ORACIÓN

2 ¿Tiku natlawaniyaw oración?

UKU lhuwa latamanin lakpuwankgo pi tlan natlawaniyaw oración tiku natlawaniputunaw, xlakata Dios putum kgaxmata. Nachuna lakpuwankgo tiku wankgo pi lhuwa takanajla makxtum nakakninanikgo Dios chu tiku wankgo pi putum takanajla tlan. Pero ¿xlikana uma?

 Biblia wan pi lhuwa oraciones ni wa tlawanikan tiku lakgchan. Makgasa, akxni xtsokgmaka Biblia xkatlawanikan oración ídolos. Pero Dios makglhuwa kawanilh xkachikin pi nichuna xtlawakgolh. Anta kSalmo 115:4-6 wan pi ídolo «[...]kgalhi takgen, pero ni [...]kgaxmata». Liwana kinkawaniyan uma texto: Ni kinkamakgtayayan natlawaniyaw oración chatum dios tiku ni kgaxmata.

Xlakata tlan naʼakgatekgsaw uma talakapastakni, kaʼakxilhwi tuku lichuwinan Biblia xlakata palakachuwina Elías akxni kawanilh sacerdotes xla Baal pi xliʼakxilhkgolh tiku xaxlikana Dios: Elías xʼama tlawani oración xDios chu xlakan xʼamakgo tlawanikgo oración Baal, chu Dios tiku xkgalhtinalh wa xaxlikana. Xpalakachuwinanin Baal wankgolh pi tlan chu tsukukgolh tlawakgo oración. Lhuwa horas tlawakgolh oración, pero «niti kgalhtinalh chu niti kgaxmatli» (1 Reyes 18:29). ¿Nachuna kitaxtunilh Elías?

Nichuna: akxni tlawakgolh xʼoración, Dios makamincha lhkuyat kʼakgapun xlakata klhkuyulh xtamakamastan palakachuwina. ¿Tuku litalakgpali uma oración? Xtakgalhtin tekgsaw kxʼoración Elías nema wi 1 Reyes 18:36, 37. Kʼuma oración nema max puxamakaw tachuwin kxahebreo limaklakaskilh, makgtutu mapakuwilh Jehová, xtukuwani Dios.

Baal (nema wamputun «malana») xdioskan cananeos xwanit chu tanu tanu la xlimapakuwikgo uma dios. Pero, xtukuwani Jehová ni anan atanu tuku xtachuna, xlakata xliputum kakilhtamaku kaj Chatum tiku chuna mapakuwikan. Xla wa: «Akit Jehová. Wa uma kintukuwani; chu niti ktimaxkilh kililanka» (Isaías 42:8).

Wa xlakata, ¿tlan xlakpuwaw pi xʼoración Elías chu xʼoracionkan xpalakachuwinanin Baal watiya Dios xlakgchalh? Ni. Akxni xkakninanikan Baal xmakamastakan latamanin chu xtlawakgo talakgxtumit xalimaxana nema lixkajni xkatlawa latamanin. Pero akxni xkakninanikan Jehová tlan xwanit chu kachikin ni xkamatlawikan tuku xalixkajni. Liwana tasiya pi oración nema xtlawanikan Jehová ni wa xlakgchan Baal. Xtachuna akxni namalakgachaniya miʼamigo maktum carta nema kgalhi xtukuwani, ni katilakpuwanti pi atanu tiku nalakgchan.

Tiku tlawanikgo oración Jehová tlawanimakgolh Malakatsukina, xTlatkan putum latamanin. * Palakachuwina Isaías kxʼoración wa: «Wix Jehová, wix kinTlatkan» (Isaías 63:16). Wa xlichuwinama Jehová akxni Jesús kawanilh kstalaninanin: “Klakgama nkinTlat ntalhman, chu wixin minTlatkan, kiDios, chu wixin miDioskan” (Juan 20:17). Wa xlakata, komo Jehová xTlat Jesús, na wa Dios tiku Jesús xtlawani oración chu tiku kstalaninanin na wa xtlawanikgolh (Mateo 6:9).

Pero ¿wan Biblia pi natlawaniyaw oración Jesús, María, santos o ángeles? Ni, kajwatiya natlawaniyaw oración Jehová. Kaʼakxilhwi pulaktiy tuku xlakata. Pulana, xlakata akxni tlawakan  oración likakninankan chu chuna la wan Biblia, kajwatiya nakakninaniyaw Jehová (Éxodo 20:5). Xlipulaktiy, xlakata Jehová tiku “Kgaxmata oración” (Salmo 65:2). Xlikana, maski Dios pulaklhuwa tuku lakgayawananit, wi pulaktum tuku nitu lakgayawanama: atanu tiku nakgaxmata kiʼoracionkan.

Chuna, xlakata Jehová nakgaxmata kiʼoracionkan, talakaskin wa natlawaniyaw. Biblia wan: «Xlipaks [«tiku», NM] xmapakuwilh xtukuwini nkimPuchinakan naʼakgaputaxtuy» (Hechos 2:21). ¿Wamputun pi Dios kgaxmata putum oraciones akxni natlawanikan? ¿Wi atanu tuku talakaskin?

[Notas nema wilakgo kpágina]