¿Tuku xlakata latamanin tlawakgo tuku nitlan?

LHUWA latamanin lakpuwankgo: pi kimputumkan kgalhiyaw talakgalhin, kimputumkan tlawayaw tuku alistalh lakpuwanaw pi ni xtitlawaw. Pero, xlakata tlawakgo tuku ni xlilat, ni wamputun pi wa xlakata anan tuku nitlan. Atsinu ni putum kilhtamaku akxilhaw la lakatsalakgokan limapakgsin o kgaxmataw ktelevisión, kradio o alakatanu.

Xlikana, pi lhuwa latamanin wankgo pi wilakgolh makgapitsi limapakgsin nema chatunu chatunu nalaksakaw komo nakgalhakgaxmataw o ni. Asta putum latamanin katsikgo akxni wi tiku ni xaʼakgsaninanputun chu akxni wi tiku lakkaxwili xlakata naʼakgsaninan o akxni wi tiku tlawani tuku nitlan achatum chu ni chuna xtlawaputun chu akxni lakkaxwili wi tiku namakgni. Maski chuna, taliwakatilhama latamanin tiku chuna tlawakgo tuku lu nitlan, maski wa tiku xlakpuwanaw pi nichuna katitlawakgolh. Wa xlakata, ¿tuku tlawa pi latamanin natlawakgo tuku nitlan?

 Anta kxTachuwin Dios wan tuku xlakata latamanin tlawakgo tuku katsikgo pi nitlan. Kaʼakxilhwi makgapitsi tuku xlakata.

▪ «Taʼakglhuwit tlawa pi chatum xaskgalala chixku nialh nalakpuwan tuku natlawa.» (ECLESIASTÉS 7:7)

Biblia wan pi chuna la wi xlatamatkan latamanin wa kamatlawi tuku nipara xlakpuwankgonit natlawakgo. Wi tiku tlawakgo tuku lu nitlan xlakata lakpuwakgo pi chuna nalakkaxtlawakgo xtaʼakglhuwitkan o xlakata ni tlawamaka tuku xaʼakgstitum. Chuna la wan libro Urban Terrorism, «wantuku matlawi chatum tiku makgninan xlakata namakgapekuanan wa xlakata lu nitlan limakgkatsi xlakata nila lakgpali tuku xla política, xlakata latamanin chu xlakata tumin».

▪ «Yama wanti xman [laka]pastakmakgo nakgalhikgoy lhuwa tumin katuwa wantu lixkajnit tsukuy lakapastakkgoy.» (1 TIMOTEO 6:10, HUA XASASTI TALACCAXLAN, [1999])

Lhuwa wankgo pi asta latamanin tiku tlan likatsikgo tlawakgo tuku nitlan komo kamaxkikan lhuwa tumin. Chatum lataman tiku tlan likatsi chu xalakgalhamanina, tlan natalakgpali chu lixkajni natsuku likatsi kaj xlakata tlan natlaja tumin. Kaj kalapastakti lhuwa tuku nitlan tatlawama xlakata lhuwa tuku kgalhiputunkgo: Makgapitsi makgapekuanankgo xlakata wi tuku nakamaxkikan, akgskgawinankgo akxni tlawakgo negocios, chu wi tiku kakgalhankgo latamanin xlakata naskinkgo tumin, o asta makgninankgo.

▪ «Akxni wi tiku tlawa tuku nitlan chu ni lakapala malakgaxokgekan, wa xlakata xkamanan lakchixkuwin lakpuwankgo natlawakgo tuku nitlan.» (ECLESIASTÉS 8:11)

Latamanin lakpuwankgo pi tlan natlawakgo tuku lakaskinkgo komo niti kaʼakxilhma. Wa xlakata lhuwa latamanin lu lakapara matlawanikgo xputlawkan, copiaxtunankgo kʼexámenes, ni liwana maklakaskinkgo xtuminkan kachikin o tlawakgo tuku tlakg nitlan. Chatum lataman tiku kgalhakgaxmata limapakgsin max na natlawaputun tuku nitlan akxni akxilha pi nitu tamakgantaxtima limapakgsin o akxni ni pekuan xlakata la nakitaxtuni. Xlakata uma revista, Arguments and Facts wan: «Xlakata tiku lakatsalakgo limapakgsin ni kamalakgaxokgekan [...] uma tlawa pi amakgapitsi latamanin na natlawakgo tuku tlakg nitlan».

▪ «Chatunu [...] [«liʼakxilhkan», NM] wantu watiya xtaxkgonalakankan [o wantuku tlawaputunkgo] [...]. Wa ntaxkgonalakan; akxni wi ntu likilhtsukunit, talakgalhin nkitaxtuniy.» (SANTIAGO 1:14, 15)

Chali chali max natlawaputunaw tuku nitlan, wa xlakata max namin kilhtamaku chuna natlawaputunaw. Makgasa kawanika kstalaninanin Cristo: «Ni taji [...] [«liʼakxilhkantit», NM] mpala tu nitlan, wampi kaj xman wa lantlata talay nchatum chixku» (1 Corintios 10:13). Maski chuna, kinchatunukan nalaksakaw komo namasputuyaw o chuntiya nalakapastakaw uma tuku nitlan tlawaputunaw. Chuna la wa Santiago kstalanina Cristo anta kxcarta, komo ni kuenta natlawayaw, max wantuku tlawaputunaw “nakgantaxtu” chu nakinkamatlawiyan tuku nitlan.

▪ «Wantiku katalalin xalakgskgalalan latamanin, xaskgalala nawan, pero tiku katalalin  tiku xalaktontos nitlan katikitaxtunilh.» (PROVERBIOS 13:20)

Kuenta katlawaw xlakata latamanin tiku kinkalistilikgoyan tlan nakinkamatlawikgoyan tuku tlan chu tuku nitlan. Makglhuwa, latamanin tlawakgo tuku nitlan xlakata wa kamatlawikgo amakgapitsi o chuna la wankgo lhuwa latamanin, xlakata talalinkgolh tiku ni xlilat natalalinkgo. Xlikana, akxni katalalinkan «xalaktontos» chuna la kalimapakuwi versículo nema likgalhtawakgaw, putum kilhtamaku nitlan kitaxtu. Tlan nawanaw pi akxni Biblia lichuwinan «xalaktontos», ni wamputun tiku ni lakgskgalalan, wata wamputun tiku lakatsalakgo xtastakyaw xTachuwin Dios. Wa xlakata, maski lakgkgawasan o laklankata akinin, wa kiʼamigoskan nakatlawayaw tiku kgalhakgaxmatkgo xtastakyaw Biblia. Liwana kakatsiw, pi komo ni chuna natlawayaw “nitlan kintikakitaxtunin”.

Asta uku akxilhwi pulaklhuwa nema lichuwinan Biblia tuku xlakata latamanin tlawakgo tuku lu nitlan. Pero max akstu kinkakgalhskinkanan komo tlakg tlan natawila kakilhtamaku. Biblia nikajwatiya kinkawaniyan tuku xlakata tlawakgokan tuku nitlan; na kinkawaniyan pi namin kilhtamaku akxni namasputukan. ¿Katsiputuna uma tuku natlawa Dios? ¿Xlikana pi namin kilhtamaku akxni namasputukan tuku nitlan? Nakatsiya xtakgalhtin kʼartículo nema mima.