Nialh makgas nasputa tuku nitlan

CHUNA la akxilhwi kxapulana artículo, Dios kinkamasiyaninitan kxTachuwin tuku xlakata latamanin tlawakgo tuku nitlan. Nachuna, kinkamaxkinitan talakaskin namachokgoyaw tuku nitlan tlawaputunaw chu nalaksakaw tuku natlawayaw, wa xlakata akinin nalaksakaw komo natlawayaw tuku tlan o tuku nitlan (Deuteronomio 30:15, 16, 19). Xlikana, kgalhiyaw putum tuku nakinkamakgtayayan xlakata tlan naʼakxilhaw akxni tlawaputunaw tuku nitlan chu tlan nalakgpaliyaw. Komo chuna natlawayaw, ¿la nakitaxtu? Nakgalhiyaw tapaxuwan chu na napaxuwakgo tiku kinkalistilikgoyan (Salmo 1:1).

Pero, maski lu naliskujaw xlakata natlawayaw tuku tlan, nila limasputuyaw tuku nitlan anan kkakilhtamaku. Biblia makatsininalh: «Awatiya kilhtamaku, xlisputni katuxawat [o kakilhtamaku] luwa skalajwa namin kilhtamaku». Chu na lichuwinalh tuku  xlakata lu tuwa xʼama wan: «Lhuwa chixkuwin wanti kaj xman xakstukan [...] [«nakapaxkikan», NM], xman wa luwa nalakgatilakankgoy nakgalhikgoy lhuwa tumin, natlankakatsikgoy, luwa laktalipaw namakgkatsikgokan lantla nalakgapakgxkgoy. Lhuwa ti [...] [«lixkani nalichuwinankgo Dios», NM], chu nalakgachixkuwimakganankgoy xnatlatnakan, niukxni pala ti tu nalipaxkatkatsinikgoy, chu nitu naliukxilhkgoy Dios. Xlakan nipara chatum ti katilakgalhamankgolh, chu para ti natlawanikgoy wantu nitlan, ni katimatsankgananikgolh, xawachi xlakan tlanka xaʼakgsaninanin nawankgoy, ni namakgaxtakgtayaputunkgoy lantla tlakgaj nalilakgoy xmaknikan, ni tsinu kgayaj nakatsankgoy, chu ni katiʼukxilhputunkgolh wantu tlan taskujut. Asta xakstukan natsukuy laliakgskgawinan, tlanka lakapakxnin nawankgoy, kaj luwa xman wa natsakgsakgoy lantla namakgapaxuwakgoy xmaknikan, ni xawa katiputsakgolh lantla nalimakgapaxuwakgoy Dios kxlatamatkan. Yama chixkuwin kaj wa natlawakgoy xtachuna pi kakninanikgoy Dios natasiyukgoy, maski stalanka nalitasiyukgoy xlipaks wantu lixkajni tlawakgoy pi nipala tsinu makamaxkiputunkgoy xlatamatkan Dios. Xlipaks tama chixkuwin wanti chuna lamakgo [...] kaj katamakgatlinikgo» (2 Timoteo 3:1-5, Hua Xasasti Talaccaxlan, [1999]).

Akxni lichuwinanaw «awatiya kilhtamaku» wi, wamputunaw pi amaja sputa. Wa xlakata, ¿tuku amaja sputa chuna la wan uma texto? Uma tuku malaknu Dios kinkamasiyaniyan tuku uma.

Putum kilhtamaku nialh katianankgolh tiku lixkajni likatsikgo.

«Tsina [...] ama latama xalixkajnit, nakxilha latani ixwij, y ni pimpat takgasa. Pero ti laktlan takatsij, ixlakan nawan ama lilakgatit pulataman, xlakan ana snun lipaxaw natalatamaj.» (SALMO 37:10, 11)

«Kintikukan kamakgtakgalha wakg ti tapaxkij, pero nakamasputu wakg ti xalaktlakatni» o tiku lixkajni likatsikgo. (SALMO 145:20)

Nialh tiku katilatlawanilh tuku nitlan.

«Xla nalakgmaxtu pobre nak ixmakankan ti [...] [«kamakgapatinan», NM], akxni nakilhanij; xawa, namakgtaya ama ti patima porque nila ti lekgawaj. Akxni lixkajnit nakamakgxtakgajnikan y nakamakgniputunkan.» (SALMO 72:12, 14)

«Xampi na chuna xlipaks ntamalakatsukun nalakgtaxtunikgoy yuma ntu ntliwakglh kgalhikgoy lantla ankgalhin sputtilhay, lakimpi makxtum natalipaxuwakgoy xlakgskgatan Dios wa yuma lilakgatit ntalakgtaxtun ntu namin.» (ROMANOS 8:21)

Nialhtu katikatsankganilh latamanin.

«Chatunu chatunu tawila xtampin xakiwi xʼuvas chu xtampin xhiguera, chu ni katianalh tiku nakamakgapekuan.» (MIQUEAS 4:4)

«Natlawakgo chiki chu anta natawilakgo chu [...] nachankgo uvas chu nawakgo xtawakat. Ni katitlawakgolh chiki chu atanu tiku anta natawila; ni katichananankgolh chu atanu tiku nawakgo. Xlakata chuna la latama kiwi nachuna natawila kinkachikin chu tuku natlawakgo kintalaksaknin putum kilhtamaku nalipaxuwakgoy.» (ISAÍAS 65:21, 22)

Naʼanan tuku xaʼakgstitum xlikalanka Katiyatni.

«¿[...] Dios, ni natlawanikgoy ntalulokgtat [o tuku xaʼakgstitum] xtalaksaknin, mpi xakgatlilakankgoy ntantaku tantaskaka [...]? Kawaniyan mpi lakapala namakgtayakgoy.» (LUCAS 18:7, 8)

«Porque kinTikukan Dios kapaxki ti tanks talamanaj, y nikxni kaʼakgxtakgwili ixkamanan nima kalaksaknit, kanikxniwa kamakgtakgalha.» (SALMO 37:28)

 «Wantuku xalakatitum wa nakatsikgo latamanin tiku natawilakgo kkatiyatni.» (ISAÍAS 26:9)

«Likgalhiyaw xasasti akgapun, chu xasasti tiyat, xtachuna lantla kinkawaninitan mpi namin, anta [...] ntatlaway talulokgtat.» (2 PEDRO 3:13)

Talakgpalimakgolha latamanin

Xlikana pi kimputumkan akxilhputunaw pi kakgantaxtulh uma tuku Dios natlawa. Pero ¿wi tuku likanajlayaw pi xlikana nakgantaxtu? Akxilhmaw tuku tlan nalikanajlayaw: lhuwa millón latamanin xlikalanka kakilhtamaku nialh xakstukan kapaxkikan, nialh tlawakgo talakgxtumit xalimaxana o nialh lixkajni likatsikgo chu katsinikgonit nialh naʼakgskgawinankgo, tlan katalalinkgo amakgapitsi chu tlan kalikatsinikgo. Xtatayananin Jehová nema wilakgo xlikalanka katiyatni tiku liwaka akgtujun millón tlan latalalinkgo, chu ni akxilhkgo komo tanu xcolorkan, xtachuwinkan, xkachikinkan, chu nachuna ni mastakgo talakaskin pi política chu tumin nakamapitsi, nema tlawanit pi kkakilhtamaku latamanin ni nalaʼakxilhputunkgo, nalatlawani tuku nitlan chu nalamakgni. * Xlikana, akxni akxilhaw la lhuwa latamanin lakgpalimakgolh xlatamatkan uku, uma liwana kinkalimasiyaniyan pi Dios xlikana namakgantaxti tuku wanit natlawa kilhtamaku nema aku mima.

Pero ¿tuku tlawa pi latamanin nalakgpalikgo xtayatkan? Wa kamakgtaya tuku wan Biblia, nema palakachuwina Isaías wa:

«Lobo chu borrego akxtum nalatamakgo chu nitu katilatlawanilh, chu leopardo akxtum natatama aktsu cabra, chu aktsu toro chu aktsu león chu animal nema liwana wayanit akxtum nalatamakgo; chu chatum aktsu kgawasa nakakuentajtlawakgo. [...] Chu asta león nawa sekget chuna la toro. Aktsu skgata nakgamanan niku tanuma cobra; chu klhuku tantum luwa nema kgalhi veneno tlan natamaknu xmakan chatum aktsu skgata. Ni katitlawakgolh tuku nitlan chu ni katimasputunankgolh kkisipi xasanto; xlakata  katiyatni nalitatsama xtamasiy Jehová chuna la chuchut litsama pupunu.» (Isaías 11:6-9.)

Xlakata ama tachuwin, Isaías ni xwamputun pi kajwatiya xʼama minkilhtamaku akxni latamanin chu animales akxtum xlatamakgolh. ¿Tuku likatsiyaw? Xlakata chuna la wan xaʼawatiya tachuwin xla uma texto, tuku kalakgpali wa «xtamasiy Jehová». Akinin liwana katsiyaw pi uma texto ni wamputun pi Dios nakalakgpali animales, pero tlan kalakgpali latamanin. Wa xlakata, uma tuku wa palakachuwina, na kilhchanima tiku kgalhikgo xtayatkan la xla animales nema ni lakapastaknankgo, pero akxni katsinikgo tuku masiya Biblia, kamakgtaya nakgalhikgo lakwan tayat.

Chuna titaxtulh Pedro. * Xlakata xlakpuwan pi xtlawama tuku tlan, tsukulh kamakgtaya akgtum tamakxtumit tiku makgninankgo xlakata namakgapekuanankgo. Akxni xmamakgatawakgakanita, wanika pi xwililh akgtum bomba niku xwilakgo policías. Pero, akxni nina xtlawa tuku xmatlawimaka, chipaka chu linka kpulachin. Akgkutsayan papaʼ nema xtanuma kpulachin, chuntiya xlakpuwan pi tlan niku xmakgtanuma. Akxni xtanuma kpulachin, xpuskat tsukulh katalikgalhtawakga Biblia xtatayananin Jehová. Akxni Pedro taxtulh kpulachin, na tsukuka limakgalhtawakgakan Biblia, chu tuku katsinilh malakgpalinilh xtayat chu xlakata la xakxilha latamat. Pedro wa: «Kpaxtikatsini Jehová xlakata akgchaxan kata nema anta xakmakgtanuma nipara chatum tiku kmakgnilh. Uku klimaklakaskin espada xla xespíritu  Dios, Biblia, xlakata kkamasiyani latamanin pi tlan nalatalalinkgo chu tuku xlikana xaʼakgstitum: xalakwan xalaksasti xlakata xTamapakgsin Dios». Lhuwa talakgpalilh asta kalitachuwinalh uma tamakatsin tiku xwilakgo niku xʼama wili bomba.

¡Lu lhuwa kamakgtaya xTachuwin Dios kxlatamatkan latamanin! Tlan tlawa pi tiku tlawakgo tuku nitlan namakgxtakgkgo chu tlakg tlan nalikatsikgo. Uma liwana limasiya pi Dios tlan namakgantaxti tuku wanit natlawa, pi namasputu tuku nitlan. Chu xlakata chuna natlawa, na namasputu Akgskgawini, tiku malakatsuki tuku nitlan. Maski ni akxilhaw, Satanás wa tiku pulalima tuku tlawakgokan kkakilhtamaku. Chuna la wan Biblia, «kxlitliwakga akgskgawini wilakgo, xlipaks ntachixkuwitat» o latamanin (1 Juan 5:19). Satanás nialh makgas namasputukan chu na nakamasputukan tiku ni lakgpaliputunkgo xlatamatkan. ¡Lu lipaxuw nawan latamat anta kKatiyatni niku ni katianalh tuku nitlan!

¿Tuku talakaskin xlakata tlan naʼakxilhaw la nakgantaxtu tuku wanit Dios natlawa? Kalakapastakwi pi wa «xtamasiy Jehová» tuku kalakgpalima latamanin la uku chu wa nakalakgpali latamanin xlikalanka kakilhtamaku, kilhtamaku nema aku mima. Wa xlakata, komo wix nakatsiniya tuku masiya Biblia chu natlawaya tuku nakatsiniya chuna la tlawalh Pedro, na tlan nalatapaya kkakilhtamaku niku natawila tuku xaʼakgstitum (2 Pedro 3:13). Wa xlakata, tlakg liwana kalakgapasti Dios chu Jesucristo, xlakata wa natlawa pi nakgalhiya latamat nema ni kgalhi xlisputni (Juan 17:3).

[Notas nema wilakgo kpágina]

[Epígrafe xla página 9]

Wix na tlan nalatapaya kkakilhtamaku niku naʼanan tuku xaʼakgstitum (2 PEDRO 3:13)