo la Jesús, limaklakaskinkgo tamakxtumit xlakata nakalimasiyanikgo xnatalan pi nitu katitlawalh pi nialh napaxkikgo Jehová (Romanos 8:38, 39). Wa xlakata akxni mastakgo akgtum takgalhchuwin, lichuwinankgo tuku tlan tlawamakgolh xnatalan, chu ni lichuwinankgo tuku ni tlan tlawakgo. Ni lakpuwankgo pi kaj wi tuku lakaskinkgo akxni wi tuku tlawakgo. Wata akxni kalichuwinankgo kalimasiyakgo pi katsikgo pi xnatalan paxkikgo Jehová chu makgapaxuwaputunkgo (1 Tesalonicenses 4:1, 9-12). Pero max namin kilhtamaku natalakaskin pi lakgkgolotsin namastakgo tastakyaw kcongregación, pero komo ni chalhuwa tiku nakastayawakan tlakg tlan kaj xakstukan nakastakyawakan (Gálatas 6:1; 2 Timoteo 2:24-26). Akxni tawila tamakxtumit lakgkgolotsin kawanikgo congregación pi lu tlan skujnanimakgolh Jehová (Isaías 32:2). Liskujkgo tlan nakatachuwinankgo congregación, xlakata akxni nasputa tamakxtumit putum tlan namakgkatsikgo chu natatliwakglha xtakanajlakan (Mateo 11:28; Hechos 15:32).
Niku lu tlan makgkatsiyaw
17. 1) ¿Tuku xlakata la uku tlakg talakaskin pi tamakxtumit tlan nalimakgkatsiyaw? 2) ¿Tuku tlan natlawaya xlakata tamakxtumit namatliwakglhnan? (Kaʼakxilhti recuadro: «Pulakaw tuku tlan natlawayaw xlakata tamakxtumit lu nakinkamatliwakglhan».)
17 Xlakata xkakilhtamaku Satanás tlakg lixkajni likatsima, kuentaj kilitlawatkan xlakata ktamakxtumit tlan namakgkatsikan, uma wamputun niku nakinkamakgtayayan nialh nalipuwanaw (1 Tesalonicenses 5:11). Chatum tala chu xchixku tiku makgasa kgalhikgolh akgtum lanka taʼakglhuwit wa: «Anta kxPukgalhtawakga xTatayananin Jehová, akxni xakkatatamakxtumiyaw kinatalankan xakʼakxilhaw la Jehová lu tlan xkinkakuentajtlawayan. Xakmakgkatsiyaw pi tlan xakmakamaxkiyaw Jehová kintaʼakglhuwitkan, chu tlan xaklimakgkatsiyaw» (Salmo 55:22). Lakaskinaw pi putum tiku naʼankgo ktamakxtumit nachuna namakgkatsikgo chu natatliwakglha xtakanajlakan. Xlakata chuna nawankgo tamakxtumit, katlawaw tuku kinkalakgchanan xlakata lu namatliwakglhnan.
[Notas nema wilakgo kpágina]
^ párr. 1 Talichuwinalh pi pulaklhuwa tuku xtatlawa ktamakxtumit xla xapulana siglo nialh xʼama tatlawa. Kawiliw akgtum liʼakxilhtit, nialh xʼamakgolh chuwinankgo atanu tachuwin chu nialh xʼama talichuwinan tuku aku nala (1 Corintios 13:8; 14:5). Maski chuna, tastakyaw nema mastalh apóstol Pablo kinkamakgtayayan liwana naʼakgatekgsaw o namakgachakgxiya la xlitatlawat tamakxtumit.
^ párr. 11 Revista La Atalaya 1 xla septiembre kata 2003, kpáginas 19 asta 22, tlakg natekgsa tamakgtay xlakata la tlan namastaya takgalhtin ktamakxtumit.
^ párr. 13 Tachuwin «matliwakglhnankan» chu «tlan lamamakgkatsinikan» uma akgtiy tachuwin nema tamatitaxtinit xatotonaco takilhtinit kxagriego, chu Diccionario expositivo de palabras del Antiguo y del Nuevo Testamento exhaustivo, xla W. E. Vine, wa pi tachuwin «tlan lamamakgkatsinikan» kilhchanima «tlakg lapaxkikan» nixawa tachuwin «matliwakglhnankan» (katamalakxtumi Juan 11:19).
^ párr. 14 Max wa uma tuku xlichuwinama Pablo akxni wa pi Jesús «ntitasiyunikgolh mpala liwaka akgkitsis ciento» kstalaninanin (1 Corintios 15:6).
¿La xkgalhtinanti?
• ¿La xlilakaskinka xtamakxtumitkan kstalaninanin Cristo?
• ¿Tuku xlakata «nalimakgtayakgoy xtakanajlakan amakgapitsin» takgalhtin nema tamasta ktamakxtumit?
• ¿Tuku kinkamasiniyan tamakxtumit nema Jesús katatlawalh kstalaninanin?
[Takgalhskinin]
[Epígrafe xla página 30]
PULAKAW TUKU TLAN NATLAWAYAW XLAKATA TAMAKXTUMIT LU NAKINKAMATLIWAKGLHAN
Pulana kalikgalhtawakgaw. Komo nalikgalhtawakgaya kminchik tuku nataʼakxilha ktamakxtumit, tlakg lilakgatit namakgkatsiya chu natamakgxtakga kmintalakapastakni.
Nikxni kamakgatsankga. Akxni lhuwa ankgo ktamakxtumit tlan limakgkatsiyaw, wa xlakata lu xlakaskinka napina.
Nachipina akxni nina tsuku. Komo wilata akxni nina tsuku tamakxtumit, tlan akxtum nakatakilhtliya chu nakgaxpata oración nema nalimatsukikan tamakxtumit, xlakata uma na likakninaniyaw Jehová.
Kalipi likgalhtawakga nema natamaklakaskin. Komo nalipina Biblia chu likgalhtawakga nema natamaklakaskin, tlan naʼakxilha tuku talichuwinama chu tlakg naʼakgatekgsa tuku natawan.
Kuenta katlawa. Kawiliw akgtum liʼakxilhtit, ni kalikgalhtawakga mensajes kmicelular ktamakxtumit. Alistalh nalikgalhtawakgaya. Chuna nalimasiyaya tuku tlakg xlakaskaskinka.
Kamasta comentarios. Akxni lhuwa tiku mastakgo comentarios, amakgapitsin tlakg lipaxuwakgo chu tatliwakglha xtakanajlakan.
Ni lu lhuwa kachuwinanti akxni namastaya mincomentarios. Akxni chuna natlawaya amakgapitsi natalan na tlan namastakgo xcomentarioskan.
Kamatitaxti tuku lakgchanan kcongregación. Akxni nalakgchanan namatitaxtiya akgtum taʼakgchuwin Niku Masiyakan xlakata la Lichuwinankan Dios o kTamakxtumit xlakata xTaskujut Dios, pulana liwana kalikgalhtawakga chu kamatitaxti.
Kakawani pi tlan tlawakgolh tiku kalakgchalh taʼakgchuwin. Kakawani pi lu kapaxtikatsiniya tiku matitaxtikgolh akgtum taʼakgchuwin o mastakgolh comentarios.
Kakatachuwinanti. Akxni nina tsuku chu akxni nakgalhsputa tamakxtumit xatapaxuwan kakamakgachipa chu lu tlan kakatachuwinanti, uma natlawa pi tlakg napaxuwakgo chu nalitamakgtayakgo tiku ankgo.