ORACIÓN

1 ¿Tuku xlakata natlawayaw oración?

ORACIÓN. Maski lhuwa temas anankgo kBiblia, xlakata oración wa tuku tlakg katsiputunkgo latamanin. Kʼuma revista naʼakxilhaw akgtujun takgalhskinin nema tlawakgokan xlakata oración chu takgalhtin nema masta Biblia. Artículos nema naminkgo nakamakgtaya natlawakgo oración tiku nina tlawakgo chu tiku tlawakgoya, tlakg liwana natlawakgo.

NI KATITEKGSTI akgtum kachikin o takanajla niku ni tlawakgokan oración. Wi tiku tlawakgo ksikulan, ktemplo o ksantuario chu na limaklakaskinkgo rosarios, libro xla oraciones o imágenes, maski kaj xakstukan o xlhuwakan, tlawakgo oración.

Xlakata latamanin tlawakgo oración wa tuku ni lakxtum katlawa xliputum tuku staknan kKatiyatni. Chuna la animales, maklakaskinaw liwat, chuchut chu un. Na lakachinaw, stakaw chu niyaw (Eclesiastés 3:19). Pero kajwatiya latamanin tlawakgo oración. ¿Tuku xlakata?

Xlakata maklakaskinaw. Latamanin maklakaskinkgo oración xlakata lakpuwankgo natachuwinankgo tiku kakninanikgo. Chuna la wan Biblia, kinkatlawakanitan xlakata naputsaputunaw Dios (Eclesiastés 3:11). Jesús wa: «Paxuwana lamakgo wantiku katsikgo pi lakaskinkgo tuku xla Dios» (Mateo 5:3, NM).

Wa xlakata anan lhuwa templo chu lhuwa tuku maklakaskinkgo xla takanajla chu lhuwa horas tlawakgokan oración. Xlikana makgapitsi latamanin xakstukan putsakgo tlan namakgkatsikgo o skinikgo tamakgtay atanu lataman. Pero ¿nixlikana pi nitlan makgkatsikgo akxni xakstukan tamakgtayaputunkgo o putsakgo xtamakgtay atanu lataman? Akinin ni lakgtliwakgan, ni makgas latamayaw chu ni liwana lakgapasaw kakilhtamaku. Kajwatiya tiku nikxni niy, tlakg skgalala chu lhuwa litliwakga kgalhi, tlan nakinkamaxkiyan tuku maklakaskinaw. Pero ¿tuku xlakata tlawaputunaw oración?

Akgtum liʼakxilhtit, ¿milh kilhtamaku akxni xlakaskina tamakgtay chu niti pulalin, niti maxkin tastakyaw o niti maxkin xtakgalhtin min takgalhskinin? Akxni nitlan tuku titaxtukan, la akxni niy tiku xpaxkiya, akxni xatuwa tuku nalaksaka tuku natlawaya kmilatamat o akxni tlawa tuku nitlan, ¿makgkatsinita pi ni makgtayan lakwan tachuwin nema wanika, la kstakyawapaka o akxni tapatikantita?

Pero Biblia, tlan nalipawanaw xlakata uma tema, wan pi oración wa tuku nakinkamakgtayayan. Asta limin lhuwa oraciones nema tlawakgolh lakchixkuwin chu lakpuskatin tiku ni makgatsankgananikgolh Dios chu skinkgolh xkamakgtayaka, xkapulalinka chu xkatapatika, nachuna xkakgalhtinika xalaktuwa xtakgalhskininkan (Salmo 23:3; 71:21; Daniel 9:4, 5, 19; Habacuc 1:3).

Uma oraciones wi tuku akxtum xkatlawa. Wantiku xtlawakgo uma oraciones xkatsikgo tuku xlitlawatkan xwanit xlakata xkakgaxmatnika, nema la uku nialh tatlawani kuenta: xlakan xkatsikgo tiku xtlawanikgo oración.