ORACIÓN

3 ¿La natlawayaw oración?

BIBLIA ni lu xlakaskinka akxilha natayayaw, natawilayaw o atanu, la nachuwinanaw chu tuku namaklakaskinaw akxni natlawayaw oración, lhuwa takanajla xlakaskinka akxilhkgo. Biblia, atanu tuku lu xlakaskinka akxilha.

Biblia lichuwinan xlakskujnin Dios tiku ni makgatsankgananikgolh, lakalhuwa niku tlawakgolh xʼoracionkan chu makgapitsin takilhputakgolh, tatsokgostakgolh o atanu. Milh kilhtamaku kaj kxtalakapastaknikan tlawakgolh oración chu lakgachunin takgaxmatli tuku wankgolh. Makgapitsi talakayawakgolh chu makgapitsin takilhputakgolh. Nikxni maklakaskinkgolh imágenes, rosarios nipara libro xla oraciones. Kajwatiya wankgolh tuku xmakgkatsikgo. ¿Tuku xlakata lakgatilh Dios xʼoracionkan?

Pulana, xlakata wa Jehová tiku xtlawanikgo xʼoracionkan chuna la akxilhwi uma lu xlakaskinka. Pero 1 Juan 5:14 kinkawaniyan atanu tuku xlakata: «Na wa yuma ntalipawan ntu nkgalhiniyaw, mpi lapi wi mpala tu kskiniw, wa lantlata xtalakaskin, wa nakinkakgaxmatniyan». Chuna, natlawayaw kiʼoraciónkan chuna la xtalakaskin Dios. ¿Tuku wamputun uma?

Pulana kilikatsitkan tuku xtalakaskin Dios. Wa xlakata, xlakaskinka nalikgalhtawakgayaw xTachuwin. Xlikana, Jehová ni kinkaskiniyan pi putum nakatsiyaw tuku wan Biblia. Pero lakaskin naliskujaw naʼakgatekgsaw tuku lakapastaknit n atlawa chu natlawayaw tuku lakaskin (Mateo 7:21-23). Akxni tlawayaw kiʼoracionkan kilitlawatkan chuna la katsininitaw kBiblia.

Nachuna, akxni tlakg katsiniyaw xlakata Jehová chu xtalakaskin, tlakg staka kintakanajlakan. Uma atanu tuku lu xlakaskinka xlakata Jehová nakgaxmata kiʼoracionkan, Jesús wa: «Xlipaks wa ntu kskintit kmiʼoraciónkan, lapi nakanajlayatit, namakgamakglhtinanatit» (Mateo 21:22). Maski takanajla wamputun nakanajlaniyaw tuku ni akxilhaw ni wamputun pi akglakgwa nakanajlayaw: takanajla nema lichuwinalh Jesús wi tuku lu xlakaskinka nema tlawa pi chuna nakanajlayaw (Hebreos 11:1). Xlikana pi nila akxilhaw Jehová, pero Biblia lhuwa tuku kinkalimasiyaniyan pi lama, tlan lipawankan chu kakgalhti tiku kanajlanikgo. Xla ni lisitsi komo naskiniyaw takanajla,  wata kinkamaxkiputunan chuna la naskiniyaw (Lucas 17:5; Santiago 1:17).

Maski chuna, wi atanu tuku lu xlakaskinka xlakata Dios nakinkakgaxmatniyan. Jesús wa: «[...] [«Niti», NM] katilakgalh xaTlat lapi ni kit nkimpalakata» (Juan 14:6). Wamputun pi kajwatiya xKgawasa Dios tlan nalilakgtalakatsuwiyaw xaTlat. ¡Wa xlakata Jesús kamasiyanilh kstalaninanin pi kxtukuwani nalitlawanikgo oración Dios! (Juan 14:13; 15:16.) Pero, nalitlawayaw oración kxtukuwani Jesús ni wamputun pi wa natlawaniyaw oración. Wamputun pi katsiyaw pi Jesús tlan kinkapalakachuwinanan akxni tlawaniyaw oración kinTlatikan xalak akgapun, chatum Dios xaskulunku chu xasanto.

Makgtum, chatum kstalanina Jesús skinilh: «Kakinkamasiyuni lantla naktlawayaw nkiʼoracionkan» (Lucas 11:1). ¿Tuku xwamputun? Liwana tasiya pi xlakan xkatsikgoya la tlawakan oración. Uma limasiya pi xkgalhskininama tuku naskinkgo kxʼoracionkan.

 [Epígrafe xla página 7]

Xlakata Dios nakinkakgaxmatniyan xlakaskinka natlawayaw oración chuna la xtalakaskin, nakanajlayaw chu kxtukuwani Jesús naskinaw